1-3. Yaamɔɔnɔ kuɛɛ cho yɛ naa kpede touwɔɔ? Nduyɛ, kɔl dɛɛniaa yɛɛ naŋ sɔla yɛ, te ŋ sina pɛ nyɛ Baabuiyo dimi a yaamɔɔnɔɔ hoo okɔɔ wo?

YIYAŊNDƆ maa wana biyaa cho num towɔɔ. Wana biyaa hoo yɛ o nɔ yoomuaŋ tau mbo hiau num. Nduyɛ, o nyaanuŋ vɛlɛ mbo hiau num. O nɔ nyɛyii wana le kanifuule, a che niŋ ndu mbo bii chaaŋaa numaa siaama. Mɛɛ ŋ nyaanuŋ fau, lende ko o chɔɔlu num sɔɔŋguu ikɛi kpɛɛluŋ. A nɔ lɛ tiindaŋ kposoŋ te. O lepilɛ niŋ kpe, waŋndo fula num lachi le num piŋioo. Nduyɛ, o nɔ yoomuaŋ mbo hiau wana cho num hoo towɔɔ wo. Vɛɛnɛ kɔllo wa yɛ num? Koŋ tosa num ma naŋ kɔl tau le wana nya bɔŋaŋ hoo le num piŋioo wo.

² O dimi niŋ, nyɛ cho num towɔɔ. Nduyɛ, naa kpou o cho naa towɔɔ. A mɛɛ naŋ pɛɛku o buŋgɛi naŋ hiou vɛ niŋ yɛ, Baabuiyo veelu piɔmndo aa, yaamɔɔnɔɔ. Mɛɛ naŋ cho kpede, ŋ nɔla yaamɔɔnɔɔ hoo nyaanɔŋ te. Ŋ nɔla ndu chɔulaba le. Naapum nda, yaamɔɔnɔɔ hoo dii niŋ chaaŋaa naa kaalaa bɔɔbɔɔ. Kɛ Chɛhowa nɔ kpaayaa mbo hiau piɔmndo. Ndu cho wana naa piŋiaa ni. Nduyɛ, o chɔm naa kpendekele mɛɛ o cho hunɔɔ piɔmndo bɛɛlaŋ tɛɛmbuu yɛ. O mɛi lediom maa o cho hunɔɔ piɔmndo faŋa. Nduyɛ, o faŋa ndu pɛ, fɛɛŋ fɛɛŋ bɛɛ, o cho lɛ wa le. Baabuiyo dimi aa, “Yaamɔɔnɔ Mɛlɛka mɛɛlu niŋ tɛɛmbuu kpɔŋ ndo, ndu cho piɔmndo ni.” (Kɔliŋtiaŋ Tasoo 15:​26) O cho yooŋgu kɛndɔɔ le cho hoo le?

³  O tasoo cho ni, ŋ yiyaŋndɔ fɛŋ mɛɛ naŋ wa yɛ te o yɔŋ pɛ mi wana naŋ kaalaa wo vi. Hei sinaa mala naa miŋ sɔla kɔl dɛɛniaa le nyɛ Baabuiyo dimi a piɔmndo okɔɔ wo, nduyɛ koŋ tosa miŋ wa a nyaale. Chɛhowa mɛi lediom maa, wanaa vi wa cho vɛlɛ miiŋgu yoomu ma wa achal. (Aisaya 26:​19) A nɔ vɛlɛ le miiŋgoo yoomu pila. Tiindaŋndo cho le wanaa vi wa kanifuule, Chɛhowa mɛi lediom maa, o cho hunɔɔ nda soli o sɛilaŋ niŋ.

4. (a) Yɛɛ naŋ pɛɛku yɛ a Chɛhowa okɔɔ a nyɛ Chiisu tosa wo, te waŋndo wana ndɔ kaalaa vi pɛ? (b) Chaŋyɛi teŋgeŋ kuɛɛ Chiisu ndoo nɔ yɛ?

