1, 2. Le yɛɛ o bɛnda yɛ le nyunaa lɔɔlɔɔ?

A YIYAŊ niŋ pa mɛɛ chuaambuaa pɔmbuaa nyuuniaa yɛ? Apum kandu dɔɔ pɛ suɛi chaa, a kandu nyuuniaalaŋ. A yeema num pɛ nyunaa, a chal, a nua num o lahɔl tom tom a mɛɛ ŋ cho naa chuaambɔɔ hoo chɔɔ o fotueiyo niŋ yɛ. Okoŋ a kandu num nyunaa aa, Yɛɛ cho yɛ hoo? Nɛɛnɛ toosiaa yɛ Mɛlɛka? Kuɛɛ Mɛlɛka cho yɛ? Ma kindiŋ kpoke le nyunalaŋ ndaŋ mulioo. Kɛ lepum, o ve suɛi kpɛdɛ le. O yɔŋ bɛɛ ma muli nyɛkɛndɛi, ma nyuna num vɛlɛ nyuna cheleŋ.

² O cho ko chuaambuaa le nyuuniaa le. Mɛɛ naŋ hindu fau, lende ko naŋ hiau lachi a nyuuniaa ni. Ŋ tosa hei halikpeŋ miŋ saaluŋ naa naŋ yeema kɔlaŋnda, le miŋ sina kpundɛ cho naa lachi wo, nduyɛ, mɛɛ naŋ kpeeŋaŋ ndu yɛ. Ŋ nyuna vɛlɛ le sinaa suɛi naŋ yeema le sinaa ve. Kɛ waŋnda apum, ma vi ŋdial le nyunaa, taama taama nyunala sɔwɛlaŋ. Nduyɛ ma chalnuŋ le mulilaŋ nuuviaa.

3. Le yɛɛ wanaa bɔɔbɔɔ kɛɛ yɛ mulilaŋ nuuviaa le nyunala sɔwɛlaŋ?

³ Yiyaŋndɔ a nyuna cho o yauwo hoo kɔɔ wo. Yiyaŋndɔ vɛlɛ a nyunala cho o pei 3 a 6 o yauwo hoo  niŋndo. Nyunala sɔwɛlaŋ pila la cho ni. Nduyɛ, o bɛnda ma nyuna laŋ. Kɛ wanaa bɔɔbɔɔ kɛɛ niŋ hau mulilaŋ nuuviaa le nyunalaŋ ndaŋ. Le yɛɛ? Kanifuule, apum kiisaŋ te Baabuiyo nɔ pɛ mulilaŋ. Apum yiyaŋ vɛlɛ maa, mulila Baabuiyo nɔ laŋ la kendu bɔɔ bila biyɔɔ. Mi apum yiyaŋ vɛlɛ maa, o wa bɔɔ suɛi lasiɔmbu le nyunala waa ndoo nyunaa. Apum dimi maa, le simlachiaa o piɛiye niŋ, vɛlɛ a wanaa sinaa yauwa nyunalaŋ ndaŋ la cho ni. Num yɛ?

4, 5. Nyuuniaala sɔwɛla kuɛɛ naa ŋ nɔ yɛ miŋ nyunaŋ o yoomu naa niŋ? Nduyɛ, le yɛɛ o bɛnda yɛ miŋ nuuviaa mulilaŋ?

⁴ O kpeekpei niŋ, a nɔ yeemɛi tau le ma sɔla mulilaŋ o yoomu numndo niŋ le nyunala sɔwɛlaŋ ndaŋ. Lepum, mi kɔndɔfillo bii num dɔɔ ma nyuna aa, ‘Yɛɛ cho yɛ sabu yoomoo? Baa yoomoo hoo kpou ko cho hoo ni? Wana suu maa vɛɛ Mɛlɛka cho yɛ? O bɛnda ma nyuna nyunalaŋ ndaŋ. Nduyɛ, o bɛnda ma lambaŋ mulilaŋ nuuviaa le nyunala sɔwɛlaŋ ndaŋ. Hei mala num ma saaluŋ mulila hini num kɔltaŋ. Mi wana pɛɛkaa bɛndoo Chiisu Kiliti dimi aa, “La nyuna Mɛlɛka diom le nyɛ nya hau ba wo. O nɔla mbo ke nya ndu. Nduyɛ, la nuuwa, la cho sɔla. La kundu dioo, Mɛlɛka nɔla mbo kumbul nya.”—Maatiu 7:​7.

