Walta Kiilaa 25:1-27
25 Mɛɛ Fɛsitɔɔ fuuluu o buŋgɛi keŋ niŋ, palɛi i yaa okoŋ kɔɔli, mbo chaŋ Sisaliaa mbo kua Chulusalɛm.
2 Mi masaa wanaa soliaa lasalaa, a wanaa bɛnduaa Chuuwa dimul ndu sɔɔŋ a Pɔɔl okɔɔ. Ma kandu ndu dɛɛniaa
3 le mbo tosa mi Pɔɔl hiŋ Chulusalɛm. Kɛɛsiaa ndaa wa ni, le ma kei Pɔɔl delɔɔ choo o nɛi ma dii ndu.
4 Kɛ mi Fɛsitɔɔ dimul nda maa Pɔɔl nɔ mbo wa Sisaliaa, nduyɛ maa ndupila cho miiŋgu loŋ suŋ.
5 Mbo dimi aa: “Lelaŋ, wanaa nyaa bɛnduaa kɔ a ya latulu. Te Pɔɔl tosa pɛ isɔɔ o isɔɔ wɔɔŋ, a kɔ ma kɔ chɔm suɛi nduɛi loŋ.”
6 Mɛɛ o chii palɛi i ŋɔmaa ɔɔ tɔ a nda latulu, mbo miiŋgu Sisaliaa. Diimandɔɔ, mbo chal o kpeŋgbei* lemasaa choo, mbo dimi le ma hiŋ a Pɔɔl.
7 Mɛɛ Pɔɔl hiŋ, mi Chuuwaa chɛŋ Chulusalɛm nda huŋ sim ma balu ndu silɔ. Ma hɛɛnduu ndu sɔɔŋ wɔɔŋ wɔɔŋndoŋ choo, kɛ a nɔla ma chɔm maa nyɛ nda dimi wo cho tonya le.
8 Mi Pɔɔl kandu kɔɔsaa aa: “I tɛɛmbuu Sawa maChuu le. I tosa suɛi wɔɔŋ a chiɛi Mɛlɛkaa le, kɛlɛŋgaa niŋ te mi tɛɛmbuu isɔɔ a Siisa.”
9 Fɛsitɔɔ ndoo yeema mbo nɛŋi Chuuwa kɔl. Le hei, mbo nyuna Pɔɔl aa: “A yeema ma kuɛ Chulusalɛm, ma kɔ kɔɔsa ya o hɔl loŋ a sɔɔŋ muŋ okɔɔ?”
10 Kɛ mi Pɔɔl dimi aa: “O kpeŋgbei lemasa Siisa wo lachi ya cho isisi nuaa ni, naa nda nɔ ma kɔɔsa ya wa. I tosal Chuuwa suɛi wɔɔŋ te. Numpila bɛɛ kandu niŋ ndi sinaa walaŋ.
11 Te ndoo wa pɛ aa wana wɔɔŋndo kpeekpei ya cho ni, nduyɛ mi yaa tosa suɛi wana sɔla piɔm le ndi pɛ, I ve kɛɛ le ya diyɔɔ le. Kɛ te nyɛ o nyɛ ve le chɔmndo maa sɔɔŋ waŋnda haa hɛɛnduu ya choo woŋ cho tonya le, mɛɛ wana o wana nɔ di mbo mal la nda o ba le nda kɔllo nɛŋioo le. Hivi suɛi nii o Siisa lo!”
12 Mɛɛ Fɛsitɔɔ naŋgu nda laŋgbaa nduaa kalla, mbo dimul Pɔɔl aa: “Mɛɛ ŋ yeema mi suɛi numnde kuɛ o Siisa lo yɛ, mɛɛ a cho lakɔ o Siisa lo.”
13 Mɛɛ palɛi hiou itiŋ, mi masaa Akilipa nda Bɛnisi huŋ Sisaliaa le Fɛsitɔɔ yilɔɔ lemasaa.
14 Le mɛɛ nda wa viouwɔɔ loŋ le palɛi faŋga yɛ, mi Fɛsitɔɔ chɔm masaa suɛi Pɔɔl ve aa:
“Po pum cho nanuŋ mi Felisi mɛi ndu o biyɔɔ niŋ.
