Sam 64:1-10
-
Pioŋɔɔ sɔlaa wanaa del waŋnda choo wa o ba
-
“Mɛlɛka cho nda vii vii” (7)
-
O wana sim lachi le chondei yo lo. Chondii Deeve ve.
64 Oo Mɛlɛka, a yandii, I nyɔɔlu num le ma tuei ya diom.
Piŋi yoomu nuu yaamɔɔnɔ kpaaya bɛndoo o ba.
2 Piŋi ya o sɔɔŋ wanaa dɛnɛ wɔɔŋnda kɛɛsiaa le ya tosallo woŋ niŋ,Faŋga bɛndu wanaa dɛnɛ wɔɔŋnda o ba.
3 Diɔɔmuii ndɛi luɛi naŋ chaa muɛi faŋnde ni.Ma soliŋ diomnda wɔɔŋndaŋ o sondo maa machiŋɔ,
4 A lo o fondaŋnda ndala viaŋnaŋ ndaŋ, ma vii vii wana tɛɛmbuu isɔɔ le wo.Ma vɛ ndu o lepilɛ niŋ kpe, siooŋii ve nda le.
5 Ma baŋnuŋ kpiŋ o yiyaŋnda ndala wɔɔŋndaŋ choo,*Ma suukaŋ a mɛɛ nda kɛsi yaŋɔɔla ndalaŋ yɛ okɔɔ.
Ma dimi aa: “Wana o wana cho nda chɔ le.”
6 Ma nuuviaa nɛila sɛnɛilaŋ le sɔɔŋ wɔɔŋndoŋ tosaa.Ma suukaŋ o sɔɔŋ wɔɔŋ nda kɛɛsiaa le tosaa woŋ choo o nɛi chaa niŋ.Ma yiyaŋ maa wana nɔla ma sina yiyaŋnda cho nda o lakɔl taŋ te.
7 Kɛ Mɛlɛka cho nda vii viiO lepilɛ niŋ kpe, mbo booluu nda a chiŋuaŋ.
8 Diɔɔmuii ndɛi cho tosa ma deli.Nduyɛ wana o wana che pɛ nyɛ cho yɔŋnɔŋ ndo, o cho bolleŋ hiiluu.
9 Siooŋnde cho wana o wana biyɔɔ,Ma soo a nyɛ Mɛlɛka tosa wo okɔɔ,Okoŋ ma nɔ sinapɛŋgoo o walta ndɔlaŋ niŋ.
10 Wana cho sakpo wo cho wa a nyaale o Chɛhowa niŋ, nduyɛ mbo siiŋguu ndu naa nduaa viaŋnaŋnda.Wanaa cho sakpo o kɔlta ndalaŋ niŋnda kpou cho bɛɛleŋ sɔla.
Tɛɛsiaalaŋ
^ Ɔɔ “Ma dimulaŋ velaa velle le sɔɔŋ wɔɔŋndoŋ tosaa.”
