MI CHIISU dimul Kilisiɔŋnda le ma wa Loonɔŋndo a piɔm ndɔɔ okɔɔ. Baabuiyo veelu vɛlɛ bɔŋaŋndo hoo aa nyɛdiaa ichɔl Salamanɔɔ. (Kɔliŋtiaŋ Tasoo 11:20) Le yɛɛ bɔŋaŋndo hoo cho yɛ nyɛ sɔwɛ? Lɔɔ kuɛɛ o nɔ yɛ mbo biinuŋ? Nduyɛ, vɛɛ nda nɔ yɛ ma bii ndu?

Boondii Chuuwa wa bɔŋaŋndo biyɔɔ le loonɔŋndo a Hiouwɔɔ Choo wo okɔɔ wo, Chiisu bii bɔŋaŋndo hoo ni. Hei yɔŋnuŋ o wɔsi 33 ve niŋ. Mɛɛ o nyumma maŋ niŋ kpeekpei Chiisu bii bɔŋaŋndo nda buɛiyaa nduaa ni le loonɔŋndo a ndu okɔɔ. Le pilɛ kpe Chuuwa ndaa bii bɔŋaŋndo hoo ni o wɔsioo niŋ. Nduyɛ o paŋgii maChuuve niŋ, Naisaŋ 14 Chuuwa ndaa bii bɔŋaŋndo le Hiouwɔɔ Choo wo hoo ni. Mɛɛ ndaa looku teleŋndo hoo sina yɛ cho ni, a lo chumndo tei mi Fuoo chɔm. O paŋgei hei niŋ yɛ, paaleŋ a nyumndaŋ viouwɔɔ pilɔɔ kpe. Paale tasele nda cho Fuoo chɔ leŋ mɛɛ paale leŋ Naisaŋ kanduŋ ni. Okoŋ te palɛi hiou pɛ 13 a bii bɔŋaŋndo hoo a paale delaa leŋ doŋ.

Chiisu nda buɛiyaa nduaa bii bɔŋaŋ loonaŋndo a Hiouwɔɔ Choo wo hoo okɔɔ ni. Mɛɛ nda chii ndu biyɔɔ, mi Chuda Isikaliɔɔ ndu faŋaŋ nda tɛɛŋ mbo kuaŋnuŋ.  Okoŋ, mi Chiisu bii vɛlɛ bɔŋaŋ cheleŋ. Nduyɛ, mbo toosiaa nyɛdiaa le mi buɛiyaa nduaa tuaa a de. Nyɛdiaa hoo Baabuiyo veelu ni aa Nyɛdiaa Ichɔl Salamanɔɔ. Bɔŋaŋndo hoo miiŋgu sɔŋgɔ bɔŋaŋ loonaŋndo a Hiouwɔɔ Choo Chuuwa ndaa bii sindɛ wo ni. Lelaŋ, ŋ nɔ miŋ bii ndu le pilɛ kpe o wɔsioo niŋ.

Mi yau Maatiu wo dounuŋ naa kona aa, “Mi Chiisu chua beediiyo mbo mel Mɛlɛka balika. Okoŋ, mbo yimi yimi. Mbo ke buɛiyaa nduaa. Mbo dimul nda aa, ‘La bii mi la de. Hoo sim le dialuŋ nuŋ ni.’ Okoŋ kɔɔli, mbo chua taalaa mbo mel Mɛlɛka balika. Mbo ke nda. Mbo dimul nda aa, ‘Nya kpede la kol. Maŋ ma sim le kooma niaŋ ni. A kooma niaŋ maŋ Mɛlɛka yii kpemaa nda ŋwaŋnda chiee tɛɛŋ ni. Maŋ ma cho tala le wanaa faŋga faŋga ni le mi Mɛlɛka mal nda le yɔŋnda ndala wɔɔŋndaŋ.’”—Maatiu 26:26-28, NW.

Waŋnda apum laalaŋ maa Chiisu, dialuŋ ndɔŋ kpeekpei o maŋgala beedii koŋ ni. Nduyɛ maa, kooma nduaŋ koni o maŋgala vɛlɛ muɛiyaŋ ni. Kɛ loonuŋ maa teleŋ Chiisu wa bɔŋaŋndo hoo biyɔɔ wo, nyɛ o nyɛ ndoo yɔŋnuŋ ndɔ a dialuŋ ndɔŋ te. Baa dialuŋ Chiisu woŋ kpeekpei buɛiyaa nduaa de ni? Baa kooma nduaŋ kpeekpei ndaa kol vɛlɛ ni? Pɛ pɛ bɛɛ a tosa keŋ te. Te ndaa tosa pɛ keŋ, mɛɛ wanaa diaa ŋwaŋndachieeya nda wa ni. Mɛɛ ndaa tɛɛmbuu vɛlɛ sawa Mɛlɛkaa. (Chɛnɛsee 9:3, 4; Lɛvitikɔɔ 17:10) Mi Chiisu dimi o Luku 22:20 (NW) niŋ aa, “Taala mamuɛiyo hoo sim le kpema sɛnɛi Mɛlɛka yii a kooma niaŋ ndo ni. Maŋ ma cho tala le nya ni.” Baa taala mamuɛi koŋ pa kpeekpei simnuŋ ‘kpema sɛnɛiyo’ hoo ni? O cho lende le icho le. Kanifuule, te waŋnda a chɛlaŋ pɛ o isɔɔ choo, mɛɛ a chii kpemaa yii.

