1. Nɛɛ toosiaa yɛ nyɛ o nyɛ cho yoomu?

‘MƐLƐKA YAAWƐƐ, Mɛlɛka kpeekpeiyo o cho ni. Mɛlɛka cho yoomu wo o cho ni.’ (Chɛluimaya 10:​10) Wana ndoo suaa le Mɛlɛka wo, Chɛluimaya, poonyiaa diomndaŋ ndaŋ ni. Le handɔɔ lechoo, Chɛhowa cho Mɛlɛka toosiaa nyɛ o nyɛ cho yoomu wo ni. Mi nyaa yoomaa cho o inyinaya o choo choo niŋnda lisa Mɛlɛka aa, “Num toosiaa nyɔɔŋ kpou ni, nduyɛ o hɛnaŋ num ndo niŋ ŋ toosiaŋ mi ŋ wa kpou ni.” (Sɔɔŋ Chɔɔmaŋndoŋ 4:​11) Mɛɛ Masaa Deeve wa Chɛhowa lisaa o chondei niŋ, mbo dimi aa, “Num yɔŋgu yoomoo le nyɛ o nyɛ yoomaa ni.” (Sam 36:​9) A tonya kpeekpei, yoomoo ndu, ke Mɛlɛka wo o cho ni.

2. Nyɛm yɛɛ Chɛhowa ke yɛ naa le miŋ wa achal?

² Chɛhowa cho tosaa ni miŋ wa yoomu. (Walta Wanaa Chiisuaa 17:​28) Nyɛdiaa naŋ dia wo ni, mɛŋma naŋ kol laŋ, hueiyii naŋ yoomu ve, vɛlɛ a lɛŋnde naŋ cho leŋ choo leŋ kpou, Chɛhowa ke naa ni. (Nuawɔ Walta Wanaa Chiisuaa 14:​15-17.) Le yɛɛ Chɛhowa ke yɛ naa nyɔɔŋ muŋ kpou? Le miŋ tuei yoomoo yeela. Kɛ le miŋ tuei yoomu kpeekpeiyo yeela, mɛɛ miŋ pɛɛku a sawala Mɛlɛkalaŋ okɔɔ nduyɛ, miŋ dɔu laŋ o wali niŋ.—Aisaya 48:​17, 18.

3. Vɛɛ Mɛlɛka che yɛ diyɔɔ Keŋ dii Ebɛl pɔmbɔ ndɔ wo?

³ Mɛlɛka yeema naa miŋ chɔm bɛɛleŋ le yoomoo. Yoomu naa naapilaa, vɛlɛ a yoomula chaaŋnda. Le tamaseliiyo, o boondii Adama nda Ifi wa achal le niŋ, mi nyɛ yɔŋnuŋ. Mi po ndaa diolaŋ aa Keŋ tuulu kɔl a Ebɛl pɔmbɔ ndɔ. Mi Chɛhowa sila Keŋ maa kɔl ndɔ tuu wo hoo cho ndu nyindɔɔ mbo tosa haki wɔɔŋ wɔɔŋndo.  Kɛ Keŋ yeŋ nilaŋ o silaa hoo le. Yɛɛ ndoo yɔŋnuŋ yɛ? “Mi Keŋ del Ebɛl pɔmbɔ ndɔ choo, mbo dii ndu.” (Chɛnɛsee 4:​3-8) Mi Chɛhowa saaŋgiaa Keŋ tau le mɛɛ o dii pɔmbɔ ndɔ yɛ.—Chɛnɛsee 4:​9-11.

4. O sawala Mɛlɛka ke Muuse laŋ niŋ, vɛɛ Mɛlɛka chɔm yɛ maa yoomoo nɔ bɛɛleŋ?

⁴ Mɛɛ wɔsilaŋ la hiou le 2,400 o koŋ kɔɔli, mi Chɛhowa yɔŋgu Isɔluɛitiiya sawala ndɔlaŋ. Sawalaŋ ndaŋ la cho tosa ni le ma saŋgala ndu mɛɛ o hini kɔl lɛ. Le mɛɛ Mɛlɛka kei Muuse sawalaŋ ndaŋ o ba yɛ, nyɛ koŋ waŋnda veelu laŋ lepum ni aa Sawala Muuselaŋ. O Sawala Mɛlɛka ke Muuse laŋ tɛɛŋ, mi opilɛ dimi aa, “La dii wana chioo le.” (Ditɔnɔmii 5:​17) Sawaa hoo wa Isɔluɛitiiya chɔmndo maa Mɛlɛka nɔ bɛɛleŋ le yoomu wanachioo, nduyɛ maa waŋnda nɔ ma chɔm bɛɛleŋ le yoomula chaaŋaa ndaa.

