Sam 78:1-72
-
Sɔɔŋ kɛndɛŋ Mɛlɛka tosa woŋ vɛlɛ a laalaŋ lepɛŋ Isɔluɛiya
Masiki.* Chondii Asafi ve.
78 Wanaa niaa, la yaŋ nilaŋ o sawa* nuu.La yaŋ nilaŋ o diomnda cho ya fulaa o sondo laŋ.
2 I cho isɔɔ o talelaŋ niŋ.
I cho wa talela masindɛlaŋ dimioo.
3 Sɔɔŋ naŋ tuei miŋ sina,Nduyɛ mi finyaa naa dimul naa a muŋ okɔɔ woŋ,
4 Ŋ cho chuauwaa ndaa mamaa muŋ viŋ te.Sɔɔŋ tɔɔmaŋ bɛnduŋ Chɛhowa tosa woŋ, vɛlɛ a kpaaya ndɔɔ,A sɔɔŋ kɔndɔfiliŋ o tosa woŋ,Ŋ cho wanaa cho hunɔɔ violɔŋ o chilaŋ niŋnda dimul a muŋ okɔɔ.
5 Mbo ke Chekɔpu loonɔŋnda ndɔlaŋ,Nduyɛ mbo kɛsi sawaa o Isɔluɛi niŋ.Mbo dimul finyaa naa mamaa,Le ma dimul chuauwaa ndaa a sɔɔŋ muŋ okɔɔ,
6 Le halikpeŋ mi waŋnda o chilaŋ niŋ,Chuauwaa cho hunɔɔ violɔŋ nda sina a muŋ okɔɔ.
Okoŋ kɔɔli, mi nda bɛɛ dimul chuauwaa ndaa a muŋ okɔɔ.
7 Keŋ cho tosa ma dɔu tiindaŋ ndaa o Mɛlɛka niŋ,
A puɛɛnuŋ a walta ndɔlaŋ te,Kɛ ma bii sawala ndɔlaŋ.
8 Okoŋ a ve maa finyaa ndaa mamaa,A ndaa nɔ nilakalulaŋ, ma simul Mɛlɛka wa le.A kɔlta ndalaŋ laa nɛi siŋgaŋ* te wa,Nduyɛ ma kɛɛ le lo lechoo wo chɔmndo o Mɛlɛka lo wa.