⁴ Kani bɛɛ wana ŋ kaala wo vi niŋ? Yiyaŋndɔ a mɔnɛi wa num o kɔllo niŋnde. Ma yiyaŋ vɛlɛ pɛŋ maa a nɔ tiindaŋ te. Mɛɛ a boondei hei kinɛi o bɛnda ni miŋ nuuviaa Diom Mɛlɛkaa le naa kɔllo dɛɛniaa. (Nuawɔ Kɔliŋtiaŋ Diiŋ Ndɔɔ 1:​3, 4.) Baabuiyo mala naa miŋ sina mɛɛ Chɛhowa nda Chiisu yiyaŋ a piɔmndo okɔɔ yɛ. Chiisu, Finya ndɔ o vel ni. Nduyɛ, mbo sina vɛlɛ kpendekele maa, te waŋndo wana ndɔɔ vi pɛ, i wa bɔɔ suɛi imɔnɔ. (Chɔŋ 14:​9) Teleŋ o teleŋ Chiisu ndoo hiŋ pɛ Chulusalɛm, mi ndoo kuɛ Lasalɔɔ yilɔɔ vɛlɛ a yemaa nduaa, Meele a Mata. O chiee pɔmbɔɔ pum Chulusalɛm ikɛi nda wa ni, diolaŋ aa, Bɛtanii. O hei niŋ, mi chaŋyɛi luɛi nda tɛɛŋ vellaa velle. Mi Baabuiyo dimi aa, “Chiisu ndu oo kaala Mata nda Meele pɔmbɔ ndɔ a Lasalɔɔ yema nda tau.” (Chɔŋ 11:​5) Kɛ a mɛɛ naŋ pɛɛku o buŋgɛi naŋ hiou ve niŋ yɛ, mi Lasalɔɔ wu.

5, 6. (a) Yɛɛ Chiisu ndoo tosa yɛ mɛɛ o wa a yuŋgu Lasalɔɔ wo latulu vɛlɛ a chaaŋaa nduaa? (b) Vɛɛ mɔnɛi bii Chiisu mbo tuisi mɛmiaŋ nde cho yɛ kɔl dɛɛniaa le naa?

⁵ Yɛɛ Chiisu ndoo tosa yɛ mɛɛ chaaŋ ndɔ vi? Baabuiyo dimi maa mɛɛ Lasalɔɔ vi, mi Chiisu kua naa wanayaŋ vɛlɛ a chaaŋaa Lasalɔɔ wa cha. Mɛɛ Chiisu che nda, mi “mɔnɛi bii ndu, nduyɛ, mbo tambu kɔl.” Mi Baabuiyo hiau lachi a dimioo aa, “Mi mɛmiaŋ ma tual Chiisu kpasu kpasu.” (Chɔŋ 11:​33, 35) Baa mɛmɛma Chiisu tuisi waŋ ma chɔm ni maa ndoo nɔ tiindaŋ te? O cho lende le icho le. Ndoo sina maa suɛi kɔndɔfille nɔ le hunɔɔ yɔŋnɔŋndo. (Chɔŋ 11:​3, 4) Kɛ a koŋ kpou, mi Chiisu sinaŋ mɔnɛi piɔmndo chuu wana o kɔllo niŋnde.

⁶  O dimi niŋ, mɛmɛma Chiisu tuisi maŋ ndaŋ ma cho nyɛ dɛɛniaa naa kɔl. Ma chɔm naa maa, Chiisu nda Finya ndɔ tul piɔmndo leyɛ. Kɛ Chɛhowa nɔla mbo chɔulaba piɔmndo, nduyɛ, mbo tiu ndu ba. Ŋ tofawɔ nyɛ Mɛlɛka mala Chiisu mbo tosa wo.

7, 8. Le yɛɛ wanachiee ndoo nɔ lɛ tiindaŋ a piɔm Lasalɔɔ wo le? Kɛ yɛɛ Chiisu ndoo tosa yɛ?