5. Vɛɛ naŋ nɔ yɛ miŋ che foli tɛɛmbaa?

⁵ Kɛ, ɔɔ niŋ yoomu chɛlɛkpɛ cho o demboo niŋndo? A mɛɛ Sawala Mɛlɛka ke Muuse laŋ la dimi yɛ, o cho suɛi kɛndɛ le mi waŋndo tosa mi chɛlɛkpɛ cho waŋndo o dembe wo vi le. Mɛɛ o dimi niŋ, yoomu chɛlɛkpɛ cho o demboo niŋndo bɛɛ, o cho nyɛ sɔvɛ o Chɛhowa lo. (Nuawɔ Ɛsɔdɔɔ 21:​22, 23; Sam 127:​3.) Hoo cho naa chɔmndo maa, foli tɛɛmbaa bɛɛ o niŋ te.

6. Le yɛɛ o bɛnda miŋ tul chaaŋ naa wanachioo leyɛ le?

⁶ Le miŋ nɔ bɛɛleŋ le yoomoo, mɛɛ miŋ soliŋ nyɛ o nyɛ wɔɔŋ cho naa o kɔl le chaaŋaa naa waŋndachieeya. Baabuiyo dimi aa, “Wana o wana tul chaaŋ ndɔ wana laalaŋndo leyɛ pɛ, mɛɛ wana diyaa ŋwaŋnda chiee wo o cho ni. Nduyɛ la sina maa wana diyaa ŋwaŋnda chiee wo, ndu ndu o nɔ yoomu kpeekpei nɔ la mɛɛlu le wo le.” (Chɔŋ Tasoo 3:​15) Te ŋ yeema pɛ yoomu kpeekpei nɔ lamɛɛlu le wo sɔlaa, mɛɛ miŋ soliŋ yɛletulaale naŋ nɔ o kɔl le chaaŋaa naa waŋchieeya wa. Le yɛɛ? Kanifuule, yɛletulaaleŋ le huŋ a kɔl tuu wɔɔŋ wɔɔŋndo ni. (Chɔŋ Tasoo 3:​11, 12) O naŋ bɔɔ miŋ pɛɛku le chaaŋaa naa waŋndachieeya kaalaa.

7. Kaala pum kuɛɛ la ke yɛ yoomoo lebɛɛ le?

⁷ Vɛɛ naŋ chɔm yɛ bɛɛleŋ le yoomu naa naapilaa? Wana o wana yeema mbo vi le, lende le? Kɛ apum cho yoomula ndalaŋ lueiyo o kpundɔɔ niŋ a mɛɛ nda cho laŋ biyɔɔ yɛ. Le tamaseliiyo, wanaa siaama cho taaŋ bɛndoo kolɔɔ, sikɛɛtiiyo, folilaŋ tɛɛmbuu wo, kooma nda ve o ndapila niŋ te waŋ chuaa, samaa kɛsioo, a ŋ cheleŋndoŋ tau. Nyɛm tɛɛmbaa yoomoo nyɔɔŋ muŋ kpou cho ni. Wana o wana tosa nyɛm waa naa pɛ, mɛɛ wana koŋ, o chɔm bɛɛleŋ le  yoomoo le. Nduyɛ, o chi yoomoo maa nyɛ sɔwɛ le o cho le. Mɛlɛka niŋ kɔl kposoŋ a kaalaŋ ndaŋ te. (Nuawɔ Luomaŋnda 6:​19; 12:​1; Kɔliŋtiaŋ Diiŋ Ndɔɔ 7:​1.) Le miŋ biilu Mɛlɛka o nɛi o chɛl lo choo, mɛɛ miŋ mal kaalaŋ ndaŋ waŋ waŋ. I cho suɛi bɛɛŋ bɛɛŋ le kaalaŋ ndaŋ malɔɔ le. Kɛ Chɛhowa nɔla mbo ke naa yoomuaŋ le miŋ mal taŋ. Te o yɔŋ pɛ miŋ dɔu sɛmbɔɔ le kaalaŋ ndaŋ malɔɔ, Chɛhowa naŋ bɔɔ kɔl a naa, taama taama le mɛɛ naŋ chɔm bɛɛleŋ le yoomu o ke naa wo yɛ.

