Sam 20:1-9
-
Pioŋɔɔ le masa Mɛlɛka pɔya wo
-
Waŋnda apum nyɛla nyaanaŋnda suaa naŋ ndaŋ a suaa nda tiindaŋ ni, ‘kɛ naa naa, o diola Chɛhowa laŋ niŋ naŋ tiindaŋ ni’ (7)
-
O wana sim lachi le chondei yo lo. Chondii Deeve ve.
20 Maa Chɛhowa muli piɛile numndeŋ o teleŋ nyɛpalaa niŋ.
Maa diola Mɛlɛka Chekɔpu laŋ la manda num.
2 Maa o yɔŋgu num malaa naa o cho o fondaŋ ndɔ diandaa wa,Nduyɛ mi mala ndɔɔ fula Saayɔŋ le num.
3 Maa o loonuŋ a salala numndaŋ kpou.Maa o chɛl chuɛima salala numnda luamaa laŋ. (Sila)
4 Maa o peelu yeemaŋ kɔl numndoŋ,Nduyɛ mbo tosa ma sɔla batiuwaa o tuula numndaŋ niŋ kpou.
5 Ŋ cho deŋi choo choo kpeleŋ a walta numnda piŋiaa laŋ okɔɔ.Ŋ cho diola Mɛlɛka naa saŋgala.
Maa Chɛhowa muli sɔɔŋ ŋ nyuna ndu woŋ kpou.
6 I sina niŋ kɛsɛ maa mi Chɛhowa piŋi wana o pɔya wo.
Mbo muli piɛile ndɔleŋ naa o cho o fondaŋ ndɔ diandaa o choo choo niŋnda.Mbo piŋi ndu a kpaaya ba ndɔ kɛndɔɔ.
7 Waŋnda apum tiindaŋ nyɛla nyaanaŋnda suaa naŋndaŋ. Apum yɛ, suaa nda tiindaŋ ni.Kɛ naa naa, o diola Chɛhowa Mɛlɛka naa niŋ naŋ tiindaŋ ni.
8 A yem nda nduyɛ ma del.Kɛ naa naa, ŋ miiŋgu chɔnɔŋ miŋ sim yi.
9 Oo Chɛhowa, piŋi masaa!
O cho piɛile naaleŋ tueiyɔɔ o paale naŋ cho ndu nyuna le malaa leŋ choo.