⁵ Te o yɔŋ pɛ ma lambaŋ mulilaŋ “nuuviaa” le nyunala sɔwɛlaŋ lapum, a cho sina maa tɔnɔɔ cho o nuuviaa ŋ cho koŋndo niŋ. (Pulɔwaa 2:​1-5) Mi waŋnda apum dimul num maa a tiuba ma saaluŋ mulilaŋ ndaŋ te. Kɛ o cho tonya le icho le. A tiuba ma saaluŋ ndaŋ o Baabuiyo niŋ. Nduyɛ, mulila ndɔlaŋ la nɛi bila biyɔɔ le. Tɔnɔ bɛndu ŋ sɔla wo cho ni, mi la chuu num nyaaloo vɛlɛ a tiindaŋndo. Nduyɛ, mi la mala num ma nɔ yoomu sɔwɛɔ o teleŋndo hoo niŋ. Tuupa miŋ soo a la cheleŋndaŋ okɔɔ, ŋ yaasiaa wɔ fɛŋ nyuna bii hau waŋnda kɔndɔfillo tau wo.

6. Le yɛɛ wanaa siaama dimi yɛ maa Mɛlɛka buulaŋ a nyɛpalaa cho naa choo wo le?

⁶ Wanaa bɔɔbɔɔ muli maa lende kpeekpei icho ni. Ma dimi aa, ‘Te Mɛlɛka ndoo buulaŋ pɛ le naa, chieeŋndo hoo ve wa naa le.’ Te ŋ mɛɛndaŋ pɛ hau o chieeŋndo niŋ kpede, ŋ tuɛi a chɔulaŋ  okɔɔ, yɛletulaaleŋ, vɛlɛ a kpundɛlaŋ. Nduyɛ naapila bɛɛ, miŋ naa, mi nyɛpalaa komal naa, nduyɛ, mi wanaa naa naŋ kaala wa bɛɛ vi. Le hei wanaa siaama dimi ni aa, ‘Te Mɛlɛka ndoo buulaŋ pɛ lekɛndɛi a naa vɛlɛ a bahawɛila naalaŋ, o wa nyɔɔŋ muŋ kpou kuuna yɔŋnɔŋndo.’

7. (a) Vɛɛ simlachiaa o piɛiye niŋ hau tosa yɛ mi wanaa bɔɔbɔɔ yiyaŋ maa wana kɔl vesɛiyo Mɛlɛka cho ni? (b) Yɛɛ kpeekpei Baabuiyo pɛɛku yɛ a nyɛpalaa komal naa wo okɔɔ?

⁷ I hiou niŋ lewɔu kpou ve cho ni, mi simlachiaa o piɛiye niŋ dimi maa wana kɔl vesɛiyo Mɛlɛka cho ni. Le yɛɛ nda dimi yɛ lende? Kanifuule, te kpundɔɔ del pɛ, a dimi maa hɛnaŋ Mɛlɛka wo ni. Mɛɛ le hei nda bii Mɛlɛka tɔɔyaŋ ni le kpundɛla yɔŋnuŋndaŋ. Baa pɛɛku tonyaa pa cho hoo a Mɛlɛka okɔɔ ni? Baabuiyo dimi aa, ‘Te tɔɔndaŋndo komal num pɛ, dimi naa aa, ‘Mɛlɛka le tɔɔndaŋ ya le.’ Wana tɔɔndaŋ Mɛlɛka a nyɛpalaa le. Nduyɛ, ndu bɛɛ tɔɔndaŋ wana a nyɛpalaa le.’ (Chemisi 1:​13, NW) Lelaŋ, o cho Mɛlɛka le cho puundule dɛnɛwɔɔŋndo o chieeŋndo hoo niŋ kposoŋ te. (Nuawɔ Choobu 34:​10-12.) Tonya icho ni maa, mbo chɛl mi dɛnɛwɔɔŋndo yɔŋnuŋ. Kɛ teŋgeŋndo cho tɛɛŋ le mi waŋndo chɛl mi suɛi yɔŋnuŋ, vɛlɛ a waŋndo tosaa mi suɛi yɔŋnuŋ.

