MAIKƐL cho o poonyiaa tau o Baabuiyo niŋ te. O inyinaya Maikɛl cho ni. Ba o ba Baabuiyo soo pɛ a Maikɛl okɔɔ, mɛɛ o cho wallo kalaŋ. O yau Daaniɛɛ wo niŋ, mi Maikɛl chɔulaba a maalikɛiyaa wɔɔŋnda o inyinaya. O yau Chudi poonyiaa wo niŋ, mi Maikɛl sɛɛŋgiaŋ nda Setana. O yau Sɔɔŋ Chɔɔmaŋndoŋ niŋ, mi Maikɛl chɔulaba a Setana vɛlɛ a nyinaa nduaa wɔɔŋnda. Nyɛ diolaŋ ndaŋ la simndo cho ni, “Nɛɛnɛ cho yɛ maa Mɛlɛka?” Diolaŋ ndaŋ la bɛnda le Maikɛl kanifuule, teleŋ o teleŋ, o cho isisi o kala kpiŋ le masale Mɛlɛkaleŋ, nduyɛ, mbo wa yaamɔɔwaa Mɛlɛkaa chɔulabaa. Kɛ nɛɛnɛ cho yɛ Maikɛl?

Waŋnda apum nɔ diola pilɛ le. Le tamaseliiyo, Chekɔpu o Baabuiyo niŋ, ndoo nɔ vɛlɛ diolaŋ ni aa Isɔluɛi. Kiilanɔɔ Pitɛ ndoo nɔ vɛlɛ diolaŋ ni aa Saimɔŋ. (Chɛnɛsee 49:1, 2; Maatiu 10:2) Lelaŋ Baabuiyo dimi ni maa, Maikɛl cho diola cheleŋ ni le Chiisu Kiliti. Tuupa mbo huŋ o chieeŋndo choo, ndoo nɔ niŋ diolaŋ ndaŋ. Nduyɛ, miiŋgu ndɔɔ choo choo bɛɛ, diolaŋ ndaŋ la cho ndu choo ni. Ŋ yaasiaawɔ bolii Baabuiye ipum le sinaa maa diola Chiisu laŋ la cho vɛlɛ Maikɛl ni.

Kiilanɔ cho Kiilaa Mɛlɛkaa Kpou Bolleŋndo. Diom Mɛlɛka wo veelu Maikɛl aa o “cho kiilaa Mɛlɛkaa bolleŋ ndo.” (Chudi 9) Hoo sim ni maa ndu cho “masaa” le kiilaa Mɛlɛkaa kpou ni. Kɛsiŋ hei o kɔl maa Maikɛl cho vɛlɛ kiilanɔ cho kiilaa Mɛlɛkaa kpou bolleŋndo ni. Hoo cho naa chɔmndo maa kiilanɔ waa naa ndu pilɛ kpe cho ni, a cho a ŋiɔɔŋ te. Nduyɛ, foofo ndɔɔ cho ni, le waa kiilaa Mɛlɛkaa bolleŋ. Teleŋ Chiisu fula o sɛiyo niŋ mbo hel choo choo wo, mi Baabuiyo suaa a ndu okɔɔ o Tɛsaloniaŋ Tasoo 4:16 niŋ aa, “A boondii keŋ, Mɛlɛka pila cho isɔɔ choo choo kpeleŋ,  nduyɛ, mi kiilanɔ Mɛlɛkaa o cho kiilaa Mɛlɛkaa kpou bolleŋ ndo, mbo soo.” Baabuiyo veelu Chiisu nanuŋ maa ndu cho kiilanɔ cho kiilaa Mɛlɛkaa kpou bolleŋndo ni. Bolle Baabuileŋ ndeŋ le cho naa dimullo maa kiilanɔ cho kiilaa Mɛlɛkaa kpou bolleŋndo cho Chiisu ni, ndu ko cho yɛ vɛlɛ Maikɛl ni.

Masa Puaa Chɔuwa. Baabuiyo dimi maa mi “Maikɛl nda kiilaa Mɛlɛkaa . . . del tambalakaa a kiilaa cho tambalakaa o ba bɛŋgu wa choo a chɔuwo.” (Sɔɔŋ Chɔɔmaŋndoŋ 12:7) Maikɛl cho masaa ni le puaa chɔuwaa Mɛlɛkaa choo choo. Yau Sɔɔŋ Chɔɔmaŋndoŋ dimi vɛlɛ maa Chiisu cho masa puaa chɔuwa ni le kiilaa Mɛlɛkaa choo choo. (Sɔɔŋ Chɔɔmaŋndoŋ 19:14-16) Mi kiilanɔɔ Pɔɔl bɛɛ poonyiaa a “masanɔɔ Chiisu” vɛlɛ a “kiilaa nduaa kpaayaa” okɔɔ. (Tɛsaloniaŋ Diiŋ Ndɔɔ 1:7) Tonya icho ni. Baabuiyo soo a Chiisu a “kiilaa nduaa” vɛlɛ a Maikɛl a “kiilaa nduaa.” (Maatiu 13:41; 16:27; 24:31; Pitɛ Tasoo 3:22) Kɛ koŋ chɔm naa maa kundala puaa chɔuwaa Mɛlɛkaa la cho la tiɔɔŋ choo choo le. Baabuiyo dimi vɛlɛ naa maa, Chiisu nɔ kundaa opilɛ, mi Maikɛl bɛɛ nɔ opilɛ le. O hei niŋ, icho a tonya kpeekpei maa, Chiisu cho Maikɛl ni. Diolaŋ ndaŋ la chɛlaŋ a baala o cho tosaa choo choo wo. *