⁷ Mɛɛ Lasalɔɔ vi, ma chɔ ndu o sɛi buuloo niŋ. Mɛɛ Chiisu kuɛ o sɛiyo, mbo dimul waŋnda le ma faŋa pou ndaa kɛsi o sondoo wo. Mi Mata kɛɛ, kanifuule, ndoo chii niŋ palɛi i hiɔɔlu o sɛiyo niŋ. Dialuŋ ndɔŋ wa niŋ siɔɔ a boondii keŋ. (Chɔŋ 11:​39) Le wanachioo ndu, tiindaŋ ve lɛ le.

⁸ Okoŋ, ma faŋa pouwo o sɛiyo sondoo. Mi Chiisu deŋi choo choo kpeleŋ aa, “Lasalɔɔ, fula!” (Chɔŋ 11:​43, 44) Numpila yiyaŋndɔ niko mɛɛ wanaa wa loŋnda wa a nyaale yɛ. O yɔŋ bɛɛ aa pɔmbɔ nda Lasalɔɔ wa ni, bɛnda, yema nda, wanayɛi ndɛi, vɛlɛ a chaŋyɛi ndɛi, nda kpou ma sina maa Lasalɔɔ vi. Kɛ ma cha vɛlɛ Lasalɔɔ ndaa kaala hoo wo isisi nda tɛɛŋ yoomu. Ma yiyaŋ dɔɔ maa o cho suɛi ndii yɔŋnuŋ te. Mi wanaa bɔɔbɔɔ demul Lasalɔɔ a nyaale. Batiuwaa kpeekpei cho hoo ni le piɔmndo.

9, 10. (a) Vɛɛ Chiisu chɔm yɛ maa o cho a kpaaya ndɔ le o soli Lasalɔɔ o sɛiyo niŋ te? (b) Kɔl dɛɛniaa yɛɛ naŋ sɔla yɛ te ŋ wa pɛ nuaa o Baabuiyo niŋ a fulasɛiniŋnda yɔŋnuŋ ndaŋ okɔɔ?

⁹ Chiisu looŋ ibuŋ le kaamaa o tosa hoo wo le. Lɔɔpa mbo soli Lasalɔɔ o sɛiyo niŋ, o piɛi fɛŋ. Nduyɛ o piɛile o wa leŋ niŋ, mbo chɔm kpendekele maa Chɛhowa ke ndu kpaayaa ni mbo soli Lasalɔɔ o sɛiyo niŋ. (Nuawɔ Chɔŋ 11:​41, 42.) O cho teleŋndo hoo koni le Chɛhowa soliŋ kpaaya ndɔɔ kpeku le. Fulasɛiniŋndaŋ la ŋɔmahiɔɔlu la yɔŋnuŋ ni mi la wa la poonyiaa o Baabuiyo niŋ. * O laŋ tɛɛŋ, fulasɛiniŋ Lasalɔɔ wo cho opilɛ. O cho bɔɔ suɛi kɛndɛ le pɛɛkoo a sɔɔŋ kaamaa waa ndoo okɔɔ. Ŋ pɛɛku naa maa, Mɛlɛka hɛli ŋwaŋndachiee le. O wanaa sɔla haa fulasɛiniŋndo wa tɛɛŋ, chuaambuaa wa, kaasoŋnda, waŋpiaanduaa, waŋlaanduaa, Isɔluɛitiiya,  vɛlɛ a wanaa ve a Isɔluɛitii le wa. Tofawɔ ma che mɛɛ Baabuiyo chɔm nyaale waŋnda dɔunuŋ o bundɔŋ muŋ niŋndo. Le tamaseliiyo, mɛɛ Chiisu miŋgi chuaambɔ pɔmbɔɔ yoomu, mi “kɔndɔfillo bii” wanaa nduaa. (Maki 5:​42) A tonya, mi Chɛhowa tosa ma duaunuŋ nyaale nda puɛɛnuŋ fɛɛŋ fɛɛŋ te wo.

