1-3. Nyunala kuɛɛ wanaa siaama nyuuniaa yɛ a piɔmndo okɔɔ? Nduyɛ, mulila kuɛɛ piɛiyii ka ka yɔŋgu yɛ hau?

LE WƆSILA bɔɔbɔɔ, wanaa siaama cho niŋ yiyaŋndo o nyunalaŋ ndaŋ choo. Nyunala sɔwɛlaŋ pila la cho ni. Chɔŋ a teleŋ naŋ veluŋndo, naa bɔɔbɔɔ, wanaa naa naŋ kaala wa vi niŋ. Nduyɛ, naa bɛɛ piɔmndo cho naa kuee.

² O buŋgɛi naŋ hiou ve niŋ, miŋ yaasiaa mɛɛ yoomu Chiisu soliŋ sala wo kumbul naa nɛiyo le yoomu fafɛɛŋndo yɛ. Miŋ sina vɛlɛ nyɛ Baabuiyo dimi wo maa teleŋ cho fuuluu, “wana o wana vi lɛ le.” (Sɔɔŋ Chɔɔmaŋndoŋ 21:​4) Kɛ le suŋsuŋ ndɔ, naa kpou cho piɔmndo. Mi masaa Sɔlɔmɔŋ dimi aa, “Wanaa cho yoomu wa a sina maa, . . . a nɔ le piɔmndo sɔlaa.” (Ikilisiaatii 9:​5) Mɛɛ mɛɛ naŋ viou achal, mi kaamaa bii naa miŋ nyunaŋ naapila aa, yɛɛ yɔŋnuŋ yɛ naa te ŋ vi pɛ?

³ Te wanaa naŋ kaala wa vi pɛ, miŋ bii mɔnɛi tau. Naapum, miŋ nyuna aa, ‘Yɛɛ yɔŋnuŋ yɛ a nda? A cho pa o nyɛpalaa niŋ? A cho pa naa hɔlteŋ choo? Ŋ mala nda pa? Ŋ cho lɛ nda pa chɔ?’ Piɛiyii teŋgeŋnde o chieeŋndo choo yɔŋgu mulila teŋgeŋndaŋ le nyunalaŋ ndaŋ. Piɛiye ipum pɛɛku maa te o yɔŋ pɛ ma wa wana kɛndɛ, a vi pɛ, a kuɛŋnuŋ choo choo. Kɛ te o yɔŋ pɛ ma wa wana yɔŋ wɔɔŋ, a vi pɛ, a kuɛ o fondaŋ nyɛpalaa le ma wa ŋɔɔ o yiŋndeŋ niŋ lefafɛɛŋ. Piɛiye ipum bɛɛ pɛɛku maa, te waŋndo vi pɛ, o kuɛ naa finyaa nduaa mamaa cha o inyinaya. Mi ipum pɛɛku vɛlɛ maa, te waŋndo vi pɛ, o kuɛ chiee piɔm le mbo kɔ sɔla kɔɔsɔɔ. Te a kɔɔsa ndu pɛ, o miiŋgu vɛlɛ violɔŋ a dialuŋ cheleŋ.

