1, 2. Nyɛpalaa suu kuɛɛ komallɛ hau waŋndachieeya? Nduyɛ, nyunala yɛɛ wanaa bɔɔbɔɔ nyuna yɛ?

MƐƐ chɔuwo del o lɛŋnde pum niŋ, mi waŋlaanduaa a chuaambuaa sɔla piɔmndo o waalaŋ niŋ. Mi waŋnda tuau sooŋ bɛndoo okoŋ, ma kumbu wanaa sɔla haa piɔmndo wa kpou leniŋ. Mɛɛ nda chii nda kumbɔɔ, ma balu yɔmnde beŋioo o sɛi bɛndu koŋ chɛ chɛ. Ma poonyiaa o yɔmii nda beŋi keŋ nde choo aa, “Le yɛɛ?” Nyuna imɔnɔɔ pila cho hoo ni. Yɛɛ tosa yɛ mi waŋnda nyuna nyunaa hoo? Te chɔuwo del pɛ, mi lɛŋndeŋ le nyiiya, te koŋ te, mi dɛnɛpalaa cheleŋ komal waŋnda, mi mɔnɛi bii nda tau. Te o yɔŋ pɛ mi nyɔɔŋ muŋ dii wanaa ndaa kaalaa, miŋ tɛɛmbuu chiɛila nda laŋ, te koŋ te, miŋ chuu nda saŋgaa o yoomoo niŋ, waŋnda nyuna nyunaa hoo le sinaa sabu dɛnɛpalaa koŋ komal nda wo.

² Le yɛɛ Mɛlɛka chɛllɛ mi nyɛpalaa wa? Te o yɔŋ pɛ aa Chɛhowa nɔ kpaayaa, nduyɛ mbo nɔ vɛlɛ kaalaa, taasioo, a sandei, mɛɛ le yɛɛ o chɛllɛ niko mi nyɛpalaa wa naa? Le yɛɛ chieeŋndo hoo pɛ yɛ cha a kafalaŋ, vɛlɛ a yaamɔɔleŋ? Kani bɛɛ a nyunaŋ niŋ pa nyunala suu waa naa?

3, 4. (a) Yɛɛ chɔm yɛ maa icho suɛi wɔɔŋ le nyunaa le sabu Mɛlɛka chɛl mi dɛnɛwɔɔŋndo wa wo le? (b) Vɛɛ Chɛhowa yiyaŋ yɛ a dɛnɛwɔɔŋndo vɛlɛ a nyɛpalaa cho hau o chieeŋndo choo wo?

³ Te a nyuna pɛ aa le sabu yɛɛ Mɛlɛka chɛllɛ mi nyɛpalaa wa, baa suɛi wɔɔŋnde pa icho ni? Apum yiyaŋ maa te wana nyuna pɛ  nyuna waa ndoo, mɛɛ o chɔm maa a nɔ laalaŋ bɔɔ le. Mi apum yiyaŋ pɛŋ maa, a chɔm lebɛɛ le Mɛlɛka le. Te o yɔŋ pɛ ma wa Baabuiyo pɛɛkoo, a cho saalɔŋ maa mi buɛiyaa laalaŋaa Mɛlɛkaa apum sindɛ nyuna nyunala suu waa naa. Le tamaseliiyo, mi wana suaa le Chɛhowa wo diolaŋ aa Habakuku nyuna ndu aa, “Vɛ ma chɛl mi nyɛ palaa suu waa nuaa o tual la choo? Vɛ mi waŋnda wa sɔɔŋ waa nuaa tosaa a tosa isɔɔ a ndi okɔɔ le? Ba o ba ya nua, waŋnda cho nyɔɔŋ tɛɛmbuuwo ma wa chieiyo. Sɔŋgɔlaŋ a sɛɛŋgiaŋndaŋ la cho la tiuwaa ba o ba.”—Habakuku 1:​3.

