1, 2. Kuɛɛnɛ naŋ viaŋnuŋ yɛ hau miŋ wa kɛndiaa?

YIYAŊNDƆ maa a cho kɔlaŋ o tiŋndo tɛɛŋ. Hueiyii wɔɔŋ wɔɔŋnde suŋgu hɔŋndo. Piɔɔ hel helɔɔ pila okoŋ, mi choo piimiaa kpilo. Nduyɛ, o viu bɛɛ le mi piɔɔ kalaa kandu siaa kpɔlɔ kpɔlɔ bɛndoo pila. Taŋndaŋ bɛɛ ma kandu deŋioo. Yɛɛ ŋ nɔ yɛ niko ma tosa? O kpeekpei niŋ, a yeema ma nuuviaa fondaa le vioŋnɔŋndo. A lo nuuviaa, ma cha fondaŋ viaŋnaŋndo o nɛiyo daŋgala. O cho o vesɛi leniŋ sɛɛŋ, nduyɛ hueiyii nɔla ndu nyɛ o nyɛ yɔŋ te. A che ndu dɔɔ pɛ nyɔɔ hɛnaŋ num le luɛiyɔɔ leniŋ. Vɛ, a ve a kɔlkɛndɛ le luɛiyɔɔ o fonda waa lende niŋ te?

² Chieeŋ naŋ cho hau niŋndo cho ko maa hueiyii wɔɔŋii keŋ. Hiouwɔɔ tuŋ kpundɛlaŋ la cho lachi a kuiyo o chieeŋndo hoo niŋ ni. Kɛ a koŋ kpou, ŋ nɔ naa viaŋnaŋaa manda naa o kpundɛla chieeŋndo hoo niŋ, la tɛɛmbuu naa lefafɛɛŋ te wo. Kuɛɛnɛ naa viaŋnaŋaa kaŋ a cho yɛ? Baabuiyo dimi aa, “Mɛlɛka Yaawɛɛ . . . Num cho wana chiɔu yoomu nuu, nduyɛ ma manda ya wo ni. Num cho Mɛlɛka nuu ni, num ya I tiindaŋ ni.”—Sam 91:​2.

3. Vɛɛ naŋ siiŋguu yɛ Chɛhowa naa viaŋnaŋ?

³  Numpila yiyaŋndɔ a keŋ, le mi Chɛhowa wana toosiaa chieeŋndo kpou, nduyɛ, mbo wa Mɛlɛka Kpuluŋgumaa wo, wa naa naŋ viaŋnuŋ nda. Chɛhowa nɔla mbo manda naa kanifuule, o nɔ kpaayaa mbo hiau wana o wana vɛlɛ a nyɛ o nyɛ wɔɔŋ huŋ le naa nyɛpalaa tuisioo choo. O yɔŋ bɛɛ mi nyɛpalaa komal naa, Chɛhowa nɔla mbo dɛɛniaa naa kɔllo le miŋ biunuŋ. Vɛɛ naŋ siiŋguu yɛ Chɛhowa naa viaŋnaŋ? Mɛɛ naŋ tosa hei yɛ cho ni, tiindaŋndo dɔuwɔɔ o ndu niŋ. Le handɔɔ lechoo, diom Mɛlɛkaa dimul naa aa, “La hiou lachi a waa o kaala Mɛlɛkaa bɛŋgu.” (Chudi 21) Lekɛndɛi, ŋ nɔ miŋ hiou lachi a waa o kaala Mɛlɛkaa bɛŋgu. Hei tosaa chɔm ni maa ŋ nɔ kaalaa le Finya naa cho o choo choo niŋndo. Nduyɛ, miŋ laalaŋ kɛsɛ maa, ndu cho naa naŋ viaŋnuŋ nda ni. Kɛ vɛɛ naŋ looku yɛ kaala suu waa naa taŋgul?

4, 5. Chɔmndɔ nɛilaŋ lapum, la Chɛhowa chɔm naa kaalaa wo.