8, 9. (a) Vɛɛ ŋ tuu yɛ teŋgeŋndo tɛɛŋ le chɛlɔɔ mi dɛnɛwɔɔŋndo yɔŋnuŋ, a tosaa mi dɛnɛwɔɔŋndo yɔŋnuŋ? (b) Le yɛɛ i wa yɛ suɛi lakafa le Mɛlɛka tɔɔyaŋndo biyɔɔ le chɛlɔɔ o chɛl mi wanachioo wa dɛnɛwɔɔŋndo tosaa wo?

⁸ Le hei biyɔɔ bila, ŋ tuuwɔ ndi naa. Finya nɔ kaalaa a taasioo wo nɔ po sulaa ndu o ba chiɛɛniŋ. Te o yɔŋ pɛ mi po ndɔ koŋ luɛi nila kalulaŋ, okoŋ mbo kɛɛsiaa le fulaŋndo chiɛɛniŋ, baa finya ndɔ kuuna ndu pa? Te o yɔŋ pɛ mbo fulaŋ mbo kɔ luei balaŋ o sɔɔŋ wɔɔŋndoŋ niŋ, okoŋ mi kpundɔɔ komal ndu, a dimi pa maa finya ndɔ tuisi ndu kpundɛ koŋ choo ni? Sako. (Luku 15:​11-13) Mɛɛ lende ko icho a Mɛlɛka ni. Te waŋndachieeya tosa pɛ chuaŋ chuaa le iwɔɔŋnde tosaa, o kuuna nda le. Te a kɔ luɛi yɛ pɛ o kpundɔɔ niŋ, ŋ dimi naa maa Mɛlɛka le tuisi nda ndu choo le. Lelaŋ, icho suɛi lakafa le Mɛlɛka tɔɔyaŋndo biyɔɔ le kpundɛla cho waŋchieeya choo laŋ.

⁹ Mɛlɛka nɔ sabu kɛndɔɔ le mɛɛ o chɛl mi waŋchieeya wa dɛ nɛwɔɔŋndo tosaa yɛ. Wana taasioo o cho ni, nduyɛ ndu toosiaa nyɛ o nyɛ fee ni. Icho ndu kuee naa maa mɛɛ mbo tɛɛsial naa sabu koŋ te. Kɛ le mɛɛ o nɔ kaalaa le naa yɛ, o chɔm naa sabu koŋ ni. A cho hunɔɔ chɔɔlu sina a saboo hoo okɔɔ o Buŋgɛi 11 niŋ. Kɛ kɛsiŋ o kɔl maa pesiŋ bɛɛ o cho Mɛlɛka le tuisi naa nyɛpalaa choo le. Le chɔmndo maa o cho ndu le, o ke naa tiindaŋndo maa o cho hunɔɔ kpundɛlaŋ ndaŋ faŋa.—Aisaya 33:​2.