Beediiyo a muɛiyaŋ ma sim le nyɔɔŋ sala tiɔɔŋ. Beediiyo sim le dialuŋ walaŋ Chiisu woŋ ni. Dialuŋ ndɔŋ muŋ nɔ haki le. Beedii nda bii bɔŋaŋ loonaŋndo a hiouwɔɔ choo wo okɔɔ wo Chiisu soliŋ kpeku ni. A dou yiisii o beediiyo hoo niŋ te. (Ɛsɔdɔɔ 12:​8) Fondaŋ nda bɔɔbɔɔ o Baabuiyo niŋ, mi Baabuiyo soliŋ yiisiiyo kpeku le hakioo. Beediiyo hoo yɛ, o sim le dialuŋ walaŋ Chiisu pila soliŋ sala woŋ. Dialuŋ ndɔŋ muŋ nɔ haki le.—Maatiu 16:11, 12; Kɔliŋtiaŋ Tasoo 5:6, 7; Pitɛ Tasoo 2:22; Chɔŋ Tasoo 2:1, 2.

Muɛiyaŋ ma sim le kooma Chiisu waŋ ni. Kooma ndɔ ma maŋ ma siiŋguu kpema sɛnɛiyo hoo nyɛ sɔwɛ ni. Mi Chiisu dimi maa kooma ndɔ ma maŋ ma cho tala ni le mi waŋndachieeya sɔla malɔɔ hakioo le yɔŋnda ndala wɔɔŋndaŋ. Mɛɛ o hei niŋ, waŋndachieeya cho diondɔɔ walaŋndo sɔla Mɛlɛka o hɔl okoŋ, ma luɛi o kpema sɛnɛi Chɛhowa yii hoo a ŋwaŋndachiee wo niŋ. (Hibuluiya 9:​14; 10:​16, 17) Kpemaa hoo tosa ni mi Mɛlɛka hɛli waŋnda 144,000 le kɔlaŋ choo choo o fondaŋ  ndɔɔ. Ŋwaŋndachiee tɛɛŋ Mɛlɛka hɛli waŋnda haa ni. Loŋ o cho nda lakɔ siiŋguu masaa vɛlɛ a wanaa soliaa salaa ni le tɔnɔ wanaa cho wa o chieeŋndo choo naŋnda kpede.—Chɛnɛsee 22:​18; Chɛluimaya 31:​31-33; Pitɛ Tasoo 2:​9; Sɔɔŋ Chɔɔmaŋndoŋ 5:​9, 10; 14:​1-3.

Nɛɛ yaa nɔ yɛ ma de beediiyo, nduyɛ ma kol muɛiyaŋ? O kpeekpei niŋ, wanaa cho o kpema sɛnɛiyo hoo niŋnda kinɛi. Kanifuule, nda nɔ tiindaŋndo ni le helɔɔ choo choo. Mɛlɛka hɛli waŋnda haa a nyina ndɔ diandaa ni, le ma kɔ wa masaa o choo choo niŋ. (Luomaŋnda 8:​16) Waŋnda haa cho vɛlɛ o kpema Chiisu yii a nda wo niŋ le waa o masaleŋ choo a ndu latulu.—Luku 22:​29.

Wanaa nɔ yɛ tiindaŋndo le waa achal o kpele hɛnɛkiɔɔ niŋ lefafɛɛŋ o lɛŋndeŋ choo wa yɛ? Nda bɛɛ diikuŋ nyɛ Chiisu dimul buɛiyaa nduaa wo le loonɔŋndo a piɔm ndɔɔ okɔɔ. Kɛ nda nda, hunɔɔ kinɛi le ma che mɛɛ Chiisu ndoo bii Bɔŋaŋ Loonuŋyaa hoo nda buɛiyaa nduaa yɛ. A nɔ ma de beediiyo le. Nduyɛ, a nɔ vɛlɛ ma kol muɛiyaŋ te. Le pilɛ kpe Seiyaa Chɛhowaa bii Bɔŋaŋndo hoo o wɔsioo niŋ ni. O paŋgii maChuuve niŋ Naisaŋ 14 a paale delaa leŋ doŋ nda bii ndu ni. Mi che bɛɛ naa waŋnda nyɛɛmbɔ koni nɔ tiindaŋndo le helɔɔ choo choo ni, kɛ bɔŋaŋndo hoo cho nyɛ sɔwɛ le Kilisiɔŋnda hau kpede. O bɔŋaŋndo hoo choo naŋ loonuŋ kaala bɛndu Chɛhowa nda Chiisu Kiliti chɔm ŋwaŋndachiee wo ni.—Chɔŋ 3:​16.