TE O yɔŋ pɛ ma nɔ Baabuiyo, tofawɔ o Sam 83:​18 niŋ ma che mɛɛ nda hivi bolle Baabuileŋ ndeŋ yɛ. Baabuiyo hoo, New World Translation of the Holy Scriptures ndu hivi leŋ aa, “Maa waŋnda kpou sina maa num nɔ hoo diolaŋ aa Chɛhowa wo, num pilɛ kpe cho o Bɛndu le chieeŋndo kpou ni.” Baabuila bɔɔbɔɔ bɛɛ naa nda hivi leŋ ni. Kɛ mɛɛ nda wa bolle Baabuileŋ ndeŋ hivioo o Baabuilaŋ lapum niŋ, ma faŋa Chɛhowa laŋ ma miŋgi wou Masanɔɔ, te koŋ te, Mɛlɛka. Kɛ yɛɛ kpeekpei nɔ yɛ mbo wa o bolle Baabuileŋ ndeŋ niŋ? Masanɔɔ, Mɛlɛka, baa Chɛhowa?

A diolaŋ okɔɔ bolle Baabuileŋ ndeŋ le soo ni. O Hibuluiye niŋ nda poonyiaa sindɛ Baabuiyo ni. Nduyɛ mɛɛ nda wa ndu poonyiaa, ma poonyiaa diola Mɛlɛkalaŋ leniŋ. Naa nda poonyiaa laŋ o chomulta maHibuluilaŋ niŋ ni יהוה (YHWH). Hivi chomultaŋ ndaŋ la cho yɛ ni aa, “Chɛhowa.” Baa o bolle Baabuileŋ lepilɛ niŋ koni diolaŋ ndaŋ la cho ni? Sako. Mɛɛ nda wa sindɛ Baabuiyo poonyiaa o Hibuluiye niŋ, ma poonyiaa diolaŋ ndaŋ leniŋ le bɛmbɔɔ 7000.

Vɛɛ kpɛ diola Mɛlɛkalaŋ la cho yɛ nyɛ sɔwɛ? Tofawɔ piɛile Chiisu ndoo pɛɛku buɛiyaa nduaa leŋ. Mbo dimul buɛiyaa nduaa maa, te a wa pɛ piɛileŋ o Mɛlɛka lo, a dimi naa aa, “Mɛlɛka Finya naa o choo choo niŋ, waŋnda kpou ke diola numndaŋ bɛɛleŋ.” (Maatiu 6:​9, NW) Okoŋ kɔɔli, mi Chiisu piɛi vɛlɛ o Mɛlɛka lo aa, “Kɛkɛ, tosa mi waŋnda ke diola numndaŋ bɛɛleŋ.” Okoŋ mi diomndo fula o choo choo niŋ mbo dimi aa, “I chɔm nda mɛɛ diola nilaŋ la nɔ bɛɛleŋ yɛ, nduyɛ I cho nda vɛlɛ chɔɔlu chɔm.” (Chɔŋ 12:​28, NW) Hei cho naa chɔmndo kpendekele maa diola Mɛlɛkalaŋ la cho bɔɔ nyɛ sɔwɛ. Kɛ le sabu yɛɛ waŋnda faŋa yɛ niko diola Mɛlɛkalaŋ o Baabuilaŋ lapum niŋ, ma miŋgi poonyiaa Masanɔɔ, te koŋ te, Mɛlɛka?