⁴ Le miŋ lo o kaala Mɛlɛkaa bɛŋgu, mɛɛ miŋ nɔ fɛŋ balika melaa le kaala o chɔm naa wo. Yiyaŋndɔ a sɔɔŋ tonya ŋ pɛɛku niŋ o Baabuiyo niŋ a mala yauwo hoo wo. Mɛlɛka toosiaa nyɔɔŋ kpou wo cho Chɛhowa ni. O ke naa lɛŋndeŋ ndeŋ le mi le wa fondaŋ naa chalaa. Nduyɛ, mbo toosiaa nyɛ o nyɛ naŋ yeema o lɛŋndeŋ ndeŋ choo. Nyɛdiaa ni, mɛŋdaŋ ni, visiaa vɛlɛ a nyɛm cheleŋndoŋ tau. Diom Mɛlɛkaa Baabuiyo cho ni. Leniŋ o chɔm naa diola ndɔlaŋ vɛlɛ a suiliŋnda ndɔlaŋ ni. Le handɔɔ lechoo, Baabuiyo dimul naa vɛlɛ maa, mi Mɛlɛka yɔŋ Po ndɔ kaalaa pilɔɔ kpe o chieeŋndo hoo choo. Okoŋ kɔɔli, mbo chɛl mi Chiisu saŋga tau, okoŋ, mbo wu le naa baŋaa. (Chɔŋ 3:​16) Yɛɛ kioo hoo tosallɛ naa? Kioo hoo ke naa tiindaŋndo le chila kɛndɛlaŋ.

⁵ Tiindaŋ naa le chilaŋ cho vɛlɛ o nyɛ cheleŋ Chɛhowa tosa le naa wo niŋ. Ndu cho Masale ndɔ le o kila o choo choo niŋndo ni. Nduyɛ, Chiisu Kiliti cho masaa o masaleŋ ndeŋ choo ni. Masaleŋ ndeŋ le cho hunɔɔ nyɛpalaa chii suŋsuŋ o chieeŋndo hoo choo. Okoŋ, mi chieeŋndo kpou simnuŋ kpele hɛnɛkiɔɔ. Numpila yiyaŋndɔ a keŋ. A wa niŋ achal o kpele hɛnɛkɛ koŋ niŋ a kɔlnyuloo lefafɛɛŋ. (Sam 37:​29) Kɛ le suŋsuŋ ndɔ, Mɛlɛka ke naa nɛi chɔmaa mɛɛ naŋ looku miŋ bii yoomu naa nyɛkɛndɛi yɛ. O ke naa vɛlɛ  dioo le miŋ wa suɛi naa ndu cha o piɛileŋ niŋ. Nɛilaŋ lapum la cho laŋ ni, la Chɛhowa chɔm num kaalaa vɛlɛ a waŋchieeya kpou wo.

6. Yɛɛnɛ ŋ tosa yɛ le chɔmndo maa a Kaala Chɛhowa mɛɛ o kaala num yɛ?

⁶ Nyunaŋndɔ numpila aa, yɛɛ kpeekpei ya tosa yɛ le chɔmndo maa I kaala Chɛhowa? Mi apum dimi dɔɔ aa, “Ya bɛɛ I nɔ mi kaala Chɛhowa le sɔŋgɔ o kaala ya wo.” Lende num bɛɛ yiyaŋ ni? Sawa Mɛlɛkaa dimi aa, “Kaala Masanɔɔ [Chɛhowa] o cho Mɛlɛka ŋ piɛiyo . . . nyɛ kɛndɛ kɛndɛi. Kaala ndu a kɔl numndo kpou, nduyɛ, ma wa yiyaŋndo a ndu okɔɔ teleŋ o teleŋ fee.” (Maatiu 22:​37) Nduyɛ, sawaa hoo Chiisu dimi ni maa, ndu hiou a sawalaŋ kpou. A nɔ sabulaŋ tau le Chɛhowa Mɛlɛka kaalaa. Kɛ yiyaŋndo nɔɔ maa I kaala Mɛlɛka cho letuu le. A nɔ ma kaala ndu a kɔl numndo, yiyaŋ numndo, vɛlɛ a yoomu numndo kpou.

