Sam 132:1-18
Chondii Wanaa Cho Helɔɔ Chiee Wa.
132 Oo Chɛhowa, loonuŋ a DeeveVɛlɛ a sɔɔŋ palaŋ cho ndu choo woŋ kpou.
2 Num Chɛhowa, Mɛlɛka Kpaaya Bɛndu Chekɔpu wo,Loonuŋ maa mbo mɛnaŋ po naa num chua aa:
3 “I miiŋgu o ya lo chiɛiniŋ te.
I hel o kpele nuu choo mi hini le.
4 I cho chɛlɔɔ mi lɔl te,Kɛlɛŋgaa niŋ te mi kumbu hɔlteŋ,
5 Haaa mi saaluŋ fondaa le Chɛhowa,Chiɛi kɛndɔɔ* le Mɛlɛka Kpaaya Bɛndu Chekɔpu Wo.”
6 Miŋ tuɛi a ndu okɔɔ o Ɛfiluata niŋ,Nduyɛ miŋ saaluŋ ndu o bundɔɔ niŋ.
7 La ŋ kɔŋnuŋ o chiɛi ndɔɔ* niŋ,Miŋ baŋ wulaŋ nyɛ ndɔ kɛsiaa ŋpeloo lachi.
8 Oo Chɛhowa, chɔŋ ma kuɛ o fondaŋ num pɛŋgiaa,A kɔfu num chɔm maa a nɔ kpaayaa wo.
9 Maa wanaa num aa soliaa lasalaa chuɛɛnuŋ sakpoyɛi,Nduyɛ mi wanaa chɔm lo lechoo wo o numndo wa deŋi choo choo a nyaaloo.
10 Le sabu Deeve buɛi numndo,Kɛɛ wana ŋ pɔya wo le.*
11 Mi Chɛhowa mɛnaŋ o Deeve lo,Nduyɛ o cho nyɛ o chuel ndu buŋgɛi yo tosa. Mbo dimi aa:
“I cho wana pilɛ o chuauwaa numnda tɛɛŋ,Kɛsi o kpeŋgbei* num lemasaa choo.
12 Te puaa numnda lo pɛ o kpema nuu choo,Vɛlɛ a loonɔŋnda ya pɛɛku nda laŋ,Nda bɛɛ puaa ndaaCho hunɔɔ ichali o kpeŋgbei num lemasaa choo le fɛɛŋ a fɛɛŋ.”
13 Kanifuule Chɛhowa hɛli Saayɔŋ.O yeema mbo wa fondaŋ ndɔ o chal lo. Mbo dimi aa:
14 “Fondaŋ ni chalaa cho wa hoo ni le fɛɛŋ a fɛɛŋ.Nanuŋ ya cho wa ni, kanifuule yeemɛi nii cho hei ni.
15 I cho ndu salaa dɔwɔɔ tau mbo sɔla nyɛm o yeema woŋ.I cho wanaa bala fonduaa cho loŋ nda nyɛdiaa* ke ma hini kɔl.
16 I cho wanaa soliaa lasalaa o Saayɔŋ niŋ piŋi,Nduyɛ mi wanaa cho loŋ ma chɔm lo lechoo wo wa deŋi choo choo a nyaaloo.
17 Loŋ ya cho tosa ni mi Deeve hiou lachi a kpaayaa* sɔlaa.
I bɛɛndiaa nyɛ teŋgaa le wana ni ya pɔya wo.
18 I cho yaamɔɔwaa nduaa simbul a siɔmbulaŋ maa kola,Kɛ mɔsil lemasa cho ndu o lebol lo cho hiouwɔɔ lachi a diondɔɔ.”
Tɛɛsiaalaŋ
^ Ɔɔ “Chiɛi bɛndoo.”
^ Ɔɔ “chiɛi ndɔ bɛndoo.”
^ Hibuluiye, “Mulul wana ŋ pɔya wo kɔɔ le.”
^ Ɔɔ “kpɛŋɛ.”
^ Hibuluiye, “beediiyo ɔɔ buloo.”
^ Hibuluiye, “lioo.”
