Yauwo hoo cho ndi tosa tɛtɛlɛ le ma saaluŋ bolii Baabuiye, vɛlɛ a konalaŋ o Baabuiyo niŋ le simultaŋ biuwɔŋndo, le acheleŋnda kɔllo dɛɛniaa, vɛlɛ a nda malaa ma tosa kɛɛsiaala nɛŋi Chɛhowa kɔllo laŋ. Nuuviaa suɛi lebolii ŋ yeema ve, okoŋ ma soliŋ bolii Baabuiye a konala Baabui nda tɛɛsiaa nyɛmbɔɔ laŋ kpeku. (Tofa kɔfoo hoo “ Mɛɛ Ŋ Soliŋ Yauwo Hoo Kpeku Yɛ.”) A cho silala sɔvɛlaŋ, nɛila chɔmaalaŋ, vɛlɛ a kɔl dɛɛniaa ŋ yeema wo sɔla o Diom Mɛlɛkaa niŋ. A cho wa a kɔl kɛndɛ le bolii Baabuiye ipum soliŋndo kpeku le acheleŋnda malaa, ma ke nda sila kɛndɔɔ, nduyɛ ma dɛɛniaa nda kɔltaŋ le ma biunuŋ bahawɛilaŋ o yoomoo niŋ.

O cho bolii Baabui ŋ yeema ve kpou le cho wa o suɛi lebolle bɛŋgu le. Kɛ yauwo hoo toosiaŋ le num malaa ma che ndi tɛtɛlɛ le yaasiaa tosaa. (Pulɔ 2:​1-6) Le yaasiaa yiŋgoloŋndo tosaa, wa sɔɔŋ nda tɛɛsiaa o Baabuiyo-Hivioo le Chieeŋ Sɛnɛiyo niŋndoŋ mɛɛdaŋndo, vɛlɛ a bolii Baabui cheleŋ chiɛɛliaŋ a suɛi lebolle ve. Soliŋ Yau Yaasiaa ŋSɔɔ le Seiyaa Chɛhowaa kpeku ɔɔ Watch Tower Publications Index le sinaa nyɛ bolii Baabuiye simndo, vɛlɛ a mɛɛ ŋ duau ndi o wali niŋ yɛ. Kindiŋ ma tosa yaasiaa o yaula nda laŋga soli laŋ niŋ le halikpeŋ ma sina mɛɛ nda tɛɛsiaa bolii Baabuiye ipum suŋ suŋ yɛ. Keŋ cho num mala ma sɔla sinapɛŋgu sɛnɛiyo a tonyala nda miŋgi kpɛlɛkiaa laŋ okɔɔ.

Maa yauwo hoo, Bolii Baabuiye le Yoomu leKilisiɔŋndo mala num le ma sɔla kɔl kalu kpeekpeiyo, sinapɛŋgoo, vɛlɛ a taasi cho o Diom Mɛlɛkaa niŋndo. Te a wa pɛ yauwo hoo soliŋndo kpeku, a cho chɔ kɛsɛ maa “Diom Mɛlɛkaa cho yoomu, nduyɛ kpaayaa pila o nɔ ni.”—Hibu 4:12.