1. Le yɛɛnɛ wana bɛndu pum o lɛŋnde Itoopiaa leŋ niŋ ndoo yeema yɛ yiŋɔɔ?

“TOFAŊ mɛŋndaŋ. Yɛɛnɛ kuuna yɛ ya yiŋɔɔ sɔlaa?” Wana bɛndu pum o lɛŋnde Itoopiaa leŋ niŋ nyuna nyunaa hoo ni o wɔsiŋ kɛmɛ tasoŋ niŋ. Po Kilisiɔŋnɔɔ pum diolaŋ aa Filipi  ndoo tɛɛsial ndu nyɛ dimiŋ a Chiisu okɔɔ wo ni. Mɛɛ nyɛ nda tɛɛsial ndu wo pilaŋ ndu kɔllo, mbo duau ndu o wali niŋ chɔ chɔ. Okoŋ mbo yeema le yiŋɔɔ.—Walta Wanaa Chiisuaa 8:​26-36.

2. Le yɛɛnɛ ŋ nɔ yɛ ma wa yiyaŋndo kpeekpei a yiŋɔɔ okɔɔ?

² Te o yɔŋ pɛ aa pɛɛku niŋ buŋgaŋ tasoŋ pekeke o yauwo hoo niŋ nyɛkɛndɛi a Seiyaa Chɛhowaa opilɛ, mɛɛ num bɛɛ yeemɛi cho num biyɔɔ ma nyuna aa, ‘Yɛɛnɛ kuuna yɛ ya yiŋɔɔ?’ A pɛɛku niŋ paandu, nduyɛ ma sina nyɛ Baabuiyo dimi a yoomu fafɛɛŋndo okɔɔ o kpele hɛnɛkiɔɔ niŋ o lɛŋndeŋ choo wo. (Luku 23:​43, NW; Sɔɔŋ Chɔɔmaŋndoŋ 21:​3, 4) A pɛɛku niŋ vɛlɛ a wanaa vi niŋnda okɔɔ, vɛlɛ a tiindaŋ fulasɛiniŋndo. (Ikilisiaatii 9:​5; Chɔŋ 5:​28, 29) Kɛlɛŋgaa a kandu niŋ chuuŋgiaŋndo paandu a Seiyaa Chɛhowaa o bɔŋaŋnda ndalaŋ. Numpila che niŋ kpendekele maa nda cho o piɛile tonyaleŋ niŋ ni. (Chɔŋ 13:​35) Kɛ nyɛ hiou kpou wo cho ni, chaŋyɛi ŋ kandu kilaa nya Chɛhowa Mɛlɛka tɛɛŋnde.

3. (a) Yɛɛnɛ Chiisu ndoo dimullɛ buɛiyaa nduaa le tosaa? (b) Vɛɛ Kilisiɔŋnda nɔ yɛ ma yiŋ waŋndo?

³ Vɛɛ ŋ looku yɛ chɔm maa a yeema ma piɛi Mɛlɛka? Mi Chiisu dimul buɛiyaa nduaa aa, “La kɔ o ŋwaŋnda chiee lo . . . mi la siiŋguu nda buɛiyaa ni, mi la yiŋ nda.” (Maatiu 28:​19, 20) Mi Chiisu pila kɛsul naa tamaseliiyo. Mbo yiŋ o mɛŋndaŋ niŋ. O cho mamɛŋ te nda vesul ndu choo le, kɛlɛŋgaa niŋ te, ma tala ndu maŋ o lebol. (Maatiu 3:​16) Diomndo hoo “yiŋɔɔ” o diom maKilikiiyo niŋ nda soli ndu ni. Ndu sim ni, “mɛɛyaa o mɛŋndaŋ bɛŋgu.” Hoo cho naa dimullo maa te a wa Kilisiɔŋnɔɔ yiŋɔɔ pɛ, a nɔ ma mɛɛya ndu o mɛŋndaŋ bɛŋgu, okoŋ ma soli ndu vɛlɛ.

