Sam 7:1-17
-
Mɛlɛka kialu yamaŋ o nɛi sakpoo choo wo Chɛhowa cho ni
-
“Oo Chɛhowa, kɔɔsa a ya” (8)
-
Chondii biisiei. Deeve solul Chɛhowa chondei hei ni, a diomnda Kusi, Bɛŋjaminaitiinɔɔ dimi laŋ okɔɔ.
7 Oo Chɛhowa Mɛlɛka nuu, num cho naa niaa viaŋnaŋnda ni.
Piŋi ya wanaa cho ya dɛnɛ palaa tusioo choo wa kpou o ba,
2 Yɔŋii nda sɛɛsiaa ya, mɛɛ kpɔkuŋndo* tosa nuaa yɛ,Nduyɛ ma kuɛŋnuŋ a ya I sɔla wana piŋiaa le.
3 Oo Chɛhowa Mɛlɛka nuu, te suɛi wɔɔŋnde ya tosa ni,Te o yɔŋ pɛ maa kafalaŋ ya tosa ni,
4 Te o yɔŋ pɛ maa wana tosal la ikɛndɛiyo ya tosal iwɔɔŋnde ni,Ɔɔ mbo wa maa yaamɔɔnɔ nuu ya puŋga nyɛm ndɔŋ o fondo fuu wo choo ni,
5 Mɛɛ tosa mi yaamɔɔnɔɔ tisa ya kɔɔli mbo bii ya,Mbo niɔu niɔu ya o lɛŋndeŋ choo,Okoŋ mbo tɛɛmbuu ya labɛɛ, mbo mɛi ya ihini o chundoo niŋ. (Sila)
6 Oo Chɛhowa, chɔŋ a kɔl num tuuwo,Chɔŋ ma chiŋalaŋ yaamɔɔwaa niaa cho a kɔl tuu bɛndoo wa.Chɔŋ ma mala ya, nduyɛ ma kelu yamɛi o nɛi sakpoo choo.
7 Maa kaalaŋ la balu num,Nduyɛ ma lo o choo choo niŋ ma chiŋalaŋ nda.
8 Chɛhowa cho waŋnda yamɛi kilul.
Oo Chɛhowa, kɔɔsa a ya, ma kelu yamɛi a mɛɛ sandii nii cho yɛ,Vɛlɛ a mɛɛ lo lechoo nuu cho yɛ.
9 A yandii, tosa mi sɔɔŋ wɔɔŋ wanaa dɛnɛ wɔɔŋnda tosa woŋ mɛɛlu,
Kɛ ma tosa mi wana cho sakpo wo sim yi,Kanifuule num cho Mɛlɛka sakpoo ni. Num yaasiaa kɔlta waŋnda chieeya ni, nduyɛ ma sina yiyaŋnda ndala yiŋgoloŋ ndaŋ.
10 Mɛlɛka cho boo chɔu manda ya wo ni. Ndu Piŋi wanaa cho sakpo o kɔlta ndalaŋ niŋnda ni.
11 Mɛlɛka cho wana kialu yamaŋ o nɛi sakpoo choo wo ni,Nduyɛ o cho wanaa dɛnɛ wɔɔŋnda yamaŋ kilullo lepaa o lepaa.
12 Te wana o wana kɛɛ pɛ le dɛnɛ ndɔ wɔɔŋndo malɔɔ, o yikpa muɛi nduɛi faŋnde le ndu.O cho chiŋɔle ndɔleŋ kindɔɔ mi le wa le bɛɛndiaa.
13 O bɛɛndiaa nyɛm ndɔŋ chɔu wɔɔŋ wɔɔŋndoŋ.O bɛɛndiaa chiŋɔma ndɔma leyiŋndaŋ.
14 La tofawɔ wana cho a foli* dɛnɛ wɔɔŋndo wo.Kpundɔɔ cho ndu o dembe ni, mbo vialu choolaŋ.
15 O tou sooŋndo mbo yiŋgila ndu yiŋgoloŋ,Kɛ mbo del o sooŋ o tou koŋ ndo niŋ.
16 Kpundɛ o mal lo cho ndu mululaŋ.Sɔɔŋ kɔl vesɛi o tosa woŋ cho ndupila hulɔŋ o lebol.
17 I cho Chɛhowa saŋgala le sandii nduɛi.I cho chondoŋ soli* le diola Chɛhowa laŋ, Mɛlɛka Hiou Kpou Wo.