4. O yɛɛ choo piɛiye hei kpou simi yɛ hau pɛɛkula ndalaŋ a piɔmndo okɔɔ?

⁴  Pɛɛkula piɛiye hei pɛɛku a piɔmndo okɔɔ laŋ kpou la sim o nyɔɔ pilɛ kpe choo. Ndu cho ni maa, te ŋ vi pɛ, nyɔɔ pum cho naa o ŋdial, ndu vi le. Sɔŋgɔ piɛiyii waŋnda tol sindɛ kɔɔli ve, a i nda cho suŋsuŋ tolɔɔ kɔɔli ve kpou pɛɛku maa, te ŋ vi pɛ, ŋ nɔla miŋ wa achal chiee piɔm le fɛɛŋ a fɛɛŋ. Nduyɛ maa, ŋ nɔla vɛlɛ miŋ che, miŋ tuei, nduyɛ miŋ yiyaŋ. Te a vi pɛ, vɛɛ hei yɔŋnuŋ yɛ? Kɔlkalula naalaŋ, vɛlɛ a yiyaŋnda naalaŋ kpou, a hullaŋ la tosa wallo ni. Lelaŋ te ŋ vi pɛ, hulma naŋ bɛɛ ma vi. Ma tosa lɛ wali le. Sinaŋndo bɛɛ ŋ sinaŋ lɛ le. Yiyaŋnda naalaŋ vɛlɛ a kɔlkalula naalaŋ kpou bɛɛ pɛŋgi wallo. Te hullaŋ ma vi pɛ, laŋ kpou la tosa lɛ wali le. Nyɛ koŋ te hulma naŋ ma vi pɛ, nyɛ o nyɛ fee bɛɛ vi.

5, 6. Yɛɛ Baabuiyo pɛɛku yɛ a wanaa vi wa okɔɔ?

⁵ Kaamaa bii Chɛhowa le nyɛ yɔŋnuŋ naa o piɔmndo kɔɔli wo le. Le yɛɛ? Kanifuule, ndu toosiaa hulma naŋ ni. O sina tonya cho a piɔmndo okɔɔ wo. Nduyɛ, o tɛɛsiaa tonya koŋ vɛ vɛ o Diom ndɔɔ niŋ. Diom koŋ cho yɛ Baabuiyo ni. Nyɛ kpeekpei Baabuiyo pɛɛku wo cho hoo ni, Te waŋndo vi pɛ, o ve lɛ achal te. Te a ve yoomu le, mɛɛ a cho o vilɛi. Wana vilɛiyo chi le, o tui le, o yiyaŋ vɛlɛ pɛŋ te. Te ŋ vi pɛ, nyɛ o nyɛ cho naa o ŋdial mbo lo yoomu le. Puuloo naŋ cho ni. *

⁶ Mɛɛ masaa Sɔlɔmɔŋ dimi maa wanaa cho yoomu wa sina maa a nɔ le piɔmndo sɔlaa, mbo chɔɔlu poonyiaa aa, “Kɛ wanaa vi wa nda, a sina lɛ nyɛ kposoŋ te.” Mbo chɔɔlu tonya o poonyiaa wo tɛɛsiaa maa, wanaa vi wa nɔ lɛ kaala le, a nɔ lɛ yɛletulaa le. Mbo hiau lachi a dimioo aa, “Naa ŋ cho kɔlaŋ nda o [sɛiyo] niŋ, kpeku soliaa cho loŋ te, kɔlkalu cho loŋ te, yiyaŋndo a nyɛ o nyɛ okɔɔ cho loŋ te, taasi cho loŋ te.” (Nuawɔ Ikilisiaatii 9:​5, 6, 10, NW.) Mi Sam 146:​4 bɛɛ dimi maa te waŋndo vi pɛ, “tuula  ndɔlaŋ kpou la mɛɛlu.” Puuloo naŋ cho ni. Lelaŋ, ŋ vi pɛ nyɛ o nyɛ cho naa o ŋdial mbo lo yoomu le. Yoomu naŋ nɔ suŋsuŋ ndo cho ko maa yiŋnde kianduei leŋ. Te ŋ nyumi leŋ pɛ, le chuu nyum. Le kue ba o ba le.

