TE O yɔŋ pɛ ma tuei diomndaŋ ndaŋ, yoomoo a nyinaa, yiyaŋ yɛɛ huŋ yɛ num o kɔl? Wanaa bɔɔbɔɔ laalaŋ maa nyɛ pum cho naa niŋ wana chi ndu le. Nduyɛ maa o yɔŋ bɛɛ miŋ vi, nyɛ koŋ ndu vi le. A laalaŋ vɛlɛ maa te ŋ vi pɛ, nyɛ koŋ mɛi dialuŋ vilɛiyoŋ o kɔ wanuŋ achal naa cheleŋ. Laalaŋndo hoo pɛŋgɛlaŋ niŋ hau ba o ba fee. Le hei, te waŋnda huŋ sina pɛ maa o cho lende le Baabuiyo ndu pɛɛku kposoŋ te, mi kɔndɔfillo bii nda tau. A mɛɛ Baabuiyo ndu pɛɛku yɛ, yɛɛnɛ cho yɛ niko yoomoo? Yɛɛnɛ cho yɛ vɛlɛ nyinaa?

Ŋ yaasiaawɔ fɛŋ a yoomoo okɔɔ. Ŋ nɔ miŋ sina maa o Hibuluiye vɛlɛ a Kilikiiye niŋ ndaa poonyiaa sindɛ Baabuiyo ni. Mɛɛ nda wa poonyiaa a yoomoo okɔɔ, ma soliŋ diom maHibuluiyo kpeku. Diomndo hoo cho nɛ̄fɛ̄sh ni. Ma soliŋ vɛlɛ diom maKilikiiyo kpeku. Ndu cho,  saki ni. Diomndaŋ ndaŋ la cho o Baabuiyo niŋ la hiou 800 nduyɛ, New World Translation hivi laŋ aa “yoomoo” o Baabuiyo niŋ ɔɔ tɛɛsiaa cho amatou wo. Te o yɔŋ pɛ ma tofa o Baabuiyo niŋ nyɛkɛndɛi a cho saalɔŋ maa, diomndo hoo “yoomoo” te koŋ te, “yoomulaŋ”, o sim le (1) Waŋchieeya, (2) Visiaa, (3) Yoomu waŋchieeya vɛlɛ a o visiaa nɔ wo. Ŋ tofawɔ fondaŋ ndaŋ lapum o Baabuiyo niŋ miŋ che mɛɛ Baabuiyo soliŋ yoomoo kpeku a tamaseliila yaalaŋ ndaŋ okɔɔ yɛ.

Waŋchieeya. ‘A boondii Nuuwa ve . . . waŋnda [yoomulaŋ] nyɛpɔmbɔ koni, wanaa ŋɔmaa kpe Mɛlɛka piŋi ni.’ (Pitɛ Tasoo 3:20) Ŋ che niko naŋ kpendekele maa, yoomulaŋ la sim le waŋchieeya. Nuuwa, laandɔ, puaa nduaa yaa wa, vɛlɛ a laandaa puaa nduaa. Teleŋ Chɛhowa wa Isɔluɛitiiya manɛiyo kioo wo, mbo dimul Muuse le mbo dimul waŋnda mɛɛ nda nɔ ma chɔuviaa ndu yɛ. Mbo dimul nda aa, la “chɔɔviaa ndu mɛɛ kpɛ . . . waŋndo nɔ waŋnda [yoomulaŋ] chiɛi niŋ yɛ.” (Ɛsɔdɔɔ 16:16) Mɛɛ hoo cho chɔmndo maa mɛɛ waŋndo nɔ waŋnda o yuŋgoo niŋ yɛ, o nɔ ni mbo chɔuviaa manɛiyo hoo. Tamaseliila cheleŋ lacho vɛlɛ tau o Baabuiyo niŋ la soo a “yoomoo” te koŋ te “yoomulaŋ” okɔɔ wo. Nduyɛ, la chɔm maa, yoomulaŋ la sim le waŋndo, te koŋ te, le waŋchieeya. A saaluŋ ndaŋ o Chɛnɛsee 46:18; Chɔɔsuaa 11:11; Walta Wanaa Chiisuaa 27:37; Luomaŋnda 13:1 o tɛɛsiaa amatou o New World Translation niŋ.

