Sɛkalaya nda Elisabɛɛ velu Chɔŋ ni. Nduyɛ mɛɛ Chɔŋ sul kaasoŋnɔ, mbo simnuŋ wana suaa le Mɛlɛka wo. Mi Chɛhowa soliŋ Chɔŋ kpeku le waŋnda pɛɛkoo a hunɔɔ Mɛsayanɔɔ okɔɔ. Chɔŋ ve waŋnda pɛɛku o chiɛila Chuuwa piɛi Mɛlɛka laŋ niŋ ɔɔ o chiooŋ niŋ te. Kɛ o yondo pollo niŋ o wa waŋnda yooŋgu Mɛlɛkaa dimullo ni. Waŋnda wa fulaa Chulusalɛm a Chudiaa le ma huŋ yaŋ Chɔŋ nilaŋ. Mbo pɛɛku nda maa le ma nɛŋi Mɛlɛka kɔl, a nɔ ma pɛŋgi sɔɔŋ wɔɔŋndoŋ tosaa. Mɛɛ nda tuei nyɛ Chɔŋ dimi wo, mi wanaa bɔɔbɔɔ mulul yɔŋnda ndala wɔɔŋndaŋ kɔɔ, okoŋ mi Chɔŋ yiŋ nda o Pioo Chɔɔdaŋ.

Mi Chɔŋ tosa yoomu ndɔɔ tɛtɛlɛ. Nyɛla ndoo wounuŋ ndaŋ, a yiiŋii nyɔɔmiaa ndaa toosiaa laŋ ni. Nduyɛ, soonuaa a liaaŋ ndoo dia ni. Waŋnda ndaa yeema bɔɔ sinaa a wana suu Chɔŋ wa wo okɔɔ. Mi Falisiiya a Sadusiiyaa yoŋgaa bɛɛ ndaa hiŋ le Chɔŋ chɔɔ. Mi Chɔŋ dimul nda aa: ‘La nɔ mi la siŋga kaala nyalaŋ, nduyɛ mi la mulul yɔŋnda nyala wɔɔŋndaŋ kɔɔ. La yiyaŋ nuaa maa la cho teŋgeŋ le mɛɛ nya dimi maa chuauwaa Ebilaham nda le nya cho yɛ le. Keŋ chɔm nuaa maa chuauwaa Mɛlɛkaa le nya cho le.’

Mi wanaa bɔɔbɔɔ ndaa hiŋ naa Chɔŋ chua ma nyuna ndu aa: ‘Yɛɛnɛ naŋ nɔ yɛ miŋ tosa le miŋ nɛŋi Mɛlɛka kɔl?’ Mi Chɔŋ ndoo dimul Chuuwa aa: ‘Te a nɔ pɛ domalaŋ la tiɔɔŋ, ke chaaŋ num hau ba le ndu wo opilɛ.’ A sina pa le sabu Chɔŋ ndoo dimul nda lende wo? Ndoo yeema mi buɛiyaa nduaa ndaa sina maa le ma nɛŋi Mɛlɛka kɔl, mɛɛ ma kaala waŋnda chieeya.

Mi Chɔŋ dimul wanaa biyaa paawaa aa: ‘La wa sakpo, nduyɛ la tosal wana o wana lakafa le.’ Mbo dimul puaa chɔuwa aa: ‘La luɛi luɛiyɔɔ niŋndo ɔɔ mi la dimi choolaŋ te.’

 Mi wanaa soliaa lasalaa a Livaiya bɛɛ huŋ naa Chɔŋ chua, ma nyuna ndu aa: ‘Wana suu maavɛɛ ŋ cho yɛ?’ Wana o wana ndoo yeema sinaa a ndu okɔɔ. Mi Chɔŋ dimi aa: ‘Ya cho diom wana cho yondaa o pollo niŋndo ni, le waŋnda malaa ma sina a Chɛhowa okɔɔ, a mɛɛ Aisaya dimi yɛ.’

Mi waŋnda hɛnaŋ a nyɛ Chɔŋ wa nda pɛɛkoo wo tau. Wanaa bɔɔbɔɔ wa yiyaŋndo maa Chɔŋ wa Mɛsayanɔɔ ni. Kɛ mi Chɔŋ dimul nda aa: ‘Wana cho ya hunɔɔ kɔɔli wo hiou ya poloŋ. Nduyɛ, I suliŋ bɛɛ pɛŋ le yuei nduɛi lakɔwɛiye timbioo le. Ya o mɛŋndaŋ niŋ ya cho nya yiŋɔɔ ni, kɛ ndu a nyina diandaa o cho nya yiŋɔɔ ni.’