7. A yɛɛ Chiisu tuu yɛ piɔmndo?

⁷ Mi Chiisu Kiliti dimi isɔɔ a lawaa piɔm okɔɔ. A Lasalɔɔ okɔɔ o dimi hei ni. Chiisu ndoo sina Lasalɔɔ tau. O bondii pum niŋ, mi Lasalɔɔ wu pɛ. Mi Chiisu dimul buɛiyaa nduaa aa, “Chaaŋ naa Lasalɔɔ cho o malɔ.” Kɛ buɛiyaa nduaa ndaa cha ko bɛɛ aa o kpele Lasalɔɔ cho ihini a naa ni, nduyɛ, maa o nɔ le sioŋgɔɔ mbo chɛŋ. Kɛ o cho keŋ te Chiisu ndoo yiyaŋ te. Mi Chiisu dimul nda kpendekele aa, “Lasalɔɔ vi [pɛ].” (Nuawɔ Chɔŋ 11:​11-14.) Kɛsiŋ hei o kɔl maa, Chiisu tuu piɔmndo a mɛɛ waŋndo wa naa o malɔ yɛ. Lasalɔɔ kue o choo choo niŋ te. O ve vɛlɛ o yiŋnde nyɛpalaa fɛɛŋfɛɛŋ niŋ te. O kue o ŋmaalikɛi lo le. O kue vɛlɛ o finyaa nduaa mamaa lo le. O miiŋgu ma velu ndu a dialuŋ cheleŋ te. O lɔma piɔmndaŋ niŋ o wa ni. O cho ko mɛɛ waŋndo wa naa o luaŋ yiŋgoloŋ yɛ, kɛ o sɔl malɔ le. Bolii Baabui cheleŋ bɛɛ tuu piɔmndo a luaŋ. Le tamaseliiyo, mi Baabuiyo dimi maa mɛɛ nda vii vii Tiiviŋ a poutaŋ, mbo “hini o lɔma piɔmndaŋ niŋ.” (Walta Wanaa Chiisuaa 7:​60, NW) Le handɔɔ lechoo, bondii kiilanɔɔ Pɔɔl wa yoomu ve, mbo poonyiaa o Baabuiyo niŋ a wanaa cho ‘ihini o lɔma piɔmndaŋ’ niŋnda okɔɔ.—Kɔliŋtiaŋ Tasoo 15:​6.

8. Vɛɛ naŋ looku yɛ sina maa o cho sabu Mɛlɛka le icho le miŋ vi le?

⁸ Baa sabu Mɛlɛkaa kpeekpei wa koŋ ni le mi waŋndachieeya vi? Sako bɛɛ! Chɛhowa ndoo toosiaa waŋchieeya le ma wa achal lefafɛɛŋ o chieeŋndo choo. A mɛɛ naŋ pɛɛku niŋ o yauwo hoo niŋ yɛ, mi Mɛlɛka wou wana pɔnɔ a wana lanɔ tasoo o kpele  kɛndɔɔ niŋ Idɛŋ. Mbo duau nda sala a kɛndiaa kɛndɔɔ. O kɛndɔɔ suee Chɛhowa ndoo yeema le nda ni. Baa kalachua nɔ kaalaa wo yeema pa mi chuauwaa nduaa yuwa te koŋ te ma vi? Sako bɛɛ! Chɛhowa kaala chuauwaa nduaa. Nduyɛ, ndoo yeema mi ndaa tuei yoomoo yeela o lɛŋndeŋ choo lefafɛɛŋ. Mi Baabuiyo dimi maa mɛɛ Chɛhowa toosiaa waŋndachieeya, “mbo duau nda o la kɔl le waa achal lefɛɛŋ a fɛɛŋ.” (Ikilisiaatii 3:​11, NW) Mɛlɛka toosiaa naa a yeemɛi le waa achal lefɛɛŋ a fɛɛŋ. Nduyɛ, Mɛlɛka yɔŋ po ndɔɔ halikpeŋ miŋ huŋ miiŋgu yoomu fafɛɛŋndo sɔla.