4. Yɛɛ yiŋɔɔ o mɛŋndaŋ niŋ chɔm yɛ?

⁴ Wana o wana yeema pɛ mbo wa o chaŋyɛi niŋ a Chɛhowa Mɛlɛka, mɛɛ icho ndu kuee le mbo sɔla yiŋɔɔ o mɛŋndaŋ niŋ. Yiŋɔɔ ŋ cho koŋ ndo cho waŋnda chɔm ni kpendekele maa a yeema ma piɛi Mɛlɛka. Ndu cho chɔm ni maa a cho a kɔl kɛndɛ le hɛnaŋ Chɛhowaa tosaa. (Sam 40:​7, 8) Kɛ tuupa ma suiliŋ le yiŋɔɔ, a nɔ fɛŋ ma tosa sɔɔŋ pum.

5. (a) Lɔɔpa ma suiliŋ le yiŋɔɔ, suɛi tase kuɛɛ fɛŋ ŋ nɔ yɛ ma tosa? (b) Le yɛɛ kɔlaŋ o bɔŋaŋnda naala leKilisiɔŋndaŋ cho yɛ suɛi sɔvɛ?

⁵ A kandu niŋ suɛi tasei tosaa. Ndi cho ni, a nɔ ma sina a Chɛhowa Mɛlɛka okɔɔ vɛlɛ a Chiisu Kiliti. Baabuiyo pɛɛkoo nyɛkɛndɛi mala num ni ma tosa hei. (Nuawɔ Chɔŋ 17:​3.) Kɛ nyɛm cheleŋ cho tau le sinaa. Kilisiɔŋnda nɔ ma “sɔla kɔl kaloo a sina pɛŋgoo o nyina Mɛlɛkaa ke waŋnda wo.” (Kolosiaŋnda 1:​9) Nyɛ cheleŋ cho vɛlɛ o mala num tau wo. Ndu cho ni, kɔlaŋ o bɔŋaŋnda Seiyaa Chɛhowaa. Icho bɔɔ suɛi sɔwɛ le kɔlaŋ o bɔŋaŋndaŋ ndaŋ. (Hibuluiya 10:​24, 25) Kɔlaŋ o bɔŋaŋndaŋ lɔɔlɔɔ mala num ma hiou lachi a Chɛhowa sinaa.

6. Vɛɛ kpɛ ŋ nɔ yɛ ma pɛɛku Baabuiyo tuupa ma suiliŋ le yiŋɔɔ?

⁶ Hei chɔm naa maa mɛɛ ma sina fɛŋ nyɛ o nyɛ cho o Baabuiyo niŋ malaŋ ŋ yiŋ te. Wana bɛndu koŋ o lɛŋnde Itoopiaa leŋ niŋ bɛɛ ndoo nɔ kɔlkaloo nyɛpɔmbɔ. Kɛ, ndoo yeema malaa le mbo chɔɔlu sɔɔŋ pum o Baabuiyo niŋ biyɔɔ bila. (Walta Wanaa Chiisuaa 8:​30, 31) Lende koni icho a num ni. A nɔ ma chɔɔlu pɛɛku. Kɛ nyɔɔ pilɛ cho ni, a nɔ pɛŋ ma saŋga a pɛɛkoo a Mɛlɛka okɔɔ le. (Ikilisiaatii 3:​11) Lɔɔpa ma sɔla yiŋɔɔ, a nɔ fɛŋ ma sina, nduyɛ, ma chɛl sɔɔŋ taseŋ cho o Baabuiyo niŋ a Mɛlɛka okɔɔ woŋ ŋpum. (Hibuluiya 5:​12) Sɔɔŋ muŋ ŋpum cho ni, tonya cho o Baabuiyo niŋ a waŋvilɛiya okɔɔ wo, tɔɔmayɛi diola Mɛlɛka laŋ, vɛlɛ a Masale ndɔleŋ.