¹⁰ Kɛ mi wanaa Chiisu miŋgi yoomu wa wu vɛlɛ. Baa hoo chɔm ni maa fondo fuu o miŋgi nda yoomu ni? Sako, o cho fondo fuu le. Sɔɔŋ muŋ cho machuaa ŋ poonyiaa o Baabuiyo niŋ le naa tonyaa pɛɛkoo, vɛlɛ a naa tiindaŋndo kioo.

11. Vɛɛ kona fulasɛiniŋ Lasalɔɔ wo chɔm yɛ maa nyɛ poonyiaŋ o Ikilisiaatii 9:​5 niŋndo cho tonya?

¹¹ Baabuiyo pɛɛku maa ‘wanaa vi niŋ nda, a sina lɛ nyɛ kposoŋ te.’ (Ikilisiaatii 9:​5) A cho yoomu le, nduyɛ, a cho vɛlɛ achal ba o ba le. Nyɛ yɔŋnuŋ a Lasalɔɔ wo chɔm naa hei ni. Mɛɛ Lasalɔɔ miiŋgu yoomu, ndoo dimul pa waŋnda a sɔɔŋ waa choo choo okɔɔ? Baa mi ndoo luei vɛlɛ pa nda siooŋnde maa yiŋndeŋ le cho le luam wanaa dɛnɛwɔɔŋnda leŋ? Sako bɛɛ. Kona waa naa cho o Baabuiyo niŋ te. Le palɛi hiɔɔlu o wa o sɛiyo niŋnde kpou, o “sina lɛ nyɛ kposoŋ te.” O kpeekpei niŋ, o lɔma piɔmndaŋ niŋ Lasalɔɔ wa ni.—Chɔŋ 11:​11.

12. Le yɛɛ naŋ laalaŋ yɛ maa lekɛndɛi, mi Chiisu soli Lasalɔɔ o sɛiyo niŋ?

¹² Fulasɛiniŋ Lasalɔɔ wo hoo pɛɛku naa vɛlɛ maa, fulasɛiniŋndo cho hunɔɔ yɔŋnɔŋ lekɛndɛi. Hei cho bundɛi lachoowa le. Teleŋ Chiisu soli Lasalɔɔ o sɛiyo niŋndo, waŋnda wa loŋ faŋga bɛndoo. Mi nda kpou cha nyɛ yɔŋnuŋndo pɛɛŋ a le hɔl. Hali simlachiaa lepiɛiya bɛɛ, a ndaa tul Chiisu leyɛ wa, a sɛɛŋgiaa kaamaa yɔŋnuŋ hoo wo le. Kɛ ma dimi okoŋ kɔɔli aa, “O yɛɛ naa ŋ yɔŋ yɛ? A che walta kɔndɔfilta faŋga poo hoo cho tosaa laŋ.” (Chɔŋ 11:​47) Mi wanaa bɔɔbɔɔ kua Lasalɔɔ Chiisu soli hoo o sɛiyo niŋndo tofaa. Nduyɛ fulamakɔɔlioo wa ni, mi wanaa bɔɔbɔɔ duau laalaŋndo o Chiisu niŋ. Mɛɛ nda che Lasalɔɔ isisi nda tɛɛŋ yoomu vɛlɛ, ma laalaŋ kpeekpei maa Mɛlɛka vem Chiisu ni. Fulasɛiniŋ Lasalɔɔ wo hoo ve suɛi bɛɛŋ bɛɛŋ te. Mi suɛi nɛi simlachiaa lepiɛiyaa Chuuwa apum. Okoŋ, ma kɛɛsiaa le Chiisu diyɔɔ nda Lasalɔɔ.—Chɔŋ 11:​53; 12:​9-11.