9. Sawa yɛɛ Chɛhowa ndoo dou yɛ Adama? Nduyɛ, le yɛɛ sawaa hoo ndoo kindu yɛ biyɔɔ le?

⁹  Le yɛɛ waŋchieeya wu yɛ? Le nyunaa hoo mulioo, mɛɛ miŋ miŋgi kɔllo dika o nyɛ yɔŋnuŋ wana pɔnɔ a wana lanɔ tasoo o chieeŋndo choo wo. Baabuiyo dimul naa aa, “Mi Mɛlɛka tosa mi yɔmnde i wul lɛŋ o kpeloo niŋ, yɔm o yɔm naŋ le tofa nduyɛ, mbo naŋ le dioo mi i wul.” (Chɛnɛsee 2:​9) Kɛ a koŋ kpou, mi Mɛlɛka ke Adama sawaa opilɛ. Mbo dimul ndu aa, ‘Yɔm o yɔm cho o kpeloo hoo niŋ a dia. Kɛ yɔm komɔɔ ndɔɔ tosa mi wana sina suɛi wɔɔŋnde a i kɛndɛi yo, dia ndu le pa. O paaleŋ niŋ bɛɛ te a de ndu pɛ a vi.’ (Chɛnɛsee 2:​16, 17) Sawaa hoo ndoo kindu biyɔɔ le, kanifuule, yɔmii kuamɛi cheleŋ wa puɛɛ i Adama a Ifi ndaa dia ve. Dioo ndaa sɔla niko hoo ni le chɔmndo maa a nɔ balika melaa le mɛɛ Mɛlɛka ke nda yoomu walaŋndo, vɛlɛ a nyɛ o nyɛ fee yɛ. Te ndaa diikuŋ pɛ sawaa hoo, o cho ko balika melaa le nda wa chɔm te. Kɛ, a wa vɛlɛ chɔm maa Mɛlɛka cho o choo choo niŋndo, a diikuŋ masale ndɔleŋ. O fulawɔ okoŋ kɔɔli, a wa vɛlɛ chɔm maa a chɛl le mi Mɛlɛka chɔm nda nɛi ndɔ kaalaa.

10, 11. (a) Vɛɛ wana pɔnɔ a wana lanɔ tasoo looku yɛ Mɛlɛka kɛɛ diikɔŋ? (b) Vɛɛ diikɔŋ nda kɛɛ hoo Mɛlɛka wo cho yɛ suɛi wɔɔŋ?

¹⁰ Mi wana pɔnɔ a wana lanɔ tasoo kɛɛ Chɛhowa diikɔŋndo. Hei cho bɔɔ suɛi kɔl tambɛi. Mi Setana soliŋ kɛuwo kpeku le Ifi choolaŋ dimullo. Mbo nyuna ndu aa, “Baa Mɛlɛka dimi madimiaa aa, ‘Yɔmnde o kpeloo hoo niŋ kinɛi la dia le?’” Mi Ifi mulul ndu aa, “Mɛlɛka dimi maa yɔmnde o kpeloo niŋ kinɛi ŋ dia. Kɛ aa, yɔm cho o kpeloo tɛɛŋ ndo ndu, aa naa, ŋ dia ndu le, aa pilaŋndo bɛɛ naa ŋ pilaŋ te. Aa, te ŋ de pɛ ŋ vi.”—Chɛnɛsee 3:​1-3.

¹¹ Mi Setana dimul Ifi aa, “La dio bɛɛ la vi le.” Mbo hiau lachi a dimioo aa, “Mɛlɛka dimi lende fondole, o sina maa te la de ndu pɛ hɔlta nyalaŋ la cho kumbiŋ nduyɛ, mi la sina suɛi kɛndɛi a i wɔɔŋnde pɛŋgu maa Mɛlɛka pila.” (Chɛnɛsee 3:​4, 5) Setana ndoo yeema mi Ifi laalaŋ maa te o de pɛ komɔɔ yɔm Mɛlɛka kɛɛlu nda koŋ dioo wo, o cho wa ikɛndɛ a ndu Ifi. A mɛɛ Setana dimi yɛ, Ifi ndoo nɔ dioo le mbo tosa nyɛ o yeema wo. Ndoo  nɔ vɛlɛ dioo le mbo tosa kɛɛsiaa a ba ndɔ. Mi Setana dimul vɛlɛ Ifi maa choolaŋ fuu Chɛhowa Mɛlɛka dimul nda ni maa te a de pɛ komɔɔ yɔm koŋ a vi. Mi Ifi laalaŋ nyɛ Setana dimul ndu wo. Okoŋ, mbo kendi komɔɔ yɔm koŋ, mbo dia. Mɛɛ pɔnɔ ndɔ hiŋ, mbo ke ndu o tiŋ, mi ndu bɛɛ dia. Ma sina sawa ndaa tɛɛmbuu hoo wo walaŋ. Ndaa sina vɛlɛ maa nyɛ Mɛlɛka dimul nda maa a tosa le wo nda wa tosaa ni. A siɛlɛi fuu nda tɛɛmbu sawaa hoo ni, kanifuule, o cho sawa ndoo kendu biyɔɔ le. Ma chɔm maa o cho Mɛlɛka le bɛnda mbo wa nda choo masa le. Tɛɛndaŋndo kɛsɛ kɛsɛ nda tɛɛndaŋ Mɛlɛka ni. Nduyɛ, tɛɛndaŋ waa naa nɔ nɛi nda kɔɔsa ma fula leniŋ te.