7. O nɛi kuɛɛ choo pɛɛku Baabuiyo piiliaŋ yɛ num?

⁷ Kɛ sinalapɛŋgoo sɔlaa kinɛi a Mɛlɛka okɔɔ cho letuu le. Le yɛɛ? Kanifuule, “le wana o wana ma nɔla ma nɛŋi Mɛlɛka kɔl mɛɛ ma nɔ tiindaŋndo o ndu niŋ.” (Hibuluiya 11:​6) Baabuiyo dimul naa maa, mɛɛ waŋnda apum sindɛ o lɛŋnde Kɔɔliŋ ndeŋ niŋ tuei yooŋgu kɛndɛ buɛiyaa Chiisuaa dimul nda wo, ma laalaŋ, okoŋ, ma sɔla yiŋɔɔ. (Walta Wanaa Chiisuaa 18:​8) Mɛɛ lende koni icho ni a pɛɛku Baabuiyo. Te o yɔŋ pɛ ma pɛɛku Baabuiyo, mɛɛ nyɛ ŋ pɛɛku koŋndo cho tosa ma chɔɔlu laalaŋndo dɔuwɔɔ o Diom Mɛlɛkaa niŋ. Pɛɛku Baabuiyo cho num mala ma nɔ laalaŋndo o mɛila Mɛlɛka laŋ niŋ, nduyɛ  ma che mɛɛ sala soliaŋ Chiisoo nɔ kpaayaa le waŋnda piŋioo yɛ.—Chɔɔsuaa 23:​14; Walta Wanaa Chiisuaa 4:​12; Timoti Diiŋ Ndɔɔ 3:​16, 17.

8. Yɛɛ cho yɛ num nyindɔɔ le ma dimul acheleŋnda nyɛ ŋ pɛɛku wo?

⁸ Mɛɛ laalaŋ numndo hiau lachi fau a hindɔɔ num o kɔl, lende koni ŋ cha ndi ikala kpoke le nyɛ ŋ pɛɛku wo kɛsiŋndo o kɔl ni. (Chɛluimaya 20:​9) Yeemɛi kalɛi keŋ num o kɔl cho num nyindɔɔ ni le ma dimul acheleŋnda nyɛ ŋ pɛɛku a Mɛlɛka okɔɔ wo vɛlɛ a mɛila ndɔlaŋ.—Nuawɔ Kɔliŋtiaŋ Diiŋ Ndɔɔ 4:​13.

9, 10. (a) O nɛɛ yaa lo ŋ kandu yɛ nyɛ ŋ pɛɛku o Baabuiyo niŋndo dimioo? (b) Te a yeema pɛ le mi num bɛɛ wa yooŋgu kɛndɔɔ dimioo a Seiyaa Chɛhowaa latulu, yɛɛ ŋ nɔ yɛ ma tosa?

⁹ Le hei tosaa, a kandu suɛi o chaaŋaa numnda lo, wanayaŋ numndoŋ, wanaa nya chiɛɛliaŋnda, vɛlɛ a wanaa nya tosa wallo diompilɛ wa. Kɛ a nɔ ma soo o ndalo a lebɛɛ. Te boondii biŋgi hiou pɛ, yeemɛi cho num biyɔɔ le waa kɔlaŋ yooŋgu kɛndɔɔ dimioo nya Seiyaa Chɛhowaa latulu. O hei niŋ, a dimul wana cho num Baabuiyo pɛɛkoo wo. Wana cho num pɛɛkoo wo cho wanaa chua chilaŋ o kundaa niŋnda dimul. O hei niŋ, a cho kɛɛsiaa le mi wanaa chua chilaŋnda a ŋiɔɔŋ chal a num. Nduyɛ, mi wana cho num pɛɛkoo wo bɛɛ wa ikɛi. O challe hei nda cho sina ni te a suiliŋ le kandɔɔ kɔlaŋ o wali pollo niŋ.

¹⁰ Hei cho num mala ma sina wanaa chua chilaŋ o kundaa niŋnda apum. Wanaa chua haa chilaŋ o kundaa niŋnda cho kunda wanaa laalaŋnda mandaa ni. (Walta Wanaa Chiisuaa 20:​28; Pitɛ Tasoo 5:​2, 3) Te wanaa chua haa chilaŋ o kundaa niŋnda sina yɛ pɛ maa a bii sɔɔŋ taseŋ cho o Baabuiyo niŋ a Mɛlɛka okɔɔ woŋ ŋpum bila, ma wa sawala Mɛlɛkalaŋ dɔuwɔɔ o wali niŋ, nduyɛ maa a yeema ma simnuŋ Sei Chɛhowaa opilɛ, a cho num dimul maa, a suiliŋ le waa yooŋgu kɛndɔɔ dimioo. O hei niŋ, a cho simnɔŋ wana dimiaa yooŋgu kɛndɔɔ o yiŋ ndɔ loo.