7. Dimioo a sondo kinɛi maa I kaala bɔɔ Mɛlɛka chɔm ni maa a nɔ kaalaa le ndu? Tɛɛsiaa wɔ.

⁷ A mɛɛ Baabuiyo dimi yɛ, o cho ko dimioo a sondo maa I kaala bɔɔ Mɛlɛka le cho suɛi le. O kpeekpei niŋ, yiyaŋ kɛndɔɔ pila cho koŋ ni le kaalaa nɔɔ le Mɛlɛka. Kɛ kandɔŋndo ko cho koŋ ni, le kaala kpeekpeiyo nɔɔ le Mɛlɛka. Kulu lesiauwo nyɛ sɔviɔɔ pila o cho ni, kanifuule, o kulu koŋ niŋ siauwo wul ni mbo sul, okoŋ, mbo kom siauma kɛndiaŋ. Kɛ te o yɔŋ pɛ ma piɛi waŋndo siauleŋ, mbo chua kulu lesiauwo mbo ke num, a naŋ pa kɔl? Sako. Lende koni icho a Mɛlɛka kaalaa ni. Yiyaŋ kɛndɔɔ pila cho koŋ ni le dimioo maa I kaala Mɛlɛka. Kɛ kandɔɔ koni cho koŋ ni. Baabuiyo chɔm mɛɛ naŋ nɔ miŋ kaala Mɛlɛka yɛ. Mbo dimi aa, “Mɛlɛka kaalaa cho hoo ni, nyɛ o dimul naa wo tosaa. Nduyɛ, nyɛ o dimul naa le tosaa wo, o cho nyɛ kendu maa mi ŋ bumba ndu tosa le.” (Chɔŋ Tasoo 5:​3) Kaa naa a nyɛ naŋ cho pɛɛkoo wo dɔuwɔɔ o wali niŋ chɔm ni maa, ŋ nɔ kaala kpeekpeiyo le Mɛlɛka.—Nuawɔ Maatiu 7:​16-20.

8, 9. Vɛɛ naŋ chɔm yɛ kaala a balika melaa le Mɛlɛka?

⁸ Le chɔmndo maa ŋ nɔ kaalaa le Mɛlɛka, mɛɛ miŋ bii sawala  ndɔlaŋ nduyɛ, miŋ dɔu laŋ o wali niŋ. Sawala Mɛlɛkalaŋ la kindu biyɔɔ le. O cho pɛŋ kalaŋ te lacho le naa le. Kɛ Chɛhowa ke naa sawalaŋ ndaŋ le miŋ wa a nyaale, nduyɛ, miŋ tuei yoomu naa yeela. (Aisaya 48:​17, 18) Te o yɔŋ pɛ miŋ kuɛ o nɛi chɔmaa Mɛlɛka wo choo, mɛɛ koŋ chɔm maa ŋ nɔ balika melaa le nyɛ o nyɛ Finya naa cho o choo choo niŋndo tosal naa wo. Icho bɔɔ suɛi kɔl tambɛi le sinaa maa o chieeŋndo hoo niŋ hau, waŋnda nyɛɛmbɔ koni cho balika melaa hoo chɔmndo ni. Teleŋ Chiisu wa o chieeŋndo choo naŋndo, waŋnda apum ndaa chɔm balika melaa kposoŋ le nyɛ o tosal nda wo le. Ŋ nɔ miŋ wa maa wanaa kaŋ te. Le tamaseliiyo, mi Chiisu ndoo siŋgi wanaa ndaa nɔ naa ŋlɛlɔɔ wa ŋwaŋ tɔ. Kɛ o waŋnda haa tɛɛŋ, waŋndo opilɛ kpe miiŋgu ni mbo mel Chiisu balikaa. (Luku 17:​12-17) Lelaŋ, ŋ nɔ miŋ wa maa wana mel hoo Chiisu balikaa wo. Ŋ wanuŋ maa wanaa ŋɔmahiɔɔluaa kɛɛ Chiisu balikaa mello wa le.

⁹ Sawala kuɛɛ Chɛhowa ke yɛ naa le miŋ bii? Ŋ soo niŋ a la bɔɔbɔɔ okɔɔ o yauwo hoo niŋ. Kɛ, ŋ keeku wɔ vɛlɛ sondoo o lapum choo. Sawala Mɛlɛkalaŋ biyɔɔ la mala naa le miŋ lo o kaala Mɛlɛka wo bɛŋgu.

