Walta Kiilaa 27:1-44
27 Mɛɛ nda kɛɛsiaa maa naŋ kɔ Itali, Pɔɔl ni, wanaa cheleŋ wa o chiɛi manyumndo niŋnda ni, ma chua nda ma yɔŋgu wana bɛndu puaa chɔuwa opum diolaŋ aa Chuliɔɔ, le mbo kuɛ a nda. O kunda puaa chɔuwaa nɔ diolaŋ aa Ɔkɔɔstɔɔ wo choo o wa ni.
2 Miŋ luɛi o dɛndɛ bɛndu chɛŋ Adamiitiɔm ndo niŋ. O wa kɔlaŋ o fondaŋnda dɛndɛlaŋ la sim o buŋgɛi Eesiaa ve niŋndo. Okoŋ miŋ kandu kɔlaŋ. Po pilɛ wa a naa latulu diolaŋ aa Aluitakɔɔ, fulaa Tɛsalonaika, o buŋgɛi Masidooniaa ve niŋ.
3 Diimandɔɔ, miŋ fuuluu Saidɔŋ. Mi Chuliɔɔ bii Pɔɔl nyɛkɛndɛi. Mbo chɛl ndu le mbo kuɛ o chaaŋaa nduaa lo le ma mala ndu.
4 Mɛɛ naŋ chɛŋ loŋ, miŋ diam kɔŋgɔɔ Saipulɔɔ, kanifuule kpeŋgii naŋ wa kɔlaŋ nde hueiye wa chɔnɔŋndo a hɔŋndo ni.
5 Okoŋ miŋ taŋ mɛŋma ihɛllaŋ, miŋ keeku Siliisiaa a Pamfiliaa choo, miŋ kɔ sim Mailua o Liisiaa niŋ, naa dɛndɛlaŋ la sim nda.
6 Loŋ wana bɛndu puaa chɔuwa che dɛndɛ bɛndu fula Alɛkisandiliaa wo ni. O wa kɔlaŋ Itali. Mbo luei naa leniŋ.
7 Le palɛi bɔɔbɔɔ ŋ wa kɔlaŋ o mɛŋndaŋ choo dɛɛ. I wa ikala le fuuloo Kanaidɔɔ, kanifuule hueiye wa naa paaliaŋndo. Okoŋ miŋ demul Kilɛti o fondaŋ pilɛ diolaŋ aa Salmɔɔni.
8 Mi che bɛɛ i wa ikala le kɔŋgɔɔ holnɔŋndo, kɛ a koŋ kpou, miŋ huŋ o fondaŋ pilɛ diolaŋ aa Naa Kɛndiaa Dɛndɛlaŋ la Sim nda, o chiee bɛndoo Lasiaa ikɛi.
9 Miŋ viau loŋ tiŋ chalaŋ. Nduyɛ o ve lɛ teleŋ kɛndɛ le mi dɛndɛlaŋ la kuɛ o mɛŋndaŋ choo le, kanifuule sum nda bii o Paale Malaa Lahakileŋ choo wo ndoo chuunuŋ niŋ. Le hei, mi Pɔɔl huŋ a kɛɛsiaa.
10 Mbo dimul nda aa: “Chaaŋaa niaa, a mɛɛ ya cho chɔɔ yɛ, te ŋ hiou pɛ lachi a kɔlaŋ, ŋ cho delɔɔ o kpundɔɔ niŋ. Nduyɛ o cho ko wolɔɔlaŋ a dɛndɔɔ le cho tambu le, kɛ yoomula naalaŋ bɛɛ.”
11 Kɛ wana bɛndu puaa chɔuwa yeŋ Pɔɔl lani le. Wana wa kɔlaŋ a dɛndɔɔ wo a wana nɔ dɛndɔɔ wo koni o yaŋ nilaŋ ni.
12 Naa dɛndɛlaŋ la sim kaŋ nda ve fondaŋ kɛndɛ le sialteŋ hivioo le. Le hei, mi wanaa bɔɔbɔɔ kɛɛsiaa maa ŋ faŋaŋ loŋ miŋ kɔ hivi sialteŋ Foniisi, o fondaŋ dɛndɛlaŋ la sim o Kilɛti niŋndo. Naa paaleŋ le chaŋ kpeŋgii baluaŋnde a kpeŋgii ba tou ve wo tɛɛŋ Foniisi cho ni.
13 Mɛɛ hueiyii fɛ fɛi kandu hɔŋndo chɔnɔŋndo ba touwo, ma yiyaŋ maa a cho fuuluu o fondaŋ nda wa kɔl lo. Le hei, ma timbi dɛndɔɔ, ma kandu kɔŋgɔ Kilɛti wo diomɔɔ.