⁴ Baa Chɛhowa ndoo dɔunuŋ pa tumbe a Habakuku le nyunalaŋ ndaŋ? Sako. Nyunala sɔwɛlaŋ pila Habakuku nyuna ni. Lelaŋ pɛŋ Chɛhowa tosa ni mi la poonyiaŋ o Baabuiyo niŋ. Mi Mɛlɛka mala vɛlɛ ndu mbo chɔɔlu sɔɔŋ sinalapɛŋgu, nduyɛ, mi laalaŋ ndɔɔ chɔɔlu kalu poŋ. Lende koni Chɛhowa yeema ni mbo tosa a num. Loonuŋndɔ nyɛ Baabuiyo dimi wo maa Mɛlɛka buulaŋ a num. (Pitɛ Tasoo 5:​7) Mɛlɛka tul dɛnɛwɔɔŋndo leyɛ. O tul vɛlɛ nyɛpalaa leyɛ mbo hiau bɛɛ mɛɛ naŋ tul ndu yɛleŋ yɛ. (Aisaya 55:​8, 9) Kɛ le yɛɛ nyɛpalaa hɔba yɛ niŋ o chieeŋndo choo?

5. Mulila yɛɛ simlachiaa o piɛiye niŋ yɔŋgu yɛ hau waŋnda te nyɛpalaa yɔŋnuŋ pɛ? Kɛ yɛɛ Baabuiyo ndu pɛɛku yɛ?

⁵ Wanaa bɔɔbɔɔ nyuna niŋ simlachiaa o piɛiyii ndɛi yɛ yɛi niŋ le sinaa sabu nyɛpalaa kuii hau o chieeŋndo choo wo. Kɛ muli nda ke nda lɔɔlɔɔ wo cho ni maa, nyɛ o nyɛ yɔŋnuŋ pɛ, hɛnaŋ  Mɛlɛkaa ni. Nduyɛ maa, sindɛ niŋ pa Mɛlɛka tuu nyɛ o nyɛ cho hau yɔŋnɔŋndo wo ni. Ma dimul vɛlɛ apum maa Mɛlɛka kendu bɔɔ bila biyɔɔ. Ma dimul nda vɛlɛ maa, ndu chua yoomula waŋndachieeya ni. Nduyɛ, maa ndu ko chua vɛlɛ yoomula chɛlɛkpiaa ni halikpeŋ ma wa a ndu latulu choo choo. Kɛ a mɛɛ naŋ pɛɛku niŋ yɛ, Chɛhowa tuisi wana o wana nyɛpalaa choo le. Baabuiyo dimi aa, “Mɛlɛka cho wana dɛnɛ wɔɔŋ kposoŋ te. Nduyɛ, o cho Mɛlɛka nɔ lakafa le.”—Choobu 34:​10.

6. Le yɛɛ waŋnda bii yɛ Mɛlɛka tɔɔyaŋ le nyɛpalaa cho hau o chieeŋndo choo wo?

⁶ A sina pa le sabu waŋnda bii Mɛlɛka tɔɔyaŋ le nyɛpalaa cho hau o chieeŋndo choo wo? Yiyaŋ ndaa ke nda maa Mɛlɛka cho suŋsuŋ masaa le chieeŋndo hoo ni. A sina tonya sɔwɛ Baabuiyo pɛɛku a hei okɔɔ wo le. Ŋ pɛɛku niŋ a tonya koŋ okɔɔ o Buŋgɛi 3 ve o yauwo hoo niŋ. Wana cho masaa kpeekpei le chieeŋndo hoo suŋsuŋ ndo cho Setana Nyina Wɔɔŋndo ni.

7, 8. (a) Vɛɛ waŋndachieeya vellɛ hau kaala Setana laŋ? (b) Vɛɛ suɛi naŋ ve kɔl tei vɛlɛ a hakila waŋndachieeya chuu yɛ hau nyɛpalaa?

⁷ Baabuiyo dimul naa kpendekele aa, “Chieeŋndo hoo kpede o cho Masa Nyinaa Wɔɔŋnda o ba bɛŋgu.” (Chɔŋ Tasoo 5:​19) Numpila yiyaŋndɔ a hei okɔɔ. Tonya le icho le? Chieeŋndo hoo vel kaala Setana laŋ. Ndu ‘cho hau waŋnda chieeya kpou huiyo ni ma wa yɔŋ wɔɔŋndo tosaa.’ Kaala Setana laŋ lapum la cho ni, yɛletulaaleŋ, waŋnda huiyo, nduyɛ o cho ŋua ŋua. Lelaŋ chieeŋ cho hoo ndu o ba bɛŋgu wo bɛɛ nɔ yɛletulaaleŋ, huiyaŋndo, vɛlɛ a dɛnɛwɔɔŋndo. Saboo opilɛ cho hoo ni le nyɛpalaa kuii hau o chieeŋndo choo wo.

