Elisabɛɛ ndoo nɔ wanayɛi nduɛi pum diolaŋ aa Meele. Feleŋgɔnɔɔ o wa ni, nduyɛ Naasaluɛi chiee o wa ichali ni o Kalili niŋ. Meele nda Choosɛ wa nuaŋnaŋndo le challe o nɔɔ niŋ, nduyɛ kaapindɛinɔɔ Choosɛ wa ni. Elisabɛɛ wa niŋ a folioo le paŋgoŋ ŋɔmpum, mi Keebilɛɛ fula Meele o hɔl. Mbo yil ndu aa: ‘Isɛ Meele. Chɛhowa che num wana sɔvɛ bɛndu.’ Kɛ Meele sina nyɛ Keebilɛɛ ndoo yiyaŋndo le. Okoŋ, mi Keebilɛɛ dimul ndu aa: ‘A cho folioo chua ma velu poo, nduyɛ ma ke ndu diolaŋ aa Chiisu. Masaa o cho wa ni, nduyɛ Masale ndɔleŋ le cho wa le fɛɛŋ a fɛɛŋ.’

Mi Meele dimi aa: ‘Kɛ yufuaanɔɔ ya cho ni. Vɛɛ ya cho yɛ looku poo violɔɔ?’ Mi Keebilɛɛ dimul ndu aa: ‘Nyɛ o nyɛ cho mi Chɛhowa bumba ndu tosa le. Nyina diandaa cho num tolɔɔ choo, okoŋ ma velu poo. Wanayɛi numnde Elisabɛɛ bɛɛ cho niŋ a folioo.’ Mi Meele dimi aa: ‘Buɛi Chɛhowa wo ya cho ni. Maa i yɔŋnuŋ a ya a mɛɛ ŋ dimi yɛ fɔ.’

 Mi Meele kua Elisabɛɛ yilɔɔ o ndu lo chiee. Nduyɛ o pemboŋ tɛɛŋ chioo hoo wa ni. Mɛɛ Meele yil Elisabɛɛ, mi chɛlɛkpɛ wa ndu o dembe wo kpeeŋiaŋ. Mi nyina diandaa tual Elisabɛɛ choo, okoŋ mbo dimi aa: ‘Chɛhowa dɔu num bɔɔ sala Meele. Dikeŋnaŋ bɛndoo pila ya sɔla hoo ni le mi kalaa Masanɔ nuu hiŋ o ya lo chiɛiniŋ.’ Mi Meele dimi aa: ‘I saŋgala Chɛhowa a kɔl nuu kpou.’ Mɛɛ Meele chii paŋgoŋ ŋgaa nda Elisabɛɛ latulu, mbo miiŋguŋ o ndu lo chiee Naasaluɛi.

Mɛɛ Choosɛ sina maa Meele cho a folioo, mbo yeema le ndu kiɔɔ. Kɛ mi maalikɛinɔɔ fula ndu o hɔl o lɔma sɔlaŋ niŋ, mbo dimul ndu aa: ‘Yɔŋ isiooŋ le Meele chuaa o nɔɔ niŋ te. O tosa isɔɔ o isɔɔ wɔɔŋ te.’ Le hei, mi Choosɛ chua Meele o nɔɔ niŋ, nduyɛ mbo kua a ndu o ndu lo chiee.