Sam 33:1-22
33 Nya wanaa sakpuaa, la deŋi choo choo a nyaaloo le Chɛhowa.
Kanifuule, i cho isɔvɛ le mi wanaa sakpuaa saŋgala ndu.
2 La lɔɔ towalaŋ le Chɛhowa balikaa mello.La solul ndu chondoŋ* a nyɛm chaaŋ iyooŋ le ndu saŋgalaa.
3 La solul ndu chondii sɛnɛiye.La lɔɔ laŋ nyɛkɛndɛi mi la wa deŋioo choo choo a nyaaloo.
4 Kanifuule, diom Chɛhowa wo cho sakpo.Nduyɛ nyɛ o nyɛ o tosa pɛ, wana nɔla ma tiindaŋ ndu.
5 O kaala sakpoyɛi a sandei.
Nduyɛ, lɛŋndeŋ le cho le piaa cha a kaala lo lechoo Chɛhowa wo.
6 A diom fula Chɛhowa o sondo wo o toosiaa choo choo ni,Nduyɛ a hueiyii fula ndu o sondo ve o toosiaa nyɛ o nyɛ o choo choo niŋ ni.
7 O kanda mɛŋma ihɛllaŋ mi ma diinuŋ naapilɛ maa dala.O kɛsi mɛŋma yoŋgbaŋ yoŋgbaŋ ndaŋ o chiɛila nda kɛsi wolɔɔlaŋ ndo niŋ.
8 Maa lɛŋndeŋ kpou le nɔ siooŋii Chɛhowa ve.
Maa wanaa cho o lɛŋndeŋ choo wa kpou nɔ siooŋii nduɛi.
9 Kanifuule mɛɛ o soo, mi i yɔŋnuŋ.Mɛɛ o dimi, mi i tosaŋ.
10 Chɛhowa tɛɛmbuu tuula wɔɔŋnda waŋnda o kaalaŋ niŋ.Mbo tɛɛmbuu tuula* waŋnda.
11 Kɛ nyɛ Chɛhowa dimi wo* cho wa le fɛɛŋ a fɛɛŋ.Nduyɛ le fɛɛŋ a fɛɛŋ, yiyaŋnda ndɔlaŋ la siŋgaŋ te.
12 Kɔl kɛndɔɔ cho le wanaa Chɛhowa cho Mɛlɛka ndaa wa,Wanaa o hɛli ma wa nyɛm kɛŋ ndɔŋ nda.
13 Chɛhowa cho o choo choo niŋ mbo wa mɛɛndaŋndo o lɛŋndeŋ choo.Nduyɛ, o cho chuauwaa ŋwaŋnda chiee kpou chɔɔ.
14 O cho o naa nduaa chalaa o choo choo niŋ,Mbo wa waŋnda chieeya o lɛŋndeŋ choo mɛɛndaŋndo.
15 Ndu toosiaa kɔlta waŋnda chieeya kpou ni.Nduyɛ, o sina a walta ndalaŋ okɔɔ kpou.
16 Masaa sɔla pioŋɔɔ le mɛɛ o nɔ puaa chɔuwa faŋga bɛndoo yɛ le.Wana kpaaya bɛndoo sɔla pioŋɔɔ le mɛɛ o nɔ kpaaya bɛndoo yɛ le.
17 Tiindaŋ soo le num piŋi le, kanifuule o cho num hui.Kpaaya bɛndu soo nɔ wo chɔm nuaa maa wana cho lechoo wo nɔla mbo hɛluŋ kpundɔɔ le.
18 Hɔlte Chɛhowa leŋ le cho wanaa nɔ siooŋii nduɛi ya choo,Wanaa nɔ tiindaŋndo o kaala lo lechoo ndɔɔ niŋnda.
19 Mbo piŋi nda piɔmndo o ba,Nduyɛ mbo manda yoomula ndalaŋ a teleŋ yima bɛnduaŋ.
20 Ŋ cho Chɛhowa chumndo.
Ndu cho wana naa malaa a boo naa chɔuwo ni.
21 O ndu niŋ kɔlta naalaŋ la duaunuŋ nyaale ni,Kanifuule ŋ tiindaŋ diola ndɔla diandaa laŋ.
22 Oo Chɛhowa, mɛɛ naŋ cho hiouwɔɔ lachi a num chumndo yɛ,Maa kaala lo lechoo numndo lo naa choo fɔ!
