O teleŋ Ɛsilua wo niŋ, Isɔluɛinɔ pilɛ wa diolaŋ aa Nɛhimaya. Buɛi Masaa Atasasɛɛ wo o wa ni. Nduyɛ o chiee bɛndu Paasiaŋnda niŋ Susa o wa ichali ni. Paale pilɛ, mi Nɛhimaya wanayɛi nduɛi fula Chuda, mbo chuu ndu yooŋgu wɔɔŋndo. Mbo dimul ndu aa: ‘Wanaa miiŋgu Chulusalɛm nda cho o kpundɔɔ niŋ. Kpaki chioo a diola ndɔla Babiloniaŋnda tɛɛmbuu laŋ, a miŋgi wɔ laŋ taŋgul te.’ Mi Nɛhimaya tambu kɔl tau. Ndoo yeema mbo miiŋgu Chulusalɛm le mbo kɔ mala nda. Le hei, mbo piɛi le mi masaa chɛl ndu mbo kuɛ.

Okoŋ kɔɔli, mi masaa cha maa Nɛhimaya cho a kɔl tambɛiyo. Mbo nyuna ndu aa: ‘Lepilɛ bɛɛ I chi wɔ num nuaa le. Yɛɛ yɔŋnuŋ yɛ num?’ Mi Nɛhimaya dimul ndu aa: ‘I cho a kɔl tambɛiyo, kanifuule chiee naa bɛndoo Chulusalɛm cho o tambɛiyo.’ Mi masaa nyuna ndu aa: ‘Yɛɛnɛ ŋ yeema yɛ mi tosal num?’ O lepilɛ niŋ kpe, mi Nɛhimaya piɛi o kɔl niŋ. Mbo mulul ndu aa: ‘Yandii, chɛl la mi kuɛ Chulusalɛm mi kɔ miŋgi kpaki chioo taŋgul.’ Mi Masaa Atasasɛɛ dimul ndu maa o kɔ. Nduyɛ mi masaa tosa a sabu le mbo fuuluu kɛndiaa o tiŋ vilɛi koŋ niŋ nyɛ o nyɛ yɔŋnuŋ ndu le. Mbo siiŋguu Nɛhimaya masa ibuŋgaa le Chuda, nduyɛ mbo ke ndu yɔmnde le kɔlaŋ diola kpaki chioo taŋgullo.

Mɛɛ Nɛhimaya fuuluu Chulusalɛm, mbo mɛɛndiaŋ kpaki chioo. Okoŋ, mbo chuuŋgiaa wanaa soliaa lasalaa a masaa waa naapilɛ, mbo dimul nda aa: ‘Hei niŋ kposoŋ te. Ŋ nɔ miŋ tosa wallo.’ Mi waŋnda kpou chɛl, okoŋ ma kandu kpaki chioo taŋgullo.

Kɛ mi yaamɔɔwaa Isɔluɛiya apum wa nda mamɔɔ, ma dimi aa: ‘Kpaki nya cho hoo taŋgullo wo, siifaa bɛɛ kundu ndu pɛ, kombaa o komba ni.’ Wanaa wa wallo tosaa wa hendu kɔllo o sɔɔŋ wɔɔŋ nda wa nda dimullo woŋ choo le, kɛ ma hiau lachi a taŋgullo. Ma heelu kpaki chioo filioŋ, nduyɛ o wa o kala poŋ.

Mi yaamɔɔwaa ndaa wa o fondaŋnda yɛ yɛlaŋ nda kɛɛsiaa le ma huŋ del Chulusalɛm choo a sɔŋgɔɔ. Mɛɛ Chuuwa tuei kɛɛsiaa ndaa hoo, mi siooŋnde bii nda. Kɛ mi Nɛhimaya dimul nda aa: ‘La yɔŋ isiooŋ te. Chɛhowa cho latulu a naa.’ Mbo kɛsi waŋnda le ma wa wanaa cho wallo wa mandaa, yɔŋii yaamɔɔwaa ndaa huŋ del nda choo a sɔŋgɔɔ.

 O Palɛi 52 bɛŋgu, ma chii kpaki chioo a diola ndɔlaŋ kpou toosiaa. Mi Nɛhimaya chuuŋgiaa Livaiya kpou Chulusalɛm le ndu malɔɔ Chɛhowa o ba. Mbo piɔu waŋnda tɛɛŋ kundalaŋ la tiɔɔŋ le chondoŋ solioo. Mi kundaa pilɛ kua o dio kpaki mamɛŋndo, nduyɛ mi o pilɔɔ kua kumbuei pilɛi le chioo balɔɔ. A wa bululaŋ hɔŋndo, nyɛm chaaŋ yɛ yiɔɔŋ lɔɔ, a chondoŋ solioo o Chɛhowa lo. Mi Ɛsilua kua kundaa opilɛ kɔɔli, nduyɛ mi Nɛhimaya bɛɛ kua kundaa opilɔɔ kɔɔli. A lo balɔɔ lende haaa ma fuuluu o chiɛi Mɛlɛkaa. Mi waŋnda kpou, wana pɔnɔ ni, wana lanɔ ni, chuaambɔ ni, soli salalaŋ o Chɛhowa lo, nduyɛ ma duaunuŋ nyaale. Wanaa wa kɔɔli kɔɔli wa kpou wa nda diomndaŋ tueiyɔɔ a kɔl kɛndɛ nda wa wo.