Visiaa. Baabuiyo dimul naa a nyɛm Mɛlɛka toosiaa woŋ okɔɔ. Mi Mɛlɛka dimi aa, “Nyaa yoomaa yɛ yiaa a wa niko, ma pɛ o peelaŋ. Youwa bɛɛ a wa ma balu choo choo o halaa niŋ.” Okoŋ kɔɔli, mi Mɛlɛka dimi aa, “Lɛŋndeŋ le tosa niko mi visiaa suula yɛ yiaa a fula lɛŋ a suulaŋ yɛ yɛ, visiaa chiee niŋnda ni, a visiaa yonduaa nɔ kɛkɛulaŋ nda.” Mi i yɔŋnuŋ lende. (Chɛnɛsee 1:20, 24) O buŋgɛi hei niŋ, suwa, visiaa chieeŋniŋnda, youwa, vɛlɛ a visiaa yonduaa kpou, Baabuiyo veelu nda aa yoomoo. Baabuiyo veelu youwa a visiaa cheleŋnda aa yoomoo o tɛɛsiaa amatou o New World Translation niŋ o Chɛnɛsee 9:10; Lɛvitikɔɔ 11:46; vɛlɛ a Nɔmbaa 31:28.

Yoomu waŋndo. Teleŋndaŋ lapum, diomndo hoo yoomoo, sim le wanachioo. Mi Chɛhowa dimul Muuse aa, “Wanaa nda aa yeema le num diyɔɔ wa [“yoomu numndo nuuviaa wa,” tɛɛsiaa amatou] kpou, a chuu paku.” (Ɛsɔdɔɔ 4:​19) Le yɛɛ yaamɔɔwaa Muuse wa va yɛ ndu nuuviaa? A wa Muuse nuuviaa le yoomu ndɔɔ diyɔɔ. Mɛɛ Luechɛl wa Bɛŋchamɛŋ violɔɔ, mi yoomoo chuu ndu niŋ kanifuule, mbo wu pɛ. [tɛɛsiaa amatou o New World Translation niŋ] (Chɛnɛsee 35:​16-19) O boondii keŋ niŋ, mi Luechɛl yoomu ndɔɔ chuu. Ŋ tofawɔ vɛlɛ diomnda Chiisu dimilaŋ. Mbo dimi aa, “Ya cho wana mandaa lasaa o dɔu kɔllo kpou o saa nduaa lo wo ni. Wana mandaa lasaa o dɔu kɔllo  kpou o saa nduaa lo wo, ndu cho o chɛlaa le wuoo le saa, hali kpeŋ a yɔŋnuŋ nyɛ le.” (Chɔŋ 10:​11) Chiisu soliŋ yoomu ndɔɔ sala le waŋchieeya baŋaa. O buŋgɛi Baabuiye hei niŋ, ɔɔ tɛɛsiaa cho amatou o Baabuiyo niŋndo, ŋ che vɛlɛ kpendekele maa “yoomoo”, o sim le wanachioo. A saaluŋ tamaseliilaŋ tau le diomndo hoo “yoomoo” o bolii Baabuiye hei niŋ ɔɔ o tɛɛsiaa amatou. Masaa Bɛnduaa Tasiaa 17:​17-23; Maatiu 10:​39; Chɔŋ 15:​13; Walta Wanaa Chiisuaa 20:​10, NW.

