TUUPA mi Chiisu vialuŋ, Chɛhowa Mɛlɛka dimul fɛŋ wanaa ndaa suaa le ndu wa le ma poonyiaa a ndu okɔɔ. Nduyɛ, ma tɛɛsiaa vɛ vɛ a violɔŋ ndɔɔ, wali o nɔ le tosaa wo, vɛlɛ a piɔm ndɔɔ le waŋnda piŋioo. Le miŋ sina wana cho Mɛsaya wo, mɛɛ miŋ yaasiaa fɛŋ sɔɔŋ waŋnda haa ndaa poonyiaa muŋndoŋ. Sɔɔŋ muŋ kpou miŋ sɔla peelɔŋndo o Chiisu Kiliti niŋ. Muŋ nɔ biondɔŋ te, nduyɛ, ma tɛɛsiaa muŋ vɛ vɛ. Le tamaseliiyo, ŋ tofawɔ sɔɔŋ muŋ dimiŋ a violɔŋ ndɔɔ okɔɔ woŋ ŋtiŋ, vɛlɛ a teleŋ o wa chɛlɛkpɛ wo.

Mi wana ndoo suaa le Mɛlɛka wo Aisaya dimi maa, o pulale Masaa Deeveleŋ choo Mɛsaya cho fula ni. (Aisaya 9:​7) Lekɛndɛi, o pulale Deeveleŋ choo kpeekpei Chiisu fula ni.—Maatiu 1:​1, 6-17.

Makal bɛɛ wa wana ndoo suaa le Mɛlɛka wo opilɛ. Mi ndu bɛɛ poonyiaa a Chiisu okɔɔ. Mbo dimi maa o “Bɛtilihɛm Ɛfilata” niŋ Chiisu nɔ le violɔŋndo ni. Nduyɛ maa, o nɔ le simnɔŋndo  masa. (Makal 5:​2) A boondii Chiisu veluŋnde, chiooŋ ŋmuuŋ wa Isɔluɛi diolaŋ Bɛtilihɛm. O pilɔɔ wa Nasaluɛi ikɛi kpɛɛluŋ, kpeŋgii baluaŋnde o lɛŋnde leŋ niŋ. O pilɔɔ ndu wa Chulusalɛm ikɛi o lɛŋnde Chudiaa leŋ niŋ. Bɛtilihɛm wa Chulusalɛm ikɛiyo ndaa veelu ni aa Ɛfilata. O chiee koŋ niŋ nda velu Chiisu ni, a mɛɛ ndii dimiŋ yɛ koni.—Maatiu 2:​1.

Mi Baabuiyo dimi vɛlɛ maa Mɛlɛka cho Po ndɔɔ soli Ichipi. Teleŋ Chiisu wa chɛlɛkpɛ wo, ma kua a ndu Ichipi. Kɛ mɛɛ masaa Hɛlɔɔ vi, ma miiŋgu a ndu pila naa nda chɛŋ a ndu wa. Hei tosaŋ le mi nyɛ dimiŋ a ndu okɔɔ wo yɔŋnuŋ.—Hoosiaa 11:​1; Maatiu 2:​15.

Te a tofa pɛ o  peele 200 choo, a cho chɔ bolii Baabuiye loŋ ichɔmaa chɛ chɛ o lepula. Tofa o suɛi lebolle hei bɛŋgu “Bolle Baabuileŋ.” Bolii Baabuiye hei tɛɛsiaa sɔɔŋ pum vɛ vɛ a Mɛsaya okɔɔ. Tuuwɔ bolii Baabui keŋ a icho i chɔmaa o suɛi lebolle hei bɛŋgu wo “Nyɛ Yɔŋnuŋndo.” Hei tosaa cho num mala mi laalaŋ numndo chɔɔlu kalu, nduyɛ ma che maa Diom Mɛlɛkaa tonyaa o cho ni.

Te a wa pɛ bolii Baabuiye hei yaasiaa, kɛsiŋ o kɔl maa o cho lɛ hau le nda poonyiaa sɔɔŋ muŋ o yaula maHibuluilaŋ niŋ a Chiisu okɔɔ le. Ŋ chua fɛŋ wɔsila bɔɔbɔɔ malaŋ Chiisu vialuŋ. Mi Chiisu pila dimi aa, “Nyɛ o nyɛ dimiŋ a ya okɔɔ o cho yɔŋnɔŋ. Koŋ cho ni, nyɛ Sawala Mɛlɛka ke Muuse laŋ la dimi a ya okɔɔ wo, a nyɛ wanaa suaa le Mɛlɛka wa dimi wo, a nyɛ yau Sam dimi wo.” (Luku 24:​44) A mɛɛ numpila che o Baabui numndo niŋ yɛ, sɔɔŋ muŋ kpou miŋ yɔŋnuŋ. Nyɛ o nyɛ dimiŋ a ndu okɔɔ, opilɛ bɛɛ lo kɔɔli le yɔŋnɔŋndo le.