10. Le yɛɛ naŋ tiindaŋ yɛ Mɛlɛka maa o cho hunɔɔ dɛnɛwɔɔŋndo kpou faŋa?

¹⁰ Le chɔɔloo sinaa, Mɛlɛka wana diandaa o cho ni. (Aisaya 6:​3, NW) Hoo sim ni maa o nɔ sɔŋ te. O choŋnuŋ walaŋ. Mɛɛ mɛɛ ŋ yaasiaa a ndu okɔɔ, a seeluŋ dɛnɛwɔɔŋ ndu o ŋdial te. Lelaŋ, ŋ nɔ miŋ tiindaŋ ndu a kɔllo kpou. Ŋ dou tiindaŋ waa naa o waŋndachieeya niŋ te. Kanifuule, teleŋndaŋ lapum ma luei balaŋ o kafalaŋ niŋ. O yɔŋ bɛɛ aa waŋndo cho sakpo, nduyɛ mbo nɔ kpaayaa o sul chieeŋndo hoo niŋ, o nɔla mbo faŋa dɛnɛwɔɔŋndo le, kɛlɛŋgaa niŋ te, mbo miŋgi nyɛ wanaa dɛnɛwɔɔŋnda tɛɛmbuu wo toosiaa. Kɛ Mɛlɛka ndu wana nɔ kpaayaa kpou wo o cho ni. O tiuba, nduyɛ, o nɔ le hunɔɔ dɛnɛwɔɔŋ cho hau waŋndachieeya choo wo faŋaa. Te Mɛlɛka huŋ faŋa pɛ dɛnɛwɔɔŋndo, fɛɛŋ fɛɛŋ bɛɛ o yɔŋnuŋ lɛ le.—Nuawɔ Sam 37:​9-11.

11. (a) Vɛɛ Mɛlɛka yiyaŋ yɛ a kafala cho hau o chieeŋndo choo laŋ? (b) Vɛɛ Mɛlɛka yiyaŋ yɛ a nyɛpalaa cho num choo wo?

¹¹ Le suŋsuŋ ndɔ, yɛɛ cho yɛ yiyaŋ Mɛlɛkaa a nyɛ cho yɔŋnɔŋndo o chieeŋndo niŋndo? Yɛɛ cho yɛ vɛlɛ yiyaŋndɔɔ a nyɛ cho yɔŋnɔŋndo o yoomu numndo niŋndo? Nyɛ tasoo cho ni, Baabuiyo dimi maa Mɛlɛka “kaala sakpoyɛi.” (Sam 37:​28) Lelaŋ, o buulaŋ tau a nyɛ cho hau yɔŋnɔŋndo wo. O kɛndɛ ni, o wɔɔŋ ni. O tul kafalaŋ kpou leyɛ. Baabuiyo dimi maa mɛɛ Mɛlɛka che dɛnɛwɔɔŋ wa yɔŋnɔŋndo sindɛ o chieeŋndo choo wo, “mi i tɛɛmbuu ndu kɔl tau bɛndu.” (Chɛnɛsee 6:​5, 6) Mɛlɛka siŋgaŋ te. (Malakai 3:​6) Suŋsuŋ bɛɛ, o tul dɛnɛwɔɔŋ cho yɔŋnɔŋndo o chieeŋndo niŋndo leyɛ. Baabuiyo dimi maa, Mɛlɛka buulaŋ le num.—Nuawɔ Pitɛ Tasoo 5:​7.

12, 13. (a) Le yɛɛ naŋ nɔ yɛ suiliŋnda kɛndɛlaŋ mɛɛ kaalaa cho naa yɛ? Nduyɛ, vɛɛ nyɛ cho yɔŋnɔŋndo o chieeŋndo niŋndo piiliaŋ yɛ naa le kaala naŋ nɔ hoo wo? (b) Le yɛɛ ŋ nɔ yɛ tiindaŋndo kpeekpei maa Mɛlɛka cho hunɔɔ isɔɔ tosa le bahawɛila cho hau o chieeŋndo choo laŋ?

 ¹² Le yɛɛ naŋ dimi yɛ maa Mɛlɛka tul nyɛpalaa leyɛ? Tofawɔ saboo opilɛ. Baabuiyo dimul naa maa o velaŋ ndɔɔ niŋ o toosiaa wanachioo ni. (Chɛnɛsee 1:​26) Le sabu koŋ naŋ nɔ suiliŋnda kɛndɛlaŋ ni. Koŋ chɔm ni maa Mɛlɛka bɛɛ nɔ suiliŋnda kɛndɛlaŋ. Le tamaseliiyo, te o yɔŋ pɛ ma che waŋndachieeya o nyɛpalaa niŋ, mi nyɛiye bii num pa? Te nyɛiye bii num pɛ, ɔɔ niŋ Mɛlɛka? Kɛsiŋ o kɔl maa, nyɛiye bii Mɛlɛka le nda tau mbo hiau bɛɛ mɛɛ i bii num yɛ.