Mɛɛ ŋ hiau lachi a Baabuiyo pɛɛkoo fau, lende koni ŋ chɔɔlu sina a yoomoo okɔɔ ni. Baabuiyo dimi naa maa “yoomoo” vi le le, kɛlɛŋgaa niŋ te, mi “yoomoo kɔ wa achal naa cheleŋ “lefafɛɛŋ.” Baabuiyo dimi maa mi yoomoo vi. (Isikiaa 18:​4, 20) Lelaŋ Baabuiyo veelu “yoomu vi” wo ni aa wana vilɛiyo.—Lɛvitikɔɔ 21:​11.

Ŋ yaasiaawɔ miŋ che mɛɛ Baabuiyo soliŋ “nyinaa” kpeku yɛ. Waŋnda apum laalaŋ maa “nyinaa”, cho vɛlɛ diom cheleŋ ni le “yoomoo.” Kɛ o cho lende le icho le. Baabuiyo chɔm kpendekele maa “yoomoo” a “nyina” wanachioo, sim le sɔɔŋ sala tiɔɔŋ. Yɛɛ cho yɛ teŋgeŋndo diomndaŋ ndaŋ tɛɛŋ?

Mi wanaa poonyiaa Baabuiya soliŋ diom maHibulueiyo kpeku luak vɛlɛ a diom maKilikiiyo niuma le “nyinaa” teleŋ nda wa Baabuiyo poonyiaa wo. Baabuiyo chɔm naa nyɛ diomndaŋ ndaŋ la simndo. Le tamaseliiyo, mi Baabuiyo dimi aa, “Te a [Chɛhowa] soli dɔɔ hueiyii [luak] ŋ ke nda le waa yoomu ve pɛ, a viŋnuŋ bɛɛ, a miiŋgu o puulu nda fula niŋ ndo.” (Sam 104:​29) Mi Baabuiyo dimi vɛlɛ o yau Chemisi wo niŋ aa, “Te nyina [niuma] wanachioo o ve o dialuŋ waŋndo niŋ te, wana koŋ simnuŋ wana vilɛi.” (Chemisi 2:​26) Bolii Baabui ŋiinde hei cho naa chɔmndo maa “nyinaa” yɔŋgu dialloŋ yoomoo ni. Te nyina koŋ ve o dialloŋ niŋ te, mɛɛ wana vilɛiyo ŋ cho ni. Lelaŋ, diomndo hoo luak, mɛɛ nda hivi ndu o Baabuiyo niŋ yɛ, o sim ko suee le “nyinaa” le, kɛ o sim vɛlɛ le “yoomuaŋ” te koŋ te, nyɛ yɔŋgu yoomoo yoomuaŋndo. Le tamaseliiyo, teleŋ mɛŋma bɛndaŋ ma hiŋ o palɛi Nuuwaa ve niŋ nde, mi Mɛlɛka dimi aa, “I cho tosa mi mɛŋndaŋ ma chua chieeŋndo kpou, mi ma diu nyɛ o nyɛ yoomaa [luak].” (Chɛnɛsee 6:​17; 7:​15, 22) “Nyinaa” tosa ni mi wanachioo vɛlɛ a nyaa yoomaa cheleŋ Mɛlɛka toosiaa wa va yoomu. Ŋ nɔla miŋ che ndu le.