10. Tɛɛsiaa wɔ le sabu o cho suɛi sɔvɛ le pɛɛkoo lɔɔlɔɔ a Chɛhowa okɔɔ wo?

¹⁰ Pɛɛkoo a Chɛhowa okɔɔ cho nɛiyo opilɛ le ndu sɔɔŋgoo ikɛi kpɛɛluŋ. Ŋ nɔ miŋ pɛŋgi le pɛɛkoo a Chɛhowa okɔɔ le. Te o yɔŋ pɛ ma wa o bɛɛ nduyɛ, hueiye cho misisi okoŋ, ma kiisuu yiŋndeŋ ma chal haŋgɔɔ ikɛi, a chɛl pa mi yiŋnde leŋ le nyum? Pɛ pɛ bɛɛ a chɛl te. A yeema ma wa leŋ beeŋgoo teleŋ o teleŋ halikpeŋ mi le wa sandei wule wule le mi fondaa tuulu. Te o ve lende le, a cho nyiiya a hueiye. Mɛɛ ŋ beeŋguu naa yiŋndeŋ le mi le wa sandei wule wule yɛ, lende koni kɔlkaloo sɔlaa a Mɛlɛka okɔɔ mala naa ni mi kaala naa le ndu hiou lachi a kaloo poŋ.—Pulɔwaa 2:​1-5.

11. Mɛɛ Chiisu chii buɛiyaa nduaa pɛɛku, yɛɛ wa yɛ fulamakɔɔlioo?

¹¹ Chiisu ndoo yeema mi kaala buɛiyaa nduaa le Chɛhowa vɛlɛ a tonya ndɔ cho o Baabuiyo niŋndo mi ndoo hiou lachi. Mɛɛ Chiisu fula o sɛiyo niŋ, mbo pɛɛku buɛiyaa nduaa a ŋiɔɔŋ a sɔɔŋ muŋ dimiŋ a ndu okɔɔ o yaula maHibuluilaŋ niŋ nduyɛ, miŋ yɔŋnuŋndoŋ. Yɛɛ ndoo wa yɛ fulamakɔɔlioo? Mɛɛ nyɔɔ viou kpɛɛ, ma dimi aa, “Mɛɛ o wa suɛi naa naa cha o nɛi, nduyɛ mbo wa naa suɛi Mɛlɛkɛi tɛɛsiallo, mi kɔltaŋ la yɔŋnuŋ naa nyɛ kɛndɛ wuye wuye.”—Luku 24:​32.

12, 13. (a) Yɛɛ tosa yɛ wanaa bɔɔbɔɔ hau o chieeŋndo niŋ, a nɔ lɛ kaala ndaa nɔ paandu le Mɛlɛka vɛlɛ a Baabuiyo wo le? (b) Yɛɛ naŋ nɔ yɛ miŋ tosa kaala naŋ nɔ le Chɛhowa wo nyulul te?

¹² Teleŋ tase ŋ pɛɛku tonya cho o Baabuiyo niŋndo, ma naŋ kɔl tau. Nduyɛ, mi kaala Mɛlɛka wo luɛi num o kɔl tau. Wanaa bɔɔbɔɔ bɛɛ lende ko i yɔŋnuŋ a nda ni. Kɛ a nɔ simullo. Ndu cho ni, le loo o kaala tase num oo nɔ koŋ le Mɛlɛka wo choo. Ŋ nɔ miŋ tol kaa cho hau o chieeŋndo hoo niŋndo kɔɔli le. Mi Chiisu dimi maa kaala waŋnda nɔ le Mɛlɛka wo o cho tolɔɔ toolo. (Maatiu 24:​12) Yɛɛ ŋ nɔ yɛ ma tosa kaala ŋ nɔ le Chɛhowa vɛlɛ a tonya ŋ pɛɛku o Baabuiyo niŋndo nyulul te?

