Sam 6:1-10
O wana sim lachi le chondei yo lo. Le ndi solioo a nyɛm chaaŋ iyooŋ, mɛɛ Siɛmɛnɛti* chomul lɛ. Chondii Deeve ve.
6 Oo Chɛhowa, te a tuulu pɛ kɔl, miŋgi ya o nɛi le.Te a wa pɛ a hiilɛi, sila ya le.
2 Oo Chɛhowa, tuiinuŋ ya inyiɛɛ, kanifuule I cho hiouwɔɔ lachi a dialloŋ wuoo.
Oo Chɛhowa, siŋgi ya, kanifuule paala nilaŋ la cho nyiiyaa.
3 A tonya, kɔllo tambu ya bɔɔ.Oo Chɛhowa, I nyuna wɔ num: Le vɛɛ kpɛ hei cho yɛ viouwɔɔ ya choo?
4 Oo Chɛhowa, huŋ ma piŋi ya.Piŋi ya le sabu kaala lo lechoo numndo.
5 Kanifuule, wanaa vi wa suu* lɛ a num okɔɔ le.O nɛɛnɛ nɔla yɛ mbo saŋgala num o Sɛiyo* niŋ?
6 I cho o saŋgɛi yɔkɔɔ a nyɛ nɛiyaa cho ya choo wo.Ichɔl pii pii I lɔl kpele nuu liviaa a mɛmiaŋ.I lo chaŋndo tei mi mɛmiaŋ ma pɛ o kpele nuu maa mamɛŋ.
7 Hɔltaŋ la yɔŋnuŋ ya niŋ dɔfɔŋ dɔfɔŋ a chaŋndo.La yɔŋnuŋ ya yifidii a nyɛpalaa waŋnda cho ya tusioo choo wo.
8 Nya wanaa cho sɔɔŋ dɛnɛ wɔɔŋndoŋ tosaa wa kpou, la faŋaŋ ya kɔɔli.Kanifuule, Chɛhowa cho nilaŋ yaŋɔɔ o chaŋ ya cho wo.
9 Chɛhowa cho nilaŋ yaŋɔɔ o nyuna ya cho ndu le malaa wo.Chɛhowa cho piɛile nileŋ muli.
10 Yaamɔɔwaa niaa kpou, siɔmbulaŋ la cho nda biyɔɔ ma vi dialloŋ.O lepilɛ niŋ kpe, a cho miiŋgu amakɔɔ le bɛɛla tambɛila nda cho sɔla laŋ.
Tɛɛsiaalaŋ
^ Tofa Tɛɛsiaa.
^ Ɔɔ “loonuŋ.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