8. Le yɛɛ naŋ nɔ yɛ miŋ kɛsiŋ o kɔl lɔɔlɔɔ le waa yekeŋ?

⁸ Te o yɔŋ pɛ miŋ nɔ bɛɛleŋ le yoomoo, ŋ nɔ miŋ wa yekeŋ o nyɛ o nyɛ naŋ wa tosaa niŋ. Le tamaseliiyo, te o yɔŋ pɛ miŋ wa kɔlaŋ a nyɛ nyaanaŋndo, ŋ nɔ miŋ mandaŋ, nduyɛ, ŋ nɔ miŋ hiu nyaanɔŋ te. Ŋ nɔ miŋ faŋaŋ pisulta yɔŋulaŋndaŋ kɔɔli. (Sam 11:​5) O boondii Isɔluɛitiiya niŋ, mi Sawa Mɛlɛkaa dimi aa, “Te a taŋgul chiɛi sɛnɛiyo pɛ, a nɔ ma mal ndu lechoo lende kpandamalaŋ te. A nɔ ma balu kpakioo dɔwɔɔ lechoo o kpeŋgoŋ chɛchɛ, yɔŋi waŋndo o lo balɔɔ lechoo mbo hɛluŋ mbo del mbo vi, mi tɔɔyaŋ piɔm wana koŋ o wa num choo.” (Ditɔnɔmii 22:​8) Le tosaa nyɛ sawaa hoo dimi wo, tosa mi chiɛi num ŋ taŋgullo wa lɔɔlɔɔ nyɛkɛndɛi. Te chiɛi numndo nɔ pɛ naa helaa le luɛiyɔɔ chiɛɛniŋ, lɔɔlɔɔ toosiaa nda nyɛkɛndɛi yɔŋi waŋndo siɛɛla, mbo del, okoŋ mbo yɔŋuluŋ tau. Te o yɔŋ pɛ ma nɔ nyɛ nyaanaŋndo, mɛɛndaŋ ndu fɛɛŋ te o bɛnda pɛ le nyaanɔŋndo a ndu. Fɛɛŋ fɛɛŋ bɛɛ chɛl mi chiɛi numndo vɛlɛ a nyɛ nyaanaŋ numndo chuu num vɛlɛ a chaaŋnda kpundɔɔ le.

9. Te ŋ nɔ pɛ bɛɛleŋ le yoomoo, vɛɛ naŋ nɔ yɛ miŋ bii yoomula visiaa?

⁹ Vɛɛ naŋ nɔ yɛ miŋ che yoomula visiaa? Laŋ bɛɛ la cho nyɛ sɔwɛ Mɛlɛka o hɔl. Mɛlɛka chɛl ni miŋ wa visiaa diyɔɔ le dioo, le nyɛ chuɛiyaŋndo, vɛlɛ a naapila kiindiaa. (Chɛnɛsee 3:​21; 9:​3; Ɛsɔdɔɔ 21:​28) O wa bɛɛ lende ni, te o yɔŋ pɛ miŋ tosal nda yɔɔŋ wɔɔŋndo, te koŋ te, miŋ tɛɛmbuu yoomula ndalaŋ o fondo fuu wo choo, koŋ bɛnda kposoŋ te. Nduyɛ, hei chɔm ni maa ŋ nɔ lebɛɛ le yoomoo le.—Pulɔwaa 12:​10.