¹³ Hiou lachi a pɛɛkoo a Chɛhowa Mɛlɛka okɔɔ vɛlɛ a Chiisu Kiliti. (Chɔŋ 17:​3) Te a pɛɛku pɛ isɔɔ o Baabuiyo niŋ a Mɛlɛka okɔɔ, a chal a yiyaŋ yiŋgoloŋ o nyɛ ŋ pɛɛku koŋndo choo. Okoŋ, a nyunaŋ numpila aa, ‘Yɛɛ hoo pɛɛku yɛ ya a Chɛhowa Mɛlɛka okɔɔ? Le sabu cheleŋ kuɛɛ ya nɔ yɛ mi kaala Chɛhowa a kɔl nuu, yiyaŋ nuu, vɛlɛ a yoomu nuu kpou?’ (Nuawɔ Timoti Tasoo 4:​15.)  Yiyaŋ suu waa naa mala num mi kaala ŋ nɔ le Chɛhowa wo hiou lachi.

14. Vɛɛ piɛileŋ le mala yɛ naa le miŋ lo o kaalaa choo le Chɛhowa?

¹⁴ Nɛi cheleŋ mala naa vɛlɛ le loo o kaala naŋ nɔ le Chɛhowa wo choo wo cho piɛileŋ lɔɔlɔɔ o ndulo ni. (Tɛsaloniaŋ Tasoo 5:​17) O Buŋgɛi 17 ve o yauwo hoo niŋ, miŋ pɛɛku maa piɛileŋ, ke sɔwɛ Mɛlɛka ke naa wo le cho ni. Te waŋnda wa pɛ o chaŋyɛi niŋ nduyɛ, ma wa suukaŋndo lɔɔlɔɔ, koŋ tosa mi chaŋyɛi ndɛi keŋ hiou lachi. Mɛɛ lende koni piɛileŋ le cho ni. Te o yɔŋ pɛ miŋ wa piɛileŋ o ndu lo lɔɔlɔɔ, le tosa mi chaŋyɛi nɛi naa Chɛhowaa tɛɛŋ vɛlɛ a kaala naŋ nɔ le ndu wo hiou lachi. Lelaŋ, te ŋ wa pɛ piɛiyo o Chɛhowa lo, ŋ nɔ miŋ dimi nyɛ pilɔɔ lɔɔlɔɔ le. Ŋ nɔ miŋ poonyiaa piɛile naaleŋ o yauwo choo miŋ wa nuaa leniŋ te. Mɛɛ mɛɛ chuaambɔ pɔmbɔɔ suaa naa o finya ndɔ kaalaa lo yɛ, lende naŋ nɔ ni miŋ soo o Chɛhowa lo. Piɛile naaleŋ o Chɛhowa lo le nɔ mi le chɛŋ naa o kɔllo niŋ di. Nduyɛ, mi le wa o nɛi lebɛɛ niŋ. (Sam 62:​8) Baabuiyo pɛɛkoo a ba naa vɛlɛ a piɛileŋ, cho nɛila sɔwɛlaŋ lapum ni le Chɛhowa saŋgalaa. Nduyɛ, la mala naa le miŋ lo o kaala Mɛlɛka wo bɛŋgu.

15, 16. Vɛɛ naŋ nɔ yɛ miŋ che wali dimiaa yooŋgu kɛndɛ Mɛlɛkaa?

¹⁵ Baabuiyo pɛɛkoo vɛlɛ a piɛileŋ kinɛi naŋ tosa a ba naa ni, le Chɛhowa saŋgalaa. O faŋaŋ ndɔ o hoo kɔɔli, nɛi cheleŋ cho o naŋ saŋgala Mɛlɛka kpendekele wo. Ndu cho ni, dimullo acheleŋnda a laalaŋnda naalaŋ okɔɔ. A dimul niŋ acheleŋnda a tonya ŋ pɛɛku o Baabuiyo niŋndo okɔɔ? Te o yɔŋ pɛ maa a tosa niŋ keŋ lepilɛ, mɛɛ num bɛɛ a tosa wali sɔwɛ bɛndu. (Luku 1:​74) Te ŋ wa pɛ acheleŋnda dimullo tonya naŋ pɛɛku hoo a Chɛhowa Mɛlɛka okɔɔ wo, mɛɛ wali keŋnuŋ Kilisiɔŋaa tonyaa kpou le tosaa wo naŋ cho koŋ tosaa ni. Ndu cho ni, le yooŋgu kɛndɔɔ dimioo a Masale Mɛlɛkaleŋ okɔɔ.—Nuawɔ Maatiu 24:​14; 28:​19, 20.