⁸ Sabu diiŋndɔɔ cho ni maa, naa kpou wanaa lahakiaa naŋ cho ni. A mɛɛ naŋ pɛɛku o Buŋgɛi 3 ve o yauwo hoo niŋ yɛ, o kandɔŋndo pa o kpeloo niŋ Idɛŋ, mi Adama nda Ifi tosal Mɛlɛka nila kalulaŋ. Le hei, lɔɔlɔɔ waŋndachieeya cho kilta masale chieeŋndo hoo kɔɔli. O kilta lemasa laŋ ndaŋ niŋ, mi chɔulaŋ la del, nyɛkindilaa, vɛlɛ a saŋgaa. (Ikilisiaatii 4:​1; 8:​9) Sabu yaa ndɔɔ cho ni maa, mi “suɛi naŋ ve kɔl tei yɔŋnuŋ a teleŋ naŋ ve ndi kɔl te wo.” (Nuawɔ Ikilisiaatii 9:​11, NW.) Le tamaseliiyo, lepum waŋndo lo kɔlaŋ o nɛi mi yɔmndo fula fɛɛ mbo del ndu choo mbo vi. Le yɛɛ i waa naa yɔŋnuŋ yɛ. Kanifuule, o fondaŋ wɔɔŋndo vɛlɛ a teleŋ bɛnda le wo o wa ni. Chɛhowa cho Masa  manda naa wo ni. Kɛ te manda Chɛhowaa ve naa choo le, kpundɛlaŋ kposoŋ la yɔŋnuŋ ni.

9. Le yɛɛ naŋ dimi yɛ maa Mɛlɛka nɔ sabu sɔwɛɔ le chɛlɔɔ mi nyɛpalaa wa wɔ tuŋ hiouwɔɔ lachi?

⁹ Icho suɛi kɔl dɛɛniaa le sinaa maa, o cho Mɛlɛka le tosa mi nyɛpalaa wa le. Chɔulaŋ ni, nyɛkindilaa ni, sawa tɛɛmbaa ni, vɛlɛ a halimaala cho hau tosaa mi waŋndachieeya wa saŋgaa laŋ, o cho ndu le tosa mi la wa le. Kɛ a koŋ kpou, o bɛnda miŋ sina sabu Mɛlɛka chɛl mi nyɛpalaa wa hau wo. Ndu cho Mɛlɛka kpou kpou wo ni. Nduyɛ, o nɔ kpaayaa le mbo faŋa nyɛpalaa. Kɛ le yɛɛnɛ o feŋa niko ndu le? Ŋ sina maa wana kaala wo Mɛlɛka cho ni. Nduyɛ, o nɔ sabu sɔwɛɔ le mɛɛ o chɛl mi nyɛpalaa wa yɛ.—Chɔŋ Tasoo 4:​8, 9.

10. Di Chɛhowa kuɛɛ Setana ndoo simullɛ? Nduyɛ, vɛɛ o looku yɛ hei tosa?

¹⁰ Le sinaa sabu Mɛlɛka chɛl mi nyɛpalaa wa wo, ŋ nɔ miŋ miŋgi yiyaŋnda naalaŋ pila o teleŋ nyɛpalaa kanduŋndo. Mɛɛ Setana tosa mi Adama nda Ifi tosal Chɛhowa nila kalulaŋ, mi Setana simul Chɛhowa. O cho kpaaya Chɛhowaa le Setana simul te. Ndu fulii sina maa kpaaya Chɛhowaa nɔ lamɛɛlu le. Di Chɛhowa nɔ le waa masa wo o simul ni. Mbo dimi pɛŋ maa wana lachoowaa Mɛlɛka cho ni. Maa o tosal waŋndachieeya sɔɔŋ kɛndɛ le. Nduyɛ, maa masa wɔɔŋndo o cho ni. (Nuawɔ Chɛnɛsee 3:​2-5.) Mi Setana dimi vɛlɛ maa waŋndachieeya tiuba ma waŋnuŋ a ba nda, mi Mɛlɛka ve nda bɛɛ choo Masa le. Di Chɛhowa nɔ le waa waŋndachieeya choo Masa wo kpeekpei Setana simul hoo ni.

