Sam 92:1-15
Chondei le solioo o Paale Pɛŋgiaaleŋ choo.
92 I cho bɔɔ suɛi kɛndɛ le Chɛhowa balikaa mello.Oo Mɛlɛka Hiou Kpou Wo, i cho suɛi kɛndɛ le chondoŋ solioo* le diola numndaŋ saŋgalaa,
2 Le suɛi a kaala lo lechoo numndo okɔɔ idii,Vɛlɛ a mɛɛ ŋ cho Mɛlɛka tonya yɛ okɔɔ ichɔl.
3 Le hei tosaa, i cho wa nyɛchaa nɔ yuei tɔ wo lɔɔ, towa diom kɛndɛ kɛndɔɔ,Vɛlɛ a sɛŋndeŋ hɔŋndo.
4 Kanifuule num Chɛhowa, walta numndaŋ la tosa mi duaunuŋ nyaale.Walta ŋ tosa a bala numndaŋ ndaŋ la tosa mi deŋi choo choo a nyaaloo.
5 Oo Chɛhowa, nuawɔ se mɛɛ walta numndaŋ la cho la bɛndu yɛ!
Nuawɔ se mɛɛ yiyaŋnda numndaŋ la yiŋgila yɛ!
6 Wana yiyaŋ o isɔɔ choo le wo nɔla mbo sina laŋ te,Nduyɛ diɔm kɛ kɛ nɔla mbo bii hei bila le.
7 Te wanaa dɛnɛ wɔɔŋnda wa pɛ kuiyo maa bil,Mi nyɛ o nyɛ wa o kɛndɛ a wanaa tosa sɔɔŋ wɔɔŋndoŋ nda kpou,Fulamakɔɔlioo cho ni maa a cho tambei sɔla le fɛɛŋ a fɛɛŋ.
8 Kɛ num Chɛhowa, a nɔ kpaayaa nyɛ o nyɛ fee choo le fɛɛŋ a fɛɛŋ.
9 Oo Chɛhowa, tofawɔ yaamɔɔwaa numnda o delioo.A tonya, yaamɔɔwaa numnda cho tambei sɔla.Wanaa tosa sɔɔŋ wɔɔŋndoŋ nda kpou cho sɛŋiŋ.
10 Kɛ a cho kpaaya nuu* soli tɔɔ mɛɛ chiiyo fula nuaa tɔɔ le kpaayaa yɛ.I cho chuɛiyaŋ suiinɔŋ le dialuŋ nuŋ niŋgilaa.
11 I cho yaamɔɔwaa niaa chɔ o delioo a lehɔl pɛɛŋ.Te yaamɔɔwaa niaa simul la wa sɔla pɛ tambei, I cho tueiyɔɔ a ndi okɔɔ.
12 Kɛ dɛnɛ kɛndɔɔ wa niŋ le wanaa cho sakpo wa mɛɛ wauwo yɔŋgu nuaa kɔmndeŋ yɛ,Nduyɛ ma simnuŋ a bɛndu maa yɔmii sida ve Lebanɔŋ.
13 A cho a tualaa o chiɛi Chɛhowa wo,Ma wa kɔmnde kɛndɛleŋ yɔŋgoo o luŋ chiɛi Mɛlɛka naa.
14 O yuuwɛi ndɛi niŋ bɛɛ, a cho wa kɔmndeŋ yɔŋgoo.A cho hiouwɔɔ lachi a dialuŋ kalaŋ nɔɔ ma wa niŋgilaa,
15 Okoŋ ma hiou lachi a dimioo maa Chɛhowa cho sakpo.
Ndu cho Pou Kpoowa nuu ni, nduyɛ fɛɛŋ bɛɛ o tosa lakafa le.