¹⁶ Mi kiilanɔɔ Pɔɔl cha wali dimiaa yooŋgu kɛndɔɔ maa nyɛ sɔwɛɔ pila o cho le ndu ni. Mbo dimi maa sullo o cho ni. (Kɔliŋtiaŋ Diiŋ Ndɔɔ 4:​7) Suɛi o acheleŋnda lo a Chɛhowa Mɛlɛka okɔɔ vɛlɛ a sabula ndɔlaŋ, wali sɔwɛ ŋ nɔ ma tosa wo o cho ni. Kanifuule, wana ke naa wallo hoo wo, o nɔ sulaŋ te. Nduyɛ, tɔnɔ naŋ sɔla o wallo hoo niŋndo bɛɛ, o nɔ sulaŋ te. Te a wou pɛ balaŋ le  wallo hoo tosaa, mɛɛ a cho wanaa nɔ yeemɛi le Chɛhowa piɛiyo wa mala ma sɔɔŋguu ndu ikɛi kpɛɛluŋ. O hei niŋ, a cho nda mala le yoomu fafɛɛŋndo sɔlaa o chilaŋ niŋ. Wali kuɛɛ tosa yɛ hau ma wa a nyaale maa hoo? Le handɔɔ lechoo, waŋnda dimullo a Chɛhowa okɔɔ o Diom ndɔɔ niŋ, kindi laalaŋ numndo vɛlɛ a kaala ŋ  nɔ le ndu wo. Nduyɛ, Chɛhowa puɛɛnuŋ sɛmbɛ ŋ cho dɔuwɔɔ o wali ndɔɔ niŋndo le. (Hibuluiya 6:​10) Wallo hoo tosaa lɔɔlɔɔ mala num le ma lo o kaala Mɛlɛka wo bɛŋgu.—Nuawɔ Kɔliŋtiaŋ Tasoo 15:​58.

17. Le yɛɛ naŋ nɔ yɛ miŋ dimi yooŋgu kɛndɛ Mɛlɛkaa hau chɔ chɔ?

¹⁷ Icho i sɔwɛ le miŋ sina maa, yooŋgu kɛndɛ Mɛlɛkaa nɔ mbo dimiŋ chɔ chɔ. Baabuiyo dimi aa, “Dimul waŋnda suɛi Mɛlɛkɛi. Ke nda ndi teleŋ o teleŋ.” (Timoti Diiŋ Ndɔɔ 4:​2) Le yɛɛ naŋ nɔ yɛ miŋ dimi yooŋgu kɛndɛ Mɛlɛkaa hau chɔ chɔ? Diom Mɛlɛkaa dimul naa aa, “Paale Mɛlɛka Yaawɛɛ o kɔɔsa niŋ a waŋnda leŋ, le cho niŋ kpɛɛluŋ. Nduyɛ le cho hunɔɔ chɔ chɔ.” (Sɛfanaya 1:​14) Paale Chɛhowa tɛɛmbuu niŋ chieeŋ wɔɔŋndo hoo wo le cho niŋ kpɛɛluŋ. Lelaŋ, waŋnda nɔ ma sina a paaleŋ ndeŋ okɔɔ. Teleŋndo hoo nda nɔ ni ma sina maa Chɛhowa cho Masa ndaa ni. Nduyɛ, paale mɛɛlula chieeŋndo hoo, le dounuŋ niŋ tamala le!—Habakuku 2:​3.

