Sam 31:1-24
O wana sim lachi le chondei yo lo. Chondii Deeve ve.
31 Oo Chɛhowa, o numndo ya viaŋnuŋ ni.
Maa fɛɛŋ bɛɛ siɔmbula bii ya le.
Piŋi ya le sabu sakpoyɛi numnde.
2 A yandii yaŋ ya nilaŋ.
Huŋ chɔ chɔ le ma piŋi ya.
Simnuŋ fondaŋ viaŋnaŋndo o pembei le ya,Fondaŋ kala kala piŋi ya wo.
3 Num cho pou kpoowa nuu a naa niaa viaŋnaŋnda ni.Le sabu diola numndaŋ, a cho ya nɛiyo chɔm, nduyɛ ma manda ya.
4 A cho ya soli o yala nda hendul la sɔɔsɔɔ wo niŋ,Kanifuule num cho wana manda ya wo ni.
5 I mal num yoomu nuu o ba.
Oo Chɛhowa, Mɛlɛka tonyaa, num piŋi ya ni.
6 I tul wanaa yɔŋguŋ le piɔmaa fonduaa sooluuwo wa leyɛ.Kɛ ya ya, Chɛhowa ya tiindaŋ ni.
7 I cho nyaale dɔɔnɔŋ tau le kaala lo lechoo numndo.Kanifuule a che kɔl ni saŋgɛiyo,Nduyɛ a sina nyɛ kindilaa kala kala cho ya choo wo.
8 A mel la yaamɔɔnɔ nuu o ba le,Kɛ ma tosa mi sim o fondaŋ nyɛ o nyɛ yɔŋnuŋ ya le wo.
9 Oo Chɛhowa, tuiinuŋ ya inyiɛɛ, kanifuule I cho o nyɛ kindilaa bɛŋgu.
Hɔltaŋ la yɔŋnuŋ ya yifidii a nyɛpalaa cho ya choo wo, nduyɛ mi dialuŋ nuŋ kpou nyɔfɔliaa.
10 Yoomu nuu cho o piaa cha a nyɛ kindilaa.Nduyɛ wɔsila nilaŋ kpou, I cho kuŋndo a nyɛ nɛiyaa.
Yoomuaŋ ma chuu ya fo le haki nuu.Nduyɛ paala nilaŋ bɛɛ, la nɔ lɛ mayoomu le.
11 Yaamɔɔwaa niaa kpou cho ya nyiuwo,O bii fau wanaa naŋ chiɛɛliaŋ nda.
Nduyɛ wanaa ya sina wa bɛɛ, a wo ya.Te a che ya pɛ o faŋgaa tɛɛŋ, a nyaanuŋ ya.
12 A puɛɛnuŋ a ya pɔli naŋ chaa wana vilɛiyo ya cho ni.I simnuŋ maa kpɛɛnɛi piɔlɛi.
13 I tuei niŋ inyiimu nyiimui wanaa dɛnɛ wɔɔŋnda cho a ya okɔɔ wo tau.Siooŋnde cho ya, kanifuule a cho ya a balaa silɔ.
Te nda kpou chuuŋgiaŋ pɛ naapilɛ,A kɛɛsiaa le ya diyɔɔ.
14 Kɛ ya ya, num ya tiindaŋ ni Chɛhowa.
Mi wa dimioo aa: “Num cho Mɛlɛka nuu ni.”
15 Palɛi* nii i cho num o ba.
Piŋi ya yaamɔɔwaa niaa a wanaa cho ya nyɛpalaa tusioo choo wa o ba.
16 Tuiinuŋ buɛi numndo inyiɛɛ,
Ma piŋi ya a kaala num lo lechoo wo.
17 Oo Chɛhowa, te I veelu num pɛ, yandii tusi ya lasiɔmbu le.
Maa tusi wanaa dɛnɛ wɔɔŋnda siɔmbulaŋ,Ma mei doŋ o Sɛiyo* niŋ.
18 Maa wanaa dimi choolaŋ nda nɔ nyɛ o nyɛ le dimi le,Wanaa suaa a wanaa sakpuaa okɔɔ a yoŋga, nduyɛ ma tul nda leyɛ wa.
19 Oo Mɛlɛka, kɛndɛi numnde cho bɔɔ!
A manda ndi le wanaa nɔ siooŋnde le num nda.A chɔm ndi o wanaa huŋ naa num chua le vioŋnɔŋndo wa lo waŋnda kpou o hɔl.
20 A cho nda vioŋɔɔ num ikɛi o fondaŋ num sɔɔsɔɔ wo,Le wanaa tuu sɔɔŋ wɔɔŋndoŋ le nda wa.A cho nda vioŋɔɔ o fondaŋ numndo,Yɔŋii wanaa dɛnɛ wɔɔŋnda chiŋalaŋ nda.*
21 Maa Chɛhowa sɔla saŋgalaa.Kanifuule o chɔm ya kaala lo lechoo ndɔɔ o nɛi kɔndɔfili niŋ, o chiee yaamɔɔwa luei o piŋndo niŋndo.
22 Kɛ ya ya, mi yɔŋnuŋ pulaŋ pulaŋ, mi dimi aa:
“I cho piɔmndo sɔla num lachi.”
Kɛ mɛɛ ya chaŋ naa num chua le malaa, ma tuɛi ya diom.
23 Nya wanaa cho lo lechoo wo chɔmndo o Chɛhowa lo wa kpou, la kaala ndu!
Mi Chɛhowa manda wanaa chɔm lo lechoo wo o ndu lo wa.Kɛ wanaa heelaŋnda nda, mbo tusi nda nyɛpalaa bɛndoo choo.
24 Nya wanaa cho Chɛhowa chumndo wa kpou,La nɔ kɔl simulaa, nduyɛ mi la kendu ŋdial.
Tɛɛsiaalaŋ
^ Hibuluiye, “Boonduŋ.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Hibuluiye, “Yɔŋii wanaa dɛnɛ wɔɔŋnda chiŋalaŋ nda a sɛɛŋgiaŋndo.”
