Walta Kiilaa 28:1-31
28 Mɛɛ naŋ fuuluu kɛndiaa o kɔŋgɔ, miŋ saaluŋ maa lɛŋnde ibuŋgale leŋ nda veelu ni aa Maata.
2 Mi wanaa naŋ komal loŋ nda chɔm naa kaala teŋgeŋndo. Ma bii naa nyɛkɛndɛi. Ma kiisul naa yiŋndeŋ le haŋgɔɔ, kanifuule piɔɔ wa siaa, nduyɛ nyɔɔ wa o nyulu vili vili.
3 Kɛ mɛɛ Pɔɔl kɔndu yɔmnde mbo wa ndi dɔwɔɔ o yiŋ, mi kɛu wɔɔŋ pum fula o ndi niŋ le mɛɛ haŋgul tuuwo komal ndu yɛ. Okoŋ, mbo landuŋ ndu o ba.
4 Mɛɛ wanaa naŋ komal loŋ nda che kɛu wɔɔŋ koŋ o landaŋ Pɔɔl o ba, ma kandu dimulaŋndo aa: “Mi che bɛɛ poo hoo fuuluu kɛndiaa o kɔŋgɔ, kɛ wana diyaa lekɛndɛi o cho ni. Sandei* chɛl lɔ ndu le waa yoomu le.”
5 Mi Pɔɔl fasaŋa kɛu kalaa o yiŋ. Nduyɛ kɛuwo yɔŋul ndu le.
6 Waŋnda haa wa ko kɔl maa baa cho Pɔɔl hindɔɔ, ɔɔ o cho delɔɔ o lepilɛ niŋ kpe mbo vi. Ma chum le teleŋ vilɛi, kɛ a chi mi nyɛ o nyɛ yɔŋnuŋ ndu le. Okoŋ ma siŋga yiyaŋ ndaa, ma kandu dimioo maa mɛlɛka o cho ni.
7 Masa wa o lɛŋnde ibuŋgale leŋ niŋndo diolaŋ aa Pɔbiliɔɔ, ndoo nɔ yondolaŋ o fondaŋ naŋ wa wo ikɛi. Mbo yiya naa le palɛi i yaa, nduyɛ mbo chaa naa biyɔɔ nyɛkɛndɛi.
8 Finyaa Pɔbiliɔɔ wa ihini o kpele a dialuŋ tuuwoŋ. Nduyɛ pulii wɔɔŋnde* wa ndu vɛlɛ paaliaŋndo. Mi Pɔɔl kua naa o wa ihini chiɛiniŋ nda, mbo handu ndu balaŋ choo, mbo piɛi. Okoŋ mbo siŋgi ndu.
9 Mɛɛ hei yɔŋnuŋ, mi wanaa cheleŋ wa a naalaŋ o lɛŋnde ibuŋgale leŋ niŋnda kandu hunɔɔ naa ndu chua, mbo wa nda siŋgioo.
10 Ma chɔm balikaa le nyɛ yɔŋnuŋ nda wo, nduyɛ ma ke naa nyɔɔŋ tau tau. Mɛɛ naŋ bɛɛndiaŋ le kɔŋndaŋ o dɛndɔɔ niŋ, ma ke naa nyɛ o nyɛ naŋ hau ba.
11 Paŋgoŋ ŋgaa okoŋ kɔɔli, miŋ luɛi o dɛndɛ ndoo nɔ “Puaa Suu Wa”* a tuuliaa lechoo wo niŋ. Alɛkisandiliaa dɛndɔɔ hoo ndoo fula ni. O lo isisi o lɛŋnde ibuŋgale leŋ haaa mi sialteŋ le hiau.
12 Mɛɛ naŋ fuuluu Siluakiɔɔ naa dɛndɛlaŋ la sim nda, miŋ chua loŋ palɛi i yaa.
13 Chɔnɔŋndo loŋ, miŋ lo kɔlaŋ haaa miŋ fuuluu Luikiɔm. Diimandɔɔ, mi hueiyii chaŋ ba touwo ve kandu hɔŋndo. Okoŋ, miŋ fuuluu Putiooli diimandɔɔ pilɔɔ.
14 Miŋ komal puaapiliaa loŋ, nduyɛ ma dɛɛniaa naa le miŋ wa naa ndaa le palɛi i ŋɔmmɛu. Chɔnɔŋndo loŋ, miŋ bii nɛiyo le kɔlaŋ Luom.
15 Ŋ lo loŋ mi puaapiliaa tuɛi a naa okɔɔ. Okoŋ ma huŋ naa demullo o fondaŋ nda veelu aa Yiyala Yaalaŋ* ndo. Mi apum huŋ naa demullo haaa Apiɔɔ o Lɔɔ niŋ. Mɛɛ naŋ che nda, mi Pɔɔl mel Mɛlɛka balikaa. Okoŋ mbo simul kɔl.