9 Puaa chɔuwa Ifiluem ndaa nɔ chiɔulaŋ o laba,Kɛ ma miiŋguŋ amakɔɔ o paale nda kuɛ le sɔŋgɔɔ leŋ choo.
10 A lo o kpema Mɛlɛka yii a nda wo choo le,Okoŋ ma kɛɛ le sawala ndɔlaŋ biyɔɔ.
11 Ma puɛɛnuŋ vɛlɛ a nyɛ o tosa wo okɔɔ,Vɛlɛ a kaamaala o tosa ma cha laŋ.
12 Mbo tosa sɔɔŋ kɔndɔfiliŋ bɛndoŋ finyaa ndaa mamaa o hɔl,O tanda Sowaŋ ndo niŋ Ichipi.
13 Mbo piɔu pee mɛŋma ihɛllo tɛɛŋ le ma keeku leniŋ,Nduyɛ mbo tosa mi mɛŋndaŋ ma sim maa lakpaki.
14 Mbo chɔm nda nɛiyo ipala a yumbu yumbu ikpuŋgbaa,Nduyɛ ichɔl pii pii, ndoo lɔl kɔlaŋ a nda a yumbu yumbu leyiŋndo.
15 Mbo tɛɛndiaa poutaŋ o pollo niŋ,Okoŋ mi mɛŋndaŋ ma buli naŋ chaa peela bɛndulaŋ ni, ma kol ma pum cha.
16 Mbo tosa mi mɛŋndaŋ ma buli o pouwo,Nduyɛ mbo tosa mi ma wa hiouwɔɔ wolu wolu maa peela bɛndu.
17 Kɛ ma hiau lachi a hakioo tosaa a Mɛlɛka Hiou Kpou Wo,Mɛɛ nda simul ndu o pollo niŋ.
18 Ma simul* Mɛlɛka o kɔlta ndalaŋ niŋ,Mɛɛ nda nyuna ndu le nyɛdiaa nda landuŋ kɔl le ndu wo.
19 Ma ŋɔɔchiaŋ a Mɛlɛka.Ma dimi aa: “Baa Mɛlɛka nɔla pa mbo ke naa nyɛdiaa o pollo hoo niŋ?”
20 I cho tonya maa mɛɛ o lɔɔ pouwo,Mi mɛŋndaŋ ma buli, mi peela pɔmbɔlaŋ la pia cha.
“Baa o nɔla vɛlɛ pa mbo ke naa nyɛdiaa?*Ɔɔ o nɔla pa mbo ke wanaa nduaa visioŋ?”
21 Mɛɛ Chɛhowa tuei nyɛ nda dimi wo, mbo duaunuŋ tumbe a nda o kala kala.Le hei, mbo chiŋalaŋ Chekɔpu a yiŋndeŋ,Nduyɛ mbo duaunuŋ tumbe o kala kala a Isɔluɛi.
22 Kanifuule, a dou tiindaŋndo o Mɛlɛka niŋ te.Ndaa laalaŋ maa o nɔ kpaayaa le mbo piŋi nda le.
23 Lelaŋ mbo suaa o yumbu yumbu cho o halaa niŋndo lo,Okoŋ mbo kuumbuu diolaŋ o choo choo niŋ.
24 O wa nda manɛiyo chuchullo le ma de,Nduyɛ mbo ke nda kulloŋ fulaa o choo choo niŋ.
25 Mi waŋnda chieeya dia nyɛdiaa wanaa kpaayaa bɛnduaa,*Mbo ke nda nyɛdiaa tau le ma de ma pim.
26 Mbo tosa mi hueiye hɔŋ ba paaleŋ le chaŋ ndo fulaa o choo choo niŋ.Nduyɛ a kpaaya ndɔ bɛndoo, mbo tosa mi hueiyii fula ba tou wo ve hɔŋ.
27 Mbo hulul nda visioŋ lɛŋ maa chundu,Vɛlɛ a youwa maa siooŋnde o pee mɛŋma ihɛllo kɔŋgɔ.
28 Mbo tosa ma deli o dɔɔŋgɔ ndɔɔ niŋ,Ma balu tɛndiila ndɔlaŋ silɔ.
29 Mɛɛ nda de tei ma saŋga.Mbo ke nda nyɛ ndaa yeema wo.
30 Kɛ tuupa bɛɛ ma dia ma pum cha,Nyɛdiaa koŋ lo nda o sondo,
31 Mi Mɛlɛka duaunuŋ tumbe a nda o kala kala.
Mbo diu puaa dialuŋ kalaa wa nda tɛɛŋ nda,Nduyɛ mbo tɛɛmbuu puaa feleŋguaa o Isɔluɛi niŋ.
32 Kɛ a koŋ kpou, ma hiau lachi a hakioo tosaa,Nduyɛ a dou laalaŋndo o walta ndɔla kɔndɔfiltaŋ niŋ te.
33 Le hei, mbo tosa o lepilɛ niŋ kpe mi kpundɔɔ tual nda choo,Okoŋ mi yoomula ndalaŋ la mɛɛlu.
34 Kɛ teleŋ o teleŋ ndoo dii pɛ apum nda tɛɛŋ,A muliŋ naa ndu chua le mbo mala nda.
35 Okoŋ a loonuŋ maa Mɛlɛka wa Pou Kpoowa ndaa ni,Nduyɛ maa Mɛlɛka Hiou Kpou Wo wa Wana Nda Piŋiaa* ni.
36 Kɛ ma kindiŋ le ndu huiyo a sondo,Ma dimul ndu choolaŋ a lediɔɔmu.
37 Kɔlta ndalaŋ la ve o ndu lo le.A lo o kpema o yii a nda wo choo le.
38 Mbo tuiinuŋ nda inyiɛɛ.Mbo mal nda haki le* yɔŋnda ndala wɔɔŋndaŋ, nduyɛ o tɛɛmbuu nda le.
Teleŋnda bɔɔbɔɔ mi ndoo pɔlul kɔllo,Ndoo doonuŋ tumbe a nda mbo hiou ba le.
