Sam 109:1-31
O wana sim lachi le chondei yo lo. Chondii Deeve ve.
109 Oo Mɛlɛka ya saŋgala wo, yandii meinuŋ kpili le.
2 Kanifuule wanaa dɛnɛ wɔɔŋnda a wanaa hui waŋnda wa kumbi sondola ndalaŋ le ya chiŋalaŋndo.
A cho choolaŋ dimioo a ya okɔɔ.
3 A balu ya silɔ ma wa diomnda wɔɔŋndaŋ dimioo,Nduyɛ ma chiŋalaŋ ya o fondo fuuwo choo.
4 I chɔm nda kaalaa, mi nda wa ya fafaŋndo,Kɛ I cho hiouwɔɔ lachi a piɛileŋ.
5 Te I tosal nda o kɛndɔɔ pɛ, a miŋgul la a o wɔɔŋndo.Nduyɛ te I kaala nda pɛ, a tul la leyɛ.
6 Yulu wana dɛnɛ wɔɔŋndo iso, mbo wa nda choo masa.Maa wana simul ndu wo sim o ba ndɔ kɛndɔɔ choo.
7 Te a kɔɔsa a ndu pɛ, maa a yaala ndu.Maa piɛile ndɔleŋ bɛɛ le simnuŋ hakioo.
8 Maa palɛi o cho yoomu ve dɔɔnaŋ,Nduyɛ mi wana cheleŋ miiŋgu o foofo o nɔ le chilaŋ chuaa wo.
9 Maa chuauwaa nduaa* simnuŋ viiyaa nɔ finya le wa,Nduyɛ mi laa ndɔ simnuŋ wana lanɔ vii pɔnɔɔ wo.
10 Maa chuauwaa nduaa* simnuŋ wanaa balu piɛileŋ nda,Ma lo o chiɛila ndala tambɛilaŋ niŋ ma kei nyɛdiaa nuuviaa.
11 Maa wana o bii kuoo o ba wo poondiaa nyɛ o nyɛ o nɔ,Nduyɛ mi wanaa lekaawa kuɛŋnuŋ a nyɛm ndɔŋ.
12 Maa wana o wana tosal ndu ikɛndɛ le,Nduyɛ maa wana o wana tuiinuŋ chuauwaa nduaa viiya inyiɛɛ le.
13 Maa chuaa nduaa mamaa chuu paku,Nduyɛ mi diola ndalaŋ la wɔɔsuŋ le fɛɛŋ a fɛɛŋ.
14 Maa Chɛhowa loonuŋ a biondɔŋ finyaa nduaa mamaa tosa wo okɔɔ.Maa o wɔɔsuu haki kala ndɔ wo le.
15 Maa Chɛhowa wa loonɔŋndo teleŋ o teleŋ a nyɛ nda tosa wo okɔɔ,Nduyɛ mbo tosa mi waŋnda puɛɛnuŋ a nda okɔɔ o lɛŋndeŋ choo.
16 Kanifuule o loonuŋ le wana ikɛndɛ tosal te,*Kɛ mbo hiau lachi a wana cho o nyɛkindilaa bɛŋgu wo, wana bala fondoo, a wana kɔl tambɛiyo kiltaŋ kɔɔliLe ndu diyɔɔ.
17 Sendila ndoo handu chaanda choo laŋ, laŋ la miiŋgu ndu choo ni.Ndoo nɔ iyeema le waŋnda sala dɔwɔɔ le. Le hei, ndu bɛɛ sɔla sala le.
18 Mi sendilaŋ la kumbu ndu kpu maa doma o wounuŋ ndo.
Mi la choŋ ndu choo maa mamɛŋ,Nduyɛ mi la luɛi ndu o paalaŋ niŋ maa machuɛi.
19 Maa sendilaŋ la sayiaŋ ndu mɛɛ o sayiaŋ nuaa kolaa yɛ,Nduyɛ mi la wa ndu la yiinaŋ o chaŋ teleŋ o teleŋ maa leyau.
20 Nyɛ Chɛhowa cho tosa a wanaa cho ya simullo,Vɛlɛ a wanaa cho sɔɔŋ wɔɔŋndoŋ dimioo a ya okɔɔ wa wo cho hoo ni.
21 Kɛ num Chɛhowa, Mɛlɛka Kpuluŋguma Bɛndoo,Suŋgu le ya le sabu diola numndaŋ.
Piŋi ya, kanifuule kaala lo lechoo numndo naŋ bɔɔ.
22 Wana bala fondoo ya cho ni, nduyɛ I nɔ wana malaa le.Nyɛ nɛiyaa cho ya o kɔllo niŋ.
23 Yoomu nuu cho ko mɛɛ wunduleŋ le keleŋa nuaa lo yɛ.A hiiluu ya woku woku mɛɛ nda hiiluu nuaa soonuaa yɛ.
24 Wulaŋ la cho ya nyiiyaa a yima cho ya nɛiyo waŋ.I nyau mi simnuŋ paalaŋ kposoŋ.
25 I simnuŋ nyɛ mamaa waŋnda o hɔl.
Te a che ya pɛ, a hiiluu bolle.
26 Oo Chɛhowa Mɛlɛka nuu, mala ya.Piŋi ya a kaala lo lechoo numndo.
27 Maa a sina maa num Chɛhowa,Num soliŋ ba numndo kpeku ni le ya piŋioo.
28 Maa a handu ya sendioo choo, kɛ mi num dɔu ya sala.
Te a chɛŋ pɛ le ya chiŋalaŋndo, maa siɔmbulaŋ la bii nda,Nduyɛ ma tosa mi buɛi numndo dɔɔnuŋ nyaale.
29 Maa bɛɛla tambɛilaŋ la kumbu wanaa simul la wa kpu,Nduyɛ mi siɔmbulaŋ la sayiaŋ nda maa kola.
30 I cho Chɛhowa saŋgala o chondoŋ niŋ.I cho ndu saŋgala wanaa bɔɔbɔɔ o hɔl.
31 Kanifuule o cho wa isisi o ba kɛndɛ wana bala fondoo choo,Le mbo piŋi ndu wanaa kilul ndu yamɛi le ndu diyɔɔ wa o ba.