11. Siŋgaŋnda kuɛɛ waŋndo nɔ yɛ mbo tosa tuupa mbo suiliŋ le kandɔɔ kɔlaŋ o wali pollo niŋ?

¹¹  Kɛ nyɛ cheleŋ cho vɛlɛ o hoo kɔɔli. Te a yeema pɛ ma kandu kɔlaŋ o wali pollo niŋ, a nɔ vɛlɛ ma tosa siŋgaŋndaŋ lapum o yoomu numndo niŋ, vɛlɛ a kaalaŋ lapum. A nɔ ma mal sɔɔŋ num oo tosa paandu sɔɔ sɔɔ woŋ. Kɛlɛŋgaa pɛŋ tuupa ma yeema le simnɔŋndo wana dimiaa yooŋgu kɛndɛ yiŋ ndɔ loo, a nɔ fɛŋ ma mal sɔɔŋ wɔɔŋndoŋ tosaa. Ŋpum cho yɛ muŋ ni. Kaa ihini nɔɔlɛiyo tosaa, muɛiyaŋ kolɔɔ bɛndoo, vɛlɛ a koowaŋ chuaa o nɛi bɛnda le wo choo.—Nuawɔ Kɔliŋtiaŋ Tasoo 6:​9, 10; Kaleesiaŋnda 5:​19-21.

12. Le yɛɛ o bɛnda yɛ miŋ mal yɔŋ wɔɔŋndo?

¹² Sɔɔŋ cheleŋ cho le tosaa tuupa ma suiliŋ le yiŋɔɔ. Mi kiilanɔ Pitɛ dimi aa, “La mal yɔŋnda nyala wɔɔŋndaŋ, mi la muliŋ naa Mɛlɛka chua, le mi Mɛlɛka faŋa yɔŋnda nyala wɔɔŋndaŋ nya kɔɔli.” (Walta Wanaa Chiisuaa 3:​19) Yɔŋ wɔɔŋndo malɔɔ sim ni maa mɔnɛi biyɔɔ le suɛi wɔɔŋii num oo tosa paandu ve. Te waŋndo wa pɛ paandu o kaa nɔɔlɛiyo niŋ, mɛɛ o bɛnda mbo mulul kaa wɔɔŋ koŋ kɔɔ. Kɛ o yɔŋ bɛɛ pɛŋ aa wana koŋ ve paandu o kaa nɔɔlɛi niŋ te, o bɛnda mbo mulul yɔɔŋ wɔɔŋndo kɔɔ. Le yɛɛ? Kanifuule, wanaa lahakiaa naa kpou cho ni. Nduyɛ, ŋ yeema mi Mɛlɛka mal naa haki le yɔŋnda naala wɔɔŋndaŋ. (Luomaŋnda 3:​23; 5:​12) Tuupa ma kandu Baabuiyo pɛɛkoo, num oo sina wɔ nyɛ cho hɛnaŋ Mɛlɛkaa le. Le hei, vɛɛ ŋ looku yɛ sina te a cho pɛ hɛnaŋ ndɔɔ tosaa? Le saboo hoo o bɛnda ni miŋ mal yɔŋ wɔɔŋndo.

13. Yɛɛnɛ cho yɛ muliŋndo?

¹³ A mal pɛ yɔŋ wɔɔŋndo, a nɔ ma muliŋ. Koŋ cho ni, yɔŋ wɔɔŋ koŋ kɔɔ mulullo. O cho ko mɔnɛi biyɔɔ le suɛi wɔɔŋii num oo tosa ve le. Kɛ, a nɔ vɛlɛ ma tosa nyɛ cheleŋ. A nɔ ma mal kaa wɔɔŋ ŋ wa paandu leniŋndo waŋ waŋ, okoŋ ma yiinuŋ yauleŋ le o kɛndɔɔ tosaa teleŋ o teleŋ. Tuupa ma suiliŋ le yiŋɔɔ sɔlaa, a nɔ fɛŋ ma mal yɔŋ wɔɔŋndo nduyɛ, ma mulul ndu kɔɔ.

