Sam 81:1-16
O wana sim lachi le chondei yo lo. A mɛɛ Kititi* chomul lɛ. Chondii Asafi ve.
81 La soli chonduŋ kɔl kɛndɔŋ o Mɛlɛka ke naa kpaayaa wo lo.
La soli chondoŋ o Mɛlɛka Chekɔpu wo lo.
2 La kandu chondei solioo mi la lɔɔ dundula pɔmbɔlaŋ,Towa soli diomndo nyɛkɛndɛiyo, vɛlɛ a nyɛm chaaŋ iyooŋ.
3 La hɔŋ bululaŋ o paale naŋ bii bɔŋaŋndo leŋ chooTe paŋgei chɔm pɛ, nduyɛ te i tiilaŋ pɛ.
4 Kanifuule sawaa i cho ni le Isɔluɛiya,Sawa Mɛlɛka Chekɔpu wo dɔu wo.
5 Mbo duau sawaa hoo le yuŋgu Choosɛ wo loonɔŋndo,Boondii o kɔ chiŋalaŋ lɛŋnde Ichipi leŋ ndo.
Mi tuɛi diomndo,* kɛ i bii bila le. Mbo dimi aa:
6 “I faŋa ndu wolɔɔla lusulɛilaŋ o choŋgu,Nduyɛ mi bii ndu kambɛiyo o ba.
7 A wa o nyɛpalaa niŋ ma nyuna ya diom, nduyɛ mi piŋi num.Mi mulul num o yumbu yumbu taŋndaŋ ma wa deŋioo wo niŋ.
Mi tɔɔndaŋ num o mɛŋndaŋ Mɛluiba.*
8 Wanaa niaa, la yaŋ ya nilaŋ mi timbul nya seileŋ.
Oo Isɔluɛi, o bɛnda bɔɔ mi la yaŋ ya nilaŋ.
9 Mɛlɛka cheleŋ nɔ mbo wa nya tɛɛŋ te,Nduyɛ la nɔ mi la beŋ mɛlɛka cheleŋ wulaŋ te.
10 Ya Chɛhowa, ya cho Mɛlɛka numndo ni.Ya soli num o lɛŋnde Ichipi leŋ niŋ ni.
Kumbi sondo numndo wakpa mi pei ndu cha a nyɛdiaa.
11 Kɛ wanaa niaa yeŋ ya lani le.Isɔluɛi tusiŋ ya o ba bɛŋgu le.
12 Le hei, mi mal nda o ba ndaa choo le nilakalula ndalaŋ.Ma tosa nyɛ nda yiyaŋ maa o cho o kɛndɛ nda o hɔllo.
13 Te ndoo yɔŋ pɛ mi wanaa niaa ndaa yaŋ ya nilaŋ,Nduyɛ mi Isɔluɛi ndoo kuɛ o nɛila nilaŋ choo,
14 I wa yaamɔɔwaa ndaa chiŋalaŋ chɔ chɔ a kpaaya ni bɛndoo,Nduyɛ mi yaa yem nda.
15 Wanaa tul Chɛhowa leyɛ wa cho nyiiya ndu lachi,Nduyɛ fulamakɔɔli wɔɔŋ ndaa cho wa lefafɛɛŋ.
16 O cho num* ke witiiŋ kɛndɛ kɛndɔŋ*Nduyɛ mbo ke num liaaŋ fulaa o pouwo niŋ, ma de ma pim cha.”
Tɛɛsiaalaŋ
^ Tofa Tɛɛsiaa.
^ Ɔɔ “suɛi maŋgalɛi.”
^ O sim, “Sɛɛŋgiaŋndo.”
^ Hibuluiye, “ndu,” koŋ cho ni, wanaa Mɛlɛkaa.
^ Hibuluiye, “witiiŋ machuɛiyoŋ.”