18. Le yɛɛ naŋ chuuŋgiaŋ yɛ diompilɛ naa chaaŋaa naa laalaŋnda le Chɛhowa piɛiyo?

¹⁸ Chɛhowa yeema naa miŋ wa chuuŋgiaŋndo diompilɛ naa chaaŋaa naa laalaŋnda le ndu piɛiyo. Lelaŋ Baabuiyo dimi ni aa, “La ŋ nuuviaŋ nɛila naa ŋ nɔla mi ŋ kpeeŋiaa chaaŋaa naa vellaa velle le waŋnda kaalaa a sɔɔŋ kɛndɔŋ tosaa laŋ. La ŋ mal nuŋ chuuŋgiaŋndo diom pilɛ mɛɛ waŋnda a pum a nɔ kaa a chɛl le hunɔɔ o bɔŋaŋ niŋ te yɛ le. Kɛ, la ŋ dɛɛniaŋ vellaa velle a tiindaŋ naa ŋ nɔ o Mɛlɛka niŋndo okɔɔ. Taama nya pila la cho niŋ chɔɔ maa paale Masanɔɔ nɔ le miiŋgoo naŋ ndeŋ le cho niŋ kpɛɛluŋ.” (Hibuluiya 10:​24, 25) Te o yɔŋ pɛ miŋ chuuŋgiaŋ naa chaaŋaa naa laalaŋnda, mɛɛ naa kpou di bɛndoo pila keŋnuŋ naa koŋ ni le Chɛhowa Mɛlɛka naa piɛiyo vɛlɛ a ndu saŋgalaa. O chuuŋgiaŋ ndaŋ choo naŋ dɛɛniaŋ vellaa velle ni.

19. Yɛɛ naŋ nɔ yɛ miŋ tosa le mi kaala cho naa tɛɛŋ o kunda leKilisiɔŋndo niŋndo hiou lachi a kaloo?

¹⁹ Te ŋ wa pɛ chuuŋgiaŋndo naa chaaŋaa naa laalaŋnda le Chɛhowa piɛiyo, koŋ tosa mi kaalaa a chaŋyɛi cho naa tɛɛŋ o kunda leKilisiɔŋndo niŋndo kendu poŋ. Ŋ nɔ miŋ tofa le kaala kɛndɛlaŋ waŋnda o ŋdial, mɛɛ mɛɛ Chɛhowa bɛɛ tofa le kaala kɛndɛlaŋ naa o ŋdial lɛ koni. Sinapɛŋgu maa, wanaa lahakiaa naa kpou cho ni. Nduyɛ, loonuŋ vɛlɛ maa, naa kpou nɔ kelaŋ yɛ yɛ. Waŋndo o  pum, mbo tosa hiouwɔɔ lachioo chɔ chɔ le pɛɛkoo a Mɛlɛka okɔɔ. Nduyɛ, naa kpou ŋ bianduŋ lepum. (Nuawɔ Kolosiaŋnda 3:​13.) Tosa chaŋyɛi kpɛɛluŋnde a wanaa kaala Chɛhowa a kɔl ndaa kpou wa. Te a tosa pɛ keŋ, mɛɛ num bɛɛ cho suŋsuŋ hiouwɔɔ lachioo sɔla o Mɛlɛka piɛiyo niŋ. Chɛhowa piɛiyo naa chaaŋaa naa laalaŋnda diom pilɛ, mala num ma lo o kaala Mɛlɛka wo bɛŋgu. Yɛɛ Chɛhowa fanda yɛ wanaa piɛi ndu o laalaŋndo choo nduyɛ, ma lo o kaala ndɔɔ bɛŋgu wa?

20, 21. Yɛɛnɛ cho yɛ “yoomu kpeekpeiyo”? Nduyɛ, le yɛɛ o cho yɛ tiindaŋ sɔwɛ?

²⁰ Yoomoo Chɛhowa cho hunɔɔ buɛiyaa nduaa laalaŋnda fanda ni. Kɛ yoomu suu kuɛɛ? Yoomu kpeekpeiyo pa naŋ nɔ naa ni? Naa bɔɔbɔɔ muli hau nyunaa hoo aa, ei. Kanifuule, ŋ cho hueiye soliŋndo o lamiliŋ miŋ miŋgi. Ŋ cho nyɛdiaa dioo miŋ kol mɛŋndaŋ. Teleŋ naŋ wa a nyaale wo miŋ dimi aa, yoomoo kpeekpei cho hoo ni. Kɛ a koŋ kpou, Baabuiyo ndu dimi maa, o cho yoomu kpeekpei le naŋ nɔ hoo le.

