Sam 69:1-36
O wana sim lachi le chondei yo lo. A mɛɛ “Lili” chomul lɛ. Chondii Deeve ve.
69 Oo Mɛlɛka, piŋi ya, kanifuule mɛŋndaŋ ma chal le hiouwɔɔ a ya.
2 I sɔɔŋa o pɔlɔŋ yiŋgilɛiyo niŋ.
I del o lumnde,Nduyɛ mi tindileŋ le wa hiounɔŋndo a ya.
3 I veelu tei mi saŋga yɔkɔɔ.Bololaŋ la vesa ya sɛɛŋ,
Mi hɔltaŋ la yɔŋnuŋ ya yifidii a Mɛlɛka nuu chumndo.
4 Wanaa tul la leyɛ o fondo fuuwo choo waHiou poloŋ a yiiŋii cho ya o lebol le.
Yaamɔɔwaa niaa dɛnɛ wɔɔŋnda,*A tuu le ya diyɔɔ wa kui tau tau.
A cho ya baŋɔɔ le mi ke nda nyɛ ya chiimbuu le wo.
5 Oo Mɛlɛka, a sina a diɔmii nii okɔɔ,Nduyɛ haki nuu cho num o viaŋnaŋ o hɔl te.
6 Oo Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa,Maa siɔmbula bii wanaa dɔu tiindaŋndo o num niŋnda le sabu nuu le.
Oo Mɛlɛka Isɔluɛiya,Maa wanaa cho num nuuviaa wa tambu labɛɛ le sabu nuu le.
7 A cho ya yioulaŋ le sabu numndo,Mi bɛɛla tambɛilaŋ la kumbu ya hɔlla kpu.
8 I simnuŋ wana lekaa le bɛndaa niaa,Mi simnuŋ miallo le puaa naŋ fula kala pilɔɔ wa.
9 Sɛmbɛ ya nɔ le chiɛi numndo wo cho ya lomɔɔ maa leyiŋ.Yioula waŋnda cho num ndaŋ, ya bɛɛ laŋ koni nda cho ya ni.
10 Mɛɛ ya tusiŋ mi bii sumndo,*Ma yei ya le keŋ.
11 Mɛɛ ya toosiaa nyɛla labɛkilaŋ mi wounuŋ,Mi simnuŋ nyɛ mamaa* le nda.
12 Wanaa chal o dio kpakioo wa, sɔɔŋ nuŋ fula nda o lasondo le.Nduyɛ a ya okɔɔ wanaa kolaa soli chondoŋ ni.
13 Oo Chɛhowa, maa piɛile nileŋ le fuuluu naa num chuaA teleŋ bɛnda wo.
Oo Mɛlɛka, le sabu kaala lo lechoo num bɛndoo,Muli piɛile nileŋ le chɔmndo maa num cho Mɛlɛka wana tiindaŋ le pioŋɔɔ sɔlaa wo ni.
14 Yandii soli ya o pɔlɔŋndo niŋ.Chɛl la mi mɔɔwa le.
Piŋi ya wanaa tul la leyɛ wa o ba,Nduyɛ ma soli ya o lumnde niŋ.
15 Chɛl mi mɛŋma hunaŋ ma hiounuŋ a ya,Ɔɔ mi lo o lumnde niŋ te.Nduyɛ chɛl mi sooŋndo kindaŋ ya kɔɔli le.
16 Oo Chɛhowa, yandii muli ya diom, kanifuule kaala lo lechoo numndo naŋ bɔɔ.
Mulul la hɔlla, kanifuule nyiɛɛyii numnde cho bɔɔ.
17 A yandii viŋ ya buɛi numndo hɔlla le.
Mulul la chɔ chɔ, kanifuule I cho o nyɛpalaa niŋ.
18 Sɔɔŋguu ya ikɛi ma chiindiaa ya,Nduyɛ ma piŋi ya yaamɔɔwaa niaa o ba.
19 A sina yioula nda cho ya laŋ, siɔmbula nda cho ya tusioo laŋ, vɛlɛ a bɛɛla nda cho ya tɛɛmbuuwo laŋ.
A cho yaamɔɔwaa niaa kpou chɔɔ.