14 Kɛ o viu bɛɛ le, mi hueiyii fuku fukuii pum diolaŋ aa Yuluakilo* kandu hɔŋndo.
15 Mi i kandu dɛndɔɔ hiiluu wɔɔŋ wɔɔŋndo. Mɛɛ naŋ bumba le ndu bolleŋ simioo naa hueiye wa fulaa wa, mi naa bɛɛ mal. Okoŋ, mi i kandu niko naa nyindɔɔ.
16 Miŋ diam kɔŋgɔ lɛŋnde ibuŋgaleŋ diolaŋ aa Kauda. I wa ikala le miŋ manda dɛndɛ pɔmbɔ wa o dɛndɛ bɛndoo amakɔɔ wo.
17 Mɛɛ naŋ heelu ndu o dɛndɛ bɛndoo niŋ, ma bayiaa ndu yuei le dɛndɛ bɛndoo mandaa. Ŋ wa siooŋnde yɔŋii dɛndɔɔ ndoo kɔ chal o siooŋii kundɛi choo Siaati.* Le hei, ma yɔŋyɔla yuei kua a dɛndɔɔ ve, okoŋ mi hueiye wa kɔlaŋ a ndu nyindɔɔ.
18 Le mɛɛ hueiye wa dɛndɔɔ hiiluuwo yokpaŋ yokpaŋ yɛ, diimandɔɔ ma kandu wolɔɔla wa o dɛndɔɔ niŋndaŋ vii viiyo.
19 O paale yaa ndɔleŋ choo, mi ndapila vii vii nyɛm dɛndɔɔ ŋtiŋ.
20 Le palɛi bɔɔbɔɔ, naŋ chi paaleŋ a looŋ te. Nduyɛ hueiye wa dɛndɔɔ hiiluuwo kpeekpei. Miŋ yiyaŋ maa ŋ nɔ lɛ tiindaŋ naŋ chinda le.
21 Mɛɛ palɛi bɔɔbɔɔ hiou a ve nyɛdiaa dio le, mi Pɔɔl chaŋ mbo sim nda tɛɛŋ. Mbo dimi aa: “Chaaŋaa niaa, te nyaa yaŋ ya pɛ nilaŋ mi naŋ feŋaŋ Kilɛti le, ŋ ve saŋga mi nyɔɔŋ muŋ kpou muŋ tambu naa o ba nuaa le.
22 Kɛ a koŋ kpou, la bii kɔlta nyalaŋ, kanifuule wana pilɛ bɛɛ cho nyɛ yɔŋnɔŋ te. Dɛndɔɔ koni cho tambu ni.
23 Chɔchɔl, mi maalikɛinɔ Mɛlɛka nuu, o ya cho wallo le ndu wo huŋ sim ya ikɛi,
24 mbo dimi aa: ‘Yɔŋ isiooŋ te Pɔɔl. A cho lakɔ isisi Siisa o hɔl. Nduyɛ Mɛlɛka cho tosa wanaa nya cho kɔlaŋ nda kpou yɔŋnuŋ niŋ nyɛ le.’
25 Lelaŋ, la yɔŋ isiooŋ te chaaŋaa niaa. I laalaŋ maa Mɛlɛka cho sɔɔŋ muŋ tosa mɛɛ mɛɛ maalikɛinɔɔ dimul la yɛ.
26 Kɛ nduyɛ, ŋ nɔ miŋ kɔ hau o kɔŋgɔ lɛŋnde ibuŋgale pum.”
27 O paale 14 leŋ choo ichɔllo, hueiye wa hiouwɔɔ lachi a naa hiiluuwo o mɛŋma ihɛllaŋ Ediliaa choo. A ditɛɛŋndo kinɛi, mi wanaa wa kɔlaŋ a dɛndɔɔ wa yiyaŋ maa a cho niŋ fuuluuwo o lɛŋnde ibuŋgaleŋ lepum ikɛi.
28 Okoŋ ma mal yooleŋ le sinaa mɛɛ mɛŋndaŋ ma yiŋgila yɛ. Ma saaluŋ maa yiŋgila ndɔɔ cho le nɛiyo 120.* Mɛɛ nda kuɛ sii, ma mal vɛlɛ yooleŋ. Ma saaluŋ maa yiŋgila ndɔɔ cho le nɛiyo 90.*
29 A wa siooŋnde yɔŋii dɛndɔɔ kɔ kunduŋ o poutaŋ. Le hei, ma tusi nyɛla simi dɛndɔɔ laŋ la hiɔɔlu o tumndo. Ma chal niko chumndo le mi paaleŋ le sel nda.