Yoomoo a nyinaa o cho nyɛ pilɛ le nda cho le. Mɛɛ ŋ wou naa poutaŋ o alaadioo niŋ le mbo soo yɛ, lende koni dialloŋ bɛɛ yeema nyinaa ni le miŋ wa yoomu. Ŋ tuuwɔ tamaseliiyo a alaadi pɔmbɔɔ. Te a wou pɛ poutaŋ o alaadi pɔmbɔɔ niŋ, kpaaya cho o poutalaŋ niŋndo cho alaadi koŋ yoomuaŋ ke. Okoŋ, te a chuku niŋ dɔɔ bɔɔtii tosa mbo soo  ve pɛ, alaadioo cho isɔɔ. Mɛɛ o dimi niŋ, te kpaaya cho o poutaŋ niŋndo chuu dɔɔ pɛ, alaadioo bɛɛ vi. Te a soli pɛ poutaŋ o alaadioo niŋ, alaadioo suu lɛ le. Mɛɛ lende koni icho a nyina wanachioo ni. Nyina cho naa niŋndo tosa ni mi dialuŋ naŋ wa yoomu. Mɛɛ pouta ŋ wou o alaadioo niŋndaŋ lacho yɛ koni. La sinaŋ te, nduyɛ, la nɔ vɛlɛ yiyaŋ te. Lende koni nyinaa bɛɛ cho ni. Nyina cho naa niŋndo bɛɛ sinaŋ te, nduyɛ, o nɔ vɛlɛ yiyaŋ te. Nyinaa cho nyɛ yoomaa le. A mɛɛ wana ŋchondoo dimi yɛ, te o ve hueiye hei le ɔɔ nyɛ yɔŋgu dialloŋ yoomuaŋndo le, dialuŋ naŋ ‘ŋ viŋnuŋ bɛɛ, ŋ miiŋgu o puulu ŋ fula niŋ ndo.’

Mi Ikilisiaatii 12:​7 dimi a piɔm wanachioo okɔɔ aa, ‘Te waŋndo vi dɔɔ pɛ, dialloŋ ŋ miiŋgu o puuloo niŋ naa ŋ fula wa, o koŋ kɔɔli, mi nyinaa ndu miiŋgu o Mɛlɛka lo wana ke ndu nyina koŋ ndo.’ Te o yɔŋ pɛ mi nyinaa, te koŋ te, nyɛ yɔŋgu dialloŋ yoomuaŋndo fulaŋ o dialloŋ niŋ, dialloŋ cho wu, okoŋ, ŋ miiŋgu pila o puuloo niŋ naa ŋ chɛŋ nda. Mɛɛ dialloŋ miiŋgu o puulu yɛ, lende koni nyinaa bɛɛ miiŋguŋ o Mɛlɛka lo ni naa o chɛŋ nda. (Choobu 34:​14, 15; Sam 36:​9) Kɛsiŋ o kɔl maa, o cho choo choo le nyinaa kua le. Kɛ hoo chɔm ni maa, te waŋndo vi pɛ, tiindaŋ fulasɛiniŋ ndɔɔ o chilaŋ niŋ cho Chɛhowa Mɛlɛka o ba. O dimi niŋ, yoomu ndɔɔ cho Mɛlɛka o ba. Mɛlɛka kinɛi tosa ni mi wana vi koŋndo miiŋgu vɛlɛ yoomu.

O cho bɔɔ suɛi kɔl dɛɛniaa le sinaa maa keŋ kpeekpei Mɛlɛka cho hunɔɔ tosa ni. Wanaa vi ma wa pɛŋgioo o sɛila loonaŋndaŋ niŋnda, o cho nda hunɔɔ miŋgi yoomu. (Chɔŋ 5:​28, 29) A teleŋ fulasɛiniŋndo, Chɛhowa cho hunɔɔ wanaa cho pɛŋgioo o sɛila loonaŋndaŋ niŋnda kpou, miŋgi dialloŋ toosiaa nyɛkɛndɛi. Okoŋ, mbo wou nda nyinaa, te koŋ te, nyɛ yɔŋgu dialloŋ yoomuaŋndo niŋ. Paale fulasɛiniŋndeŋ le wa niŋ bɔɔ paale kɔl kɛndɛ.

Te a yeema pɛ chɔɔloo sina mɛɛ Baabuiyo soliŋ “yoomoo” vɛlɛ a “nyinaa” kpeku yɛ, tofa yaulaŋ ndaŋ, What Happens to Us When We Die? vɛlɛ a Reasoning From the Scriptures pei 375 tei 384. (Que devient-on quand on meurt ? vɛlɛ a Comment raisonner à partir des Écritures pei 27 tei 32 a pei 135 tei 140). Seiyaa Chɛhowaa soli laŋ ni.