13. Yɛɛ ke yɛ naa tiindaŋndo maa Chɛhowa tiuba kpeekpei mbo miŋgi waŋvilɛiya yoomu?

¹³  O bɛnda pa miŋ kɛɛ laalaŋ maa fulasɛiniŋndo cho nyɛ tonya le? I nɔ mii wa lende le. Kanifuule, mi Chiisu dimi maa teleŋ cho fuuluu mi “wanaa vilɛiya kpou” a cho o sɛila loonaŋndaŋ niŋnda miiŋgu yoomu. (Chɔŋ 5:​28) Chɛhowa toosiaa yoomu suu o suu ni. O bɛnda pa miŋ kɛɛ laalaŋ maa o tiuba mbo miŋgi wanaa vi wa yoomu le? Baa o tiuba pa mbo loonuŋ wanaa naa kaalaa vi wa kpou? Le mi hei yɔŋnuŋ, mɛɛ mi Chɛhowa soliŋ kɔlkalu ndɔ loonaŋndo kpeku. Yiyaŋndɔ a looŋ cho o choo choo niŋndoŋ. Ŋ cho o kɛmɛ chuu chɔm te laŋ niŋ. Kɛ muŋ kpou, Chɛhowa sina muŋ diolaŋ. (Aisaya 40:​26) Mɛɛ hei chɔm ni maa, Chɛhowa tiuba mbo loonuŋ wanaa naa kaalaa vi wa kpou. Nduyɛ, o nɔla vɛlɛ mbo loonuŋ mɛɛ mɛɛ nda wa yɛ. O cho vɛlɛ o bɛɛndiaŋ le nda miŋgioo yoomu.

14, 15. A mɛɛ Choobu dimi yɛ, vɛɛ Chɛhowa yiyaŋ yɛ le wanaa vi wa miŋgioo yoomu?

¹⁴ Vɛɛ Chɛhowa yiyaŋ yɛ le waŋvilɛiya solioo o sɛilaŋ niŋ? Baabuiyo pɛɛku naa maa o nɔ yeemɛi tau le waŋvilɛiya miŋgioo yoomu. Mi wana laalaŋndo Choobu nyuna aa, “Te wana chioo vi niŋ pɛ baa o miiŋgu lɛ pa yoomu?” A chumndo o sɛiyo niŋ okɔɔ Choobu wa suɛi ni. Maa o cho lo chumndo loŋ tei mi teleŋndo fuuluu le mi Mɛlɛka loonuŋ a ndu. Mbo dimul Chɛhowa aa, “Mɛlɛka, num toosiaa ya ni. I sina maa o wa niŋ o lepala niŋ mi kɔllo del num o ya lo. O koŋ, ma veelu ya mi muli num diom.”—Choobu 14:​13-15.

¹⁵ Numpila yiyaŋndɔ a keŋ. Chɛhowa nɔ yeemɛi kpeekpei le waŋvilɛiya miŋgioo yoomu. Hei cho suɛi kɔl kɛndɛ le sinaa maa Chɛhowa nɔ yeemɛi suu waa naa le? Kɛ fulasɛiniŋ nɔ hoo le yɔŋnɔŋndo o chilaŋ niŋndo yɛ? Nɛɛ yaa nɔ yɛ le ndu hunɔɔ sɔlaa? Nduyɛ, kuɛɛnɛ o cho yɛ yɔŋnɔŋ?

16. Te waŋvilɛiya miiŋgu pɛ yoomu, vɛɛ yoomoo wa yɛ niŋ teleŋ koŋ?

¹⁶ Kona fulasɛiniŋ cho o poonyiaa o Baabuiyo niŋndo, pɛɛku naa tau a fulasɛiniŋ nɔ le yɔŋnɔŋndo o chilaŋ niŋndo okɔɔ. Wanaa  ndaa miiŋgu yoomu teleŋ koŋ o lɛŋndeŋ choo wa, ma miiŋgu vɛlɛ naapilɛ nda wanaa ndaa kaalaa. Lende ko icho vɛlɛ wa a fulasɛiniŋ yɔŋnuŋ niŋ o chilaŋ niŋndo ni. Kɛ hoo o chilaŋ niŋ hiau niŋ bɛnda. A mɛɛ naŋ pɛɛku o Buŋgɛi 3 ve niŋ yɛ, hɛnaŋ Mɛlɛkaa cho ni maa, chieeŋndo kpou nɔ le simnɔŋndo kpele hɛnɛkiɔɔ. Lelaŋ te waŋvilɛiyaa huŋ miiŋgu pɛ yoomu o chieeŋndo choo, chɔula ve lɛ niŋ te, sawa tɛɛmbaa, kɛlɛŋgaa naalaŋ. A nɔ niŋ dikeŋnaŋndo le waa achal lefafɛɛŋ o lɛŋndeŋ choo. A wa niŋ a nyaale nduyɛ, ma nɔ kɔl nyuloo.