¹³ Nyɔɔ pilɛ cho a naa waŋndachieeya ni, ŋ nɔ bɔɔ kaalaa le chaaŋ naa wanachioo. Lende ko Mɛlɛka bɛɛ cho ni. Nyɛ koŋ Baabuiyo dimul naa ni maa Mɛlɛka wana kaala wo o cho ni. (Chɔŋ Tasoo 4:​8) Le mɛɛ Mɛlɛka nɔ kaalaa yɛ naa bɛɛ ŋ nɔ kaalaa ni. Te o yɔŋ pɛ ma nɔ kaalaa, vɛ, o nyindu num le ma faŋa nyɛpalaa a kafala cho hau o chieeŋndo choo laŋ te? Te o yɔŋ pɛ ma nɔ kpaayaa le keŋ tosaa, vɛ, a tosa ndi le? A tonya kɛsɛ, ma tosa. Nyɛ koŋ ŋ nɔ ni ma kɛsiŋ hei o kɔl maa, Mɛlɛka cho hunɔɔ nyɛpalaa a dɛnɛwɔɔŋndo faŋa. Lelaŋ, mɛila Mɛlɛkala cho o pei 4 a 5 o yauwo hoo niŋndo cho lachoo le. Nduyɛ, o cho vɛlɛ lɔmasɔlaa le. La nɔ le hunɔɔ yɔŋnɔŋndo. Mɛila Mɛlakalaŋ kpou la nɔ le peelɔŋndo. Le ma dɔu laalaŋndo o mɛilaŋ ndaŋ niŋ, a nɔ fɛŋ ma chɔɔlu sina a Mɛlɛka mɛi laŋndo okɔɔ.

14. Ɔɔ diola Mɛlɛkalaŋ, nduyɛ le yɛɛ naŋ nɔ yɛ miŋ soliŋ ndaŋ kpeku?

¹⁴ Te a yeema pɛ mi waŋndo sina num,  yɛɛ fɛŋ ŋ nɔ yɛ ma tosa? O cho diola numndaŋ fɛŋ te ŋ nɔ ma chɔm ndu le? Naa kpede ŋ nɔ diolaŋ. Mɛlɛka yɛ, o nɔ pa diolaŋ? Wanaa bɔɔbɔɔ o piɛiyii cheleŋnde niŋ dimi maa diola ndɔlaŋ la cho “Mɛlɛka” ni, ɔɔ “Masanɔɔ”. Kɛ kɛsiŋ o kɔl maa o cho ladio le la cho laŋ te. Veeloo hoo Mɛlɛka, ɔɔ Masanɔɔ, cho ko mɛɛ nda veelu naa waŋndo aa masaa yɛ. Mi che bɛɛ naa diomndaŋ ndaŋ, Mɛlɛka ɔɔ Masanɔɔ la cho o Baabuiyo niŋ, kɛ o cho ladio le la cho le. O fula o Mɛlɛka ɔɔ Masanɔɔ kɔɔli, Baabuiyo dimi maa Mɛlɛka nɔ nɛila nda veelu ndu laŋ tau. Ɔɔ niko diola kpeekpeila Mɛlɛkalaŋ? Diola ndɔla kpeekpeilaŋ lacho Chɛhowa ni. Mi Baabuiyo dimi aa, “Tosa ma sina maa num pilɛ kpe cho Mɛlɛka Yaawɛɛ ni, maa num cho Mɛlɛka hiou kpou wo ni.” (Sam 83:​18) Te Baabui numndo nɔ diolaŋ ndaŋ leniŋ te, nduyɛ ma yeema  le sabu koŋ sinaa, tofa Yooŋgula Chɔɔlaalaŋ o pei 195 tei 197 o yauwo hoo niŋ. O kpeekpei niŋ, mɛɛ yaula Baabuiyo la wa sindɛ poonyiaŋndo, diolaŋ ndaŋ la wa la poonyiaŋ leniŋ o waalaŋ niŋ. Lelaŋ, Chɛhowa yeema num ma sina diola ndɔlaŋ, nduyɛ, ma soliŋ ndaŋ kpeku. Baabuiyo o soliŋ kpeku ni le naa chɔmndo wana suu o cho wo.

