SƆƆŊ pum cho o yau Sɔɔŋ Chɔɔmaŋndoŋ niŋ, ŋ kendu bɔɔ bila biyɔɔ. Lelaŋ, wana chi dɔɔ ko muŋ ma sina nyɛ ŋ simndo le. (Sɔɔŋ Chɔɔmaŋndoŋ 1:1) Le tamaseliiyo, mi yau Sɔɔŋ Chɔɔmaŋndoŋ suaa a chuaa pum okɔɔ. Mbo dimi maa, diolaŋ la cho ndu la poonyiaa o itendu aa, “Babilɔŋ, tɔɔ Bɛndoo.” Mbo dimi vɛlɛ maa, o cho ichali wanaa suu o suu choo, vɛlɛ a waŋnda lekaa o lekaa. (Sɔɔŋ Chɔɔmaŋndoŋ 17:1, 5, 15) Kɛ o kpeekpei niŋ, o cho wana lanɔ kpeekpeiyo le tiuba mbo tosa hei le. Mɛɛ ŋ dimi maa, o cho wanachiee le Babilɔŋ, tɔɔ Bɛndoo hoo cho le. Mɛɛ yɛɛ wana lanɔ suundɛiyo hoo sim yɛ niko lewundu?

 Mi Sɔɔŋ Chɔɔmaŋndoŋ 17:18 suaa vɛlɛ a chuaa hoo maa, “ndu sim le chiee tɔɔ bɛndu cho hoo chiee lemasaa mbo va masaa kpou bolleŋ o chieeŋndo choo wo ni.” Chiee Baabuiyo cho hoo suɛi a ndu okɔɔ wo sim le wanaa cho naapilɛ o kɔɔna waŋchieeya niŋnda. ‘Chiee tɔɔ bɛndoo’ hoo cho “chiee lemasaa mbo va masaa kpou bolleŋ o chieeŋndo choo wo ni.” Lelaŋ Baabuiyo veelu wana lanɔɔ hoo ni aa Babilɔŋ, tɔɔ Bɛndoo. Kɔɔnaa hoo cho hau waŋnda hɔlla hiŋndo o chieeŋndo choo kpou ni. Kɔɔna suu kuɛɛ hoo? Kɔɔna lepiɛiyo. Tofawɔ mɛɛ yau Sɔɔŋ Chɔɔmaŋndoŋ tɛɛsial naa hei yɛ.

Kɔɔnalaŋ la cho a suulaŋ yɛ yɛ. Kɔɔna masale chieeŋndeŋ le cho, kɔɔna lepiɛiyo cho, o leyulaa bɛɛ cho. Wana lanɔ nɔ hoo diolaŋ aa Babilɔŋ, tɔɔ Bɛndoo wo cho kɔɔna masale chieeŋ te. Kanifuule, Baabuiyo dimi aa, “masaa lelɛŋnda o chieeŋndo choo hini” a ndu. Chaŋyɛi o tosa a masaa lelɛŋnda o chieeŋndo hoo choo le mbo nɔ kpaayaa nda choo o nɛi o nɛi niŋndo cho hinei hei ni.” Le saboo hoo Baabuiyo veelu ndu ni aa, wana lanɔ “suundɛiyo.”—Sɔɔŋ Chɔɔmaŋndoŋ 17:​1, 2; Chemisi 4:​4.

O cho kɔɔna leyula le Babilɔŋ, tɔɔ Bɛndoo hoo cho le. Kanifuule, “wanaa layakuaa o chieeŋndo niŋ” cho lakɔl tambu tau tau le tambii o sɔla niŋnde. Lelaŋ pɛŋ, masaa lelɛŋnda ni, a wanaa layakuaa kpou sim niŋ “kɔɔli kɔɔli” ma tofa Babilɔŋ, tɔɔ Bɛndoo hoo. (Sɔɔŋ Chɔɔmaŋndoŋ 18:​3, 9, 10, 15-17) Mɛɛ hei cho naa chɔmndo kpendekele maa, Babilɔŋ, tɔɔ Bɛndoo hoo cho kɔɔna masale chieeŋ te. Nduyɛ o cho vɛlɛ kɔɔna leyula le. Kɛ kɔɔna lepiɛiyo o cho ni.

Yau Sɔɔŋ Chɔɔmaŋndoŋ tɛɛsiaa vɛlɛ kɔɔna lepiɛiyo hoo, ndu cho yɛ Babilɔŋ, tɔɔ Bɛndoo ni, maa o cho waŋnda o lekaa o lekaa niŋ huiyo a ‘maŋgala laŋ.’ Maŋgalalaŋ ndaŋ yɛ, walta nyinaa wɔɔŋnda la cho ni. (Sɔɔŋ Chɔɔmaŋndoŋ 18:​23) Nyɛ o nyɛ cho maŋgalaa, piɛileŋ o cho ni. Nduyɛ nyinaa wɔɔŋnda cho sɔɔŋ muŋ kɔɔli ni. Lelaŋ, kɔndɔfili nɔ mbo bii naa le te Baabuiyo dimi pɛ maa “nyinaa wɔɔŋaa suula yɛ yiaa koni a cho niŋ” Babilɔŋ ni. (Sɔɔŋ Chɔɔmaŋndoŋ 18:​2; Ditɔnɔmii 18:​10-12) Kɔɔnaa hoo cho piɛile tonyaleŋ simullo a labɛɛla. O cho vɛlɛ “wanaa suaa le Mɛlɛka wa”, a “wanaa Mɛlɛkaa” nyɛpalaa tuisioo choo. Babilɔŋ, tɔɔ Bɛndoo hoo nɔ bɔɔ yɛletulaaleŋ le piɛile tonyaleŋ. Nyɛ koŋ o cho wanaa cho Chiisu tolɔɔ kɔɔli wa diyɔɔ ni. Lelaŋ, Babilɔŋ, tɔɔ Bɛndoo hoo sim le kɔɔna piɛiyii lachoowɛi hau o chieeŋndo choo kpou. Piɛiyii lachoowɛi hei simul hau Chɛhowa Mɛlɛka ni.