17. Le nɛɛ yaa kinɛi fulasɛiniŋndo wa yɛ niŋ?

¹⁷ Nɛɛ yaa sɔla yɛ niŋ fulasɛiniŋndo? Mi Chiisu dimi aa, “Wanaa vilɛiya kpou” a cho o sɛila loonaŋndaŋ niŋnda cho hunɔɔ fula o sɛilaŋ niŋ. (Chɔŋ 5:​28, 29) Mi Sɔɔŋ Chɔɔmaŋndoŋ 20:​13 bɛɛ dimi aa, ‘Mi wanaa vi o peelo wa chaŋ ma fula. A nda chɔ o sɛilaŋ niŋnda bɛɛ kpou ma chaŋ ma fula.’ (NW) “Sɛiyo” nda veelu vɛlɛ o Kilikiiye niŋ ni aa, Hedis. (Le chɔɔloo sinaa a diomndo hoo okɔɔ Hedis, tofawɔ Yooŋgula Chɔɔlaalaŋ o pei 212 a 213.) Sɛila suula yɛ yɛlaŋ ndaŋ kpou la cho hunɔɔ lo fondo. Wanaa kaakuuwaa cho o sɛilaŋ ndaŋ niŋnda kpou nɔ le miiŋgoo yoomu. Mi kiilanɔɔ Pɔɔl dimi aa, “Wana o wana vi, a cho vɛlɛ miiŋgu yoomu, wana kɛndɛ ni, wana wɔɔŋ ni.” (Walta Wanaa Chiisuaa 24:​15, NW) Yɛɛnɛ koŋ sim yɛ?

18. Nɛɛ yaa cho yɛ ‘wanaa kɛndiaa’ nɔ le fulasɛiniŋndo sɔlaa wa apum? Nduyɛ, vɛɛ tiindaŋndo hoo piiliaŋ yɛ num?

¹⁸ Wanaa bɔɔbɔɔ wa sindɛ achal ma tosa hɛnaŋ Mɛlɛkaa tuupa mi Chiisu huŋ o chieeŋndo choo wo cho ‘wanaa kɛndiaa’ haa ni. Miŋ pɛɛku a nda okɔɔ tau o Baabuiyo niŋ. Ma yiyaŋ dɔɔ a Nuuwa, Ebilaham, Sela, Muuse, Lufu, Ɛsita, vɛlɛ a acheleŋnda tau. Wanaa ndaa nɔ haa laalaŋndo wa a cho a chɔmaa chɛ chɛ o lepula o yau Hibuluiya niŋ bolle 11. Seiyaa Chɛhowaa cho suŋsuŋ piɔmndo wa bɛɛ cho wanaa sandaa haa tɛɛŋ. Tiindaŋ fulasɛiniŋndo hoo mala naa ŋ nɔ lɛ siooŋii piɔm te.—Hibuluiya 2:​15.

