Sam 9:1-20
O wana sim lachi le chondei yo lo, a mɛɛ Muti-labɛŋ* chomul lɛ. Chondii Deeve ve.
א [Alɛfi]
9 Oo Chɛhowa, I cho num saŋgala a kɔl nuu kpou.I cho waŋnda dimul a walta numnda kɔndɔfiltaŋ okɔɔ kpou.
2 I cho nyaaloo dɔɔnɔŋ, nduyɛ mi wuu kpeŋjoo le num.Oo Mɛlɛka Hiou Kpou Wo, I cho chondoŋ soli le diola numndaŋ.
ב [Bɛti]
3 Te yaamɔɔwaa niaa nyaanuŋ ya pɛ,A cho ya deli lachi ma sɔla tambei.
4 Kanifuule, num suŋgu le ya ni ma ke ya dioo.A cho ichali o kpeŋgbei* num lemasaa choo, ma kialu yamaŋ o nɛi sakpoo choo.
ג [Kimɛɛ]
5 A sila kaalaŋ sila tuu kpɛiyo, ma tɛɛmbuu wanaa dɛnɛ wɔɔŋnda,Nduyɛ ma wɔɔsuu diola ndalaŋ le fɛɛŋ a fɛɛŋ.
6 Yaamɔɔwa sɔla tambei le fɛɛŋ a fɛɛŋ.Ma tɛɛmbuu chieeŋ ndaŋ bɛndoŋ kpata kpata,Fɛɛŋ bɛɛ wana yiyaŋ ndɛ a nda okɔɔ le.
ה [Hee]
7 Chɛhowa cho wa masaa le fɛɛŋ a fɛɛŋ.O chal o kpeŋgbei ndɔ lemasaa choo, mbo kialu yamaŋ o sandei choo.
8 O cho hunɔɔ waŋnda o lɛŋndeŋ choo yamɛi kilul o nɛi sakpoo choo,Nduyɛ mbo kilul kaalaŋ yamɛi o nɛi sakpoo choo.
ו [Wau]
9 Chɛhowa cho simnɔŋ naa viaŋnaŋaa kala kalaa le wanaa nda cho nyɛkindilaa handɔɔ choo wa,Mbo simnuŋ naa viaŋnaŋnda a teleŋ kpundɔɔ.
10 Wanaa sina diola numndaŋ nda cho tiindaŋ ndaa dɔwɔɔ o num niŋ.Oo Chɛhowa, fɛɛŋ bɛɛ a mel wanaa cho num nuuviaa wa le.
ז [Sayiŋ]
11 La soli chondoŋ le Chɛhowa, Mɛlɛka cho ichali Saayɔŋ ndo.La tosa mi waŋnda sina a walta ndɔlaŋ okɔɔ.
12 O cho loonɔŋ a wanaa nda cho nyɛkindilaa tusioo choo wa, mbo miŋgi maa le yoomula ndala nda tɛɛmbuu laŋ.Nduyɛ, o puɛɛnuŋ a chaŋ nda cho naa ndu chua le malaa wo le.
ח [Hɛti]
13 Oo Chɛhowa, tuiinuŋ ya inyiɛɛ. Chɔ nyɛkindilaa wanaa tul la leyɛ wa cho ya handɔɔ choo wo.Num soli ya piɔmndo o sondo ni,
14 Le mi soo a walta numnda chuu num saŋgalaa laŋ okɔɔ o diola kpakila waŋnda Saayɔŋ,Nduyɛ mi dɔɔnuŋ nyaale a walta numnda piŋiaa laŋ.
ט [Tɛti]
15 Kaalaŋ la deli o sooŋ ndapila tou wo niŋ,Nduyɛ mi peluŋ ndaŋ hau o yala nda kɛsi maa leyaŋɔɔ wo niŋ.
16 Waŋnda sina Chɛhowa a yamaŋ o kialu woŋ okɔɔ.
Wana dɛnɛ wɔɔŋndo hau o walta ndupila tosa laŋ niŋ.
Hikayɔŋ.* (Sila)
י [Yodi]
17 Wanaa dɛnɛ wɔɔŋnda cho miiŋgu o Sɛiyo* niŋ,Kaala puɛɛnuŋ a Mɛlɛka laŋ bɛɛ, loŋ laŋ kpou cho lakɔ ni.
18 Kɛ wanaa bala fonduaa nda, fɛɛŋ bɛɛ Mɛlɛka puɛɛnuŋ a nda le.Nduyɛ, fɛɛŋ bɛɛ tiindaŋ wanaa tusiaŋnda nɔ wo tembu niŋ te.
כ [Kafi]
19 Oo Chɛhowa, chɔŋ! Chɛl mi wanachioo yem te.
Maa kaalaŋ kpou la sim num o hɔl ma kilul taŋ yamɛi!
20 Oo Chɛhowa, tosa mi siooŋii bɛnduei bii nda.Maa kaalaŋ kpou la sina maa waŋnda chieeya koni nda cho ni. (Sila)
Tɛɛsiaalaŋ
^ Tofa Tɛɛsiaa.
^ Ɔɔ “kpɛŋɛ.”
^ Tofa Tɛɛsiaa.
^ Ɔɔ “Siɔl.” Koŋ cho ni, sɛila waŋnda chieeya kpou. Tofa Tɛɛsiaa.