14. Suɛi sɔwɛ kuɛɛ fɛŋ ŋ nɔ yɛ ma tosa tuupa ma sɔla yiŋɔɔ?

¹⁴ Suɛi sɔwɛ cheleŋ cho le tosaa tuupa ma sɔla yiŋɔɔ. A nɔ fɛŋ ma yɔŋguŋ numpila o Chɛhowa Mɛlɛka lo.

15, 16. Yɛɛ yɔŋgɔŋndo o Mɛlɛka lo sim yɛ? Nduyɛ, yɛɛ nyindu yɛ waŋndo le hei tosaa?

¹⁵ Te a wa pɛ numpila yɔŋgɔŋndo o Chɛhowa lo o piɛileŋ niŋ, a cho buŋgɛi chua o ndu lo maa, a cho hɛnaŋ ndɔɔ tosa tei a yoomu numndo mɛɛlulaŋ. (Ditɔnɔmii 6:​15) Le yɛɛ waŋndo tosa yɛ keŋ? Le nyunaa hoo mulioo, ŋ tuuwɔ ndi naa. Poo a chuaa cho kaalaŋ nuaŋnaŋndo le challe o nɔɔ niŋ. O hei niŋ, mɛɛ poo cha fau maa chuaa nɔ kaala kɛndɛlaŋ yɛ, lende koni kaala ndɔɔ le ndu chɔɔlu hindɔɔ ni. Hei cho tosa ni mi poo dimul chuaa aa, ‘I yeema num miŋ chal o nɔɔ niŋ.’ Tonya icho ni maa te o yɔŋ pɛ mi waŋndo chua lanɔɔ, o cho chɔɔlu kalaŋ cheleŋ siilɔŋ. Kɛ kaala o nɔ le wana koŋndo cho tosa ni mbo luei bolleŋ o kalaŋ koŋ bɛŋgu.

¹⁶ Te a sina pɛ Chɛhowa nduyɛ ma kaala ndu, keŋ cho num nyindɔɔ ni ma hiou lachi a ndu piɛiyo. Nduyɛ, a chɛl mi nyɛ o nyɛ kuuna num te. A mɛɛ Chiisu Kiliti dimi yɛ, maa te wana o wana yeema pɛ mbo tol ndu kɔɔli, o nɔ mbo wa le ndupila le. (Maki 8:​34) Vɛɛ naŋ looku yɛ miŋ tosa hei? Ŋ nɔ miŋ chɛl mi yeemaŋ naŋ wa nyɛ tase o Mɛlɛka piɛiyo niŋ te. Tuupa ma yiŋ, hɛnaŋ Chɛhowaa tosaa nɔ ni mbo wa nyɛ tasoo o yoomu numndo niŋ.—Nuawɔ Pitɛ Tasoo 4:​2.

17. Le yɛɛ waŋnda apum chalnuŋ yɛ a yɔŋguŋ o Mɛlɛka lo le?

¹⁷ Mi waŋnda apum chalnuŋ le yɔŋgɔŋndo o Chɛhowa lo. Le yɛɛ? Kanifuule ma yiyaŋ maa, kalaŋ bɛndoo pila o cho ni. Yiyaŋ ndaa ke nda ni maa te a yɔŋguŋ pɛ o Mɛlɛka lo ma simnuŋ Kilisiɔŋnda, nyɛ o nyɛ nda tosa pɛ, Mɛlɛka cho nda nyuna. Mi siooŋnde bii nda vɛlɛ maa, te a yɔŋguŋ pɛ o Chɛhowa lo, a cho paale pilɛ biondɔŋndo tosa, okoŋ, ma tɛɛmbuu ndu kɔl. Le saboo hoo nda chalnuŋ ni a yɔŋguŋ o Mɛlɛka lo le.