20 Yioula nda cho ya laŋ la boli ya kɔllo, nduyɛ o cho pau seŋgu le.
I wa kɔl maa waŋnda cho mɔnɛi biyɔɔ le ya, kɛ wana o wana bii imɔnɔ le ya le.I wa kɔl maa waŋnda cho ya kɔllo dɛɛniaa, kɛ wana o wana dɛɛniaa ya kɔl te.
21 Ma ke ya pɔsɔnioo sɔŋgɔ nyɛdiaa.Mɛɛ kolɔɔ bii ya, ma ke ya muɛima waalɛiyaŋ.
22 Maa nyɛdiaa o tibii* ndaa choo simnuŋ yaŋɔɔleŋ le nda,Mi sul ndaa bɛɛ simnuŋ yaŋɔɔleŋ.
23 Maa hɔlta ndalaŋ la yɔŋnuŋ yifidii, le halikpeŋ a chi lɛ le,Nduyɛ mi chaŋaa ndaa wa nyiiyaa teleŋ o teleŋ.
24 Maa tusi nda kɔl num tuuwo choo,Ma dɔɔnuŋ tumbe a nda o kala kala.
25 Maa dɔɔŋgɔ ndaa* simnuŋ pɔmndo,Nduyɛ mi tɛndiila ndalaŋ la lo fondo.
26 A cho wana ŋ soŋ ndo kiltaŋ kɔɔli,Nduyɛ a pɛŋgi suɛi a nyɛ nɛiyaa wanaa ŋ booluu wa okɔɔ le.
27 Maa tosa mi haki ndaa chɔɔlu handɔŋ lechoo,Nduyɛ a sɔla tɔnɔ o tɔnɔ o sakpoyɛi numnde niŋ te.
28 Maa wɔɔsuu diola ndalaŋ o yau wanaa cho yoomu wa* niŋ.Maa a suliŋ le waa wanaa cho sakpo wa tɛɛŋ te fɔ!
29 Kɛ I cho bɔɔ o nyɛ nɛiyaa niŋ.
Oo Mɛlɛka, maa kpaaya ŋ nɔ le waŋnda piŋioo wo manda ya fɔ!
30 I cho diola Mɛlɛkalaŋ saŋgala o chondoŋ niŋ,Mi mel ndu balikaa le ndu saŋgalaa.
31 Hei cho Chɛhowa kɔllo nɛŋi mbo hiou nau towaa salaa solioo,Mbo hiou nau fɔŋndɔ nɔ leelaŋ a buukulaŋ ndo salaa solioo.
32 Wanaa tusiaŋnda cho ndi chɔ ma dɔɔnuŋ nyaale.
Nya cho Mɛlɛka nuuviaa wa, maa kɔlta nyalaŋ la miiŋgu yoomuaŋ sɔla.
33 Kanifuule Chɛhowa cho wanaa bala fonduaa nilaŋ yaŋɔɔ,Nduyɛ o chue niŋ wanaa nduaa cho o biyɔɔ niŋnda chɔdɔ le.
34 Maa choo choo a lɛŋndeŋ saŋgala ndu,Mi pee mɛŋma ihɛllo a nyɛ o nyɛ yoomaa cho leniŋ saŋgala ndu.
35 Kanifuule Mɛlɛka cho Saayɔŋ piŋi,Nduyɛ mbo miŋgi chieeŋ bɛndoŋ o Chuda niŋ taŋgul.Waŋnda cho ichali loŋ, okoŋ mbo wa le nda.
36 Buɛiyaa Mɛlɛkaa, chuauwaa ndaa mamaa cho leŋ sɔla ni maa nyɛm kɛŋ nda.Nduyɛ, wanaa kaala diola ndɔlaŋ nda cho wa ichali loŋ ni.
Tɛɛsiaalaŋ
^ Ɔɔ “Yaamɔɔwaa tul la leyɛ o fondo fuuwo choo wa.”
^ Ɔɔ naapum, “Mɛɛ ya chaŋ mi bii sumndo.”
^ Hibuluiye, “taloo.”
^ Ɔɔ “tabali.”
^ Ɔɔ “dɔɔŋgɔ cho o kpakioo niŋndo.”
^ Ɔɔ “yau yoomoo.”
