Sam 22:1-31
O wana sim lachi le chondei yo lo. A “Nyɛchaa Kial Laandu Paale Siaa”* okɔɔ. Chondii Deeve ve.
22 Mɛlɛka nuu, Mɛlɛka nuu, le yɛɛnɛ ŋ mallɛ ya?
Le yɛɛnɛ ŋ kuɛŋnuŋ yɛ ya levil,Mi wa koŋullo a nyɛ nɛiyaa a piŋi ya le?
2 Mɛlɛka nuu, I niilu num veeloo kpɛŋ, nduyɛ mi lɔl num veeloo pii pii,Kɛ a mulul la le.
3 Mɛlɛka diandaa ŋ cho ni.Saŋgala Isɔluɛiya cho numndo cho num o balaa silɔ.
4 Mi finyaa naa duau tiindaŋndo o num niŋ.Ma tiindaŋ num, nduyɛ ma hiau lachi a nda piŋioo.
5 Ma chaŋ naa num chua, ma piŋi nda.Ma duau tiindaŋndo o num niŋ, nduyɛ a hui nda* le.
6 Kɛ ya ya, dɛloo ya cho ni, I cho wanachiee le.Puaa cho ya mamɔɔ nduyɛ mi waŋnda chua ya chɔdɔ.
7 Wana o wana che ya pɛ, o mam ya.Ma nyiu ya nduyɛ ma hiŋ bolleŋ o ya pɛɛsaa niŋ.
8 “Chɛhowa o tiindaŋ ni. Maa o piŋi ndu fɔ!
Maa o piŋi ndu, kanifuule o cho bɔɔ o sɔvɛ le ndu!”
9 Num soli ya o demboo niŋ ni.Num tosa ni mi waŋnuŋ yɛlɛkɛlɛɛ o mɛɛma kala nuu bɛŋgu, nyɛ o nyɛ yɔŋnuŋ ya le.
10 I wa o lende, mi wa o yɔŋgaŋ o numndo le ya mandaa.Teleŋ ya wa bɛɛ o dembe kala nuu niŋndo, num wa Mɛlɛka nuu ni.
11 Kua ya landaŋ te, kanifuule kpundɔɔ cho ya kpɛɛluŋ,Nduyɛ I nɔ wana o wana cheleŋ le ya mala le.
12 Nauwaa fɔŋnduaa kunda bɛndoo balu ya.Nauwaa kpaayaa bɛnduaa o Baasiaŋ niŋ balu ya silɔ.
13 A kuumbuu sondola ndalaŋ wakpa le ya chiŋalaŋndo,Mɛɛ kpɔkuŋndo* wa nuaa pɛɛliaa o nyɛ ndɔ diaa choo le ndu sɛɛsiaa yɛ.
14 A chuiŋi ya lɛŋ maa mamɛŋ.Paala nilaŋ kpou la faŋaŋ o boondoŋ.
Kɔl nuu simnuŋ maa waa malɛ,Nduyɛ o teŋga ya niŋ di.
15 Kpaaya bɛɛ I nɔ lɛ le, nduyɛ I cho o yomiɛi kpou maa kpɛɛnɛi puulu.Diɔɔmule nileŋ le holnuŋ kandu ŋchiŋndo.A cho ya tusioo o sooŋndo niŋ le mi sɔla piɔmndo.
16 Tuŋnda balu ya.A luei ya o piŋndo niŋ mɛɛ wana luɛi nuaa wanaa dɛnɛ wɔɔŋnda tɛɛŋ yɛ.A tiu ya o balaŋ a o peloŋ maa kpɔkuŋ.
17 I nɔla mi chɔm paala nilaŋ kpou.
A cho ya nuaa siaŋ.
18 A piɔuviaŋ nyɛla nilaŋ,Nduyɛ ma wuu kooŋ le laŋ.
19 Kɛ num Oo Chɛhowa, kua levil a ya le.
Num cho yoomuma niaŋ ni. Yandii mala ya chɔ chɔ.
20 Piŋi ya yɔŋii nda dii ya a muɛi faŋnde.Piŋi yoomu nuu tuŋnda o ba.
21 Piŋi ya kpɔkuŋndo o sondo, vɛlɛ a leela chiiyo.Tuei piɛile nileŋ, nduyɛ ma chiindiaa ya.
22 I cho puaapiliaa niaa dimul a diola numndaŋ okɔɔ,Nduyɛ mi saŋgala num o chondoŋ niŋ kundaa tɛɛŋ.
23 Nya nɔ siooŋii Chɛhowa ve wa, la saŋgala ndu!
Nya chuauwaa* Chekɔpu wa, la piɛi ndu!
La ke ndu bɛɛleŋ nya chuauwaa* Isɔluɛiya kpou.
24 Kanifuule o pɛɛsa wana cho o saŋgaa niŋndo ɔɔ mbo chua ndu maa nyɛ wɔɔŋ te o cho le.O mulul ndu kɔɔ le.
Nduyɛ te o chaŋ pɛ naa ndu chua le malaa, mbo tuei ndu diom.
25 I cho num saŋgala o kunda bɛndu wanaa cho num piɛiyo wa tɛɛŋ.I cho buŋgaŋ ya chua woŋ peelu wanaa nɔ siooŋii nduɛi ya tɛɛŋ.
26 Wanaa tusiaŋnda cho dio ma hini kɔl mɛɛ.Wanaa cho Chɛhowa nuuviaa wa cho ndu saŋgala.
Maa la tuei yoomoo yeela lefafɛɛŋ fɔ!*
27 Waŋnda o chieeŋndo choo kpou cho loonɔŋ a Chɛhowa, nduyɛ ma muliŋ o ndu lo.
Yuŋgulaŋ o kaalaŋ niŋ kpou cho ndu wulaŋ beŋ.
28 Kanifuule le Chɛhowa masaleŋ le cho ni,Nduyɛ o cho masaa kaalaŋ kpou choo.
29 Wanaa pɛlnuŋ ladio o chieeŋndo choo wa* kpou cho nyɛdiaa dio, nduyɛ ma beŋ ndu wulaŋ.Wanaa cho kɔlaŋ o puuloo niŋnda kpou cho ndu wulaŋ beŋ.Wana o wana nɔla mbo piŋi yoomu ndɔ ndupilaa le.
30 Chuauwaa ndaa mamaa* cho ndu piɛi.A cho wanaa cho hunɔɔ wa o chilaŋ niŋnda dimul a Chɛhowa okɔɔ.
31 A cho hunɔɔ isɔɔ a sakpoyɛi nduɛi okɔɔ.
Wanaa cho violɔŋ o chilaŋ niŋnda bɛɛ, a cho nda dimul a sɔɔŋ o tosa woŋ okɔɔ.
Tɛɛsiaalaŋ
^ Naapum o sim, chomul nyɛchaa.
^ Ɔɔ “a tusi nda lasiɔmbu.”
^ Ɔɔ “yalakanaa.”
^ Hibuluiye, “kulle.”
^ Hibuluiye, “kulle.”
^ Hibuluiye, “Maa kɔlta nyalaŋ la wa yoomu.”
^ Hibuluiye, “Wanaa chelulɛiya.”
^ Hibuluiye, “Kulle.”
