Sam 39:1-13
O wana sim lachi le chondei yo lo, Chɛdutɔŋ.* Chondii Deeve ve.
39 Mi dimi aa: “I cho wa yekeŋ o kelala nilaŋ niŋ,Yɔŋii ya tosa hakioo a lediɔɔmu.
Te wana dɛnɛ wɔɔŋndo cho wɔ pɛ ya ikɛi,I cho sondo nuu manda, mi kumbu ndu kpiŋ.”
2 Mi meinuŋ doŋ, nduyɛ I suu le.Hali le suɛi kɛndɛi bɛɛ, yaa suu nyɛ o nyɛ le.Kɛ nyɛ nɛiyaa wa hiouwɔɔ lachi a ya kindilaa.
3 Kɔllo wa ya ŋɔɔ.*
Mɛɛ yaa yiyaŋ fau, lende koni o wa ya lomɔɔ ni maa leyiŋ.
Okoŋ mi dimi aa:
4 “Oo Chɛhowa, a yandii mala ya mi sina mɛɛ mɛɛlula nilaŋ la cho wa yɛ,Nduyɛ a mɛɛ palɛi nii cho wa yɛ,Le halikpeŋ mi sina mɛɛ kpɛ yoomu nuu cho o biŋgi yɛ.
5 A tonya, a toosiaa ya le mi wa achal le teleŋ biŋgi koni.Yoomu nuu cho nyɛ o nyɛ num o hɔl te.
O kpeekpei niŋ, o yɔŋ bɛɛ mi wanachioo yiyaŋ maa o cho hɛnɛkɛ, o cho nyɛ o nyɛ num o hɔl te, hueiyii fonduei fuu o cho ni. (Sila)
6 A tonya, waŋnda chieeya kpou cho balɔɔ maa lewundu.
Wanachioo cho fafalaa kpeekpei, kɛ o fondo fuuwo choo.
Mbo chuuŋgiaa sullo, kɛ o sina nuaa maa o cho ndu tueiyɔɔ yeela le le.
7 Oo Chɛhowa, o yɛɛnɛ kpeekpei ya nɔ yɛ mi tiindaŋ?
Num kinɛi cho tiindaŋ nuu ni.
8 Piŋi ya o yɔŋnda nila wɔŋndaŋ niŋ kpou.
A yandii, chɛl mi wana fondoo siiŋguu ya nyɛ mamaa le.
9 Mi meinuŋ doŋ,Nduyɛ sondoo bɛɛ I tiuba mi kumbi le.Kanifuule, num tosa ni mi sɔɔŋ muŋ kpou yɔŋnuŋ.
10 A yandii, faŋa ya kpundɛ numndo choo.
I cho a kɔl tambɛiyo, kanifuule ba numndo tusi ya nyɛpalaa choo.
11 Le haki wanachioo tosa wo, ma tusi ndu nyɛpalaa choo le ndu miŋgioo o nɛi.Nduyɛ, ma tɛɛmbuu nyɛm ndɔŋ sɔviɔŋ mɛɛ kaaŋguaa tosa nuaa yɛ.
A tonya, wanachiee kɛ kɛ cho ko mɛɛ hueiye cho nuaa yɛ.
12 Oo Chɛhowa, tuei piɛile nileŋ.Yaŋ nilaŋ o chaŋ ya cho naa num chua le malaa wo.
A yandii, pɛɛsa mɛmɛma niaŋ te.
Kanifuule, I cho ko num o hɔl maa mial,Mial cho hiouwɔŋndo, maa finyaa niaa mamaa kpou wo.
13 A yandii, pɛŋgi ya tofa kɔl tuu koŋ le halikpeŋ mi naŋ tiŋ kɔl,Tuupa mi vi, mi kuɛŋnuŋ.”