18. Yɛɛ nyindu yɛ num le ma yɔŋguŋ o Chɛhowa lo?

¹⁸ Te a pɛɛku pɛ le Chɛhowa kaalaa, koŋ cho num nyindɔɔ  ni ma yɔŋguŋ o ndulo, nduyɛ ma kindiŋ kpoke le loo lechoo. (Ikilisiaatii 5:​4) Te a yɔŋguŋ pɛ o Mɛlɛka lo, a yeema le ma “tosa nyɛ nɛŋi ndu kɔllo pɛŋgu o pɛŋgu.” (Kolosiaŋnda 1:​10) Te o yɔŋ pɛ maa a kaala Mɛlɛka a kɔl numndo kpou, a yiyaŋ pɛŋ maa icho bɔɔ suɛi kala le hɛnaŋ ndɔɔ tosaa le. O hei niŋ, a cho chɛlɔɔ a nyɛ kiilanɔɔ Chɔŋ dimi wo aa, “Mɛlɛka kaalaa cho hoo ni, nyɛ o dimul naa wo tosaa. Nduyɛ, nyɛ o dimul naa le tosaa wo, o cho nyɛ kendu maa mi ŋ bumba ndu tosa le.”—Chɔŋ Tasoo 5:​3.

19. Le yɛɛnɛ siooŋii bii num le yɔŋgɔŋndo o Chɛhowa lo le?

¹⁹ Le ma yɔŋguŋ o Mɛlɛka lo, o cho naa maa, mɛɛ ma wa wana walaŋ te. Chɛhowa sina maa wanaa lahakiaa naŋ cho ni. Le hei, fɛɛŋ fɛɛŋ bɛɛ o dimul naa le tosaa nyɛ naŋ bumba le tosaa wo le. (Sam 103:​14) O yeema num ma tosa nyɛ cho o kɛndɛ wo, nduyɛ o cho num mala le hei tosaa. (Nuawɔ Aisaya 41:​10.) Kɛsiŋ o kɔl  maa te a dɔu pɛ tiindaŋndo o Chɛhowa niŋ a kɔl numndo kpede, “o nɔla mbo tosa mi nyɛ o nyɛ wa o kɛndɛ a num.”—Pulɔwaa 3:​5, 6.

20. Le yɛɛ yɔŋgɔŋndo o Chɛhowa lo cho nyɛ lo o vioŋnɔŋ niŋ te?

²⁰ Yiyaŋndɔ a nyɛ naŋ laŋga wa yaasiaa wo okɔɔ. Hei cho num mala ni ma yɔŋguŋ o Chɛhowa lo o piɛileŋ niŋ. Num oo num  kaala pɛ Mɛlɛka kpeekpei, mɛɛ a nɔ ma chɔɔmuu ndu waŋnda o hɔl le ma sɔla pioŋɔɔ. (Luomaŋnda 10:​10) Vɛɛ ŋ chɔɔmuu yɛ waŋnda o hɔl maa a kaala Mɛlɛka?

21, 22. Vɛɛ ŋ chɔɔmuu yɛ laalaŋ numndo kpendekele?

²¹ Te a yeema pɛ yiŋɔɔ, dimul bɛndu kɔɔna sɔɔŋ le wanaa chua chilaŋ o kundaa niŋnda. O cho kɛɛsiaa le mi wanaa chua chilaŋnda apum chal a num, okoŋ, mi la yaasiaa nyunalaŋ lapum latulu la soo a sɔɔŋ taseŋ cho o Baabuiyo niŋ a Mɛlɛka okɔɔ woŋ. Te wanaa chua chilaŋnda che pɛ maa a suiliŋ le yiŋɔɔ, a cho num dimul le ma yiŋ o bɔŋaŋ cho hunɔɔ wo. * Teleŋ o teleŋ bɔŋaŋndo wa pɛ, ma yɔŋgu suɛi le wanaa cho yiŋɔɔ wa. O suɛi nda cho wa hei yɔŋgoo ve niŋ, a cho vɛlɛ miŋgi tɛɛsiaa nyɛ yiŋɔɔ simndo. Okoŋ kɔɔli, wana cho wa suɛi hei yɔŋgoo wo cho wanaa cho wa yiŋɔɔ wa dimul le ma muli nyunalaŋ latiɔɔŋ. Nyunala nda cho laŋ muli laŋ la cho nɛiyo opilɛ ni le chɔmndo maa, a chɔɔmuu laalaŋ ndaa waŋnda o hɔl kpendekele.

