Sam 56:1-13
O wana sim lachi le chondei yo lo. A “Piiŋ Cho Levil Mbo Meinuŋ Kpili Wo” okɔɔ. Chondii Deeve ve. Mikitam.* Teleŋ Filitiaŋnda bii ndu Kaati wo.
56 Oo Mɛlɛka, tuiinuŋ ya inyiɛɛ, kanifuule waŋnda chieeya chiŋalaŋ ya.*
Lepaa o lepaa, a cho ya delɔɔ choo a sɔŋgɔɔ ma tusi ya nyɛpalaa choo.
2 Lepaa o lepaa, yaamɔɔwa cho ya touwɔɔ le ma bii ya.Wanaa bɔɔbɔɔ chiŋalaŋ ya a yoŋga le sɔŋgɔɔ.
3 Te I wa pɛ a siooŋnde, o num niŋ ya duau tiindaŋndo ni.
4 Mɛlɛka ya tiindaŋ ni, o ya saŋgala diomnda ndɔlaŋ ndo.O Mɛlɛka niŋ ya tiindaŋ ni, lelaŋ I nɔ isiooŋ te.
O yɛɛnɛ wanachioo nɔla yɛ mbo tosal la?
5 Lepaa o lepaa, a cho ya kɔllo tɛɛmbuuwo.Yiyaŋ nda nɔ a ya okɔɔ kinɛiyo cho le ya nyɛpalaa tusioo choo ni.
6 Ma veŋnuŋ le ya delɔɔ choo.Ba o ba ya kuɛ pɛ, a cho ya hɔlteŋ chooA tiindaŋndo le ya diyɔɔ.
7 Tusi nda nyɛpalaa choo le dɛnɛ nda wɔɔŋndo.
Oo Mɛlɛka, tɛɛmbuu nda a kɔl num tuuwo.
8 A sina kelala nilaŋ kpou.
A yandii, dɔu mɛmɛma niaŋ o bɔlɔ num yau visioo niŋ.
Sɔɔŋ kindilaŋ cho ya choo woŋ kpou, ŋ cho ŋ poonyiaa o yau numndo niŋ.
9 Paale ya cho num veelu le ya malaa leŋ, yaamɔɔwaa niaa cho nyaanɔŋ.
I sina kɛsɛ maa Mɛlɛka cho a ya latulu.
10 Mɛlɛka ya tiindaŋ ni, o ya saŋgala diomnda ndɔlaŋ ndo.Chɛhowa ya tiindaŋ ni, o ya saŋgala diomnda ndɔlaŋ ndo.
11 O Mɛlɛka niŋ ya tiindaŋ ni, lelaŋ I nɔ isiooŋ te.
O yɛɛnɛ wanachioo nɔla yɛ mbo tosal la?
12 Oo Mɛlɛka, buŋgaŋ ya chuel num ndoŋ cho ya kuee.I cho num chondoŋ solul le num balikaa mello.
13 Kanifuule a piŋi ya piɔmndo o ba,Nduyɛ ma manda peluŋ nuŋ yɔŋii ya del,Le halikpeŋ mi wa kɔlaŋ num lachi o nyɛ teŋgaa wanaa cho yoomu wa niŋ.