²¹ Diom Mɛlɛkaa dɛɛniaa naa le miŋ sim o kala kpiŋ le miŋ “sɔla yoomu cho yoomu kpeekpeiyo wo.” (Timoti Tasoo 6:​19) Diomndaŋ la cho chɔmndo maa, ŋ nɔ tiindaŋndo le hunɔɔ “yoomu kpeekpeiyo” sɔlaa o chilaŋ niŋ. Teleŋ naa kpou cho simnɔŋ wanaa walaŋndo, ŋ cho yoomu naa tueiyɔɔ yeela a mɛɛ diom Mɛlɛkaa dimi yɛ. Naa kpou cho wa achal lefafɛɛŋ a mɛɛ sabu Mɛlɛkaa wa o kandɔŋndo pa yɛ. Teleŋ naŋ cho wa achal o kpele hɛnɛkiɔɔ niŋ o lɛŋndeŋ choo wo, kɛndiaa walaŋndo wa niŋ, kɔlnyuloo, vɛlɛ a nyaaloo. A teleŋ koŋ naŋ cho “yoomu kpeekpeiyo” tueiyɔɔ yeela ni. Ndu cho yɛ yoomu fafɛɛŋndo ni. (Timoti Tasoo 6:​12) O cho tiindaŋ kpeekpeiyo le cho hoo le?

22. Vɛɛ ŋ looku yɛ ma sim o kala kpiŋ le “yoomu kpeekpeiyo” hoo hunɔɔ sɔlaa?

²² Vɛɛ naŋ looku yɛ miŋ sim o kala kpiŋ le miŋ huŋ “sɔla yoomu cho yoomu kpeekpeiyo wo?” Le yoomu kpeekpeiyo hoo sɔlaa, mɛɛ miŋ dɔu tonya Baabui naŋ cho pɛɛkoo wo o wali niŋ. Lelaŋ Pɔɔl dimul Kilisiɔŋnda o kala kala ni maa, a wa wanaa “tosal waŋnda tonyaa” nduyɛ ma wa “wanaa nɔ kɛndɛi tau tau wa.” (Timoti Tasoo 6:​18) Yɛɛ Pɔɔl ndoo yiyaŋ yɛ? Baa wali kɛndɔɔ tosaa  ke wana “yoomu kpeekpeiyo” ni? Pɛ pɛ bɛɛ, o cho keŋ te o yiyaŋ te. “Kɛndɛi Mɛlɛkɛi” cho tosa ni miŋ sɔla yoomu kpeekpeiyo hoo. (Luomaŋnda 5:​15) Wanaa cho lo Chɛhowa piɛiyo o laalaŋndo choo wa, nda o cho hunɔɔ fandaa ke ni. Chɛhowa yeema num ma sɔla “yoomu kpeekpeiyo” hoo. Wanaa cho lo o kaala Mɛlɛkaa bɛŋgu wa cho hunɔɔ yoomu fafɛɛŋndo hoo sɔla o chilaŋ niŋ ni. Nyaaloo wa niŋ o hɔbɛi vɛlɛ a kɔlnyuloo.

23. Le yɛɛ o bɛnda yɛ le miŋ lo o kaala Mɛlɛkaa bɛŋgu?

²³ Wana o wana fee nɔ mbo nyunaŋ ndupila aa, ‘A mɛɛ Baabuiyo dimi yɛ pa ya cho Mɛlɛka piɛiyo ni?’ Te ŋ laalaŋ pɛ lekɛndɛi maa lende naŋ cho Mɛlɛka piɛiyo lɔɔlɔɔ ni, mɛɛ o nɛi tonyaa choo naŋ sim ni. Hei tosa miŋ dɔu tiindaŋndo o Chɛhowa niŋ maa ndu cho naa naŋ viaŋnuŋ nda ni. Chɛhowa cho lo buɛiyaa nduaa laalaŋnda manda tei a mɛɛlula chieeŋ kpundɔɔ hoo. Chɛhowa cho naa vɛlɛ mala miŋ luɛi o chieeŋ sɛnɛi cho niŋ hoo kpɛɛluŋndo niŋ. O wa niŋ bɔɔ suɛi kɔl kɛndɛ le teleŋndo hoo chɔɔ. Numpila yiyaŋndɔ mɛɛ naŋ wa niŋ a nyaale le mɛɛ naŋ tosa kɛɛsiaa kɛndɔɔ suŋsuŋ yɛ. Te a tosa pɛ kɛɛsiaa suu waa naa suŋsuŋ, a tuɛi niŋ “yoomu kpeekpeiyo” yeela. Yoomoo hoo Chɛhowa ndoo yiyaŋ le wana o wana fee kioo ni. Yoomu fɛɛŋ a fafɛɛŋndo.