Walta Kiilaa 4:1-37
4 Pitɛ nda Chɔŋ lo suɛi o waŋnda lo, mi wanaa soliaa lasalaa, wana bɛndu wanaa manda chiɛi Mɛlɛkaa wa, a Sadusiiya huŋ naa nda chua.
2 Ma tuulu kɔl le mɛɛ kiilaa Chiisu wa a wa waŋnda pɛɛkoo, ma wa nda dimullo kpendekele maa Chiisu miiŋgu yoomu yɛ.
3 Ma bii nda, ma kɔ dɔu nda o chiɛi manyumndo niŋ haaa diimandɔɔ, kanifuule paaleŋ lee del niŋ.
4 Kɛ mi wanaa yaŋ sɔɔŋ muŋ nilaŋ nda a bɔɔbɔɔ laalaŋ. Mi waŋ piaanduaa fuuluu 5,000.
5 Diimandɔɔ, mi masaa waa, laŋgbaa kalla, a wanaa pɛɛku waŋnda sawala Mɛlɛkalaŋ nda chuuŋgiaŋ Chulusalɛm.
6 Anaasi masa wanaa soliaa lasalaa, Kayafaa, Chɔŋ, Alɛkisanda, a wanayaŋ masa wanaa soliaa lasalaa kpou wa loŋ.
7 Ma huŋ simi Pitɛ a Chɔŋ nda tɛɛŋ, ma kandu nda nyunaa aa: “A kpaaya nɛɛnɛ ɔɔ o diola nɛɛnɛ niŋ nya tosa yɛ suɛi hei?”
8 Mi nyina diandaa tual Pitɛ choo, mbo mulul nda aa:
“Masaa waa a laŋgbaa kalla,
9 te o yɔŋ pɛ maa le dɛnɛ kɛndɛ yɔŋnuŋ po bɛvɛiyo hoo wo nya cho naa hau nyuuniaa ni, a le sinaa wana tosa mbo siaŋgu wo,
10 nya kpou a wana o wana cho Isɔluɛi, la sina pɛŋgu maa Chiisu Kiliti, o fula Naasaluɛi mi la dii ndu o yɔmndo choo, kɛ mi Mɛlɛka miŋgi ndu yoomu wo, o diola ndɔlaŋ niŋ poo hoo sɔla sioŋgɔɔ nya o hɔl ni.
11 Chiisu koŋ cho ‘pou nya wanaa taŋgulaa che fondo fuu, kɛ mbo simnuŋ pou kpeekpei saa taŋgullo wo ni.’
12 Wana o wana cheleŋ nɔla mbo baŋa naa le, kanifuule diola cheleŋ la cho o chieeŋndo choo, la Mɛlɛka yɔŋgu wanachioo le miŋ sɔla baŋaa le.”
13 Mɛɛ nda che Pitɛ nda Chɔŋ suɛi walaŋ siooŋii ve nda le, mi kɔndɔfillo bii nda tau, kanifuule ndaa sina maa a ve wanaa sinaa yau le.* Nduyɛ ndaa pelnuŋ ladio le. Okoŋ ma sina maa a wa latulu a Chiisu.
14 Mɛɛ nda che po sɔla sioŋgɔɔ wo isisi Pitɛ nda Chɔŋ ikɛi, a nɔla ma soo nyɛ o nyɛ le.
15 Okoŋ ma dimul nda le ma fula o bɛɛ. Ma kandu nyuuniaŋndo.
16 Ma dimi aa: “Yɛɛnɛ naŋ tosa yɛ a puaa haa? Waŋnda kpou Chulusalɛm sina maa nda tosa suɛi kɔndɔfili bɛnduei hei ni. Nduyɛ ŋ nɔla miŋ sɛɛŋgiaa nyɛ yɔŋnuŋ hoo wo le.
17 La ŋ kɔŋgɔliaŋ nda, miŋ dimul nda maa a suaa lɛ o wana o wana lo a diola poo hoo okɔɔ le, yɔŋii suɛi hei pɛŋgɛlaŋ.”
18 Okoŋ kɔɔli, ma veelu nda ma dou nda sawaa maa, a suaa lɛ o wana lo ɔɔ ma pɛɛku waŋnda a diola Chiisu laŋ okɔɔ le.
19 Kɛ mi Pitɛ nda Chɔŋ dimul nda aa: “I kuɛɛ wa yɛ i kɛndɛ Mɛlɛka o hɔl? Diikɔŋndo nya ɔɔ nyɛ Mɛlɛka dimi wo tosaa? Nyapila kiolu wɔ yamɛi.
20 Kɛ naa naa, ŋ nɔla miŋ pɛŋgi suɛi a sɔɔŋ naŋ che, nduyɛ miŋ tuɛiyoŋ okɔɔ le.”
21 Mɛɛ nda chɔɔlu nda kɔŋgɔliaŋ, ma mal nda. Kanifuule a seeluŋ nyɛ o nyɛ nda tɛɛmbuu le ma saaŋgiaa nda le. Siooŋnde wa nda vɛlɛ le waŋnda, kanifuule nda kpou wa Mɛlɛka saŋgalaa le nyɛ yɔŋnuŋndo.
