BAABUIYO chɔm naa teleŋ Chiisu veluŋndo le. Kɛ o wa bɛɛ lende, o tɛɛsial naa sɔɔŋ le miŋ sina maa o viluŋ o Yindimiiyo niŋ te.

Yiyaŋndɔ mɛɛ halaa wa a boondii keŋ o wɔsioo niŋ Bɛtilihɛm yɛ naa nda velu Chiisu wa. O paŋgii maChuu ve niŋ Kislɛf, hueiye wa misi misi, nduyɛ, piɔɔ wa wɔ siaa. Paŋgei hei yɛ, i chiɛɛliaŋ a Bɛŋgufɔnɔɔ le kɔlaŋ biyɔɔ a Yindimiiyo. Te paŋgei Kislɛf chuu pɛ, paŋgii chɔm ndi kɔɔli ve cho Tibɛf ni. Ndi chiɛɛliaŋ a Yindimiiyo mɛɛlulaŋ le kɔlaŋ biyɔɔ a Tɛɛkpaa ni. Boondei hei bɛɛ, nyɔɔ wa wɔ misi misi. Lepum pɛŋ mɔmndo wa chuchɔɔ o pemboŋ choo. Ŋ tofawɔ nyɛ Baabuiyo dimul naa wo mɛɛ chieeŋndo wa o tanda koŋ niŋ a boondii keŋ yɛ.

Mi wana poonyiaa Baabuiyo pum diolaŋ Ɛsilua bɛɛ duaunuŋ kona maa o paŋgii Kislɛf ve niŋ, hueiye wa misi misi, nduyɛ piɔɔ wa wɔ siaa. Mi Ɛsilua duaunuŋ vɛlɛ kona a chuuŋgiaŋ waŋnda faŋga bɛndoo Chulusalɛm okɔɔ. O paŋgii ŋɔmahiɔɔlu ve niŋ Kislɛf, o paale 20 ndeŋ choo o paŋgii keŋ niŋ kpeekpei ndaa  chuuŋgiaŋ ni. Mbo dimi maa, hueiye wa waŋnda lekɔɔ ma wa nyiiyaa kpa kpa a piɔɔ wa siaa wo. Le sinaa mɛɛ chieeŋndo wa a boondii keŋ o tanda koŋ niŋ yɛ, tofawɔ nyɛ wanaa ndaa chuuŋgiaŋ kaŋ Chulusalɛm nda dimi wo. Ma dimi aa, “Sialteŋ le cho leŋ ni. Ŋ nɔla miŋ sim o piɔɔ bɛŋgu le.” (Ɛsilua 9:​10, 13; Chɛluimaya 36:​22) Nyɛ koŋ te paŋgii Yindimiiyo fuuluu pɛ o tanda Bɛtilihɛm ndo niŋ, wanaa mandaa lasaa ve lɛ o bɛɛ a saa ndaa o boondii keŋ niŋ te.

Kɛ Baabuiyo ndu dimi maa, wanaa mandaa lasaa wa o bɛɛ a saa ndaa boondii nda velu Chiisu ve. Mi wanaa poonyiaa Baabuiyo wa opilɛ diolaŋ Luku dimi aa, “wanaa mandaa lasaa a wa o tanda koŋ niŋ. A wa saa ndaa ikɛi o fondaŋ nda manda chɔluaa wo ichɔl koŋ” Bɛtilihɛm ikɛi. (Luku 2:​8-12) Kɛsiŋ o kɔl maa, wanaa mandaa lasaa wa saa ndaa ikɛi ichɔl koŋ. O cho ko ipala le nda wa kelaa le. O bɛɛ deŋ chɔluaa ndaa wa ichɔl koŋ ni. Te oo yɔŋ pɛ maa a paŋgii Yindimiiyo, teleŋ piɔɔ sia yuu yuu Bɛtilihɛmndo, ndaa wa pa o bɛɛ ichɔl koŋ? Sako, ndaa ve o bɛɛ le. Mɛɛ hoo cho chɔmndo maa, o cho a Yindimiiyo le Chiisu veluŋ te. *

Baabuiyo yaasial naa tɛɛ tɛɛ a teleŋ Chiisu vi wo okɔɔ. Kɛ o chɔm naa teleŋ kpeekpei o veluŋndo le. Hei loonuŋ naa a nyɛ Masaa Sɔlɔmɔŋ dimi wo. Ndu cho ni, “Diola kɛndɛ laŋ nɔɔ laŋ la hiou naŋɔɔ a chuɛima baa kalaŋ suunɔŋndo. Lende koni, paale wana wu leŋ leŋ le hiou naŋɔɔ a paale ŋ vialuŋ ndeŋ.” (Ikilisiaatii 7:1) Le saboo hoo, Baabuiyo tɛɛsial naa vɛ vɛ a wali Chiisu tosa wo okɔɔ vɛlɛ a piɔm ndɔɔ. Kɛ o tɛɛsial naa lapi a teleŋ o violuŋndo okɔɔ le.