Sam 86:1-17
Piɛile Deeve leŋ.
86 Oo Chɛhowa, yaŋ ya nilaŋ,* ma muli ya diom.Kanifuule I cho o nyɛ nɛiyaa niŋ, nduyɛ wana bala fondoo ya cho ni.
2 Manda yoomu nuu, kanifuule I chɔm num lo lechoo wo.
Manda buɛi num dɔu tiindaŋndo o num niŋndo,Kanifuule num cho Mɛlɛka nuu ni.
3 Oo Chɛhowa, tuiinuŋ ya inyiɛɛ,Kanifuule I niilu chaŋndo kpɛŋ naa num chua.
4 Oo Chɛhowa, tosa mi buɛi numndo dɔɔnuŋ nyaale,Kanifuule o numndo ya muliŋ ni.
5 Oo Chɛhowa, a cho bɔɔ wana kɛndɛ, nduyɛ a cho o bɛɛndiaŋ teleŋ o teleŋ le ma mal haki.Ma chɔm kaala lo lechoo wo o wanaa nyuna num le malaa wa lo teleŋ o teleŋ.
6 Oo Chɛhowa, yandii yaŋ nilaŋ o piɛile nileŋ,Nduyɛ ma tuei chaŋ ya cho naa num chua le malaa wo.
7 Te I wa pɛ o nyɛpalaa niŋ, o numndo ya muliŋ ni.Kanifuule, I sina maa a cho ya diom tueiyɔɔ.
8 Oo Chɛhowa, mɛlɛka kɛ kɛ cho maa num te,Nduyɛ wana o wana nɔla mbo tosa walta kɔndɔfiltaŋ mbo sulaŋ maa num te.
9 Oo Chɛhowa, wanaa ŋ toosiaa o lɛŋndeŋ choo wa kpou,A cho hunɔɔ num lachi ma beŋ num wulaŋ,Nduyɛ ma ke diola numndaŋ bɛɛleŋ.
10 Kanifuule a nɔ bɔɔ kpaayaa, nduyɛ ma tosa walta kɔndɔfiltaŋ.Numpilɛ kpe cho Mɛlɛka ni.
11 Oo Chɛhowa, pɛɛku ya nɛila numndaŋ,
Le mi kuɛ o tonyaa choo.
Ke ya kɔl cho o piɔuwaŋ te wo,* le mi nɔ siooŋnde le diola numndaŋ.
12 Oo Chɛhowa Mɛlɛka nuu, I cho num saŋgala a kɔl nuu kpou,Mi ke diola numndaŋ bɛɛleŋ le fɛɛŋ a fɛɛŋ.
13 Kanifuule, kaala lo lechoo ŋ chɔm ya wo cho bɔɔ o bɛndu.Nduyɛ a piŋi yoomu nuu o Sɛi* yiŋgilɛiyo niŋ.
14 Oo Mɛlɛka, wanaa heelaŋnda simul la.Kunda wanaa dɛnɛ wɔɔŋnda yeema ma dii ya,Nduyɛ kposoŋ bɛɛ a nɔ lebɛɛ le num te.*
15 Kɛ num Chɛhowa, Mɛlɛka nɔ nyiɛɛye a kɛndɛiyo ŋ cho ni.A cho wana dɔɔnuŋ tumbe chɔ chɔ le, nduyɛ kaala lo lechoo numndo cho bɔɔ. Le teleŋ o teleŋ, tonyaa ŋ dimi ni.
16 Mulul la hɔlla nduyɛ ma tuiinuŋ ya inyiɛɛ.
Ke buɛi numndo kpaayaa,Ma manda po buɛi num laandoo.
17 Chɔm ya tamasioo le sinaa maa a cho wana kɛndɛ,Le halikpeŋ mi wanaa tul la leyɛ wa che ndu, okoŋ mi siɔmbulaŋ la bii nda.
Kanifuule num Chɛhowa, num cho wana ni malaa a wana dɛɛniaa ya kɔllo wo ni.
Tɛɛsiaalaŋ
^ Ɔɔ “tunduŋ ma yaŋ ya nilaŋ.”
^ Hibuluiye, “Ke ya kɔllo o pilɛ.”
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
^ Ɔɔ “a kɛsiŋ num nda lachi le.”