10. Vɛɛ Mɛlɛka chɔm yɛ kpendekele maa yoomoo chiɛɛliaŋ a koowaŋ?

¹⁰ Mɛɛ Keŋ dii Ebɛl pɔmbɔ ndɔ, mi Chɛhowa dimul Keŋ aa, “Tofa wɔ nyɛ ŋ tosa wo. Pɔmbɔ num ŋ dii yo, te o wa maa yɔŋɔɔ pɛ kooma ndɔ ma cho lɛŋ ndaŋ ma cho chaŋndo naa ya chua le num  maa miŋgul lo.” (Chɛnɛsee 4:​10) Te Mɛlɛka soo pɛ a kooma Ebɛllaŋ, mɛɛ koŋ chɔm ni maa a yoomu Ebɛllo okɔɔ o wa suɛi ni. O fondo fuu wo choo Keŋ tɛɛmbuu yoomu Ebɛl pɔmbɔ ndɔ wo ni. Le hei, Keŋ nɔ mbo sɔla saŋgaa le nyɛ o tosa wo. Ŋ dimi maa, kooma Ebɛllaŋ ma wa chaŋndo o Chɛhowa lo le maa miŋgioo. O koowaŋ niŋ yoomoo cho ni. O boondii Nuuwaa ve niŋ, hei wa i chɔmnaŋ kpendekele a teleŋ mɛŋma koŋgima bɛndaŋ ma hiou o chieeŋndo choo wo. Tuupa mi mɛŋma koŋgima bɛndaŋ ma huŋ, yɔmii kuamɛi, tɔlɔɔlaŋ, nyɛm chuulu mi ŋ tosa kululaŋ ndoŋ, vɛlɛ a yɔmii kuamɛi kuam a buŋndaŋ leniŋ nde kinɛi waŋndachieeya ndaa dia ni. Kɛ mɛɛ mɛŋma koŋgima bɛndaŋ ma hiou, mi Chɛhowa dimul Nuuwa a chuauwaa nduaa aa, “I ke nya nyɛ o nyɛ cho nyɛ yoomaa le waa nyɛ nya diaa, mɛɛ ya I ke nya tɔlɔɔlaŋ le dioo yɛ koni.” Kɛ o wa bɛɛ lende, mi Chɛhowa dou nda sawaa hoo aa, “La dia visioo o nya soli fɛɛŋ kooma nduaŋ te wo le, kani fuule, o koowaŋ niŋ yoomoo cho ni.” (Chɛnɛsee 1:​29; 9:​3, 4) A tonya kpeekpei, o koowaŋ niŋ Chɛhowa dɔu yoomoo ni.

11. Chɔŋ a boondii Nuuwa ve, sawa kuɛɛ Mɛlɛka ndoo dɔu yɛ a koowaŋ okɔɔ?

¹¹ Mɛɛ naŋ chɔm bɛɛleŋ le koowaŋ yɛ cho ni, ŋ nɔ miŋ de maŋ te. Mi Chɛhowa dou Isɔluɛitiiya sawaa aa, “Wana o wana cho Isɔluɛinɔɔ . . . te a dii visioo ɔɔ youwo o doosuleŋ niŋ pɛ, o cho o diandaa ya o hɔl le dioo wo pɛ, a nɔ ma kelu visi koŋ ɔɔ you koŋ bololaŋ, mi kooma nduaŋ ma yueinuŋ lɛŋ nduyɛ, ma kumbu maŋ a puuloo. . . . Lelaŋ ya I dimul nya [Isɔluɛitiiya] ni, ‘maa wana o wana dia kooma visioo le.’” (Lɛvitikɔɔ 17:​13, 14) Sawa Mɛlɛka dou hoo Isɔluɛitiiya maa a dia koowaŋ te wo, Nuuwa fɛŋ Mɛlɛka ndoo dou Sawaa hoo. Chɔŋ a boondii Mɛlɛka ndoo ke Nuuwa sawaa hoo ve, mbo huŋ bii a teleŋ o ke Isɔluɛitiiya ndu wo, suɛi wɔsila 800 la hiou niŋ ni. Hei chɔm ni maa, sawaa hoo wa wɔ tuŋ o wali niŋ. Nyɛ Chɛhowa ndoo yiyaŋndo choŋnuŋ kpendekele. Dimullo kɛsɛ o wa wanaa nduaa ni maa, visiŋ visioo kinɛi nda nɔ ni ma de, o cho kooma nduaŋ te. Nduyɛ maa a nɔ ma soli ndu koowaŋ o ŋdial mi ma del lɛŋ. Hoo sim ni maa yoomu nyɛ yoomaa koŋ nda cho miŋgioo o Mɛlɛka lo ni.

