O Isɔluɛi niŋ ba paaleŋ le chaŋndo, wanaa wa ichali loŋ nda apum ndaa laalaŋ maa mi looŋ chɔm nda nɛiyo. Ichɔl pilɛ, mi puaa apum fulaa Ba Paaleŋ le Chaŋndo cha luei diandɛi kɔlaŋ o choo choo niŋ, nduyɛ ma tual ndi kɔɔli. A lo ndi tolɔɔ kɔɔli haaa ma fuuluu Chulusalɛm. Mɛɛ nda fuuluu Chulusalɛm, ma kandu waŋnda nyunaa aa: ‘Kuɛɛnɛ chɛlɛkpɛ cho wa masa Chuuwa wo cho yɛ? Ŋ hiŋ le miŋ beŋ ndu wulaŋ.’

Mɛɛ Hɛlɔɔ, o wa masaa Chulusalɛm ndo tuei a masa sɛnɛiyo hoo okɔɔ, mbo luɛi o buulaŋndo niŋ. Okoŋ, mbo nyuna masaa wanaa soliaa lasalaa aa: ‘Kuɛɛnɛ masaa hoo nɔ yɛ le violɔŋndo?’ Ma mulul ndu aa: ‘Wanaa suaa le Mɛlɛka wa dimi maa o cho violɔŋ o chioo Bɛtilɛhɛm niŋ.’ Le hei, mi Hɛlɔɔ veelu puaa fula kaŋ Ba Paaleŋ le Chaŋndo wa, mbo dimul nda aa: ‘La kɔ Bɛtilɛhɛm mi la kɔ nuuviaa chɛlɛkpɛ koŋ. Nduyɛ te la saaluŋ ndu pɛ, la miiŋgu naŋ mi la huŋ dounuŋ ya kona. Kanifuule, ya bɛɛ I yeema mi kɔ beŋ ndu wulaŋ.’ Kɛ choolaŋ Hɛlɔɔ wa dimioo ni.

Mi “luei” hei kandu vɛlɛ kɔlaŋ. Okoŋ, mi puaa haa lo ndi kɔlaŋ kɔɔli haaa ma fuuluu Bɛtilɛhɛm. Mi luei kɔ sim o chiɛiyo opum choo, nduyɛ mi puaa luɛi chiɛiniŋ. Mɛɛ nda luɛi, ma saaluŋ Chiisu nda Meele kala ndɔ. Ma beŋ chɛlɛkpɔɔ hoo wulaŋ, ma ke ndu kooliiyoŋ, nyɛm chuŋ kɛndɔŋ vɛlɛ a nyɛ cheleŋ ma veelu ndu aa mɔɔ. Baa Chɛhowa kpeekpei ndoo vem puaa haa ni le Chiisu nuuviaa? Pɛ pɛ bɛɛ.

Ichɔl koŋ, mi Chɛhowa dimul Choosɛ o lɔma sɔlaŋ niŋ aa: ‘Hɛlɔɔ yeema mbo dii Chiisu. Lelaŋ, chua laa num a poombɔɔ mi la nyaanuŋ Ichipi. La lo loŋ haaa mɛɛ mi I dimul nya le mi la miiŋgu.’ O lepilɛ niŋ kpe, mi Choosɛ chua yuŋgu ndɔɔ ma kuaŋnuŋ Ichipi.

Chɛhowa ndoo chii niŋ puaa fula kaŋ Ba Paaleŋ le Chaŋndo wa dimul maa a miiŋgu o Hɛlɔɔ lo le. Mɛɛ Hɛlɔɔ sina maa a ve lɛ miiŋgu o ndu lo le, mbo tuulu kɔl tau. Le mɛɛ ndoo nɔla lɛ mbo saaluŋ Chiisu le yɛ, mbo duau sawaa maa a diu diu puaambuaa pɔmbuaa kpou o Bɛtilɛhɛm niŋ. Kɛ Chiisu waŋnuŋ pɔɔli o lɛŋnde Ichipileŋ niŋ, nduyɛ o waŋnuŋ kɛndiaa.

 Mɛɛ teleŋ tiŋ hiou, mi Hɛlɔɔ wu. Okoŋ, mi Chɛhowa dimul Choosɛ aa: ‘Teleŋndo cho niko hoo ni le ma miiŋgu o numndo.’ Mi Choosɛ, Meele a Chiisu miiŋgu Isɔluɛi, nduyɛ ma kɔ chal o nda lo chiee Naasaluɛi.