O CHO o Baabuiyo niŋ te dunyiaŋ bɔɔbɔɔ waŋnda tosa hau woŋ ŋ fula le, taama taama muŋ o piɛiye niŋ, vɛlɛ a ŋ bɔɔbɔɔ cheleŋ waŋnda bii hau o chieeŋndo niŋndoŋ. Mɛɛ kuɛɛnɛ  dunyiaŋ muŋ chɛŋ yɛ niko tum? Te o yɔŋ pɛ ma nɔ yaula yaasiaa ŋsɔɔ laŋ, a cho saalɔŋ nyɛ yaulaŋ ndaŋ lapum la dimi a dunyiaŋ muŋ ŋpum okɔɔ wo. Tofawɔ nyɛ yaulaŋ ndaŋ lapum la dimi wo.

Dunyɛi Fulasɛiniŋ Chiisoo. Mi yauwo hoo o puuluei niŋ, The Encyclopædia Britannica dimi aa, “Ba o ba a chi o yaula maKilikiilaŋ niŋ naa waŋnda bii dunyɛi le fulasɛiniŋ Chiisoo wa le.” Vɛɛ dunyɛi hei looku yɛ niko kandɔŋ? Wanaa ndaa piɛi sindɛ Mɛlɛka le wa kandu dunyɛi hei tosaa ni. A dimi maa le fulasɛiniŋ Chiisoo nda tosa dunyɛi hei ni. Kɛ mi naamula cheleŋ la tosaŋ o dunyɛi hei choo. Nduyɛ, Kilisiɔŋnda nɔ ma tosa naamulaŋ ndaŋ kposoŋ te.

Dunyɛi Wɔsi Sɛnɛiyo. Lelɛŋ o lelɛŋ fee nɔ paale nda bii dunyɛi Wɔsi Sɛnɛiyo ve. Nduyɛ naamula nda tosa o paaleŋ ndeŋ choo laŋ bɛɛ la hiyaŋ. Mi yauwo hoo o puuluei niŋ, The World Book Encyclopædia dimi isɔɔ a teleŋ dunyɛi hei kanduŋndo okɔɔ. Mbo dimi aa, “Masa maLuomaŋndo Chuliɔɔ Siisa kila dunyɛi hei ni. O kila ndi o Tɛɛkpaa niŋ lɔma lepilɛ o wɔsi 46 tuupa mi Chiisu vialuŋ.” Mi yauwo hoo hiau lachi a dimioo aa, “Paaleŋ ndeŋ Luomaŋnda chua ni maa lechoo Wɔsi Sɛnɛiyo kanduŋ ni. Le mɛlɛka ndaa diolaŋ Chanɔs Luomaŋnda hɛli paaleŋ ndeŋ ni. Mɛlɛka ndaa hoo wa mɛlɛka lakpakioo, o ladioo, vɛlɛ a kandɔŋndo. O Chanɔs niŋ nda ke Tɛɛkpaa diolaŋ o puuluei niŋ ni. Ndoo nɔ hɔlla sala tiɔɔŋ. Haa wa ndu lachi, haa wa vɛlɛ ndu o mundu.” Mɛɛ ŋ dimi maa, o naamula wanaa ndaa piɛi Mɛlɛka le wa niŋ dunyɛi Wɔsi Sɛnɛiyo i fula ni.

Dunyiaŋ Cheleŋndoŋ. Dunyiaŋ waŋnda bii hau o chieeŋndo choo woŋ, ŋ tiuba miŋ soo a muŋ okɔɔ kpou le. Kɛ a koŋ kpou, i dunya o i dunya cho pɛ le waŋndachieeya tɔɔ heeloo, te koŋ te, le kɔɔnala waŋndachieeya tɔɔ heeloo, Chɛhowa chɛl ndi kposoŋ te. (Chɛluimaya 17:5-7; Walta Wanaa Chiisuaa 10:25, 26) Kɛsiŋ vɛlɛ o kɔl maa o cho dunyiaŋ o piɛiye niŋ fau le hini Mɛlɛka kɔl te. (Aisaya 52:11; Sɔɔŋ Chɔɔmaŋndoŋ 18:​4) Vɛɛ Mɛlɛka che yɛ dunyiaŋ fula muŋ o chieeŋndo niŋndoŋ? O Buŋgɛi 16 o yauwo hoo niŋ, miŋ pɛɛku a sawala Baabuiyo lapum okɔɔ. La cho num mala ma sina mɛɛ Mɛlɛka che dunyiaŋ fula muŋ o chieeŋndo niŋndoŋ yɛ.