Le sabulaŋ la tiɔɔŋ. O tasoo cho ni, wanaa bɔɔbɔɔ dimi maa, o bɛnda miŋ soliŋ diolaŋ ndaŋ kpeku le, kanifuule, wana o wana sina mɛɛ ndaa veelu laŋ sindɛ yɛ le. Nduyɛ, ma dimi vɛlɛ maa Hibuluiye sindɛ ndii nɔ la chomul te. Le hei waŋnda dimi ni maa wana o wana sina mɛɛ waŋnda sindɛ ndaa veelu YHWH yɛ le. Kɛ baa hei kuuna naa diola Mɛlɛkalaŋ soliŋ kpeku ni? O sindɔɔ niŋ, naapum mi waŋnda ndaa veelu  Chiisu aa, Yeshua, te koŋ te, Yehoshua. Wana o wana ndoo sina kpeekpei mɛɛ wana veelu laŋ yɛ le. Kɛ a koŋ kpou, waŋnda o chieeŋndo choo kpou nɔ nɛila yɛ yɛla nda veelu Chiisu o sɔɔŋ ndaŋ maŋgalaŋ niŋndaŋ. Mi che bɛɛ naa a sina mɛɛ waŋnda o wɔsiŋ kɛmɛ tasoŋ niŋ ndaa veelu laŋ yɛ le, kɛ keŋ kuuna nda diolaŋ ndaŋ soliŋ kpeku le. Lende ko icho a diola numndaŋ ni. Te o yɔŋ pɛ ma kuɛ o lɛŋnde cheleŋ niŋ, a cho sina maa, mɛɛ nda veelu diola numndaŋ o lɛŋnde ŋ kuɛ leŋ niŋndeŋ yɛ, o cho lende le nda veelu laŋ o suɛi maŋgalɛi numnde niŋ o lɛŋnde numndeŋ niŋ te. Hoo cho chɔmndo maa, miŋ sina bɛɛ mɛɛ ndaa veelu diola Mɛlɛkalaŋ o sindɔɔ niŋ yɛ le, koŋ kuuna naa laŋ soliŋ kpeku le.

Sabu diiŋndɔ tosa mi waŋnda faŋa diola Mɛlɛkalaŋ o Baabuiyo niŋndo cho naamu Chuuwa sindɛ ni. Mi Chuuwa bɔɔbɔɔ dimi maa, pɛ pɛ bɛɛ o bɛnda mi wana veelu diola Mɛlɛkalaŋ te. Le yɛɛ ndaa dimi yɛ lende? Le sawa Mɛlɛka ndoo dou Isɔluɛitiiya, mbo wa o Baabuiyo niŋndo nduyɛ, ndaa bii sawaa hoo bila le. Ndu cho ni, “Ya cho Mɛlɛka Yaawɛɛ, Mɛlɛka nyaa ni. Wana o wana veelu diola nilaŋ o fondo fuuwo choo le. Wana o wana veelu diola nilaŋ o fondo fuuwo choo pɛ, ya Mɛlɛka Yaawɛɛ, dɛnɛ palaa ya I tuisi ndu choo ni.”—Ɛsɔdɔɔ 20:​7.

Diola Mɛlɛkalaŋ soliŋndo kpeku o nɛi bɛnda le wo choo kinɛi sawaa hoo kɛɛlu naa ni. Kɛ sawaa hoo kuuna naa diola Mɛlɛkalaŋ soliŋndo kpeku o nɛi lebɛɛ choo le. Wanaa poonyiaa yaula maHibuluilaŋ nda kpou ndaa nɔ laalaŋndo o Mɛlɛka niŋ. Nduyɛ, ma bii sawala Mɛlɛka ndoo dou sindɛ Isɔluɛitiiya laŋ. Kɛ mi ndaa soliŋ diola Mɛlɛkalaŋ kpeku le teleŋ o teleŋ. Le tamaseliiyo, o chonduŋ bɔɔbɔɔ wanaa ndaa chuuŋgiaŋ naapilɛ le Mɛlɛka piɛiyo wa ndaa soli woŋ niŋ, mi wanaa poonyiaa Baabuiyo wa poonyiaa diola Mɛlɛkalaŋ leniŋ tau. O faŋaŋ ndɔ o koŋ kɔɔli, mi Chɛhowa pila dimul wanaa cho ndu piɛiyo wa maa, a wa diola ndɔlaŋ veeloo. Nduyɛ, mi wanaa laalaŋ o ndu niŋnda diikuŋ. (Chowɛɛ 2:​32; Walta Wanaa Chiisuaa 2:​21) Lelaŋ, Kilisiɔŋnda hau bɛɛ nɔ ma kiisaŋ le diola Mɛlɛkalaŋ kpeku soliŋ o nɛi lebɛɛ choo le. Lende ko Chiisu bɛɛ ndoo tosa ni.—Chɔŋ 17:​26.

