Sam 77:1-20
O wana sim lachi le chondei yo lo. A mɛɛ Chɛdutɔŋ* chomul lɛ. Chondii Asafi ve.
77 I cho chaŋ choo choo kpeleŋ naa Mɛlɛka chua.I cho chaŋ naa Mɛlɛka chua, nduyɛ mbo tuei ya diom.
2 I cho Chɛhowa nuuviaa a teleŋ nyɛpalaa cho ya wa choo wo.
Ichɔl pii pii, mi lɔl balaŋ heeloo o ndu lo I saŋga le.
Wana o wana nɔla mbo dɛɛniaa ya kɔllo le.
3 Te I yiyaŋ pɛ a Mɛlɛka okɔɔ, mi tambu kɔl tau.Mi buulaŋ tau, nduyɛ mi yoomuaŋ ma fula ya po. (Sila)
4 A chɛl la mi kumbu hɔlteŋ te.I tambu bɔɔ kɔllo, nduyɛ bako bɛɛ I nɔla mi soo le.
5 Kɔllo del la o palɛi masindɛi,Vɛlɛ a wɔsiŋ hiou woŋ.
6 Mi yiyaŋ a chondii nii* okɔɔ ichɔl.Mi yiyaŋ yiŋgoloŋ,Nduyɛ mi tosa yaasiaa nyɛkɛndɛi.
7 Baa Chɛhowa cho naa pa kɛɛ le fɛɛŋ a fɛɛŋ?
Baa fɛɛŋ bɛɛ o hini lɛ niŋ kɔl a naa le?
8 Baa kaala lo lechoo ndɔɔ mɛɛlu le fɛɛŋ a fɛɛŋ?
Baa wana chi niŋ buŋgaŋ o chuel naa woŋ o peelɔŋndo le fɛɛŋ a fɛɛŋ te?
9 Baa Mɛlɛka puɛɛnuŋ pa le naa chɔɔ wanaa sɔvɛ?Ɔɔ baa kɔl ndɔ tuuwo tosa pa mbo kɛɛ le naa tuiinɔŋndo inyiɛɛ? (Sila)
10 I cho tuŋ dimioo aa: “Hei tɛɛmbuu ya kɔllo* ni,
Mɛlɛka Hiou Kpou Wo siŋga yiyaŋ ndɔɔ* a naa okɔɔ.”
11 I cho loonɔŋ a walta Chɛhowa laŋ okɔɔ.I cho loonɔŋ a walta kɔndɔfilta o tosa o sindɔɔ niŋndaŋ okɔɔ.
12 I cho yiyaŋ a walta numndaŋ kpou okɔɔ,Okoŋ mi yiyaŋ yiŋgoloŋ a mɛɛ ŋ tosa sɔɔŋ yɛ okɔɔ.
13 Oo Mɛlɛka, nɛila numndaŋ la cho la diandaa.
Mɛlɛka kuɛɛ cho yɛ o bɛndu maa num?
14 Num cho Mɛlɛka tonyaa ni, o tosa sɔɔŋ kɔndɔfilloŋ ndo.
A chɔm waŋnda kpaaya numndo.
15 A kpaaya numndo* ŋ piŋi* wanaa numnda ni,Chuauwaa Chekɔpu wa a chuauwaa Choosɛ wa. (Sila)
16 Oo Mɛlɛka, mɛɛ mɛŋndaŋ ma che num,Mi ma hiiluŋ yokpaŋ yokpaŋ,
Nduyɛ mi lumuŋ yiŋgilɛiyoŋ ŋkalaŋiaŋ.
17 Mi mɛŋndaŋ o yumbu yumbu ikpuŋgbaa niŋ ma talaŋ.
Mi taŋndaŋ ma deŋi o halaa niŋ,Nduyɛ chiŋɔma numndaŋ ma wa ipiliku pilikuei ba o ba fee.
18 Taŋndaŋ ma wa deŋioo maa peluŋ nyɛm nyaanaŋ suaa naŋndoŋ,Mi nyɛ ŋualalɛiyo tiu o lɛŋndeŋ choo kpou.Mi lɛŋndeŋ le nyiiya nduyɛ mi le hiiluŋ woku woku.
19 Ma yambu nɛiyo o pee mɛŋma ihɛllo niŋ.Ma keeku o mɛŋma yiŋgilɛiyaŋ niŋ,Kɛ wanaa nɔla ma che foofola peluŋ numndoŋ te.
20 Ma soliŋ Muuse nda Elɔŋ kpeku le kɔlaŋ a wanaa numnda,Mɛɛ wana mandaa lasaa kua nuaa a saa nduaa yɛ.
Tɛɛsiaalaŋ
^ Tofa Tɛɛsiaa.
^ Ɔɔ “nyɛchaa iyoo.”
^ Ɔɔ “chuku ya kɔllo.”
^ Hibuluiye, “ba ndɔ kɛndɔɔ.”
^ Hibuluiye, “ba numndo.”
^ Hibuluiye, “ŋ baŋa.”