12. O wɔsiŋ kɛmɛ tasoŋ niŋ, sawa kuɛɛ Kilisiɔŋnda sɔla yɛ a koowaŋ okɔɔ? Nduyɛ vɛɛ sawaa hoo cho yɛ wɔ hau o wali niŋ?

¹² Sawa pilɔɔ hoo kpe Kilisiɔŋnda bɛɛ cho hau biyɔɔ ni. O wɔsiŋ kɛmɛ tasoŋ niŋ, mi wanaa Chiisu vem hɔlte ndɔ wa vɛlɛ a laŋgbaa kalaa ndaa chua chilaŋ buɛiyaa Chiisuaa tɛɛŋnda huŋ diompilɛ.  Le sabu yɛɛ? Le kɛɛsiaa tosaa le sawa Kilisiɔŋnda o kundalaŋ niŋ kpou nɔ ma diikuŋndo. Mɛɛ nda chii kɛɛsiaa ma dimi aa, ‘Nyina . . . Mɛlɛkaa ni, a naa, ŋ cho a chɛlaŋ maa ŋ cho lɛ nya wolɔɔ lusulaa cheleŋ siiluu le. Kɛ nduyɛ, sɔɔŋ muŋ naa ŋ hɛnaŋ nya mi la tosa le ni. La dia nyɛ diaa lasooluu wo le. La dia kooma visi le. La dia visi nda dii a soli kooma nduaŋ ndo le. La suunda a lanɔ pila ɔɔ pɔnɔ pila le.’ (Walta Wanaa Chiisuaa 15:​28, 29; 21:​25) Lelaŋ, ‘ŋ nɔ miŋ de koowaŋ te.’ Hei cho nyɛ sɔwɛ Mɛlɛka o hɔl. Te o yɔŋ pɛ miŋ faŋaŋ koowaŋ dioo kɔɔli, mɛɛ o cho ko mɛɛ naŋ kɛɛ nyɛm cheleŋndoŋ sooluu wo vɛlɛ a suundaa a lanɔ pilaa ɔɔ a pɔnɔ pilaa yɛ.

13. Tuuwɔ tamaseliiyo. Vɛɛ sawa Mɛlɛka dɔu maa naŋ dia koowaŋ te wo chɔm yɛ maa ŋ nɔ miŋ hiviŋ koowaŋ o ŋdial te?

¹³ Mɛlɛka dou naa sawaa maa pɛ pɛ bɛɛ naŋ dia koowaŋ te. Baa kooma hiviaŋ o ŋdial cho pa o sawaa hoo choo? Ei. Le tamaseliiyo, te o yɔŋ pɛ mi wana chiɔwaa dimul num maa kol muɛiyaŋ te, baa kolɔɔ maŋ a sondo kinɛi o yiyaŋ ni? Baa a chɛl pa ma hɔu num o nyɛsuaŋ niŋ a muɛima kalaŋ? Sako bɛɛ! Lelaŋ, te Mɛlɛka dimi pɛ maa naŋ dia koowaŋ te, mɛɛ o bɛnda vɛlɛ miŋ chɛl ma hivi naa maŋ o ŋdial pesiŋ te. Le hei, sawa Mɛlɛka dɔu maa naŋ dia koowaŋ te wo sim vɛlɛ ni maa, ŋ chɛl mi wana o wana hivi naa koowaŋ o ŋdial te.

14, 15. Te Kilisiɔŋnɔɔ naa pɛ mi wana chiɔwaa dimul ndu maa mɛɛ ma hivi ndu koowaŋ o ŋdial, yɛɛ o nɔ yɛ mbo tosa? Nduyɛ, le yɛɛ?

¹⁴ Te o yɔŋ yɛ niŋ mi Kilisiɔŋnɔɔ yɔŋuluŋ yɔŋulɔŋ wɔɔŋ wɔɔŋndo, te koŋ te, mbo naa, okoŋ, ma dimi maa o nɔ mbo sɔla yambɔɔ? Kɛ mi wana chiɔwaa dimi maa mɛɛ ma hivi ndu koowaŋ o ŋdial, te o cho koŋ te, o cho wu. Yɛɛ Kilisiɔŋnɔ koŋ nɔ yɛ niko mbo tosa? O kpeekpei niŋ, Kilisiɔŋnɔ koŋ yeema mbo vi le. Le mbo kiindiaa yoomu sɔwɛ Mɛlɛka ke ndu koŋndo, o chɛl mi wana chiɔwaa koŋ soliŋ nɛila cheleŋ kpeku le ndu chiɔuwo, la nda hivi ndu makoŋgo o ŋdial te laŋ. Le hei, te nɛila miŋgiaa makoŋgo cheleŋ wa pɛ, Kilisiɔŋnɔ koŋ tosa a sabu mi wana chiɔwaa soliŋ ndaŋ kpeku le mi kooma nduaŋ ma miiŋgu ndu o ŋdial.