²² Yiŋɔɔ ŋ cho wo cho waŋnda chɔm kpendekele ni maa, a yɔŋguŋ o Mɛlɛka lo, nduyɛ maa num bɛɛ simnuŋ paale leŋ Seiyaa Chɛhowaa opilɛ. A wa pɛ waŋnda haa yiŋɔɔ, a cho nda mɛɛya o mɛŋndaŋ bɛŋgu. Hoo cho chɔm kpendekele ni maa, a yɔŋguŋ o Chɛhowa lo.

23. Yɛɛ yiŋɔɔ o ‘diola Finyaa niŋ, a Po ndɔɔ, vɛlɛ a nyina diandaa Mɛlɛkaa’ sim yɛ?

²³ Mi Chiisu dimul buɛiyaa nduaa maa a nɔ ma yiŋ o diola Finyaa niŋ, a Po ndɔɔ, vɛlɛ a nyina diandaa Mɛlɛkaa. (Maatiu 28:​19) Hoo cho naa chɔmndo maa, wana cho yiŋɔɔ wo nɔ mbo sina kpaaya Chɛhowa Mɛlɛka wo, vɛlɛ a Chiisu Kiliti. (Sam 83:​18; Maatiu 28:​18) O nɔ vɛlɛ mbo sina wali nyina diandaa Mɛlɛkaa tosa wo. Kpaaya Mɛlɛkaa cho yɛ nyina diandaa hoo ni.—Kaleesiaŋnda 5:​22, 23; Pitɛ Diiŋ Ndɔɔ 1:​21.

24, 25. (a) Yɛɛ yiŋɔɔ sim yɛ lewundu? (b) Nyuna kuɛɛ naŋ yeema yɛ muli ndɔɔ?

²⁴ Yiŋɔɔ cho maa pulɔŋ te. Nyɛ sɔwɛɔ pila o sim lewundu ni.  Mɛɛya nda cho num koŋ o mɛŋndaŋ bɛŋgu wo chɔm ni maa, a mɛi kaala wɔɔŋnda num oo nɔ paandu laŋ kpou o mɛŋndaŋ bɛŋgu. Kɛ fula ŋ cho o mɛŋndaŋ bɛŋgu pusaa wo chɔm ni maa, a fula a kaala sɛnɛilaŋ le hɛnaŋ Chɛhowaa tosaa. Loonuŋ maa, o Chɛhowa lo ŋ yɔŋguŋ ni. O cho o wali niŋ te ŋ yɔŋguŋ te, nduyɛ, o cho wanachiee le vem num hei tosa le. O cho vɛlɛ pɛŋ o wanachiee lo le ŋ yɔŋguŋ te, kɛlɛŋgaa niŋ te, o kɔɔnala chieeŋndo hoo niŋ. Yɔŋgɔŋ numndo vɛlɛ a yiŋɔɔ numndo chɔm ni maa, a kandu wɔ ko chaŋyɛi kpɛɛluŋnde kilaa sɛnɛi nya Chɛhowa tɛɛŋ.—Sam 25:​14.

²⁵ O cho yiŋɔɔ le ke wana yoomu fafɛɛŋndo le. Lelaŋ kiilanɔɔ Pɔɔl dimi ni aa, “La hiou lachi a fafalaa, le mi la siou pioŋɔɔ sɔla. La tosa hei o siooŋii Mɛlɛkɛi niŋ, a tuisiŋndo ndu o labɛŋgu niŋ.” (Filipiaŋnda 2:​12) Yiŋɔɔ cho kandɔŋndo ni le pioŋɔɔ sɔlaa. Kɛ nyunaa cho niko hoo ni, vɛɛ wana looku yɛ ma lo o kaala Mɛlɛkaa niŋ? Buŋgɛi mɛɛlɛi cho naa nyunaa hoo mulul.