15 Teleŋ ya wa Chulusalɛm ndo, mi masaa wanaa soliaa lasalaa a laŋgbaa kalaa Chuuwa dimul la sɔɔŋ a ndu okɔɔ. Ma dimi maa ya yaala ndu.
16 Kɛ mi dimul nda maa sawa maLuomaŋndo dimi lende le. A yaala waŋndo le waŋnda kɔllo nɛŋioo le, mɛɛ ma hiŋ fɛlɛŋ ma kɔɔsa vellaa velle nda ndaa ma chɔm suɛi wana koŋ tɛɛmbuu ve.
17 Lelaŋ mɛɛ nda fuuluu nanuŋ, I dounuŋ tamala le. Diimandɔɔ, mi chal o kpeekpei lemasaa choo, okoŋ mi dimi maa a huŋ a ndu le kɔɔsɔɔ.
18 Mi wanaa hɛɛnduu ndu sɔɔŋ choo wa sim ma kandu suɛi. Kɛ sɔɔŋ nda chɔm ndoŋ kinɛi, ipilɛ bɛɛ cho suɛi wɔɔŋ mɛɛ yaa nɔ o kɔl lɛ le.
19 Diomndaŋ koni nda hiŋaŋ nda ndaa ni a nɛi nda lepiɛiyo okɔɔ, nduyɛ a po nda veelu aa Chiisu wo, o vi kɛ mi Pɔɔl ndu wa dimioo maa o cho yoomu wo.
20 Taasi bɛɛ yaa nɔ mɛɛ ya bii suɛi hei yɛ le. Lelaŋ, mi nyuna Pɔɔl te o yeema pɛ le kɔlaŋ Chulusalɛm mbo kɔ kɔɔsa loŋ o suɛi hei choo.
21 Kɛ mi Pɔɔl dimi maa o yeema mbo wa pɔɔ o biyɔɔ niŋ le mi Masa Bɛndoo dimi suɛi nduɛi. Le hei, mi tosa le ma wa ndu hɔlteŋ choo haaa mi yɔŋ ndu o Siisa lo.”
22 Okoŋ mi Akilipa dimul Fɛsitɔɔ aa: “Ya bɛɛ, I yeema mi yaŋ ndu nilaŋ.” Mi Fɛsitɔɔ dimi aa: “Siɔdii a cho ndu nilaŋ yaŋɔɔ.”
23 Diimandɔɔ, mi Akilipa nda Bɛnisi huŋ o toŋgo kɔɔsɔɔ niŋ a pɛɛlɔŋ bɛndoo. Ma luɛi latulu nda wanaa cho puaa chɔuwa bolleŋ nda, a wanaa tɔɔ bɛnduaa o chioo niŋ. Okoŋ mi Fɛsitɔɔ dimul waŋnda ma huŋ a Pɔɔl.
24 Mi Fɛsitɔɔ dimi aa: “Masaa Akilipa a nya wanaa chuuŋgiaŋ haa nanuŋ nda kpou, la tofawɔ poo hoo. A ndu okɔɔ Chuuwa Chulusalɛm a haa nanuŋ kpou wa deŋioo choo choo ni, ma dimul la maa o nɔ mbo wa yoomu le.
25 Kɛ mi saaluŋ maa o tosa suɛi wɔɔŋ kɛ kɛ o sɔla piɔm le ndi le. Lelaŋ, mɛɛ poo hoo dimi maa suɛi nduɛi kɔ o Masa Bɛndoo lo, ya bɛɛ mi kɛɛsiaa le ndu yɔɔ loŋ.
26 Kɛ I nɔ nyɛ kpeekpei ya poonyiaa o Masaa lo a ndu okɔɔ le. Le sabu koŋ ya hiŋ a ndu nya kpou o hɔl ni, taama taama num Masaa Akilipa, le ma yaasiaa suɛi hei fɛsɛ fɛsɛ. Te i chuu pɛ yaasiaa, I nɔla niko mi sɔla nyɛ ya poonyiaa o Masaa lo wo.
27 Kanifuule, i ve suɛi taasi le ya, le wana cho o biyɔɔ niŋndo yɔŋndo lende I chɔm sɔɔŋ o tɛɛmbuu woŋ te.”
Tɛɛsiaalaŋ
^ Ɔɔ “kpɛŋɛ.”