15. Diolaŋ ndaŋ Chɛhowa, yɛɛ la sim yɛ?

¹⁵ Mɛlɛka pila keŋnuŋ diolaŋ ndaŋ ni. Nduyɛ diolaŋ ndaŋ la sim le nyɛm bɔɔbɔɔ. Diola ndɔlaŋ ndaŋ Chɛhowa, la sim ni maa, nyɛ o nyɛ o dimi pɛ, yɔŋnɔŋndo o yɔŋnuŋ ni. * Nduyɛ, nyɛ o nyɛ o kɛɛsiaa pɛ o kɔl le tosaa, mɛɛ mbo tosa ndu. Diola ndɔlaŋ la nɔ  velaŋ te. Ndupilɛ kpe nɔ laŋ ni. Nduyɛ vɛlɛ, o choŋnuŋ teŋgeŋ o nɛila bɔɔbɔɔ niŋ. Vɛɛ hei cho yɛ tonya?

16, 17. Yɛɛ naŋ pɛɛku yɛ a Chɛhowa okɔɔ o nɛila yɛ yɛlaŋ ndaŋ niŋ: (a) ‘Mɛlɛka kpaaya kpou wo’? (b) “Masaa le fɛɛŋ a fɛɛŋ”? (c) Mɛlɛka ‘toosiaa nyɔɔŋ kpou’ wo?

¹⁶ Mi Baabuiyo dimi aa, “Num pilɛ kpe cho Mɛlɛka . . . hiou kpou wo ni.” (Sam 83:​18) Le sabu koŋ naŋ dimi ni maa Chɛhowa ndupilɛ kpe cho ‘Mɛlɛka kpaaya kpou wo ni.’ Sɔɔŋ Chɔɔmaŋndoŋ 15:​3 dimi aa, “Masanɔɔ Mɛlɛka, num nɔ kpaayaa kpou ni. Walta ŋ tosalaŋ la cho walta bɛndu, nduyɛ la cho walta kɔndɔfili. Num cho masaa [ni].” A cho wa le fɛɛŋ a fɛɛŋ. Veeloo hoo ‘Mɛlɛka kpaaya kpou wo’ cho naa pɛɛkoo maa Chɛhowa kinɛi nɔ kpaayaa le chieeŋndo kpede ni. Kpaaya ndɔɔ nɔ sulaŋ te. Nduyɛ veeloo hoo “Masaa le fɛɛŋ a fɛɛŋ” cho naa vɛlɛ chɔmndo maa o nɔ kandɔŋ te, nduyɛ o nɔ lamɛɛlu le. Baabuiyo dimi o Sam 90:​2 niŋ aa, “Le fɛɛŋ a fɛɛŋ, Mɛlɛka ŋ cho ni.” Diomnda kɔndɔfiltaŋ pila la cho ni, lende le?

¹⁷ Chɛhowa ndupilɛ kpe cho vɛlɛ wana toosiaa ni. Sɔɔŋ Chɔɔmaŋndoŋ 4:​11 dimul naa aa, “Num cho Masa naa ni. Nduyɛ num cho Mɛlɛka naa ni. Num toosiaa nyɔɔŋ kpou ni, nduyɛ o hɛnaŋ numndo niŋ ŋ toosiaŋ mi ŋ wa kpou ni. Lelaŋ a bɛnda ma sɔla lisaa, a bɛɛleŋ, a balikaa le mɛɛ ŋ cho wana kpaaya yɛ.” Nyɛ o nyɛ ŋ yiyaŋ pɛ a ndu okɔɔ, Chɛhowa toosiaa ni. Chɔŋ a nyaa yoomaa naŋ chi le wa, a cho o inyinaya o choo choo niŋnda, looŋ naŋ cha ichɔlloŋ, mbo huŋ bii a yɔmii kuamɛi, vɛlɛ a suwaa cho o peelaŋ niŋnda kpou, ndu toosiaa ni.

18. Le yɛɛ waŋnda apum yiyaŋ yɛ maa fɛɛŋ fɛɛŋ bɛɛ a tiuba ma sɔɔŋguu Mɛlɛka ikɛi kpɛɛluŋ te? Kɛ yɛɛ Baabuiyo ndu pɛɛku yɛ?

