Sam 94:1-23
94 Oo Chɛhowa, Mɛlɛka miŋgi maa wo,Oo Mɛlɛka miŋgi maa wo, chɔm wana suu ŋ cho wo!
2 Num Mɛlɛka kilul lɛŋndeŋ yamɛiyo, chɔŋ!
Tusi wanaa heelaŋnda nyɛpalaa choo le nyɛ nda tosa wo.
3 Oo Chɛhowa, le vɛɛ kpɛ wanaa dɛnɛ wɔɔŋnda cho yɛ hiouwɔɔ lachi,A waa a kɔl kɛndɛ? Le vɛɛ kpɛ?
4 A cho sɔɔŋ bɛndoŋ dimioo ma kialu yoŋgaa.Wanaa dɛnɛ wɔɔŋnda kpou cho heelɔŋndo.
5 Oo Chɛhowa, a cho wanaa numnda bɛɛlaŋ tɛɛmbuuwo,Nduyɛ ma tusi nyɛm kɛŋ numndoŋ nyɛpalaa choo.
6 A cho waŋ laanduaa vii piaanduaa wa, mialla,Vɛlɛ a chuauwaa nɔ lɛ ŋfinya le wa diuwo.
7 A cho dimioo aa: “Chɛhowa cho chɔ le.Mbɔ Mɛlɛka Chekɔpu wo sina nyɛ o nyɛ a hei okɔɔ le.”
8 Nya wanaa kendu haa isɔɔ bila biyɔɔ wa, la sina hei pɛŋgu.Nya diɔmnda haa, teleŋ kuɛɛ nya cho yɛ taasioo sɔla?
9 Baa wana toosiaa* nileŋ ndo nɔla mbo tuei le?
Baa wana toosiaa hɔlteŋ ndo nɔla mbo che le?
10 Baa wana miŋgi kaalaŋ kpou o nɛiyo nɔla mbo sila num te?
Ndu tosa ni mi waŋnda nɔ sinapɛŋgoo!
11 Chɛhowa sina yiyaŋnda waŋnda chieeya,La cho ko ndu o hɔl maa hueiyii yoomaa.
12 Oo Chɛhowa, kɔl kɛndɔɔ cho le wana ŋ miŋgi o nɛi,Nduyɛ ma pɛɛku ndu sawala numndaŋ ndo,
13 Le halikpeŋ ma ke ndu pɛŋgioo a teleŋ nyɛpalaa,Haaa mi sooŋndo chuu touwɔɔ le wanaa dɛnɛ wɔɔŋnda.
14 Kanifuule Chɛhowa kɛɛ wanaa nduaa le,Kɛlɛŋgaa niŋ te mbo mal nyɛm kɛŋ ndɔŋ.
15 Yamaŋ cho vɛlɛ miiŋgu kiolɔŋndo o nɛi sakpoo choo,Nduyɛ mi wanaa cho sakpo o kɔlta ndalaŋ niŋnda kpou chɛl muŋ.
16 O nɛɛnɛ cho yɛ chɔnɔŋ mbo chiŋalaŋ wanaa dɛnɛ wɔɔŋnda le ya?
O nɛɛnɛ cho yɛ wanaa tosa sɔɔŋ wɔɔŋndoŋ nda simul le ya?
17 Te Chɛhowa ndoo ve wana mala ya wo le,Maa yaa sɔla niŋ piɔmndo.*
18 Oo Chɛhowa, mɛɛ ya dimi aa: “I siɛɛla,”
Ma hiau lachi a ya kaala lo lechoo numndo chɔmndo.
19 Mɛɛ buulaŋndaŋ la pɛ ya o kɔl cha,Num dɛɛniaa ya kɔllo ni, mi sinaŋ nyɛkɛndɛi.
20 Baa kpeŋgbei* lakafaa nɔla pa mbo wa o naaŋaŋndo niŋ a num?Kanifuule nda soliŋ sawaa kpeku ni le kpundɛlaŋ mɛlioo.
21 Ma chiŋalaŋ wana cho sakpo wo a hiilɛi,Nduyɛ ma kilul wana tosa isɔɔ le wo yamɛi le ndu diyɔɔ.
22 Kɛ Chɛhowa cho simnɔŋ fondaŋ kala kala ya viaŋnuŋndo,Mɛlɛka nuu cho pou kpoowa ya viaŋnuŋndo ni.
23 O cho tosa mi dɛnɛ nda wɔɔŋndo miŋgulaŋ nda,
O cho nda basɔɔ tɛɛ* le dɛnɛ nda wɔɔŋndo.
Chɛhowa Mɛlɛka naa cho nda basɔɔ tɛɛ.*
Tɛɛsiaalaŋ
^ Hibuluiye, “tɔl.”
^ Hibuluiye, “meinuŋ niŋ kpili.”
^ Ɔɔ “masa.”
^ Hibuluiye, “O cho tosa ma mei doŋ.”
^ Hibuluiye, “cho tosa ma mei doŋ.”