12. Yɛɛ mala yɛ naa miŋ sina mɛɛ kɔllo wa Chɛhowa yɛ mɛɛ Adama nda Ifi simul ndu ma kɛɛ le ndu diikɔŋndo?

¹²  Ŋ tuuwɔ tamaseliiyo naa. Vɛɛ kɔllo wa yɛ num te o yɔŋ pɛ mi chua ŋ manda wo kɛɛ le num diikɔŋndo, te koŋ te, mbo kɛɛ le num bɛɛleŋ kioo vɛlɛ a num kaalaa chɔmndo? A niŋ kɔl te. Lende le? Yiyaŋndɔ niko mɛɛ kɔllo wa Chɛhowa yɛ mɛɛ Adama nda Ifi simul ndu ma kɛɛ ndu diikɔŋndo.

13. Yɛɛ Chɛhowa dimi yɛ maa o cho yɔŋnɔŋ Adama te o yɔŋ pɛ mbo vi? Nduyɛ, yɛɛ Chɛhowa yiyaŋ yɛ a nyɛ o dimi koŋndo?

¹³ Chɛhowa chi sabu o sabu le mbo mal Adama nda Ifi le ma wa achal lefafɛɛŋ te. Lelaŋ, ma wu pɛ, mɛɛ Mɛlɛka dimul nda yɛ koni. Adama nda Ifi cho lɛ achal te. A cho vɛlɛ achal naa cheleŋ o iyinaya le. Vɛɛ naŋ looku yɛ hei sina? Teleŋ Mɛlɛka wa Adama nyuuniaa le diikɔŋ o kɛɛ ndu wo, mbo dimul ndu aa, “Puuloo ŋ cho ni, nduyɛ o puuloo niŋ ŋ cho vɛlɛ miiŋgu ni.” (Chɛnɛsee 3:​19) A puuloo lɛŋ Chɛhowa toosiaa Adama ni. (Chɛnɛsee 2:​7) Adama ve fɛŋ achal naa cheleŋ tuupa mi Mɛlɛka toosiaa ndu le. Lelaŋ, te Chɛhowa dimi pɛ maa Adama cho miiŋgu o puulu, ndu cho ni maa o cho lɛ wa achal kposoŋ te. Yoomu cho lɛ wa ndu niŋ te. O cho ko mɛɛ puulu Mɛlɛka toosiaa ndu wo nɔ yoomu le yɛ koni.

14. Le yɛɛ naŋ wu yɛ?

¹⁴ Maa Adama nda Ifi cho wɔ hau achal. Kɛ, a vi niŋ lɔɔ levil kanifuule, Mɛlɛka nda kɛɛ diikɔŋndo ni okoŋ ma tosa hakioo. Kɛ le yɛɛ naa bɛɛ ŋ wu yɛ hau? Saboo cho ni maa o haki piɔm koŋ niŋ Adama nda Ifi velu naa ni. (Nuawɔ Luomaŋnda 5:​12.) Ŋ tuu haki nda velu naa hoo niŋndo a naa ŋkɔŋyaa o yuŋgoo niŋ. Fulamakɔɔli naa hoo cho piɔmndo ni. Yaamɔɔnɔɔ piɔmndo cho ni. O cho chaaŋ naa le. (Kɔliŋtiaŋ Tasoo 15:​26) Ŋ nɔ miŋ mel Chɛhowa balika le mɛɛ o yɔŋ Po ndɔɔ mbo huŋ soli naa yaamɔɔnɔ wɔɔŋndo hoo o ba yɛ!