¹⁵ O chieeŋ naŋ cho hoo suŋsuŋ niŋndo, yoomu fafɛɛŋ cho le. Baa o bɛnda pa le mi Kilisiɔŋnɔ cho hoo a naa wo tɛɛmbuu sawa Mɛlɛka wo halikpeŋ mbo chiindiaa yoomu ndɔɔ o chieeŋndo hoo niŋ? Mi Chiisu dimi aa, “Wana o wana kindi le yoomu ndɔɔ chiindiaa pɛ, mɛɛ o cho yoomu kpeekpeiyo fula. Kɛ nduyɛ, wana o wana yoomu ndɔɔ hɛluŋ ndu le ya pɛ, mɛɛ o cho hunɔɔ yoomu kpeekpeiyo sɔla.” (Maatiu 16:​25) Ŋ yeema miŋ vi le. Kɛ, te o yɔŋ pɛ miŋ tɛɛmbuu  sawa Mɛlɛka wo le yoomu naŋ nɔ hoo suŋsuŋ ndo kiindiaa, mɛɛ yoomu kpeekpeiyo cho naa hunɔɔ hiɔlɔŋ. O cho bɔɔ suɛi taasi le tiindaŋndo dɔuwɔɔ o nyɛ Mɛlɛka dimi wo niŋ. Hei mala naa miŋ sina maa te ŋ sɔla pɛ piɔmndo le sawala Mɛlɛka laŋ biyɔɔ, Mɛlɛka ke naa yoomoo wo, cho naa hunɔɔ soli o sɛiyo niŋ. Okoŋ, mbo ke naa yoomu nɔ lamɛɛlu le wo.—Chɔŋ 5:​28, 29; Hibuluiya 11:​6.

16. Vɛɛ Kilisiɔŋaa laalaŋaa Mɛlɛka wa cho yɛ a bɛɛndiaŋ le tosaa a koowaŋ okɔɔ?

¹⁶ Hau bɛɛ, Kilisiɔŋaa laalaŋaa Mɛlɛka wa cho a bɛɛndiaŋ lɔɔlɔɔ le sawa makoŋgo Mɛlɛka dɔu hoo wo tolɔɔ kɔɔli. Pesi bɛɛ a di koowaŋ o nɛi o nɛi niŋ te. A chɛl vɛlɛ danda kooma hiviaa le. * A sina maa Mɛlɛka toosiaa yoomoo a koowaŋndo sina nyɛ cho o sɔwɛ le nda wo. Num yɛ, a laalaŋ pa maa Mɛlɛka sina nyɛ cho o sɔwɛ le numndo?

17. O boondii Isɔluɛitiiya niŋ sindɛ, nɛi kuɛɛ kinɛi Chɛhowa chɛllɛ le ma soliŋ koowaŋ kpeku?

¹⁷ Mi Sawala Mɛlɛka ke Muuse laŋ la chɔm nɛiyo opilɛ, o Isɔluɛitiiya ndaa soliŋ koowaŋ kpeku wo. O sindɔɔ niŋ pa, mi Chɛhowa chɔm mɛɛ Isɔluɛitiiya nɔ ma tosa yɛ te a wa ndu pɛ piɛiyo. Mi Chɛhowa dimi aa, “Nyɛ o nyɛ yoomaa, o koowaŋ niŋ yoomu ndɔɔ o cho ni. Le sabu koŋ ya dimi ni, maa la nɔ mi la soli koowaŋ salaa o maaŋndo choo, le yɔŋnda nyala wɔɔŋndaŋ faŋaa.” (Lɛvitikɔɔ 17:​11) Te  Isɔluɛitiiya ndaa tosa pɛ yɔŋ wɔɔŋndo, a dii visioo le salaa solioo. Te a dii ndu pɛ, a chua kooma visi koŋ a wou o bandu soliaa salaa choo o maaŋ Mɛlɛkaa niŋ. Hei tosa ni mi Mɛlɛka mal nda haki le yɔŋ wɔɔŋ nda tosa koŋ ndo. O nɛiyo hoo choo kinɛi Mɛlɛka dimi ni maa a soliŋ koowaŋ kpeku.