¹⁸ Te waŋnda yiyaŋ pɛ a suiliŋnda kaamaala Chɛhowalaŋ ndaŋ okɔɔ, mi siooŋnde kuɛ le nda biyɔɔ. Ma yiyaŋ maa Mɛlɛka cho bɔɔ filioŋ a nda. Maa fɛɛŋ fɛɛŋ bɛɛ a tiuba ma sɔɔŋguu ndu ikɛi le. Nduyɛ, maa a bɛnda pɛŋ Mɛlɛka o hɔl te. Kɛ baa yiyaŋ kɛndɔɔ pa cho koŋ ni? Sako. O cho lende le Baabuiyo pɛɛku naa le. Mi Baabuiyo dimul naa a Chɛhowa okɔɔ aa, “Kɛ nduyɛ, Mɛlɛka cho levil a wana o wana le.” (Walta Wanaa Chiisuaa 17:​27)  Baabuiyo dɛɛniaa naa aa, “La sɔɔŋguu Mɛlɛka ikɛi. Ndu bɛɛ o cho nya sɔɔŋguu ikɛi.”—Chemisi 4:​8.

19. (a) Vɛɛ naŋ kandu yɛ Mɛlɛka naŋnɔŋndo ikɛi kpɛɛluŋ? Nduyɛ, tɔnɔ yɛɛ o chuu yɛ naa? (b) Suiliŋnda Mɛlɛkala kuɛɛ ŋ hɛnaŋ yɛ tau?

¹⁹ Vɛɛ ŋ looku yɛ Mɛlɛka sɔɔŋguu ikɛi? Nyɛ tasoo cho ni, hiou lachi a tosaa nyɛ ŋ cho hoo tosaa wo. Ndu cho ni, pɛɛkoo a Mɛlɛka okɔɔ. Mi Chiisu dimi aa, “Yoomu kpeekpeiyo hoo ndu cho yɛ ni, waŋndo sinaa maa num pilɛ kpe cho Mɛlɛka ni, nduyɛ, mbo sina vɛlɛ Chiisu Kiliti, wana ŋ vem ndo.” (Chɔŋ 17:​3) Tonya kpeekpei icho ni. Baabuiyo dimi maa te ŋ pɛɛku pɛ a Chɛhowa okɔɔ vɛlɛ a Chiisu Kiliti, ŋ sɔla “Yoomu kpeekpeiyo.” A mɛɛ naŋ laŋga pɛɛku amaluaŋ yɛ, wana kaala wo Mɛlɛka cho ni. (Chɔŋ Tasoo 4:​16) Chɛhowa nɔ vɛlɛ suiliŋnda kɛndɛla cheleŋ tau. Le tamaseliiyo, Baabuiyo dimul naa a Chɛhowa okɔɔ maa, Mɛlɛka inyɛiyo o cho ni, nduyɛ, o nɔ vɛlɛ kɛndɛi. O yala tumbe dɔunɔŋ te. O nɔ kɛndɛi kaalɛi ihɔbɛi vɛlɛ a tonyaa. (Ɛsɔdɔɔ 34:​6) Mbo mal waŋnda le “yɔŋnda ndala wɔɔŋndaŋ.” (Hibuluiya 8:​12) Wana biuwaŋndo Mɛlɛka cho ni. (Pitɛ Diiŋ Ndɔɔ 3:​9) O feŋaŋ wanaa nduaa kɔɔli le. (Sɔɔŋ Chɔɔmaŋndoŋ 15:​4) Mɛɛ ŋ nua o Baabuiyo niŋ fau, lende ko ŋ kua a sinaa ni maa lekɛndɛi Mɛlɛka nɔ suiliŋndaŋ ndaŋ, vɛlɛ a la kɛndɛla cheleŋ tau.

20-22. (a) Mi che bɛɛ ŋ chi Mɛlɛka le, kɛ hei kuuna naa pa le ndu sɔɔŋguu wo ikɛi? Tɛɛsiaa wɔ. (b) Yɛɛ wanaa numaa lasiɔmbuaa apum kindiŋ yɛ le num kuunaa tosaa? Kɛ yɛɛ ŋ nɔ yɛ ma tosa?