22 Po sɔla sioŋgɔɔ a kaamaa hoo wo ndoo hiou niŋ wɔsilaŋ 40.
23 Mɛɛ nda mal nda, ma miiŋgu o wanaa ndaa lo, ma kɔ dounuŋ nda kona a nyɛ masaa wanaa soliaa lasalaa, a laŋgbaa kalla dimul nda wo.
24 Mɛɛ nda tuei hei, ma piɛi Mɛlɛka diompilɛ aa:
“Mɛlɛka Kpuluŋguma Bɛndoo, num toosiaa choo choo, lɛŋndeŋ, pee mɛŋma ihɛllo, a nyɛm cho o muŋ niŋndoŋ kpou ni.
25 O sabu nyina diandaa niŋ, ma tosa mi finya naa mamaa Deeve, o wa buɛi numndo wo dimi aa: ‘Le yɛɛnɛ kaalaŋ la tuulu yɛ kɔl, nduyɛ mi waŋnda wa yiyaŋndo o sɔɔŋ fondoŋ choo?
26 Masaa lelɛŋnda bɛɛndiaŋ, mi wanaa bɛnduaa chuuŋgiaŋ diompilɛ le Chɛhowa* nda wana o pɔya wo simullo.’
27 Lekɛndɛi mi Hɛlɔɔ, Pɔŋtiɔɔ Paile, wanaa lekaa wa, a waŋnda Isɔluɛi chuuŋgiaŋ diompilɛ o chiee bɛndoo hoo niŋ ma simul buɛi num diandaa Chiisu, wana ŋ pɔya wo.
28 Ma chuuŋgiaŋ le ma tosa nyɛ ŋ dimi wo. Sɔɔŋ muŋ yɔŋnuŋ, kanifuule a nɔ kpaayaa, nduyɛ keŋ ŋ kɛɛsiaa sindɛ pa ni.
29 Lelaŋ Chɛhowa,* yaŋ nilaŋ o kɔŋgɔliaŋnda nda cho naa laŋ, ma mala buɛiyaa numnda ma hiou lachi a diom numndo dimioo a kɔl simulaa.
30 Tosa mi waŋnda sɔla sioŋgɔɔ, nduyɛ miŋ tosa kaamaalaŋ o diola Chiisu laŋ niŋ, buɛi num diandaa.”
31 Mɛɛ nda chii Mɛlɛka nyɔɔlu o piɛileŋ niŋ, mi fondaŋ nda chuuŋgiaŋndo nyiiya. Nda kpou mi nyina diandaa tual nda choo, okoŋ ma wa diom Mɛlɛkaa dimioo a kɔl simulaa.
32 Mi che bɛɛ wanaa laalaŋnda wa tau, kɛ ndaa nɔ yiyaŋ pilɔɔ. Wana pilɛ bɛɛ nda tɛɛŋ dimi nuaa maa nyɛm o nɔ woŋ le ndupilɛ le ŋ wa le. Kɛ nyɛ o nyɛ ndaa nɔ, a wa piɔuviaŋndo.
33 Mi kiilaa hiau lachi a seileŋ timbioo a miiŋgu Masanɔɔ Chiisu miiŋgu yoomu wo okɔɔ a dialuŋ fulaa. Nduyɛ mi Mɛlɛka duau nda sala tau tau.
34 Wana pilɛ bɛɛ ve nda tɛɛŋ a lepɛŋ te, kanifuule wanaa ndaa nɔ kpelelaŋ ɔɔ chiɛilaŋ nda kpou, ma piisuu laŋ, ma huŋ a nyɛsɔlaa koŋ
35 o kiilaa lo. Okoŋ mi kiilaa piɔu ndu, mi wana o wana sɔla a mɛɛ bahawɛi ndɔɔ wa yɛ.
36 Livainɔ pilɛ wa diolaŋ Choosɛ, fulaa Saipulɔɔ. Kiilaa ndaa veelu ndu vɛlɛ aa Banabaa (koŋ cho ni, “Wana Dɛɛniaa Waŋnda Kɔltaŋ Ndo”).
37 Ndu bɛɛ ndoo nɔ kpeloo. Mbo pisi ndu, mbo huŋ a kaniŋ* muŋ, mbo yɔŋgu kiilaa.
Tɛɛsiaalaŋ
^ Koŋ cho ni, a tosa sukuula wanaa bɛnduaa lepiɛiya le. O cho naa maa a kue o sukuu kposoŋ te le.
^ Tofa Tɛɛsiaa.
^ Tofa Tɛɛsiaa.
^ Ɔɔ “woliŋ.”