11. Le yɛɛnɛ Chɛhowa dii wanaa nila kaluaa kaŋ o foofo o kpeloo niŋ Idɛŋ te?

¹¹ Mi Adama nda Ifi kɛɛ Chɛhowa diikɔŋndo. Mɛɛ dimioo kɛsɛ nda dimi hoo ni maa, a yeema mi Chɛhowa wa nda choo Masa le. Maa a tiuba ma kɛɛsiaa a ba nda nyɛ cho o kɛndɔɔ wo, a nyɛ cho o wɔɔŋndo wo. Yɛɛ Chɛhowa cho yɛ niko tosa a simul o sɔla hoo wo? Vɛɛ o looku yɛ niŋ mbo chɔm kiilaa nduaa laalaŋaa tuaa choo choo a waŋchieeyaa nɔ le violɔŋndo wa maa, wanaa simul ndu haa wa nɔ di le? Vɛɛ o looku yɛ niŋ mbo chɔm nda maa, ndu nɔ dioo ni, le chaa sɔɔŋ kɛɛsiaa o nɛi sɔwɛɔ choo? Yiyaŋ waŋnda  apum cho ni maa, Mɛlɛka ndoo nɔ mi ndoo dii nda o foofo koŋ choo, okoŋ, mi ndoo toosiaa wanaa cheleŋ. Kɛ loonuŋndɔ nyɛ Chɛhowa ndoo dimul Adama nda Ifi wo. Maa a nɔ ma velu chuauwa ma pɛ o chieeŋndo choo cha, nduyɛ, ma wa o kpele hɛnɛkiɔɔ niŋ o lɛŋndeŋ choo. (Chɛnɛsee 1:​28) Lɔɔlɔɔ te Chɛhowa dimi pɛ isɔɔ, mɛɛ mii yɔŋnuŋ. (Aisaya 55:​10, 11) Kɛ o fulawɔ o koŋ kɔɔli, te Chɛhowa ndoo dii pɛ wanaa nila kaluaa kaŋ o kpeloo niŋ Idɛŋ, vɛɛ ndoo chɔm yɛ niŋ maa ndu nɔ dioo ni le waa masa? Keŋ ndii chii niŋ suɛi kalɛi pɛŋ te.

12, 13. Tuuwɔ tamaseliiyo le sinaa sabu Chɛhowa chɛl mi Setana wa masaa le chieeŋndo hoo wo, vɛlɛ a sabu o chɛl mi waŋndachieeya wa ndapila choo masa wo.

¹² Ŋ tuuwɔ tamaseliiyo naa. Wana pɛɛkaa cho sukuuwaa nduaa pɛɛkoo mɛɛ wana chɔm yɛ. Kɛ mi sukuunɔ bolle kalaa chaŋ mbo dimul wana pɛɛkaa maa, o chiee chɔmndo le, nduyɛ, maa o nɔ pɛŋ kɔlkalu o pɛɛku wana le. Mbo dimi vɛlɛ maa, o chaa chɔmndo mbo hiau wana ndɔ pɛɛkaa. Mi chaaŋaa nduaa sukuuwaa apum yiyaŋ maa tonya chaaŋ nda dimi ni. Le hei, mi nda bɛɛ laalaŋ nyɛ chaaŋ nda dimi wo, okoŋ ma tual ndu kɔɔli le wana pɛɛkaa simullo. Yɛɛnɛ wana pɛɛkaa cho yɛ niko tosa? Te o yɔŋ pɛ mbo soli sukuuwaa simul ndu haa wa o bɛɛ, vɛɛ sukuuwaa tuaa cho yɛ dimi? A cho dimi maa chaaŋ nda sukuunɔɔ vɛlɛ a chaaŋaa ndaa tol ndu kɔɔli wa nɔ di. O hei niŋ, sukuuwa a piliaa kpou  nɔ lɛ lebɛɛ le wana pɛɛkaa le. Nduyɛ, ma yiyaŋ pɛŋ maa, sioonde bii wana pɛɛkaa ni. Nduyɛ maa yɔŋi siɔmbulaŋ la bii ndu maa o chiee chɔmndo le, nyɛ koŋ o soli sukuuwaa simul ndu kaŋ nda o bɛɛ ni. Kɛ le mi wana pɛɛkaa chɔm maa choolaŋ sukuunɔ sim hoo lachi le ndu simullo wo dimi ni, mbo veelu ndu chaaŋaa nduaa lachi, okoŋ, mbo ke ndu pɔu poonyiaa le mbo pɛɛku chaaŋaa nduaa mɛɛ wana chɔm yɛ.

