Sam 27:1-14
Chondii Deeve ve.
27 Chɛhowa cho paŋgele nuu a wana chiindiaa ya wo ni.
I nɔ siooŋii wana o wana le.
Chɛhowa cho naa niaa viaŋnaŋnda ni.
I nyiiya wana o wana lachi le.
2 Te wanaa dɛnɛ wɔɔŋnda chiŋalaŋ ya pɛ le ya tɛɛmbuuwo,Yaamɔɔwaa niaa boŋi ni ma deli.
3 O yɔŋ bɛɛ mi puaa chɔuwa balu ya,Siooŋii bii ya le.
O yɔŋ bɛɛ mi waŋnda chiŋalaŋ ya a chɔuwo,A koŋ kpou, I cho lo o tiindaŋ nuu choo.
4 Nyɔɔ ndupilɛ kpe ya cho Chɛhowa nyunaa le ndu ni,O ya cho nuuviaa wo.Ndu cho ni, le mi wa o chiɛi Chɛhowa wo niŋ palɛi ya cho wa yoomu ve kpou,Mi wa naŋɔɔ Chɛhowa wo mɛɛndaŋndo,Nduyɛ mi chɔm balika melaa le chiɛi ndɔɔ.
5 Kanifuule o cho ya vioŋɔɔ o fondaŋ ndɔɔ o paale kpundɛ leŋ choo.O cho ya vioŋɔɔ o fondaŋ yololiɔɔ o tɛndii ndɔɔ niŋ,Nduyɛ mbo heelu ya tema o pouwo choo.
6 I yem yaamɔɔwaa niaa balu ya wa.I cho salalaŋ soli o tɛndii ndɔɔ niŋ a kɔl kɛndɛ bɛndoo.I cho chondoŋ soli* le Chɛhowa saŋgalaa.
7 Oo Chɛhowa, yaŋ ya nilaŋ, ma tuei chaŋ ya cho wo.Tuiinuŋ ya inyiɛɛ, ma muli piɛile nileŋ.
8 Kɔl nuu tosa mi loonuŋ a nyɛ ŋ dimi wo. Ma dimi aa:
“La nuuviaa hɔlaa niaa le mi la che nda.”
Oo Chɛhowa, I cho hɔlaa numnda nuuviaa le mi che nda.
9 A yandii, viŋ ya hɔlaa numnda le.
Tosa mi buɛi numndo mulul num kɔɔ le mɛɛ ŋ dɔɔnuŋ tumbe yɛ le.
Num cho wana mala ya wo ni.A yandii, kɛɛ ya ɔɔ ma mal la le. Num cho Mɛlɛka piŋi ya wo ni.
10 O yɔŋ bɛɛ mi finya nuu a kala nuu mal la,Chɛhowa cho ya chua.
11 Oo Chɛhowa, pɛɛku ya nɛila numndaŋ.Tosa mi kuɛ o nɛi sakpoo choo, le halikpeŋ mi simul yaamɔɔwaa niaa.
12 A yandii, mal la yaamɔɔwaa niaa o ba le,Kanifuule seiyaa lakafaa chɛŋ ma chiŋalaŋ ya.Nduyɛ a cho ya kɔŋgɔlaŋndo a kɔl tuu bɛndoo.
13 Te yaa nɔ laalaŋndo le, kuɛɛ kpeekpei ya wa yɛ wa,Le mi che sɔɔŋ kɛndɛŋ Chɛhowa tosa o lɛŋnde wanaa cho yoomu wa niŋndo?
14 Tiindaŋ Chɛhowa.Nɔ kɔl simulaa nduyɛ ma kendu ŋdial.
A tonya, tiindaŋ Chɛhowa.
Tɛɛsiaalaŋ
^ Ɔɔ “nyɛchaa lɔɔ.”
