Mɛɛ Chiisu dimi yooŋgu kɛndɔɔ le wɔsioo opilɛ a tɛndaa tɛɛŋ, ndoo nɔ mbo tosa kɛɛsiaa sɔvɛ sɔviɔɔ. Nɛɛ yaa o wa yɛ hɛli le ma tosa wallo latulu? Nɛɛ yaa o wa yɛ pɛɛku le ma chua chilaŋ o kunda leKilisiɔŋndo niŋ? Chiisu ndoo yeema nɛi chɔmaa Chɛhowaa le kɛɛsiaalaŋ ndaŋ tosaa. Lelaŋ, mbo kua o pembei choo ndupilɛ kpeele, mbo kɔ lɔl piɛileŋ pii. Mɛɛ paaleŋ le sɛ, mbo veelu buɛiyaa nduaa apum naapilɛ, okoŋ mbo hɛli kiilaa 12. O nda tɛɛŋ, diola nɛɛnɛ ŋ loonuŋ yɛ? Diola ndalaŋ aa Pitɛ, Andulu, Chemisi, Chɔŋ, Filipi, Batɔlɔmiu, Tɔmɔsi, Maatiu, Chemisi po Afiɔɔsi wo, Tadiɔɔsi, Saimɔŋ, a Chuda Isikaliɔɔ.

A kiilaa 12 haa Chiisu ndoo balu ni. Mɛɛ o chii nda pɛɛku, mbo viam nda yooŋgu kɛndɔɔ dimioo a ba nda. Mi Chɛhowa ke nda kpaayaa le nyinaa wɔɔŋnda touwɔɔ, vɛlɛ a wanaa wa a naalaŋ nda siŋgioo.

Chiisu ndoo tiindaŋ kiilaa 12 haa, nduyɛ mbo veelu nda a chaaŋaa nduaa. Falisiiya ndaa yiyaŋ maa kiilaa haa ve wanaa sinaa dɛnɛ le, nduyɛ maa wanaa yɔŋaa koni nda wa ni. Kɛ mi Chiisu pɛɛku  nda le wali o ke nda wo tosaa. Ndaa nɔ ma wa latulu a Chiisu tuupa mi ndaa dii ndu, nduyɛ a te ndoo miiŋgu pɛ yoomu. Teleŋnda sɔvɛ sɔvɛlaŋ pila la wa laŋ ni le Chiisu. Kalili Chiisu ndoo fula ni, nduyɛ kiilaa 12 haa bɛɛ, Kalili ndaa fula ni. Apum ndaa nɔ laanduaa.

Wanaa lahakiaa kiilaa haa wa ni, nduyɛ mi ndaa tosa biondɔŋndaŋ. Lepum, mi ndaa soo a yiyaŋ fɛŋ te, nduyɛ mi ndaa tosa kɛɛsiaala wɔɔŋndaŋ. Lepum, ndaa chɔm kaa biuwaŋ te. A teleŋ pum, ma hiŋaŋ pɛŋ diomndaŋ le wana hiou wa wana sɔvɛ nda tɛɛŋndo. Kɛ wanaa ndaa kaala Chɛhowa wa nda wa ni. Nduyɛ o faŋaŋ Chiisu wo kɔɔli, nda wa wanaa ndaa bii kunda leKilisiɔŋndo wa ni.