15. Le yɛɛ o cho yɛ suɛi kɛndɛ le sinaa tonyaa a piɔmndo okɔɔ?

¹⁵ Nyɛ Baabuiyo pɛɛku a waŋvilɛiya okɔɔ wo dɛɛniaa naa bɔɔ kɔllo. A mɛɛ naŋ pɛɛku niŋ yɛ, waŋvilɛiya cho o nyɛpalaa niŋ te.  A cho vɛlɛ o saŋga niŋ te. Lelaŋ, ŋ nɔ sabu o sabu le miŋ wo waŋvilɛiya le, kanifuule, a yɔŋ naa nyɛ o nyɛ le. Ŋ nɔla miŋ mala nda le, nduyɛ, nda bɛɛ nɔla naa mala le. Ŋ tiuba miŋ suukaŋ a nda le, nduyɛ, nda bɛɛ suukaŋ a naa le. Simlachiaa o piɛiyii ka ka niŋ lɔɔŋ ibuŋ maa a nɔla ma mala wanaa vi niŋ nda. Wanaa siaama laalaŋ hau choola suu waa naa, okoŋ ma ke simlachiaa nyɛsɔlaa le wanaa ndaa vi niŋ nda. Kɛ te ŋ sina pɛ tonya cho a piɔmndo okɔɔ wo, wana o wana nɔla mbo huii naa a choola waa naa le.

16. Pɛɛkula ka ka cho hau o piɛiye niŋndaŋ, nɛɛ handu yɛ laŋ balaŋ kɔɔli? Nduyɛ, o nɛi kuɛɛ choo?

¹⁶ Baa Piɛiyii ka ka chɛl pa hau nyɛ Baabuiyo pɛɛku a waŋvilɛiya okɔɔ wo? I bɔɔbɔɔ chɛl te. Le yɛɛ? Kanifuule, Setana luei balaŋ o pɛɛkula ndalaŋ niŋ ni. Setana cho hau piɛiyii lachoowɛi hei soliŋndo kpeku le waŋnda pɛɛkoo maa, te waŋndo vi pɛ, nyina ndɔɔ fulaŋ, okoŋ, o kɔ waŋnuŋ achal naa cheleŋ. Choolaŋ ndaŋ a la cheleŋ Setana chuuŋgiaa hau diompilɛ ni, le waŋnda kɛɛloo Chɛhowa piɛiyo. Vɛɛ hei yɔŋnuŋ yɛ?

17. Vɛɛ pɛɛkoo maa Mɛlɛka tuisi waŋnda nyɛpalaa choo o yiŋndeŋ niŋ le fɛɛŋfɛɛŋ ke yɛ Chɛhowa Mɛlɛka lebɛɛ le?

¹⁷ A mɛɛ naŋ pɛɛku niŋ yɛ, piɛiyii bɔɔbɔɔ pɛɛku maa te wana yɔŋ wɔɔŋndo vi pɛ, o kuɛ o fonda nyɛpalaa le mbo wa ŋɔɔ o yiŋndeŋ niŋ lefafɛɛŋ. Pɛɛku lachoowaa cho hoo ni. Pɛɛku waa naa ke pɛŋ Mɛlɛka lebɛɛ le. Chɛhowa, Mɛlɛka kaala wo o cho ni. Lelaŋ, pesiŋ bɛɛ o tuisi waŋnchieeya nyɛpalaa waa naa choo le. (Nuawɔ Choŋ Tasoo 4:​8.) Nyunaa cho niko hoo ni, vɛɛ num yiyaŋ yɛ a kalachua bii hoo chuandɔ nila kaloo balaŋ, mbo yii poŋ mbo wou ndu dɛŋgultaŋ o ba wo? A ke lɛ pa wana suu waa lende bɛɛleŋ? O fulawɔ okoŋ kɔɔli, a yeema lɛ pa ma chɔɔlu sina a wana waa lende okɔɔ? Sako bɛɛ! Ma che ndu pɛŋ maa wana yɔŋ wɔɔŋndo pila o cho ni, lende le? O dimi niŋ, Setana yeema naa miŋ laalaŋ maa Chɛhowa tuisi waŋnda nyɛpalaa fɛɛŋ fɛɛŋndo choo o yiŋndeŋ niŋ.