19. Nɛɛ yaa cho yɛ ‘wanaa wɔɔŋnda’? Nduyɛ, di kuɛɛ Chɛhowa ke yɛ nda?

¹⁹ Waŋnda apum piɛi Chɛhowa le, kanifuule, a sina a ndu okɔɔ kposoŋ te. Nda yɛ, yɛɛnɛ cho yɛ yɔŋnɔŋ a nda? Nda Baabuiyo veelu ni aa ‘wanaa wɔɔŋnda.’ Waŋnda haa cho o kɛmɛ chuu chɔm te  laŋ niŋ. Nda kpou Mɛlɛka puɛɛnuŋ niŋ a nda le. Nda bɛɛ nɔ le hunɔɔ fulasɛiniŋndo sɔlaa. Mɛlɛka cho nda teleŋndo ke le ma pɛɛku tonya cho a ndu okɔɔ wo, nduyɛ ma piɛi ndu. O boondii wɔsila waa pilɛ laŋ bɛŋgu, waŋvilɛiya nɔ le fulasɛiniŋndo sɔlaa. Okoŋ, mi dioo keŋnuŋ nda le ma piɛi Chɛhowa nda wanaa laalaŋnda latulu o lɛŋndeŋ choo. Boondii kɔlkɛndɛi pila wa niŋ hei ni. Boondei hei Baabuiyo veelu ni aa, Paale Kɔɔsɔleŋ. *

20. Yɛɛnɛ cho yɛ Kɛhɛna? Nduyɛ, nɛɛ yaa kua yɛ loŋ?

²⁰ Baa hoo chɔm ni maa wanaa cho hau piɔmndo wa kpou nɔ le fulasɛiniŋndo sɔlaa ni? Pɛ pɛ bɛɛ. Baabuiyo dimi maa waŋvilɛiya apum cho “Kɛhɛna.” (Luku 12:​5, NW) Diomndo hoo Kɛhɛna fula o sal wa sindɛ Chulusalɛm chiee lekɔɔ wo. Loŋ ndaa luam billo ni, vɛlɛ a dialuŋ vilɛiyoŋ. Dialuŋ vilɛi Chuuwa ndaa che pɛ maa ŋ bɛnda le kumbɔɔ le, nduyɛ maa ŋ nɔ tiindaŋ fulasɛiniŋ te, loŋ ndaa viau muŋ ni. Lelaŋ, diomndo hoo sim lewundu le tambii fɛɛŋ fɛɛŋnde. Mi che bɛɛ naa Chiisu cho wa wanaa vi wa a wanaa cho yoomu wa yamaŋ kilullo ni, kɛ Chɛhowa cho Yamanɔ mɛɛlaa ni. (Walta Wanaa Chiisuaa 10:​42) Wana o wana o kɔɔsa mbo cha maa wana dɛnɛwɔɔŋndo o cho ni, nduyɛ mbo kɛɛ le yɔŋ ndɔ wɔɔŋndo malɔɔ, pesiŋ bɛɛ o soli ndu niŋ o sɛiyo niŋ te.

21, 22. (a) A fulasɛiniŋ cheleŋ kuɛɛ okɔɔ Baabuiyo soo yɛ vɛlɛ? (b) Nɛɛnɛ fɛŋ sɔla yɛ fulasɛiniŋ yoomu inyinayaa?

²¹ Baabuiyo soo vɛlɛ a fulasɛiniŋ cheleŋ okɔɔ. Fulasɛiniŋndo hoo ndu, le helɔɔ choo choo o inyinaya. Tamasi fulasɛiniŋ suu waa ndoo opilɛ kpe cho o poonyiaa o Baabuiyo niŋ ni. Ndu cho yɛ fulasɛiniŋ Chiisu wo ni.

²² Mɛɛ nda dii Chiisu, Chɛhowa chɛl mi Po Ndɔ laalaŋndo lo o Sɛiyo niŋ te. (Walta Wanaa Chiisuaa 2:​31; 13:​34, 35) Mi Mɛlɛka soli ndu o sɛiyo niŋ, kɛ o ve lɛ a dialuŋ iwanachieeya le. Mi kiilanɔɔ Pitɛ poonyiaa a Kiliti okɔɔ aa, “Boondii waŋnda dii ndu ve, o wa o iwana chieeya. Kɛ miŋgi Mɛlɛka miŋgi ndu yoomu wo, o  inyina o cho ni.” (Pitɛ Tasoo 3:​18) Kaamaa kpeekpei wa koŋ ni. Mi Chiisu miiŋgu vɛlɛ yoomu o inyinaya! (Nuawɔ Kɔliŋtiaŋ Tasoo 15:​3-6.) Chiisu wa wana tasoo ni le fulasɛiniŋ tɔɔma waa naa sɔlaa kɛ, o cho ko ndu le sɔla fulasɛiniŋ waa naa le.—Chɔŋ 3:​13.