18. Tɔnɔla kuɛɛ sala Chiisu huŋ soliŋ hoo wo chuu yɛ naa?

¹⁸ Kilisiɔŋaa tonyaa cho hau o Sawala Muuse laŋ bɛŋgu le. Lelaŋ, a dii visi ma wou kooma nduaŋ o bandoo choo le sala soli le. (Hibuluiya 10:​1) Le yɛɛ Isɔluɛitiiya ndaa soli yɛ sindɛ kooma visiaa sala o bandoo choo? Kooma ndaa soli salaa waŋ, ma chɔm sala Chiisu Kiliti huŋ soliŋ le ŋwaŋndachiee wo. A mɛɛ naŋ pɛɛku o Buŋgɛi 5 o yauwo hoo niŋ yɛ, Chiisu soliŋ yoomu ndɔɔ sala a mɛɛ o tala kooma nduaŋ le naa yɛ. Okoŋ kɔɔli, mbo miiŋgu choo choo. Mɛɛ o miiŋgu choo choo, mbo dounuŋ Mɛlɛka kona sabu sala ndɔ soliaa. (Hibuluiya 9:​11, 12) Sala Chiisu huŋ soliŋ hoo wo tosa ni mi Mɛlɛka mal naa haki le yɔŋnda naala wɔɔŋndaŋ. Sala Chiisu huŋ soliŋ hoo wo kumbul naa vɛlɛ nɛiyo ni le yoomu  fafɛɛŋndo sɔlaa. (Maatiu 20:​28; Chɔŋ 3:​16) Nuawɔ se dɛnɛ kɛndɛ kooma Chiisu huŋ soliŋ maŋ sala le naa waŋ ma tosa wo! (Pitɛ Tasoo 1:​18, 19) Te ŋ yeema pɛ miŋ sɔla pioŋɔɔ, mɛɛ miŋ dɔu laalaŋ naa o sala soliaŋ Chiisoo niŋ.

19. Te ŋ yeema pɛ mi tɔɔyaŋ wana o wana wa naa choo le, yɛɛ naŋ nɔ yɛ miŋ tosa?

¹⁹ Ŋ nɔ miŋ mel Mɛlɛka balika le ke sɔwɛ o ke naa hoo wo. Ndu cho yɛ yoomoo ni. Lelaŋ, ŋ nɔ miŋ dimul acheleŋnda maa te o yɔŋ pɛ ma dɔu laalaŋndo o sala soliaŋ Chiisu wo niŋ, a nɔla ma sɔla yoomu nɔ lamɛɛlu le wo. Te ŋ buulaŋ pɛ le yoomula wanaa cheleŋnda mɛɛ Mɛlɛka buulaŋ le nda yɛ, hei nyindu naa miŋ kɔ dimul nda yooŋgu Mɛlɛkaa amayoomu. (Nuawɔ Isikiaa 3:​17-21.) Mɛɛ miŋ wou sɛmbɔɔ le waŋnda yooŋgu Mɛlɛka wo dimullo. Mi kiilanɔɔ Pɔɔl dimi aa, “Tɔɔyaŋ o tɔɔyaŋ ve lɛ ya choo le ndu le. Mi dimul nya nyɛ o nyɛ Mɛlɛka kɛɛsiaa le tosaa, I viŋ nyɛ o nyɛ le.” (Walta Wanaa Chiisuaa 20:​26, 27) Te o yɔŋ pɛ miŋ dimul waŋnda nyɛ Mɛlɛka dimul naa le nda dimullo wo, mɛɛ naa bɛɛ nɔla miŋ dimi diomnda kiilanɔɔ Pɔɔl dimi laŋ ndaŋ. O cho bɔɔ suɛi sɔwɛ le waŋnda dimullo a Mɛlɛka okɔɔ vɛlɛ a sabula ndɔlaŋ. Te ŋ tosa lende pɛ, mɛɛ koŋ chɔm ni maa ŋ nɔ bɛɛleŋ tau le yoomoo vɛlɛ a koowaŋ.