¹³ Mɛɛ mɛɛ wana pɛɛkaa tosa naa yɛ, lende koni Chɛhowa bɛɛ tosa ni. Loonuŋ maa, wanaa nila kaluaa wa kaŋ o kpeloo niŋ Idɛŋ nda ve nda pilɛ le. Maalikɛiyaa cheleŋ wa o choo choo niŋ o miiliɔŋndaŋ niŋ. Nduyɛ, a wa nuaa nyɛ wa yɔŋnɔŋndo wo. (Choobu 38:​7, NW; Daaniɛɛ 7:​10) Mɛɛ Chɛhowa ndoo nɔ mbo bii simul koŋ yɛ ndoo piiliaŋ niŋ maalikɛiya kpou, vɛlɛ a waŋchieeyaa ndaa nɔ le violɔŋndo o chieeŋndo choo wa. Le hei, yɛɛ Chɛhowa tosa yɛ? Mi Chɛhowa chɛl le mi Setana wa ŋwaŋndachiee choo masa. Mbo chɛl vɛlɛ le mi waŋndachieeya wa ndapila choo masa o kpaaya Setana wo bɛŋgu.

14. Yɛɛ chɛlɔɔ Chɛhowa chɛl le mi waŋndachieeya wa ndapila choo masa wo mala yɛ naa miŋ sina?

¹⁴ O tamaselii naŋ tuu wo niŋ, wana pɛɛkaa sina maa sukuunɔ simul ndu wo vɛlɛ a chaaŋaa nduaa tol ndu kɔɔli wa nɔ di le. Mbo sina vɛlɛ maa, te o yɔŋ pɛ mbo chɛl nda le ma kindiŋ a ba nda, i mala niŋ chaaŋaa ndaa le ma che tonyaa kpendekele. Te o yɔŋ pɛ mi sukuuwaa simul haa wana nda pɛɛkaa wo bumba le chaaŋaa ndaa chɔmndo, chaaŋaa ndaa tuaa tul nda kɔɔli le wa cho sina maa, wana nda pɛɛkaa ndu pilɛ kpe bɛnda ni le mbo pɛɛku nda. O hei niŋ, a cho sina walaŋ maa te wana pɛɛkaa soli pɛ sukuunɔ kɛ kɛ fee simul ndu o bɛɛ, o nɔ di. Mɛɛ lende koni Chɛhowa tosa ni. O sina maa waŋndachieeya a maalikɛiyaa laalaŋnda sɔla niŋ malaa tau te a che pɛ maa Setana a wanaa tol ndu kɔɔli wa bumba. Nduyɛ, maa waŋndachieeya tiuba ma wa ndapila choo masa le. Mi Chɛluimaya dimi aa, “Mɛlɛka Yaawɛɛ, ya Chɛluimaya I sina maa yoomu ŋ ke wana chioo wo o cho wana chioo le nɔ ndu le. Wana chioo nɔ kpaaya o kpaaya yoomu ndɔɔ choo le.” (Chɛluimaya 10:​23) Maa Chɛluimaya, waŋndachieeya cho sina maa, a nɔ di le ndapila nɛiyo chɔmndo le.

15, 16. (a) Le yɛɛ Chɛhowa chɛllɛ mi nyɛpalaa wa tei a boondei hei? (b) Le yɛɛ o feŋa wɔ sɔɔŋ wɔɔŋ cho hau yɔŋnɔŋndo woŋ te?

¹⁵ Le yɛɛ Chɛhowa chɛl lɛ mi nyɛpalaa wa tei a boondei hei? Le yɛɛ o chii niŋ nyɛpalaa hoo le? Le nyunalaŋ ndaŋ mulioo, tofawɔ sɔɔŋ sala tiɔɔŋ ŋ wana pɛɛkaa o tamasi naŋ tuu wo niŋ tosa le woŋ. I tasei cho ni, mɛɛ sukuunɔ simul ndu wo chɛŋ le chaaŋaa nduaa pɛɛkoo mɛɛ wana chɔm yɛ, o kɛɛlu ndu le. I diiŋ nduɛi cho ni, wana pɛɛkaa pila mala ndu le. Mɛɛ lende koni Chɛhowa bɛɛ tosa ni. Sɔɔŋ sala tiɔɔŋ o dimi ni maa pɛ pɛ bɛɛ o cho tosa le. I tasei cho ni, mɛɛ Setana vɛlɛ a wanaa tol ndu kɔɔli wa simul Chɛhowa, o feŋa nda le. Chɛlɔɔ Chɛhowa chɛl mi boondei bandu naa wo pɛɛku naa suɛi sɔwɛ. Wɔsilaŋ la hiou niŋ o waalaŋ niŋ chɔŋ a teleŋ waŋndachieeya kandu masaleŋ a ba nda wo. Nduyɛ, chɔŋ a teleŋ koŋ, a kindiŋ niŋ a masale kɛ kɛ fee. Wanachioo sɔla niŋ hau hiouwɔɔ lachioo a nyɛm mapuuloŋ toosiaa. Kɛ a koŋ kpou, a tiuwɔ ba ma chii kafalaŋ, balafondolaŋ, sawa tɛɛmbaa, vɛlɛ a chɔulaŋ o chieeŋndo choo le. La cho wɔ tuŋ hiouwɔɔ lachi a kuiyo. O hei niŋ, ŋ che kpendekele maa masale waŋndachieeya le tiuba mi le hiŋ a kɔlnyuloo le.