39 Kanifuule, mbo loonuŋ maa waŋnda chieeya nda cho ni,Mɛɛ hueiye hɔŋ nuaa mi i hiounuŋ yɛ, i miiŋgu lɛ le.*
40 Teleŋnda bɔɔbɔɔ a wa ndu simullo o pollo niŋ,Nduyɛ ma tosa mbo tambu kɔl.
41 Ma tɔɔndaŋ Mɛlɛka teleŋnda bɔɔbɔɔ,Okoŋ ma tɛɛmbuu Wana Diandaa o Isɔluɛi niŋ kɔllo.
42 A loonuŋ a kpaaya ndɔɔ* okɔɔ le,Nduyɛ ma puɛɛnuŋ a paale o chiindiaa nda* yaamɔɔwaa ndaa o ba leŋ,
43 Kaamaala o tosa o Ichipi niŋndaŋ,Vɛlɛ a la o tosa o tanda Sowaŋ ndo niŋndaŋ.
44 Ma puɛɛnuŋ vɛlɛ mɛɛ o siiŋguu peela pɔmbɔlaŋ o Ichipi niŋ koowaŋ yɛ,Le halikpeŋ a kol mɛŋndaŋ o peela ndalaŋ niŋ te.
45 Mbo yɔŋ yɔluaa kunda bɛndoo le nda kisi kisioo,Vɛlɛ a sɔlla le ma tɛɛmbuu lɛŋnde ndaleŋ.
46 Mbo yɔŋ soonuaa le tɔlɔɔla ndalaŋ dioo,Nduyɛ mi soonuaa kundaa haa tɛɛmbuu tɔlɔɔla ndalaŋ kpou.
47 Mbo yɔŋ looŋ kpuŋgbaŋ,Miŋ tɛɛmbuu yɔmii ndɛi makilepiiye, vɛlɛ a yɔmii sikamɔɔ ve.
48 Mbo tɛɛmbuu visiaa ndaa a looŋ kpuŋgbaŋ,Nduyɛ mbo diu chɔluaa ndaa a taŋndaŋ.*
49 Mbo duaunuŋ tumbe a nda o kala kala,Mbo tusi nda nyɛpalaa choo.Mbo yɔŋ maalikɛiya kunda bɛndoo le nda kpundɔɔ tusioo choo.
50 Mbo chɔm kɔl ndɔ tuuwo,
O chiindiaa yoomula ndalaŋ piɔmndo o ba le.Nduyɛ, mbo duau nda naa wɔɔŋndo choo.
51 O mɛɛlulaŋ kpɔŋ, mbo diu puaa tasiaa kpou o Ichipi niŋ,A tasiaa nda velu a kpaaya Mɛlɛka ke nda le violɔɔ wo, o tanda Ham ndo niŋnda.
52 Okoŋ kɔɔli, mbo soli wanaa nduaa o lɛŋnde Ichipi leŋ niŋ,Nduyɛ mbo sim nda lachi le kɔlaŋ a nda o pollo niŋ, mɛɛ wana mandaa lasaa sim nuaa saa nduaa lachi yɛ.
53 Mbo kua a nda yɛlɛkɛlɛɛ,Siooŋii ve nda le.Nduyɛ, mi pee mɛŋma ihɛllo kumbu yaamɔɔwaa ndaa kpu.
54 Mbo huŋ a nda o tanda ndɔ diandaa niŋ,Tanda ŋpembu ndupila hɛli a ba ndɔ kɛndɔɔ wo.
55 Mbo tuau kaala wa nda lachi laŋ.Mbo tuu lɛŋndeŋ mbo piɔu nda le mi le wa nyɛm kɛŋ nda.Mbo tosa mi kaalaŋ o Isɔluɛi niŋ chal o chiɛila ndalaŋ niŋ.
56 Kɛ ma hiau lachi a Mɛlɛka Hiou Kpou Wo simullo,* vɛlɛ a ndu nila kalulaŋ tosallo.Nduyɛ, a yeŋ nilaŋ o loonɔŋnda ndɔlaŋ te.
57 Ma mulul vɛlɛ ndu kɔɔ nduyɛ ma wa sɔɔŋ wɔɔŋndoŋ tosaa maa finyaa ndaa mamaa.
Mɛɛ mɛɛ chiɔuleŋ le yɔŋyɔlaŋ nuaa wana tiindaŋ leŋ te yɛ, lende nda wa ni.