Wanaa wa sindɛ Baabuiyo hivioo ma faŋa diola Mɛlɛkalaŋ ma miŋgi diomnda cheleŋ wou wa tosa bɔɔ biondɔŋ bɛndoo. A tosa mi waŋnda yiyaŋ maa Mɛlɛka cho bɔɔ levil a waŋchieeya nduyɛ maa o buulaŋ a nda kposoŋ te. Kɛ Baabuiyo ndu dimul naa le miŋ wa o chaŋyɛi niŋ kpɛɛluŋ a Chɛhowa. (Sam 25:​14) Yiyaŋndɔ a chaaŋ num nya cho o chaŋyɛi niŋ kpɛɛluŋndo. Vɛɛ ŋ tiu yɛ ba ma sɔɔŋguu chaaŋ num koŋ ikɛi kpɛɛluŋ te a sina ndu diolaŋ te. Lende ko icho a diola Mɛlɛkalaŋ ni. Te o cho mi waŋnda sina laŋ te, vɛɛ nda looku yɛ kpeekpei ma sɔɔŋguu Mɛlɛka ikɛi? Le handɔɔ lechoo, te waŋnda soliŋ diola Mɛlɛkalaŋ  kpeku le, mɛɛ a sina niŋ nyɛ la simndo le. Yɛɛ diola Mɛlɛkalaŋ la sim yɛ?

Mi Chɛhowa pila tɛɛsiaa nyɛ diola ndɔlaŋ la simndo o Muuse lo. Mɛɛ Muuse nyuna Chɛhowa a diola ndɔlaŋ okɔɔ, mbo mulul ndu aa, “I Simnuŋ Nyɛ Ya Yeema mi Simnuŋndo.” (Ɛsɔdɔɔ 3:​14, NW) Hei cho naa chɔmndo maa o cho ko nyɛ ndupila yeema mbo simnuŋndo le, kɛ nyɛ o yeema mbo yɔŋnuŋ a nyɛm o toosiaa woŋ okɔɔ, vɛlɛ a sabu ndɔɔ peelɔŋndo.

Ŋ dimi wɔ maa, a tiuba ma simnuŋ nyɛ o nyɛ ŋ yeema pɛ le simnɔŋndo. Te o wa pɛ lende, yɛɛ ŋ yeema yɛ ma tosa le chaaŋaa numnda? Te a tuei pɛ maa opilɛ cho a naa, a tiuba ma simnuŋ wana chiɔuwaa bɛndoo, okoŋ, ma siŋgi ndu. Te o yɔŋ pɛ mi pɛŋnde nyɛsɔlaa bii chaaŋ num cheleŋ, a tiuba ma simnuŋ wana nyɛsɔlaa bɛndoo le ma mala ndu. Kɛ wana dimi isɔɔ a tonya, a tiuba ma simnuŋ nyɛ o nyɛ ŋ yeema ma simnuŋndo le. Lende ko icho a naa kpou ni. O naŋ tiuba le tosaa wo naŋ tosa ni. A wa pɛ Baabuiyo pɛɛkoo, kɔndɔfillo cho num biyɔɔ le sinaa maa Chɛhowa tiuba mbo simnuŋ nyɛ o nyɛ o yeema pɛ, halikpeŋ mi hɛnaŋ ndɔɔ yɔŋnuŋ. Nduyɛ, yeemɛi cho ndu tau le kpaaya ndɔɔ soliŋndo kpeku le wanaa kaala ndu wa mandaa. (Koloniko Diiŋ Ndɔɔ 16:​9) Wanaa sina diola Mɛlɛkalaŋ te wa tiuba ma che suiliŋnda kɛndɛla Chɛhowa nɔ laŋ ndaŋ kposoŋ te.

Ŋ che niko kpendekele maa diola Mɛlɛkalaŋ la cho o Baabuiyo niŋ. Le miŋ sɔɔŋguu Mɛlɛka ikɛi kpɛɛluŋ, o bɛnda miŋ tosa sɔɔŋ sala tiɔɔŋ ndoŋ muŋ. Muŋ cho ni, diola ndɔlaŋ sinaa, vɛlɛ a laŋ kpekoo soliŋndo. *