²⁰ Tonya icho ni. A tiuba ma che Mɛlɛka le, kanifuule, o Inyinaya o cho ni. (Chɔŋ 1:​18; 4:​24; Timoti Tasoo 1:​17) Te o yɔŋ pɛ ma wa pɛɛkoo a ndu okɔɔ o Baabuiyo niŋ, a cho sina wana suu o cho wo nyɛkɛndɛi. Mi wana ŋchondoo dimi aa, “A tiuba ma “wa naŋɔɔ ndɔ kɔndɔfillo chɔɔ.” (Sam 27:​4; Luomaŋnda 1:​20) Mɛɛ ŋ pɛɛku a Chɛhowa okɔɔ fau, lende ko ŋ cha ndu ni maa wana kpeekpeiyo o cho ni. Lende ko ŋ chɔɔlu ndu kaala ni, nduyɛ, ma sinaŋ maa, a cho ndu ikɛi kpɛɛluŋ.

²¹ A cho kandɔɔ sinaa o pɔmpɔmbɔ le sabu Baabuiyo dimi maa Chɛhowa cho Finya naa ni wo. (Maatiu 6:​9) O cho ko le sinaa maa ndu le ke naa yoomoo le, kɛ maa o yeema nyɛ cho o kɛndɛ le naa wo. O cho ko mɛɛ finya kaalaa yeema naa nyɛ cho o kɛndɛ le chuauwaa nduaa wo yɛ. (Walta Wanaa Chiisuaa 17:​28)  Baabuiyo pɛɛku naa vɛlɛ maa wanachioo simnuŋ chaaŋ o Chɛhowa. (Chemisi 2:​23) Numpila yiyaŋndɔ a keŋ. A simnuŋ chaaŋ o wana toosiaa nyɛ o nyɛ fee wo.

²² Te a wa pɛ hiouwɔɔ lachi a Baabuiyo pɛɛkoo, mi wanaa numaa lasiɔmbuaa apum kindiŋ le num kuunaa hei tosaa. Buulaŋ ndaa cho ni maa, a cho laalaŋnda numndaŋ siŋga. Kɛ chɛl mi wana o wana kuuna num chaŋyɛi tosaa nya Mɛlɛka le.

23, 24. (a) Le yɛɛ o bɛnda yɛ ma lambaŋ nyunaa a nyɛ ŋ cho pɛɛkoo wo okɔɔ? (b) A yɛɛ okɔɔ naŋ cho yɛ hunɔɔ pɛɛku o buŋgɛi diiŋnduɛi niŋ?

²³ Icho tonya maa te a kandu pɛ pɛɛkoo, o cho sɔɔŋ fau le ŋ bii bila le. Le ma sɔla malaa, mɛɛ ma nɔ kaa tuisiaŋndo, nduyɛ ma nyuna. Yɔŋ lasiɔmbu ma kɛɛ nyuna le. Mi Chiisu dimi maa o naŋ bɔɔ miŋ tuisiŋ maa chuaambuaa pɔmbɔ. (Maatiu 18:​2-4) A mɛɛ naŋ sina yɛ, nyunaa pila chuaambuaa nyuna ni. Mɛlɛka yeema num ma saaluŋ mulilaŋ. Mi Baabuiyo chandu wanaa ndaa chɔm yeemɛi le pɛɛkoo a Mɛlɛka okɔɔ wa. Ma yaasiaa o Baabuiyo niŋ nyɛkɛndɛi le sinaa te tonya nyɛ nda wa pɛɛkoo wo cho ni.—Nuawɔ Walta Wanaa Chiisuaa 17:​11.

²⁴ Nɛi sɔwɛ bɛndu naŋ pɛɛku a Mɛlɛka okɔɔ wo cho ni, nuaa o Baabuiyo niŋ. O choŋnuŋ teŋgeŋ a yaula cheleŋndaŋ. O nɛi kuɛɛ choo? Buŋgɛi cho lachi ve cho naa chɔm.