16 Mɛɛ naŋ fuuluu Luom, ma chɛl le mi Pɔɔl waŋnuŋ a ba ndɔ. Kɛ ma yɔŋgu ndu po chɔuwo le ndu waa hɔlteŋ choo.
17 Palɛi i yaa okoŋ kɔɔli, mi Pɔɔl veelu laŋgbaa kalaa Chuuwa diompilɛ. Mɛɛ nda chuuŋgiaŋ naapilɛ, mbo dimul nda aa: “Chaaŋaa niaa, mi che bɛɛ I tosal waŋnda isɔɔ o isɔɔ wɔɔŋ, ɔɔ mi tɛɛmbuu naamula finyaa naa mamaa le, kɛ ma duau ya o chiɛi manyumndo niŋ Chulusalɛm, okoŋ ma mal la Luomaŋnda o ba.
18 Mɛɛ nda chii suɛi nii yaasiaa, ndaa yeema le ya malɔɔ, kanifuule a chi suɛi wɔɔŋ ya tosa le ma dii ya le.
19 Kɛ mɛɛ Chuuwa kɛɛ, mi dimi maa I yeema ma hivi suɛi nii o Siisa lo. O cho nuaa maa suɛi wɔɔŋ te ya tosal wanaa niaa le.
20 Le saboo hoo ya veelu nya ni le mi che nya, nduyɛ mi soo o nya lo, kanifuule le tiindaŋ Isɔluɛi nɔ wo ya cho hau o yɔlɔŋ muŋ ni.”
21 Ma dimul ndu aa: “Ŋ sɔla layau a num okɔɔ fulaa Chudiaa le. Nduyɛ puaapiliaa fula loŋ nda dounuŋ naa kona wɔɔŋ ɔɔ ma dimi suɛi wɔɔŋ a num okɔɔ le.
22 Kɛ ŋ yeema ma dimul naa nyɛ ŋ yiyaŋ a kunda lepiɛiyo hoo okɔɔ wo. Ŋ sina maa ba o ba fee waŋnda cho sɔɔŋ wɔɔŋndoŋ dimioo a ndu okɔɔ.”
23 Okoŋ ma hɛli paaleŋ le bɔŋaŋndo biyɔɔ a Pɔɔl. Ma huŋ kunda bɛndoo o chiɛi o wa o yiya wo mbo hiau mɛɛ ndaa hiŋ o tasela ndɔɔ yɛ. Chɔŋ idiiyo haaa mi le del doŋ, o wa nda tɛɛsiallo a Masale Mɛlɛkaleŋ okɔɔ. O wa nda chɔmndo o Sawala Mɛlɛka ke Muuse laŋ niŋ, a nyɛ wanaa ndaa suaa le Mɛlɛka wa dimi wo, le mbo muli nda kɔltaŋ ma laalaŋ o Chiisu niŋ.
24 Mi apum kandu sɔɔŋ o dimi woŋ laalaŋndo, kɛ apum ve laalaŋ te.
25 Le mɛɛ nda chɛlaŋ ladiom te yɛ, ma kandu fuuliaŋndo. Okoŋ mi Pɔɔl dimi aa:
“Mi nyina diandaa tosa mi Aisaya, wana ndoo suaa le Mɛlɛka wo dimi a finyaa nyaa mamaa okɔɔ
26 aa, ‘Kɔ o waŋnda haa lo ma dimul nda aa: “La tuɛi niŋ, kɛ la bii niŋ bila kposoŋ te. La tofa niŋ, kɛ la chi niŋ te.
27 Waŋnda haa kinda kɔlta ndalaŋ. A baŋul nila ndalaŋ yɔŋii nda tuei, nduyɛ ma kinda hɔltaŋ yɔŋii nda chɔ. Le hei, nyɛ cho nda kuee le tosaa wo, a bii ndu bila le. Nduyɛ ma kɛɛ miiŋgoo ya o ibuŋ le mi siŋgi nda.”’
28 Lelaŋ, la kɛsiŋ o kɔl maa yooŋgu kɛndɔɔ hoo a mɛɛ Mɛlɛka cho waŋnda piŋi yɛ cho dimiŋ o wanaa cho ŋChuu le wa lo. A cho ndu nilaŋ yaŋɔɔ.”
29 *——
30 Le wɔsilaŋ la tiɔɔŋ Pɔɔl wa Luom o chiɛi ndoo chua mbo wa paawaa* wo niŋ. Mi ndoo bii wanaa ndaa kua ndu yilɔɔ wa nyɛkɛndɛi.
31 O wa nda yooŋgu kɛndɔɔ dimullo a Masale Mɛlɛkaleŋ okɔɔ, nduyɛ mbo wa nda pɛɛkoo a Masanɔɔ Chiisu Kiliti okɔɔ. Siooŋii ve ndu le hei tosaa le, nduyɛ wana o wana kuuna ndu le.
Tɛɛsiaalaŋ
^ Kilikiiye, Dike. Naapum diomndo hoo sim le mɛlɛka laandu miŋgi maa wo.
^ Ɔɔ “sɔɔndiaŋndo a koowaŋ.”
^ Pɛnduaa nda wa ni. Diola ndalaŋ aa Kasitɔɔ nda Polusi.
^ Fondaŋ pɛŋgiaa a fondaŋ diaa nyɛdiaa o wa ni.
^ Tofa Tɛɛsiaa.
^ Ɔɔ “salaa.”
