Sam 45:1-17
O wana sim lachi le chondei yo lo. Le ndi solioo a mɛɛ “Lili” chomul lɛ. Chondii puaa Kolua ve. Masiki.* Chondii kaalɛi.
45 Kɔl nuu cho bɔɔ a nyaale le suɛi kɛndɛi.
Mi dimi aa: “A masaa okɔɔ chondii nii cho* ni.”
Maa diɔɔmule nileŋ le wa maa kpɛkile wana chaa poonyiaa nyɛkɛndɛiyo.
2 O puaa ŋwaŋnda chiee tɛɛŋ kpou, num hiou naŋɔɔ poloŋ.
Diomnda kɛndɛlaŋ la fula num o sondo ni.
Le saboo hoo Mɛlɛka dɔu num sala le fɛɛŋ a fɛɛŋ ni.
3 Sayiaŋ muɛi num ii faŋnde,O naŋɔɔ numndo niŋ vɛlɛ a bɛɛle numndeŋ.
4 O naŋɔɔ numndo niŋ, kɔ ma sɔla batiuwaa.Hel o soo choo ma suŋgu le tonyaa, tusiŋndo, vɛlɛ a sakpoyɛi,Nduyɛ ba num kɛndɔɔ cho sɔɔŋ kɔndɔfilloŋ tosa.*
5 Chiŋɔma numndaŋ ma cho siombu siombu. Mi ma tosa mi waŋnda deli num lachi,Nduyɛ mi ma sɛɛsiaa kɔlta yaamɔɔwaa masaa.
6 Mɛlɛka cho kpeŋgbei* num lemasaa* le fɛɛŋ a fɛɛŋ ni.Tinda sakpoo tinda num lemasaa cho ni.
7 A kaala sakpoyɛi, nduyɛ ma tul yɔŋ wɔɔŋndo leyɛ.
Le saboo hoo Mɛlɛka numndo pɔya num a chuɛima kɔl kɛndiaŋ ni, mbo hiau chaaŋaa num aa masaa.
8 Nyɛla numndaŋ kpou la cho chuŋ kɛndɔɔ a chuɛima mɔɔ waŋ, yɔm aloo wo vɛlɛ a yɔm akeesiaa wo,O fondaŋ lemasa bɛndu nda tuuliaa kpɔkuŋnda* wo, ma wa nyɛm chaaŋ iyooŋ tueiyɔɔ yeela.
9 Chuaa laanduaa masaa velu wa cho o waŋ laanduaa num aa nɔ bɛɛleŋ o chiɛi lemasaa niŋnda tɛɛŋ.
Lanɔɔ masaa cho isisi o ba num kɛndɔɔ choo, mbo wa o doviaŋ a kooliŋ fula Ofii woŋ.
10 Chua nuu, yaŋ nilaŋ yekeŋ o nyɛ ya cho num dimullo wo.Puɛɛnuŋ a yuŋgu numndo, vɛlɛ a yuŋgu finya numndo.
11 Okoŋ masaa cho nɔ yeemɛi tau o naŋɔɔ numndo niŋ,Kanifuule masanɔ numndo o cho ni.Lelaŋ beŋ ndu wulaŋ.
12 Waŋnda Taaya cho hunɔɔ a kela ndalaŋ,Wana sulaa bɛndoo o waŋnda tɛɛŋ cho kindiŋ le ma naŋ kɔl a ndu.
13 Chua masaa velu wo cho woli wolioo o chiɛi lemasaa niŋ.A kooliiye nda toosiaa nyɛla ndɔlaŋ ni.
14 A cho lakɔ a ndu o masaa lo o nyɛla baa kalalaŋ niŋ,*
Nduyɛ waŋ laanduaa yufuaa cho ndu kɔlaŋ kɔɔli wa bɛɛ cho lakɔ naa num chua.
15 A cho lakɔ a nda a chondoŋ vɛlɛ a nyaaloo.A cho luɛiyɔɔ o chiɛi lemasaa niŋ naa masaa cho wa.
16 Chuauwaa numnda cho fondaŋ finyaa num aa mamaa chua.
A cho nda yulɔɔ iso le ma wa laŋgbaa kalla o lɛŋndeŋ niŋ kpou.
17 I cho tosa mi wanaa cho hunɔɔ violɔŋ nda kpou sina a diola numndaŋ okɔɔ.
Le saboo hoo waŋnda cho num wa saŋgalaa le fɛɛŋ a fɛɛŋ ni.
Tɛɛsiaalaŋ
^ Tofa Tɛɛsiaa.
^ Hibuluiye, “walta nilaŋ la cho.”
^ Hibuluiye, “cho num pɛɛku.”
^ Ɔɔ “kpɛŋɛ.”
^ Hibuluiye, “ke num masaleŋ.”
^ Ɔɔ “yalakanaa.”
^ Ɔɔ naapum “kolala nda huau laŋ.”