30 Mi wanaa wa kɔlaŋ a dɛndɔɔ wa tosa le dɛndɛ pɔmbɔɔ tusioo o mɛŋndaŋ choo, le ma luɛi leniŋ ma kuɛŋnuŋ. Kɛ ma tosa ndi naŋ chaa nyɛla simi dɛndɔɔ laŋ nda cho tusioo ni.
31 Mi Pɔɔl dimul wana bɛndu puaa chɔuwa a puaa chɔuwa aa: “Te o cho mi puaa haa lo o dɛndɔɔ niŋ te, la cho pioŋɔɔ sɔla le.”
32 Okoŋ mi puaa chɔuwa kili kili yuei dɛndɛ pɔmbɔɔ, mi dɛndɔɔ del o peelo.
33 Mɛɛ paaleŋ le hiŋ le siɔɔ, mi Pɔɔl dɛɛniaa nda kpou le ma de nyɛdiaa pɔmbɔ. Mbo dimul nda aa: “Hau peelu palɛi 14 ni la cho chumndo tuŋ, nduyɛ la di wɔ nyɛ o nyɛ le.
34 Lelaŋ, I cho nya dɛɛniaa le mi la de nyɛdiaa, mi la miiŋgu yoomuaŋ sɔla, kanifuule wana pilɛ bɛɛ cho nyɛ yɔŋnɔŋ te.”
35 Mɛɛ o dimi lende, mbo chua beediiyo, mbo piɛi Mɛlɛka nda o hɔl kpou, mbo yam, okoŋ mbo kandu dioo.
36 Mi kɔltaŋ la simul nda kpou. Mi nda bɛɛ chua nyɛdiaa ma kandu dioo.
37 Naŋ wa o dɛndɛ koŋ niŋnda kpou wa ŋwaŋ 276.
38 Mɛɛ nda de nyɛdiaa ma pum cha, ma vii vii witiiyoŋ o peelo le mi dɛndɔɔ yɔŋnuŋ fefele.
39 Mɛɛ paaleŋ le sɛ, ma cha lɛŋndeŋ, kɛ a bii leŋ bila le. Mɛɛ nda che kɔŋgɔ isiooŋndo, ma kindiŋ le kɔlaŋ dɛndɔɔ simioo loŋ.
40 Ma kili yuei nyɛla simi dɛndɔɔ laŋ, mi i deli o peelo. Ma tiimbuu vɛlɛ boola nda kuandu dɛndɔɔ laŋ. Okoŋ kɔɔli, ma tuandu kola bɛndu mala dɛndɔɔ le kɔlaŋ ndo, le mi dɛndɔɔ kuɛ o kɔŋgɔ isiooŋndo.
41 Kɛ mi mɛŋndaŋ ma luaa dɛndɔɔ o kpeŋgoŋ vellaa velle, mbo kɔ kundu bolleŋ o siooŋii kundɛi o mɛŋndaŋ bɛŋgu, mbo hau. Mbo chalnuŋ o siooŋnde choo. Okoŋ mi mɛŋma wa lɔɔnɔŋndo o dɛndɔɔ waŋ ma tɛɛmbuu dɛndɔɔ o tumndo.
42 Le hei, mi puaa chɔuwa kɛɛsiaa le wanaa wa o biyɔɔ niŋnda kpou diuwo, yɔŋii nda deli a saanaa ma nyaanuŋ.
43 Kɛ wana bɛndu puaa chɔuwa ndoo yeema mbo chiindiaa Pɔɔl. Le hei, mbo kuuna nda le nyɛ ndaa tuu wo tosaa. Okoŋ mbo dimul wanaa chaa saanaa wa le mi nda fɛlɛŋ del o peelo ma taŋ.
44 A lo o dɛndɔɔ niŋnda, mi atiŋ hel o pɛŋgɔŋ choo. Apum yɛ, ma hel o pɛŋgɛŋ dɛndɛ yomi wo choo. Okoŋ mi wana o wana hel o kɔŋgɔ, nyɛ yɔŋnuŋ naa le.
Tɛɛsiaalaŋ
^ Ɔɔ “Hueiyii fula naa paaleŋ le chaŋ kpeŋgii ba luaŋndo ve.”
^ Tofa Tɛɛsiaa.
^ Kilikiiye, “Fatɔm ndaŋ 20.”
^ Kilikiiye, “Fatɔm ndaŋ 15.”