¹⁶ I diiŋ nduɛi cho ni, Chɛhowa mala Setana o masale ndɔleŋ choo o chieeŋndo hoo choo le. Le tamaseliiyo, te Mɛlɛka ndoo faŋa pɛ sɔɔŋ wɔɔŋ cho hau yɔŋnɔŋndo woŋ, mɛɛ tooloo o cho koŋ Setana vɛlɛ a wanaa tol ndu kɔɔli wa ni. O hei niŋ, Setana a wanaa tol ndu kɔɔli va wa dimi maa, tonya nda dimi ni. Okoŋ, waŋndachieeya wa dimi maa a tiuba ma wa ndapila choo masa kpundɛla yɔŋnuŋ te. Te Chɛhowa ndoo tosa pɛ keŋ, waŋndachieeya wa dimi maa tonya Setana dimi ni. Okoŋ, mi ndaa dimi maa wana lachoowaa Chɛhowa cho ni. Kɛ nduyɛ, te Mɛlɛka dimi pɛ isɔɔ, “o feŋaŋ lechoo le.”—Hibuluiya 6:​18.

17, 18. Yɛɛ Mɛlɛka tosa yɛ niŋ a kpundɛla masale wanachioo tuisi hau waŋndachieeya choo laŋ, vɛlɛ a kpaaya Setana nɔ hau waŋndachieeya choo wo?

¹⁷ Kɛ yɛɛ Mɛlɛka tosa yɛ niŋ a kpundɛla chieeŋndo hoo? Ŋ nɔ miŋ kɛsiŋ o kɔl maa Mɛlɛka kpaaya kpou kpou wo Chɛhowa cho ni. Le hei, o nɔla, nduyɛ, o cho hunɔɔ faŋa nyɛ o nyɛ cho hau wanachioo nyɛpalaa tuisioo choo. A mɛɛ naŋ pɛɛku niŋ yɛ,  chieeŋndo hoo nɔ le miiŋgoo Kpele hɛnɛkiɔɔ. Le wanaa dɔu laalaŋndo o sala soliaŋ Chiisoo niŋnda, a cho sɔla malɔɔ hakioo le hakila ndalaŋ. Nduyɛ, piɔm cho lɛ hunɔɔ wa le. Fulasɛiniŋndo cho hunɔɔ wa le wanaa cho o sɛila loonaŋndaŋ niŋnda. Mɛlɛka cho hunɔɔ Chiisu soliŋ kpeku “le mbo tɛɛmbuu nyɛ o nyɛ Masa Nyinaa Wɔɔŋnda cho tosaa.” (Chɔŋ Tasoo 3:​8) Muŋ kpou cho yɔŋnɔŋ a teleŋndo kinɛi. Ŋ nɔ miŋ dɔunuŋ nyaale le mɛɛ Mɛlɛka tɛɛmbuu wɔ chieeŋndo hoo le yɛ. Biunɔŋ o cho wo cho wanaa bɔɔbɔɔ malaa ma wa tonyaa pɛɛkoo, nduyɛ ma wa ndu piɛiyo. (Nuawɔ Pitɛ Diiŋ Ndɔɔ 3:​9, 10.) Kɛ le suŋsuŋ ndɔ, Mɛlɛka cho wanaa piɛi ndu wa nuuviaa. Nduyɛ, o cho nda malaa le ma biunuŋ nyɛpalaa suu o suu komal nda o chieeŋ kpundɔɔ hoo niŋ.—Chɔŋ 4:​23; Kɔliŋtiaŋ Tasoo 10:​13.

