Sam 140:1-13
Le wana sim lachi le chondei yo. Chondii Deeve ve.
140 Oo Chɛhowa, piŋi ya wanaa dɛnɛ wɔɔŋnda o ba.Manda ya wanaa kaala sɔŋgɔlaŋ nda o ba,
2 Wanaa kɛɛsiaŋ sɔɔŋ wɔɔŋndoŋ o lakɔl,Nduyɛ ma kei sɔŋgɔlaŋ mɛlioo lepaa o lepaa wa.
3 Sondolaŋ la luɛi nda naŋ chaa sondola kɛuwa ni.Nduyɛ, lolo hɔɔlɔɔ cho nda o tiuwaa o ŋ chɔchɔ. (Sila)
4 Oo Chɛhowa, manda ya wanaa dɛnɛ wɔɔŋnda o ba.Manda ya wanaa kaala sɔŋgɔlaŋ nda o ba,Wanaa kɛɛsiaa le ya peloŋ basɔɔ wa.
5 Wanaa heelaŋnda yeŋ ya yaŋɔɔleŋ.A baa yalaa o nɛi ya keiyo choo.
A yeŋ ya yaŋɔɔlaŋ. (Sila)
6 Mi dimul Chɛhowa aa: “Num cho Mɛlɛka nuu ni.
Oo Chɛhowa, yaŋ nilaŋ o piɛile ya cho naa num chua le malaa leŋ.”
7 Oo Chɛhowa Mɛlɛka Kpuluŋguma Bɛndoo, wana ni Piŋiaa,Num manda ya bolleŋ ni a teleŋ chɔuwo.
8 Oo Chɛhowa, chɛl mi wanaa dɛnɛ wɔɔŋnda sɔla nyɛ nda yeema wo le.
Chɛl ma sɔla batiuwaa o kɛɛsiaala ndala wɔɔŋndaŋ niŋ te, yɔŋii nda heelu pɛɛŋndaŋ.
9 Maa sɔɔŋ wɔɔŋ wanaa balu ya wa cho dimioo woŋKumbu nda bolle kpu.
10 Maa dɛŋgultaŋ la chuchuŋ nda choo.
Maa a viou nda o yiŋndeŋ niŋ.A mal nda o sooŋ yiŋgilɛi bɛndoo niŋ, fɛɛŋ bɛɛ a nɔla lɛ ma chɛŋ te.
11 Maa wanaa tɛɛmbuu chaanda tɔɔ wa sɔla fondaŋ chalaa o lɛŋndeŋ choo le.
Maa sɔɔŋ wɔɔŋndoŋ komal wanaa kaala sɔŋgɔlaŋ nda, ma sɔla piɔmndo.
12 I sina maa Chɛhowa cho suŋgɔɔ le wana nɔ wana malaa le wo,Nduyɛ mbo kilul wana bala fondoo yamɛi o nɛi sakpoo choo.
13 A tonya, wanaa cho sakpo wa cho diola numndaŋ saŋgala,Nduyɛ mi wanaa kɔlta ndalaŋ la cho sakpo wa, a wa num lachi teleŋ o teleŋ.