Sam 107:1-43
-
La mel Chɛhowa balikaa le walta ndɔla kɔndɔfiltaŋ
107 La mel Chɛhowa balikaa, kanifuule o cho wana kɛndɛ.Kaala lo lechoo ndɔɔ cho le fɛɛŋ a fɛɛŋ.
2 Maa wanaa Chɛhowa baŋa wa dimi diomndaŋ ndaŋ,Wanaa o baŋa yaamɔɔwa o ba wa.
3 Nda o soli o lɛŋnde niŋ ni,Ba paaleŋ le chaŋ ndo a ba le del lo,Ba luaŋ ndo a ba tou wo, mbo chuuŋgiaa nda naapilɛ.
4 A wa heeloo a tuusoo o pollo niŋ,A seeluŋ chiee bɛndu nda chal te.
5 Mi yiaaŋ ma nɛi nda nduyɛ mi kolɔɔ bii nda.Ma saŋga yɔkɔɔ nduyɛ ma wou kpandeŋ.
6 Ma hiau lachi a chaŋndo naa Chɛhowa chua o nyɛpalaa nda wa niŋndo,Nduyɛ mbo soli nda o nyɛpalaa koŋ niŋ.
7 Mbo tosa ma kei o nɛi kpeekpeiyo choo,Le kɔlaŋ o chiee nda nɔ ma chal lo.
8 Maa waŋnda mel Chɛhowa balika le kaala lo lechoo ndɔɔ,Vɛlɛ a sɔɔŋ kɔndɔfiliŋ o tosa le chuauwaa ŋwaŋnda chiee woŋ.
9 Kanifuule o ke wanaa kolɔɔ bii wa mɛŋndaŋ ma kol ma hini kɔl,Nduyɛ mbo ke wanaa yiaaŋ ma wa nɛiyo wa nyɛdiaa kɛndɔɔ.
10 Apum wa o nyumma kpiŋgbiaŋ niŋ,Nduyɛ a wa saŋgaa tau o chiɛi manyumndo niŋ o yɔlɔŋ.
11 Kanifuule ma kɛɛ le nyɛ Mɛlɛka dimi wo tosaa,Nduyɛ a chɔm lebɛɛ le sila Mɛlɛka Hiou Kpou Wo ke nda wo le.
12 Mbo chɛl mi saŋgaa tual nda choo le ma tusiŋ.Ma del nduyɛ wana o wana ve le nda mala le.
13 Ma chaŋ o Chɛhowa lo le mbo mala nda o nyɛpalaa nda wa niŋndo,Nduyɛ mbo soli nda o nyɛpalaa koŋ niŋ.
14 Mbo soli nda o nyumma kpiŋgbiaŋ niŋ,Nduyɛ mbo kili yɔlɔŋ wa nda ŋ bayiaa woŋ.
15 Maa waŋnda mel Chɛhowa balikaa le kaala lo lechoo ndɔɔ,Vɛlɛ a sɔɔŋ kɔndɔfiliŋ o tosa le chuauwaa ŋwaŋnda chiee woŋ.
16 Kanifuule, o yimi yimi diola nda toosiaa a chiliŋii siaŋɛi* laŋ,Nduyɛ mbo kili kili sulukula ŋchiliŋndaŋ.
17 Ma tosa diɔmnde nduyɛ ma sɔla saŋgaa le hakila ndalaŋ,Vɛlɛ a biondɔŋnda ndalaŋ.
18 Mi nyɛdiaa fula nda iyeema po.Nduyɛ a wa niŋ o piɔmndo hɔlndɔ.
19 Mi ndaa chaŋ o Chɛhowa lo le mbo mala nda o nyɛpalaa nda wa niŋndo.Okoŋ mbo soli nda o nyɛpalaa koŋ niŋ.
20 Mi ndoo yɔŋ diomndeŋ okoŋ mbo siŋgi nda,Nduyɛ mbo soli nda o sooŋnda nda deli laŋ niŋ.
21 Maa waŋnda mel Chɛhowa balikaa le kaala lo lechoo ndɔɔ,Vɛlɛ a sɔɔŋ kɔndɔfiliŋ o tosa le chuauwaa ŋwaŋnda chiee woŋ.
22 Maa a soli salala balika melaa laŋ o ndu lo,Nduyɛ ma soo a walta ndɔlaŋ okɔɔ a kɔl kɛndɛ bɛndoo.