18. O piɛile suu kuɛɛ choo waŋvilɛiya sooluuwo tɔlnuŋ yɛ?

¹⁸ Setana cho vɛlɛ piɛiyii lachoowɛi soliŋndo kpeku le waŋnda pɛɛkoo maa te waŋndo vi pɛ, nyina ndɔɔ fulaŋ o kɔ wa achal naa cheleŋ. Mbo ke vɛlɛ waŋnda yiyaŋndo maa, a nɔ ma  diikuŋ waŋvilɛiya haa nduyɛ, ma ke nda bɛɛleŋ. Pɛɛku lachoowaa hoo chɔm maa nyinaa waŋvilɛiya simnuŋ chaŋyɛi kɛndɛi, te koŋ te, yaamɔɔwaa wɔɔŋ wɔɔŋnda. Wanaa bɔɔbɔɔ laalaŋ hau choola suu waa naa. Lelaŋ nda nɔ siooŋii waŋvilɛiya ni. Siooŋii waa naa nyindu nda le waŋvilɛiya sooluuwo ni. Kɛ Baabuiyo ndu pɛɛku nyɛ cheleŋ teŋgeŋ. Mbo dimi maa, waŋvilɛiya cho o luaŋ. O dɛɛniaa naa maa Mɛlɛka tonyaa ndupilɛ kpe naŋ nɔ ni miŋ piɛi. Mɛlɛka koŋ cho Chɛhowa ni, wana toosiaa nyɛ o nyɛ fee wo. Nduyɛ, ndu ko ke naa vɛlɛ nyɛ o nyɛ fee ni.—Sɔɔŋ Chɔɔmaŋndoŋ 4:​11.

19. Te o yɔŋ pɛ ma sina tonya cho a waŋvilɛiya okɔɔ wo, pɛɛku Baabui kuɛɛ koŋ mala yɛ num ma sina?

¹⁹ Tonyaa sinaa a waŋvilɛiya okɔɔ mala num piɛiyii lachoowɛi hui num te. O mala num vɛlɛ ma bii nyɛ Baabuiyo pɛɛku a nyɛm cheleŋ okɔɔ woŋ bila. Le tamaseliiyo, te o yɔŋ pɛ ma sina maa waŋndo vi pɛ o chuu wu, hei mala num le ma sina maa, mɛila Mɛlɛka laŋ le yoomu fafɛɛŋndo sɔlaa o kpele hɛnɛkiɔɔ niŋ o lɛŋndeŋ choo cho nyɛ kpeekpei.

20. Nyuna kuɛɛ naŋ cho yɛ hunɔɔ yaasiaa o buŋgɛi cho lachi ve niŋ?

²⁰ Choobu wa wana sakpo o Mɛlɛka lo. O sindɔɔ niŋ pa, mbo nyuna nyuna sɔwɛɔ pila. Mbo nyuna aa, “Te wana chioo vi niŋ pɛ, baa o miiŋgu lɛ pa yoomu?” (Choobu 14:​14) Wana vi niŋ mbo wa ihini o siɛiyo niŋndo, o miiŋgu lɛ pa yoomu? Nyɛ Baabuiyo pɛɛku a hei okɔɔ wo dɛɛniaa naa bɔɔ kɔltaŋ. Ŋ cho hunɔɔ nyunaa hoo yaasiaa o buŋgɛi cho lachi ve niŋ.