TE O yɔŋ pɛ ma nua o yau lakonaa niŋ, ma nua yooŋgulaŋ o wundule mapuululeŋ, ma yaŋ alaadioo nilaŋ, a tuɛi yooŋgula wɔɔŋndaŋ tau. Lapum lacho yɛ laŋ ni. Sawa tɛɛmbaa, chɔulaŋ, vɛlɛ a delɔɔ la choolaŋ. Yiyaŋndɔ vɛlɛ a bahawɛila numndaŋ. Lepum, ma del a naa. Lepum yɛ, mi wana ŋ kaala wo vi. Muŋ kpou tosa mi kɔllo tambu num puɛɛ. O hei niŋ, ma dimi mɛɛ wana laalaŋndo Choobu bɛɛ ndoo dimi yɛ aa, “I nɔla bɛɛ mi chua bolleŋ yukpɛɛ le a siɔmbulaŋ, nduyɛ a nyɛ palaa tual la choo wo.”—Choobu 10:​15.

Nyunaŋndɔ numpila aa,

• Baa hɛnaŋ Mɛlɛka wo pa cho hoo ni le ya vɛlɛ a waŋchieeya kpou?

• Kuɛɛnɛ ya sɔla yɛ malaa le mi biunuŋ bahawɛila nilaŋ?

• Tiindaŋ cho pa maa kɔlnyuloo wa niŋ o lɛŋndeŋ choo?

Baabuiyo ke naa mulila hini naa kɔltaŋ le nyunalaŋ ndaŋ.

“O cho nda ma mɛmɛ o ma mɛmɛ wɔɔsuu o hɔl fo. Wana o wana vi lɛ le. Wana o wana ve lɛ a kɔl tambɛi le, kɛlɛŋgaa mi wana chaŋ, kɛlɛŋgaa mi nyɛ nɛiyaa wa.”​—Sɔɔŋ Chɔɔmaŋndoŋ 21:​4

“Wanaa bɛvɛiya cho hunɔɔ lasisi ma huulu chuliaŋ maa kial.”​—Aisaya 35:​6, NW

“O koŋ, wanaa cho a sumɛiya a cho hunɔɔ chɔ.”​—Aisaya 35:​5

 “Teleŋ cho fuuluu mi wanaa vilɛiya kpou tuei diom ndɔɔ okoŋ, . . . ma fula o sɛilaŋ niŋ.”​—Chɔŋ 5:​28, 29, NW

“Waŋndo bɛɛ dimi niŋ maa ‘nyɛ waa nuaa o cho ndu nɛi le.’”​—Aisaya 33:​24

“Nyɛdiaa wa niŋ o hɔbɛi o chieeŋndo choo.” —Sam 72:​16, NW

Yiyaŋ naa maa nyɛ ŋ che o pei hei amakɔɔ wo yɔŋnuŋ niŋ te le. Mɛlɛka mɛi lediom maa, sɔɔŋ o dimi muŋ ndoŋ cho hunɔɔ yɔŋnɔŋ. Nduyɛ, Baabuiyo chɔm naa mɛɛ o tosa niŋ hei yɛ.

Kɛ o cho ko keŋ te Baabuiyo chɔm naa le. O chɔm naa vɛlɛ nyɛ naŋ nɔ miŋ tosa le miŋ wa a nyaale suŋsuŋ o yoomu naa niŋndo. Yiyaŋndɔ a bahawɛila cho num choo laŋ. Nyɛsɔlaa lepɛŋndo, bahawɛilaŋ o yuŋgoo niŋ, kɛndiaa lepɛŋndo, te koŋ te, mi wana ŋ kaala wo vi. Laŋ kpou mi la chuu num kɔl landɛiyo tau. Kɛ o wa bɛɛ lende, Baabuiyo tiuba mbo mala num mɛɛ ŋ bii bahawɛilaŋ ndaŋ yɛ. O tiu vɛlɛ ba mbo ke num mulila hini num kɔltaŋ le nyunala cho laŋ amatou laŋ. Laŋ la cho ni,

• Le yɛɛ nyɛpalaa cho yɛ naa choo?

• Vɛɛ naŋ dɔɔniaa yɛ kɔl landɛiyo o yoomu naa niŋ?

• Yɛɛ naŋ tosa yɛ mi yuŋgu naa wa a nyaale?

• Yɛɛnɛ yɔŋnuŋ yɛ naa te ŋ vi pɛ?

• Ŋ cha lɛ niŋ pa wanaa naa kaalaa vi wa?

• Yɛɛ ke yɛ naa laalaŋndo maa, nyɛ Mɛlɛka mɛi lediom le tosaa o chilaŋ niŋndo cho yɔŋnɔŋ?

 Nua ŋ cho o yauwo hoo niŋndo chɔm ni maa, a yeema ma sina nyɛ Baabuiyo pɛɛku wo. Yauwo hoo cho num mala le keŋ tosaa. Pɛl o pɛl cho o yauwo hoo niŋ, o nɔ nyunaa o peeleŋ amatou. Seiyaa Chɛhowaa cho wanaa bɔɔbɔɔ Baabuiyo pɛɛkoo a mala yauwo hoo. Mɛɛ nda pɛɛku yauwo hoo yɛ cho ni, nyunaa a mulioo. Nduyɛ, waŋnda haa tuei niŋ pɛɛkoo hoo yeela tau o nɛiyo hoo choo. Ŋ laalaŋ maa num bɛɛ cho ndu tueiyɔɔ yeela tau. Maa Mɛlɛka dɔu num sala fɔ ma tuei pɛɛkoo hoo yeela nduyɛ, ma sina nyɛ kpeekpei Baabuiyo pɛɛku wo.