23 Wanaa kua o dɛndɛla mamɛŋndaŋ niŋ o mɛŋma ihɛllaŋ choo wa,A wanaa yɔɔya o mɛŋma bɛnduaŋ choo wa,
24 A che niŋ walta Chɛhowa laŋ,Vɛlɛ a nyɛm kɔndɔfiliŋ o toosiaa miŋ wa o mɛŋndaŋ bɛŋgu woŋ.
25 A che niŋ mɛɛ o tosa mi hueiyii bɛnduei suŋgu o mɛŋma ihɛllaŋ choo,Nduyɛ mi ma wa hiilɔŋndo iyokpaŋ yokpaŋ nde yɛ.
26 Mi ma heelu nda choo choo,Nduyɛ mi ma tusi nda lebɛŋgu.
Mi kɔltaŋ la laasiaŋ nda le kpundɛ bɛndu wa nda komallo wo.
27 Mi hɔlla hiŋnuŋ nda naŋ chaa wana kolaa mamuɛiyo ni,Nduyɛ mi taasi nda nɔ a mɛŋndaŋ okɔɔ wo simnuŋ nyɛ fondoo fuu.
28 Okoŋ ma chaŋ o Chɛhowa lo o nyɛpalaa nda wa niŋndo,Nduyɛ mbo piŋi nda o nyɛpalaa koŋ niŋ.
29 Mbo kpaa hueiyii bɛnduei,Nduyɛ mi mɛŋma ihɛlma wa hiilɔŋndo iyokpaŋ yokpaŋ nde waŋ ma sim yi.
30 Ma naŋ kɔl te mɛŋndaŋ ma pɛŋgi pɛ hiilɔŋndo,Nduyɛ mbo kuɛ a nda o fondaŋ nda yeema simndaŋ ndo.
31 Maa waŋnda mel Chɛhowa balikaa le kaala lo lechoo ndɔɔ,Vɛlɛ a sɔɔŋ kɔndɔfiliŋ o tosa le chuauwaa ŋwaŋnda chiee woŋ.
32 Maa a lisa ndu te waŋnda chuuŋgiaŋ pɛ kunda bɛndoo,Nduyɛ ma saŋgala ndu te waŋ banaa chuuŋgiaŋ pɛ naapilɛ le bɔŋaŋndo biyɔɔ.
33 O tosa mi peelaŋ la simnuŋ lɛŋnde vesɛileŋ,Nduyɛ mi peela pɔmbɔlaŋ la vela sɛɛŋ.
34 O tosa mi lɛŋnde tɔlɔɔlaŋ la naŋ ndeŋ le simnuŋ lɛŋnde ihɛlteŋ,Le dɛnɛ wɔɔŋ wanaa cho ichali lechoo wa.
35 O tosa mi lɛŋnde polteŋ le simnuŋ fondaŋ mɛŋndaŋ ma chal lo,Nduyɛ mi peela pɔmbɔlaŋ la tiu o lɛŋnde vesɛileŋ niŋ silɔ.
36 O tosa mi wanaa yiaaŋ ma cho nɛiyo wa chal loŋ,Le halikpeŋ ma kila chiooŋ ma chal leniŋ.
37 Ma tosa chiɔɔŋ nduyɛ ma tɔl kpelela makilepiilaŋ,Le mi la wa kɔmndeŋ.
38 Mbo duau nda sala nduyɛ ma kui tau tau.O chɛl mi nauwaa ndaa dɔɔnaŋ te.
39 Kɛ a koŋ kpou, mi nyɛpalaa nda wa nda tusioo choo wo,Kpundɛla wa nda komallo laŋ, a mɔnɛi nda wa biyɔɔ ve tosa ma dɔɔnaŋ nduyɛ ma sɔla bɛɛla tambɛilaŋ.
40 Mbo tusi laŋgbaa kalla siɔmbulaŋ,Nduyɛ mbo tosa ma wa heeloo a tuusoo o pollo niŋ.
41 Mbo manda wanaa bala fonduaa cho o nyɛkindilaa bɛŋgu wa,Nduyɛ mbo tosa mi yuŋgula ndalaŋ la kui mɛɛ saa kui nuaa yɛ.
42 Te wanaa cho sakpo wa che pɛ hei, ma dɔɔnuŋ nyaale.Kɛ mi wanaa cho sakpo le wa kpou mei doŋ.
43 Wana o wana nɔ pɛ taasioo o cho kɔllo handɔɔ o sɔɔŋ muŋ choo,Nduyɛ mbo yiyaŋ nyɛkɛndɛi a sɔɔŋ Chɛhowa tosa le kaala lo lechoo ndɔɔ chɔmndo woŋ.
Tɛɛsiaalaŋ
^ Ɔɔ “kapaa.”