23, 24. Nɛɛ yaa cho yɛ ‘saa kunda pɔmbɔ’ Chiisu wo? Nduyɛ, vɛɛ nda cho yɛ bolle pilɛ?

²³ Tuupa mi Chiisu wu, mbo dimul buɛiyaa nduaa maa te o miiŋgu pɛ choo choo, o cho lakɔ “yiyalaŋ bɛɛndiaa” loŋ le nda. (Chɔŋ 14:​2) Chiisu veelu wanaa nɔ haa le helɔɔ choo choo wa aa “kunda . . . pɔmbɔɔ.” (Luku 12:​32) Vɛɛnɛ waŋnda cho yɛ wa o kunda pɔmbɔ Kilisiɔŋaa laalaŋnda haa niŋ? Mi kiilanɔɔ Chɔŋ dimi o Sɔɔŋ Chɔɔmaŋndoŋ 14:​1 niŋ aa, “O koŋ kɔɔli mi cha Saa Fɔŋndɔɔ [Chiisu Kiliti] isisi o pembii Saayɔŋnde choo. Mi cha waŋnda faŋga bɛndu bɛndoo ndu kɔɔli. A va waalaŋ kɛmɛ a bele hiɔɔlu a la hiɔɔlu. Saa Fɔŋndɔɔ hoo diola ndɔlaŋ a diola finya ndɔlaŋ la va la poonyiaa nda o ŋtendu.”

²⁴ Kilisiɔŋnda 144,000 nɔ le fulasɛiniŋndo sɔlaa o inyinaya ni le helɔɔ choo choo. Buɛiyaa laalaŋaa Chiisuaa bɛɛ cho kundaa hoo tɛɛŋ. Teleŋ kuɛɛ fulasɛiniŋ ndaa kanduŋ yɛ? Mi kiilanɔɔ Pɔɔl dimi maa boondii Chiisu nɔ le hunɔɔ ve fulasɛiniŋndo hoo nɔ le kandɔŋndo ni. (Kɔliŋtiaŋ Tasoo 15:​23) A mɛɛ naŋ cho hunɔɔ pɛɛku o buŋgɛi ŋɔmahiɔɔlu ve niŋ yɛ, o boondii keŋ niŋ naŋ cho niŋ naa ni. O wanaa 144,000 haa tɛɛŋ, apum cho wɔ lɛŋ naŋ. A lo yɛ haa lɛŋ naŋnda, a vi dɔɔ pɛ, a helnuŋ bɛɛ choo choo o inyinaya. (Kɔliŋtiaŋ Tasoo 15:​51-55) Kɛ waŋchieeyaa cheleŋ cho kunda bɛndoo pila. Nda nɔ le fulasɛiniŋndo sɔlaa o chilaŋ niŋ le waa o Kpele hɛnɛkiɔɔ niŋ o lɛŋndeŋ choo.

25. Yɛɛ naŋ nɔ yɛ le hunɔɔ pɛɛkoo o buŋgɛi cho lachi ve niŋ?

²⁵ Ŋ nɔ tiindaŋndo kɛsɛ kɛsɛ maa Chɛhowa nɔla mbo chɔulaba yaamɔɔnɔ naa, ndu cho yɛ piɔmndo ni. Nduyɛ, o nɔla mbo tiu ndu ba. Piɔmndo cho hunɔɔ faŋaŋ le fɛɛŋ a fɛɛŋ. (Nuawɔ Aisaya 25:​8.) Kɛ mi kɔndɔfillo bii num dɔɔ ma nyuna aa, ‘Yɛɛnɛ wanaa nɔ haa le helɔɔ choo choo wa cho yɛ lakɔ tosa loŋ?’ A cho wa o Masale Mɛlɛkaleŋ choo o choo choo niŋ. Ŋ cho hunɔɔ chɔɔlu pɛɛku a masaleŋ ndeŋ okɔɔ o buŋgɛi cho lachi ve niŋ.