¹⁸ Mi waŋnda apum nyuna dɔɔ aa, ‘Baa nyɛpalaa hoo kpou ndoo wa niŋ pa, te Mɛlɛka ndoo toosiaa pɛ Adama nda Ifi o nɛi nda tosa haki loo niŋ?’ Le nyunaa hoo mulioo, loonuŋndɔ a ke sɔwɛ Chɛhowa ke numndo.

19. Ke sɔwɛ yɛɛ Chɛhowa ke yɛ naa? Nduyɛ, le yɛɛ naŋ nɔ yɛ miŋ naŋ kɔl?

¹⁹ A mɛɛ naŋ pɛɛku o Buŋgɛi 5 ve niŋ yɛ, mɛɛ Mɛlɛka toosiaa wanachioo, mbo ke ndu dioo le mbo tosa chuaŋ chuaa o yoomu ndɔɔ niŋ. Ke sɔwɛɔ pila le cho hoo le? Mɛɛ Mɛlɛka toosiaa visiaa, mbo ke nda kɔlkaloo. Kɛ kɔlkalu ndaa hoo mala nda le sinaa o kɛndɔɔ tɛɛŋ a o wɔɔŋndo le. Visiaa nɔla ma tosa kɛɛsiaa a ba nda le. (Pulɔwaa 30:​24) Te Mɛlɛka ndoo toosiaa pɛ naa maa visiaa, ŋ naŋ pa kɔl? Sako. Naŋ niŋ kɔl te. Ŋ naŋ kɔl le mɛɛ o ke naa dioo le chuaŋ chuaa tosaa o yoomu naa niŋ yɛ. Dioo hoo mala naa le miŋ kɛɛsiaa le wana chiee suu naŋ cho wa wo, nɛi naŋ nɔ miŋ tol kɔɔli o yoomu  naa niŋndo, chaŋyɛi suu naŋ nɔ miŋ tosa ve, vɛlɛ a sɔɔŋ cheleŋndoŋ tau. Waŋndachieeya naŋ bɔɔ kɔl le wanɔŋndo hɛnɛkɛ. Nduyɛ, keŋ Mɛlɛka yeema naa ni miŋ tuei yeela.

20, 21. O nɛi sɔwɛ kuɛɛ choo naŋ soliŋ yɛ ke Mɛlɛka ke naa hoo wo kpeku? Nduyɛ, le sabu yɛɛ naŋ tosa yɛ hei?

²⁰ Chɛhowa hini kɔl a piɛile nda baŋ wana leŋ te. Le tamaseliiyo, te chuaambɔɔ de pɛ nyɛdiaa mbo mal balikaa a kɔl ndɔɔ fau, a o kala ndɔ dimul aa dimi naa balika wo, o kuɛɛ nɛŋi yɛ kala ndɔ kɔl tau? Lelaŋ, nyunaa cho niko hoo ni, vɛɛ ŋ nɔ yɛ ma soliŋ ke Chɛhowa ke num hoo wo kpeku? Setana ni, Adama ni, vɛlɛ a Ifi, a chiee ke Mɛlɛka ke nda koŋndo soliŋ kpeku le. Ma kɛɛ Chɛhowa kpooŋ. Num yɛ, yɛɛ ŋ nɔ yɛ ma tosa a ke numndo?

²¹ A nɔ dikeŋnaŋndo le ma chaa ke sɔwɛ ŋ sɔla hoo wo biyɔɔ nyɛkɛndɛi. Num bɛɛ a nɔ ma sɔɔŋguu wanaa sim haa Chɛhowa ikɛi kpɛɛluŋnda. Waŋnda haa kpou cho Chɛhowa kɔllo nɛŋioo, kanifuule, a sim o kala kpoke le chɔmndo maa wana lachoowaa Setana cho ni, nduyɛ maa masale ndɔleŋ le tiuba waŋndachieeya kɔlnyuloo chuu le. (Pulɔwaa 27:​11) Num bɛɛ tiuba ma tosa keŋ. A nɔla ma tosa kɛɛsiaa kɛndɔɔ le nɛi ŋ nɔ ma tol kɔɔli o yoomu numndo niŋndo. Ŋ cho chɔɔlu pɛɛku a hei okɔɔ o buŋgɛi cho lachi ve niŋ.