58 Ma hiau lachi a mɛlɛkaa lachoowaa sooluuwo o fondaŋnda filioŋndaŋ, le ndu kɔllo tɛɛmbuuwo.Nduyɛ, ma tosa mbo duaunuŋ tumbe* le piɔmaa nda sɛl la.
59 Mɛɛ Mɛlɛka che hei, mbo duaunuŋ tumbe a nda o kala kala.Le hei, mbo kɛɛ waŋnda Isɔluɛi kpooŋ.
60 O mɛɛlulaŋ kpɔŋ, mbo kɛɛ tɛndii wa Silɔɔ wo,Naa o wa ichali nda tɛɛŋ nda.
61 Mbo chɛl mi yaamɔɔwa bii nyɛ sim le kpaaya ndɔɔ,Vɛlɛ a naŋɔɔ ndɔɔ wo, ma kuaŋnuŋ a ndu.
62 Mbo tosa ma diu wanaa nduaa a muɛi faŋnde,Nduyɛ mbo duaunuŋ tumbe o kala kala a nyɛm kɛŋ ndɔŋ.
63 Mi yiŋndeŋ le luam puaa nduaa feleŋguaa.Nduyɛ chuaa laanduaa yufuaa ndaa, o pilɛ bɛɛ a solul ichondu o nɔ ndɔ kɛsiaa choo le.*
64 Ma diu wanaa nduaa soliaa lasalaa a muɛi faŋnde.Nduyɛ laanduaa nda mɛi ya, o pilɛ bɛɛ cheŋ te.
65 Okoŋ mi Chɛhowa tiandu naŋ chaa o luaŋ o wa ni,Mɛɛ muɛiyaŋ ma kiolu nuaa wana kpaaya bɛndoo o hɔl lɛ.
66 Mbo tuau yaamɔɔwaa nduaa ma miiŋgu pila.Mbo tɛɛmbuu nda labɛɛ le fɛɛŋ a fɛɛŋ.
67 Mbo kɛɛ tɛndii Choosɛ wo,Nduyɛ o hɛli kaaleŋ Ifiluem te.
68 Kɛ mbo hɛli kaale Chuda leŋ,Pembii Saayɔŋ o kaala ve.
69 Mbo taŋgul chiɛi ndɔɔ le mbo viou maa choo choo,Maa lɛŋnde o toosiaa le mi le wa le fɛɛŋ a fɛɛŋ ndeŋ.
70 Mbo hɛli Deeve buɛi ndɔ,Mbo soli ndu o heela saa tɛɛŋ,
71 Naa o wa saa chuauwa mandaa wa.Mbo siiŋguu ndu wana mandaa lasaa le Chekɔpu, koŋ cho ni, wanaa nduaa,Vɛlɛ a Isɔluɛi, nyɛm kɛŋ ndɔŋ.
72 Mbo manda nda a kɔl ndɔɔ kpou,Nduyɛ mbo kua a nda nyɛkɛndɛi.
Tɛɛsiaalaŋ
^ Tofa Tɛɛsiaa.
^ Ɔɔ “nɛi chɔmaa.”
^ Hibuluiye, “la ve la bɛɛndiaŋ.”
^ Hibuluiye, “tɔɔndaŋ.”
^ Hibuluiye, “beediiyo ɔɔ buloo.”
^ Ɔɔ “maalikɛiya.”
^ Ɔɔ “Wana Nda Miŋgiaa Maa.”
^ Hibuluiye, “kumbu.”
^ Ɔɔ “Mɛɛ yoomoo fulaŋ nuaa o miiŋgu lɛ le yɛ.”
^ Hibuluiye, “ba ndɔɔ.”
^ Hibuluiye, “o baŋa nda.”
^ Ɔɔ naapum, “haŋgul tuu kpɛiyo.”
^ Ɔɔ “tɔɔndaŋndo.”
^ Ɔɔ “mbo paŋala nda.”
^ Hibuluiye, “Nduyɛ chuaa laanduaa yufuaa nduaa, o pilɛ bɛɛ a saŋgala le.”
