O SƆƆŊ maŋgalaŋ ŋmuuŋ niŋ ndaa poonyiaa sindɛ Baabuiyo ni. Muŋ cho Hibuluiye a Kilikiiye ni. Mɛɛ nda wa Baabuiyo poonyiaa, ma soliŋ diom maHibuluiyo kpeku Shiol, vɛlɛ a diom maKilikiiyo Hedis. Diomndaŋ ndaŋ la cho o Baabuiyo niŋ le bɛmbɔɔ 70. Diomndaŋ ndaŋ kpou la chiɛɛliaŋ a piɔmndo. Mɛɛ nda wa Baabuiyo hivioo o sɔɔŋ maŋgalaŋ bɔɔbɔɔ niŋ, ma hivi diomndaŋ ndaŋ aa, sɛiyo, sooŋndo, a “hɛl.” O sɔɔŋ maŋgalaa bɔɔbɔɔ niŋ, diom o diom cho o tɛɛsial waŋnda nyɛ Shiol a Hedis simndo le. Le hei, Baabui nda veelu o puuluei niŋ aa, New World Translation ndo hivi laŋ ni aa, Shiol a Hedis. Yɛɛ kpeekpei diomnda tiɔɔŋndaŋ ndaŋ la sim yɛ? Ŋ yaasiaŋndɔ mɛɛ la cho la soliaŋ kpeku o buŋgaŋ teŋgeŋ teŋgeŋndoŋ o Baabuiyo niŋ yɛ.

Ikilisiaatii 9:10 dimi aa, “Naa ŋ cho kɔlaŋ nda o Sɛiyo niŋ [“Shiol”, tɛɛsiaa amatou o New World Translation niŋ] kpeku soliaa cho loŋ te, kɔlkalu cho loŋ te, yiyaŋndo a nyɛ o nyɛ okɔɔ cho loŋ te, taasi cho loŋ te.” Baa hoo chɔm ni maa Shiol sim le sɛi waŋndo, te koŋ te, naa naŋ kumbu wanaa naa kaalaa vi wa? Sako. Te Baabuiyo wa pɛ suɛi a sɛi waŋndo, te koŋ te, a fonda waŋnda kumbu wanaa ndaa kaalaa vi wa okɔɔ, o cho Shiol a Hedis te o soliŋ kpeku le. Diom maHibuluiyo vɛlɛ a o maKilikii cheleŋ o soliŋ kpeku ni. (Chɛnɛsee 23:7-9; Maatiu 28:1) O fulawɔ o hei kɔɔli, te Baabuiyo soo pɛ a “Shiol” vɛlɛ a “Hedis” okɔɔ, o cho le naa nda kumbu wanaa siaama wa le o sim te. Le tamaseliiyo, mɛɛ sɛi yuŋgoo cho naa yɛ, te koŋ te, sooŋ nda kumbu wanaa siaama wo.—Chɛnɛsee 49:30, 31.

A fonda yɛɛ okɔɔ “Shiol” cho yɛ niŋ suɛi? Diom Mɛlɛkaa dimi maa, “Shiol” a “Hedis”, o cho fondaŋ nda kumbu wanaa siaama wo le o cho le. Kɛ, a nyɛ cheleŋ okɔɔ pɔ o cho suɛi ni. Le tamaseliiyo, Aisaya 5:​14 dimi maa Sɛiyo ‘cho bɔɔ fonda bɛndu nduyɛ, sondoo cho ndu o kumbiaa wakpa o nɔ lamɛɛlu le.’ O dimi niŋ kpeekpei, Shiol mel niŋ waŋvilɛiya o miiliɔŋndaŋ niŋ. Kɛ a koŋ kpou, o pim ndɔ le, o yeema wɔ le waŋvilɛiyaa bɔɔbɔɔ miolɔɔ. (Pulɔwaa 30:15, 16, NW) Fondaŋ nda kumbu waŋvilɛiya wo ndu, mbo pɛ. Kɛ sɛiyo a sooŋ yiŋgilɛi nɔ lamɛɛlu le wo pe fɛɛŋ fɛɛŋ te. (Pulɔwaa 27:20, NW) Wana dimi isɔɔ a tonya, Shiol ndu pim a waŋvilɛiya le. O nɔ naa o kunduŋ te. Mɛɛ ŋ dimi maa, o cho fondaŋ kpeekpei waŋnda kumbu  waŋvilɛiya wo le Shiol a Hedis cho le. Kɛ, naa waŋvilɛiya kpou cho ihini o lɔma piɔmndaŋ niŋnda.

Baabuiyo pɛɛku maa fulasɛiniŋndo cho hunɔɔ wa. Tonya Baabuiyo pɛɛku hoo wo mala naa le sinaa nyɛ Shiol a Hedis simndo. Diom Mɛlɛkaa dimi maa waŋvilɛiyaa cho Shiol a Hedis wa cho hunɔɔ vɛlɛ miiŋgu yoomu. * (Choobu 14:​13; Sɔɔŋ Chɔɔmaŋndoŋ 20:​13, NW; Walta Wanaa Chiisuaa 2:​31) Baabuiyo chɔm vɛlɛ maa o cho ko wanaa piɛi Chɛhowa wa le cho Shoil a Hedis niŋ te. Kɛ wanaa bɔɔbɔɔ a piɛi ndu le wa bɛɛ cho loŋ. (Chɛnɛsee 37:​35; Sam 55:​15, NW) Nyɛ koŋ Baabuiyo dimi ni aa, “wana o wana vi, a cho vɛlɛ miiŋgu yoomu, wana kɛndɛ ni, wana wɔɔŋ ni.”—Walta Wanaa Chiisuaa 24:​15.